2 Samuel 20 - Nobonob Baibel

Seba nug Dawit waappa dayak uua, Israel ag nug dim lamidkkulagnu heum

¹ Amu danab laa onig Seba, nug Benyamin ted, Bikri bekka, nug appa dayom. Nug hanhan he, uug digdig bettom, amu nug appa dayaya, Juda dilag nai doya, nug trampet iwalala eum. “Ig Israel laa oh, ig Dawit ele laippu iitta. Ao, ig Jesi bekka Dawit, ig nug buɗub iitta. O ag Israel danab laa, da ag ele ig oh ahat, ig appanig diigppa gotu,” awa aum.

² Seba anam heum amunu, Israel danab oh ag Dawit uuidna, ag Bikri bekka Seba dim lamidppig. Ag amu heppig, amge Juda danab ag ahilag king, Dawit, ag nug ele daan, ag nug Jodan leppanu omalna, Jerusalem teppig.

³ Am King Dawit nug eɗua, nuhig lag enanagnab, Jerusalem dayom amu, nug appa ta, nug wauud amge wauudnab iitta eblaih tanig ele, nug ag daanna, nuhig lag enanagnab, amunu keeke ele atognoadkkulagnu uuatte daappig amu, nug ag lag laappa, ag lag amu uun oiglagnu elele iitta, nug ag appa maatte, piɗe anam daappig. Dawit nug ag ele baula ii niippig, amge nug he, ag ee keeke, elele daappig, keeke laanu tutu ii daappig. Ag ah qab bia anam daaeg ukke, mauhppig.

⁴ King Dawit nug anam hewowa, nug Amasa amegppa aum. “Juda danab ag uɗiglagnu, na nai meppe ukkeb doon, na ag ele iguppa deɗ ewam uueb, da noolppa dayeg!” awa aum.

⁵ Dawit anam aum, amge Amasa nug ukka, Juda dilag daup oh ag uɗin, king noobppa daaglagnu amelagppa ab dooglagnu haaha, haen King Dawit nug, nug eɗua uɗikkunu aum eɗittom.

⁶ Amasa nug haen anam eɗittom amunu, Dawit nug Abisai amegppa aum. “Amasa nug paha eɗua ii uɗitte amunu, gemu Bikri bekka Seba nug uug okkainab megakku. Apsalom nug uug okkai mekkom, amge Seba nug uug okkainab megakku amunu, na dahilad daup ippa daatteb ele noolag aoppe gona, Seba lamidkkulag. Iitta dayeb amu, nug aab okkai laa, aab amuam aab ɠagattag aɗ ele amu, nug aab amuppa teeb, ig nug aognignu elele iitta daakku,” awa aum.

⁷ Dawit anam aum amunu, Joapnu daup, danab Dawit gumappig, amuam Keret danab, Pelet danab ele, amu daup oh ɠagattag ele ag Abisai dim lamidna goppig. Abisai nug ag oh, ahilag okkai dayom. Ag oh Jerusalemnu ahan, Abisai dim lamidna, Bikri bekka Seba aɗaglagnu goppig.

⁸ Ag gonana, ag men okkai naɗi laa Gibeon daatte, ag appa teeg, Amasa nug ag uɗalag teum. Amu Joap nug matu bannu lamen nuhig ma, imuagppa matagiɗ ele takkom. Nug anam lamen ma, nug matagiɗppa qep laa, nuhig gaɗa ooppa ele inom. Nug anam ma dayaya, nug Amasa hambuppuak humidkkunu nug guguittak te, qep nuhig am gaɗappanu na qa wanppa niiom.

⁹ Qep anam niieye, Joap eppeg nanehppa bahia awa, nug Amasa amegppa aum. “O lai, na attem daattem?” awa oɗ mettom. Oɗ metta, nug Amasa ootuqidkkunu nug eppeg naɗiap-ppa Amasa akkaɗi aɗom.

¹⁰ Joap nug anam he, Amasa nug qep Joap eppeg nanehppa dayom am ii dabmeum amunu, Joap nug qep amuppa Amasa oo ye, Amasa biig wanppa neum. Joap nug Amasa haen laippu aakkuib qep-ppa ye, Amasa mauhom. Joap nug anam he, nug amag Abisai ele aa Bikri bekka Seba dim lamidpiɗ.

¹¹ Aa anam gopiɗ, amu Joapnu daup laa nug Amasa gaɗa guma dayaya, nug aum. “Aun nug Joapnu oo hette, aun nug Dawit king daakkunu oo hette ele amu, nug Joap dim lamittaɗ!” awa aum.

