2 Samuel 21 - Nobonob Baibel

Gibeon danab ag Saul, ahilagnu eheɗ heum, ag eheɗ hak amu elele mettaglagnu heppig

¹ Amu Dawit king dayeye, haen amuppa Israel wanppa gu ii neene, maɗ ewam anam daye, danab ah ag eenu tutu maknab daappig. Ag anam daappig amunu, Dawit nug Yawe amunu oɗ metta unuqittom. Dawit unuqitte, Yawe Nug nug amegppa aum. “Saul nug baekkudppan ele ag eheɗ hena, ag Gibeon danab ii aqadlob am aqaeg mauheg, ag tiilag, Saul nug baekkudppan ele eppelagppa daatte amunu, uug imu wan imuppa beum,” awa aum.

² Gibeon danab ag am Israel danab iitta. Ag Amo danab, Israel ag ii aqadmananu nai ɠagattag qena appig, amu Saul nug Israel, Juda ele dilagnu, agib daaglagnu yag-nab-bak doya, nug Gibeon danab ah aqom. Aqom, amge ohnab ii aqom. Amu daye, Yawe Nug Dawit amegppa amunu a, King Dawit Gibeon danab laa ag uɗippeg, nai mattiglagnu onilagppa eum.

³ Dawit nug ag onilagppa e uɗieg, nug ag oɗ mattom. “Da ahilagnu aɗi hekkul? Ag ig Israel, ag ig ena itigkkulagnu amu, da aɗi kobol heppi, ag amuppa, ‘Nug kobol heum, kobol amu nug he, ihinig uug babaittak daatte,’ akkulag?” awa aum.

⁴ Dawit nug ag amelagppa anam a, Gibeon danab ag appig. “Ig apput, Saul buɗub ag men doɗo, silwa, gol, keeke mekkaglagnu am elele iitta. Laa amu, ig apput, Israel oolagppa danab laa mauhkkunu ele am ib iitta,” aon appig. Ag anam aeg, Dawit nug eɗua oɗ mattom. “Ag ahilagnu da aɗi hekkulnu oolag daatte,” awa oɗ mattom.

⁵ King Dawit nug anam oɗ matte, ag nob mena appig. “Saul nug ig Gibeon danab ah ohnab mauhkkunig, ig laippu laa Israel wanppa ii daamanu dabmak awowa aha, eheɗ iqom

⁶ amunu, na Saul buɗubnu danab eblaih aɗit megappe, ig Gibea appa aqapput mauhppeg, ig ag gaɗalag Yawe noobppa uupput, ag anam boumattak iitta daaglag. Gibea am Saul appag diig, amu Yawe Nug Saul king daakkunu tituanom,” aon appig. Ag anam aeg amu, Dawit nug aum. “Da heppi, danab eblaih aɗit ele amu ag ag eppelagppa daaglag,” awa aum.

⁷ Dawit anam aum, amge nug anukka Saul bekka Jonatan amegppa nuhig nai Yawe noobppa ɠagattag qetta, layam hanhan daaglahnu aum amunu, nug Jonatan bekka Mepiboset Gibeon danab eppelagppa ii meum.

⁸ Dawit nug Jonatan bekka Mepiboset Gibeon danab eppelagppa ii meum, amge nug Rispa bekoɗ aɗit, amu Merap bekkod tanig ele diia, ag eppelagppa meum. Saul wau amge waunab iitta Rispa nug Aia aɗeg. Nug bekoɗ onilah am Aramoni, Mepiboset ele. Merap nug Saul aɗeg. Nug gamu Adriel. Adriel nug Mehola danab onig Barsilai bekka.

⁹ Dawit nug danab eblaih aɗit amu Gibeon danab eppelagppa me, ag qauko nakok igippa aqaeg mauheg, gaɗalag aguppa boumak iitta, anam Yawe noobppa dayom. Eblaih aɗit amu oh am haen laippu aakku mauhppig. Ee aeg digma awak haenppa, Israel danab ag bali aeg digmen aoegeg, Gibeon danab ag danab eblaih aɗit amu oh haen laippu aqaeg mauhppig.

¹⁰ Ag aqaeg mauheg, boumak iitta daaegeg, Aia aɗeg Rispa nug lamen heɗiag ele awa, nug aguppa daakkunu men attan duqa dayom. Gibeon danab ag ee aeg digma awaknu haenppa danab eblaih aɗit amu aqaeg mauhppig, Rispa nug haen amuppa digma, gumaama daye ukke, gu huana na, gaɗalag qeum batak nug anamib guma dayom. Nug anam dayaya, amun ai nena, gaɗalag aɗamnanu, tuqan doɗ dakkuɗ ag uɗin aɗamnanu ele nug guma dayom.