¹² Amge Amasa gaɗa ib gamagppa tiig layom ele niiom amunu, daup danab oh ag uɗinna, ag Amasa gaɗa anidnana, ag baelag yaan, hippaidna daappig. Ag anam heegeg, Joapnu daup laa amu, nug ag anam heeg anatta, nug Amasa gaɗa eeɗa, ib eɗitta, nakok uma wana, gaɗa me dayeye, nug lamen awa hautom.

¹³ Danab nug anam he, danab laa nug Amasa gaɗa anidkkunu hibaitta ii dayom. Iitta. Joap, ag ohnab ele ag Bikri bekka Seba lamidkkulagnu goppig.

¹⁴ Amu Seba, nug Israel dilag huu okkai ohppa oiya ugakka, nug aab laa onig Abel Betmaka teum. Nug aab amuppa taata, nug Beri buɗub dilag wan atu ohppa oiye, danab amu ag ahan qagmena, nug dim lamidppig.

¹⁵ Seba nug appa dayeye, Joap nuhikkud daup ele ag uɗin, ag aab Abel Betmaka oo mettan, aqaglagnu daanna, ag aab okkai amunu aɗ letaglagnu wan aɗ dimittim qagmeegeg teum. Ag amu hewona, ag ad imuag naɗippa aɗ amu heppeg nauhkkunu yaanna, henan daappig.

¹⁶ Ag amu henan daaegeg, aab okkai amunu ah laa doyak dabmak ena ele nug uɗia, aab ooppanu danab uɗat amu heppig ele amelagppa ewa aum. “Ag dahil nai doyeg! Ag appeg, Joap uɗieb, da nug ele nai mattignihnu ool daatte,” awa aum.

¹⁷ Nug ewa anam a, Joap nug guguitta ukke, ah nug Joap oɗ mettom. “Na Joapte?” awa oɗ mettom. Oɗ mette, Joap nug aum. “Am daib iikku,” awa aum. Nug anam a amu, ah nug aum. “O dahil naɗi, na da, nahip maɗi ah, na dahil nai dookkutnu oɗ medattem,” awa aum. Nug anam a, Joap nug aum. “Da daul hume daattem,” awa aum.

¹⁸ Joap nug “Da daul hume daattem,” awa a, ah amu nug tuɗitta aum. “Anukkanab danab ah ag, ‘Na oɗmak atten, na amu nob aokkutnu oot daatte amu, na Abel ukke!’ aon adappig. Am danab ah ag amunu uɗippig amu, ag ippa doyak ena aoeg, uug aakku babaittak dayom.

¹⁹ Ig Israel danab ah oolagppa king waappa oo metta ii uuak kobol dim lamidtata, maɗoɗ ele dayaknu danabnab daattem. Aab okkai imuam Israel ooppa ah laa nug nid nuhikkud anilag daatte bia daatte, amge na aab imu heppe nauhkkunu hettem. Yawenu keeke ii daama, nuhikkudnab danab ah kuɗum ele ii daamnanu hettem,” awa aum.

²⁰ Ah nug anam a, Joap nug aum. “Iitta. Da amubia ool ii daatte. Da nahip aab heppi nauheb, ag aqappi mauhkkulagnu ii hettem.

²¹ Da na amebia hekkulnu ii hettem, amge danab laa, nug Bikri bekka Seba, nug Epraim wanppa, qauko qauko daattebppan danab amu, nug heeb, King Dawit na qeeb, nug aben nuhig awa, king daakkunu hette. Danab amu uɗiom, ippa ina daatte amunu, na nug ig megappe, da heppi, ig ag uuadta gokkunig,” awa aum. Joap nug anam a, ah amu nug aum. “Ig danab amunu ikki buɗipput, aɗ dimittim uɗikku,” awa aum.

²² Ah nug anam awowa, nug eɗua ukka, ulum nai doyak dabmak ena ele aab amuppan danab ah amelagppa a, ag ahan, Bikri bekka Seba duug ona, ikki okkulna, buɗieg, aɗ dimittim Joap aokkunu noum. Ag anam heeg, Joap trampet iwale, nuhikkud daup oh ag ahan gona, appalkad diigppa anen anen goppig. Ag anam ukkaegeg, Joap nug King Dawit anidkkunu Jerusalem teum.

Dawitnu danab okkai dilag lista

²³ Joap nug Dawitnu daup oh dilag ikki anuqak dayom. Jehoiada bekka Benaia nug danab Dawit gumappig, amuam Keret danab, Pelet danab ele, nug ahilag okkai dayom.

²⁴ Adoniram nug danab ag ɗo waappa kingnu uɗat haknuib daappig gumattom; Ahilut bekka Jehosapat nug yaak danab dayom.

²⁵ Sewa nug am nai yaak danab dayom; Sadok, Abiatar ele, aa mana mettak danab daapiɗ.

²⁶ Amu Jair danab onig Ira, nug am Dawitnu ulum mettak danab dayom.