¹¹ Saul wau amge waunab iitta Rispa, nug Aia aɗeg amu, nug anam heehe, danab laa nug Dawit amegppa amunu a,

¹² Dawit doya amu, nug Jabes Gileat ukka, Saul ebehi, Jonatan ebehi ele danab appanu eppelagppanu awom. Pilistia danab ag Saul, Jonatan ele Gilboa appa aqateg mauheh, ag gaɗalti aon gona, aab onig Betsan, appa haɗap-ppa, aihateg daaeheh, Jabes Gileat danab ag lokkumna gona, gaɗalti aon uɗin, Jabes Gileat appa boumatppig.

¹³ Dawit nug Saul, bekka Jonatan ele ebehilah appanu awa uɗia, nug aa ebehilah, danab eblaih aɗit Gibeon danab aqaeg mauheg, boumak iitta niippig ele amu, nug ag ebehilag ele awa he,

¹⁴ danab ag Saul, nug bekka Jonatan ele ebehilah, ⌊laa ebehilag ele⌋ Saul mameg Kisnu boumak abenppa boumadppig. Boumak aben amuam Benyamin wanppa, Sela appa dayom. Danab ag amu heppig ele amu, ag King Dawit amelagppa haknunab aum bianab, ag anamib heppig. Amu dimppa amu, Israel ag ahilag wannu unuqitteg, Kayak Nug he, enug haen iitta meum.

Israel Pilistia ele ban heppig

¹⁵ Haen laa amu Israel, Pilistia ele ag ban heppig. Ag ban henana, Dawit nug nuhikkud daup oolagppa dayaya, Pilistia ele ban henana, nug lemelem qe, gai-iitta meum.

¹⁶ Amu Pilistia dilag ban danab laa am Rapa buɗub onig Isbibenop. Nug nuhig qep elab am qep elab bau. Nuhig ban amu, amunu ikki am brasppa hak, uug nuhig am 3.5 kilogram maha ele. Danab amu nug Dawit qeeb mauhkkunu aum.

¹⁷ Isbi Benob nug anam a, nug Dawit ele ban heyaya, Dawit beɗu lemelem qe, gai-iitta me, Pilistia danab amu nug Dawit qeeb mauhkkunu heehe, Seruia bekka Abisai nug uɗia, Dawit ehanitta, Pilistia danab amu qe mauhom. Nug anam he, Dawitnu daup ag uug amu bekkunu miag dayom anidna, ag Dawit amegppa ɠagattag appig. “Na ig Israel, na ihinig amahlak hanhan eotte bia daattem amunu, amahlak amu iitta memanu, na baula ig oonigppa daappe, ban ii hemata. Ig, nahipad ban danab amu, igib banppa daagnig,” aon appig.

¹⁸ Haen nakok daaeg te, haen laa ele Israel, Pilistia ele ag ban baula heppig. Haen imuppa ag Gob appa ban heppig. Amu ban amuppa Sibekai, nug am Israel ted, appag diig Husa appanu amu, nug Rapa buɗub laa onig Sap qe mauhom.

¹⁹ Am Gob appa haen laappa Israel, Pilistia ele baula ban henana, Jair bekka Elhanan, nug Betlehem ted amu, nug Goliat ⌊amag⌋ qe mauhom. Goliat ⌊amag⌋ am Gat danab, nuhig ban qaɗib am teppunab ele.

²⁰ Amu haen laappa, Israel, Pilistia ele ag Gat appa ban henana, Pilistia dilag daup laa nug danab beɗu okkai, okkainab ele dayom. Nug eppekuɗ anen anenppa doɗo eblaih laippu ele, am baekuɗ anen anenppa ele doɗo eblaih laippu ele. Eppekuɗ doɗo oh, baekuɗ doɗo oh ele am 24. Nug ele am Rapa buɗub laa.

²¹ Nug danab naɗi, beɗu anam, amge nug Israel awa awa aqatte, Dawit awag Sama bekka Jonatan, nug nug qe mauhom.

²² Dawit amu nuhikkud daup ele ag Pilistia danab waɗele amu oh aqaeg mauhppig. Ag oh am Rapa buɗub. Ag appalag diig am Gat.