2 Samuel 19 - Nobonob Baibel

Joap nug Dawit daug batom

¹ Dawit nug Apsalomnu qanene, laa nug Joap amegppa aum. “Dawit nug Apsalom mahitta qanatte,” awa aum.

² Amu Dawitnu daup ag, “Apsalom mauhom amunu, King Dawit nug oo uug naunab nau doyaya, mahidtte,” dooppig amunu, ag uug dooppig. Deɗ amuppa ag ahilag kekeɗ eɗadppig, amge King Dawit nug bekka mahittette, ag kekeɗ eɗadppignu oo gamag ahak am ii dooppig. Iitta. Ag oolag uug dayom.

³ Ag kekeɗ eɗadppig, amge ag oolag uug daye, ag eɗun, danab ag baɗan, banppa daaglagnu uun oolna, appalkadppa uɗa nak ele tetteb bia, Dawitnu daup ag anam aakku aab okkai Dawit dayomppa teppig.

⁴ Ag anam heppig, amge Dawit nug iɗu hauta, Apsalom mahitta, huana qanana aum. “O da bekkal Apsalom! O da bekkal, da bekkal Apsalom!” awa aum.

⁵ Dawit nug anam heehe, Joap nug lag Dawit dayom amuppa ukka ta, nug Dawit amegppa aum. “Gemu na he, nahipad daup ag uɗa nak eheɗ dootteb. Danab amu ag aakku na, na begapad, na aɗenad, nahipad ah, amu na waatad amge waatadnab iitta ele kekeɗ eppelagppanu diiatte, ag ii mauhppig.

⁶ Na laa ag nahipnu nau ninig ele dootteb dilagnu oot mauhtte, amge na laa ag nahipnu oolag mauhtte ele, na amu dilagnu nau ninig ele doottem. Na gemu nahip ban daup ikki, amu ahilkad danab ele ag am keeke hamu bia, na amu heehe daatteb ippunadttem. Ig oh mauhlom, Apsalom nug gemu bau daalo amu, na ena doolom anidttem.

⁷ Amunu na ahan, dimittim wana, ‘Ag hena autna aoppig,’ aon amelagppa appe doyeg! Aɗinu? Da Yawe onig awen, Nug onigppa da dahil nai imu ɠagattag qetten, imu attem. Na anam ii hekkut dayeb amu, gemuib nahipad danab oh ag uuidna, ahan gokkulag. Tueb meeb, laippu laa ii daama. Anam bekku dayeb amu, na naunab nau daakkut. Na nid bau daai uɗiom, gemu batak na deɗ laala uug nau digdig maome, amge uug imu bekku dayeb amu, uug imuam uug laa oh na maome eɗatta, naunab nau daakku,” awa aum.

⁸ Joap nug anam aum amunu, King Dawit nug aha ukka, aabnu aɗ odppa dayom. Nug appa dayeye, laa ag nuhikkud daup amelagppa, “King nug aabnu aɗ odppa daatte,” aeg doon, ag oh uɗin, nug noobppa daappig. Dawit aɗi ag anam heppig, amge ag anam heegeg, Israel laa ag Apsalom dim lamidppig ele ag oolna, ag laulkadppa teppig.

Israel, Juda ele ag Dawit eɗua, ahilag king daakkunu oolag dayom

⁹ Ag tena daaegeg, Israel laa oh ele nai aeg ona, aeg do appig. “King Dawit nug anukka ig ehanikke, ig kekeɗ ihinkad eppelagppa ii daamut. Nugib ig Pilistia danab eppelagppanu awikkom. Nug anam heum, amge Apsalom bekkunu he, Dawit nug oola ukka, laih daatte.

¹⁰ Ig Apsalom king daakkunu goɗen gokkaɗakppa tituanmut, amge nug banppa mauhom amunu, ig hepput, King Dawit nug eɗua uɗikku am ena,” aon appig.

¹¹ Ag amu mattiegeg, Dawit doya, nug nai inam mana mettak danab Sadok, Abiatar ele dooglahnu me ukkom. “Aa Juda dilag ikki danab inam oɗ matteɗ! ‘Israel laa oh ag king nug eɗua, nuhig lag enanagnab, nug appa daakkunu atteb amunu, aɗinu ag king nug bekkunu, am laa oh dilag mattiak dimppa mattiglagnu daatteb?’

¹² Amu Dawit nug atte. ‘Ag am da awalad, mamelad ele,’ awa atte. ‘Amunu aɗinu laa oh dilag mattiak dimppa king nug eɗua uɗikkunu mattiglagnu daatteb?’

¹³ Aa Juda dilag ikki danab amelagppa anam awoya, aa Amasa amegppa ele inam apeɗ doyaɗ! ‘Na da ele, i tiig laippunu, amu da heppi, na Joap abenppa daan, dahil ban daup ikki anuqak hanhan daakkut. Da anam ii hekkul dayeb amu, Kayak Nug bu okkainab meɗakkunu ool daatte.’ ” Dawit nug nai amu Sadok, Abiatar ele dooglahnu me ukkom.

¹⁴ Dawit nug nai amu me ukke, ⌊Sadok, Abiatar ele aa Dawit aa hekkulahnu aum bia heeh, Dawitnu nai am⌋ Juda danab ohnab ahilag dabmak eɗua, Dawit nug eɗua king daakkunu daye, ag nai imu Dawit dookkunu meeg ukkom. “Na, nahipad danab oh ele ag eɗun uɗieg!” Ag nai anam aakku meeg ukkom.

¹⁵ Juda ag nai amu meeg ukke, King Dawit doya, nug aha ukka, nug Jodan leppa teum. Nug appa te, Juda danab ag matu Dawit omalppeg, Jodan le mataɗkkunu uɗin, Gilgal daappig.

¹⁶ Juda danab ag uɗiegeg, Gera bekka Simei, nug Benyaminppan danab amu, nug Bahurimnu aha, paha King Dawit uɗa tekkunu Juda ele oh uɗippig

¹⁷ Benyamin danab 1,000 ag nug ele oh uɗippig. Amu Saulnu ehanittak okkai Siba, nug, nug bekkod 15, amu nuhikkud maɗi nid 20 ele ag ele uɗippig. Simei, Benyaminppan danab 1,000 laa amu, Siba aɗi ele oh ag paha Jodan leppa, King Dawit ehanidkkulagnu uɗippig.

Dawit nug Simeinu oo doye, nai ena mettom

¹⁸ Ag Jodan leppa gona, ag king, nug baegppan oh ele omaladna, le mataɗkkulagnu, ag oo hak nuhig heppeg bekkunu ele Jodan leppa, le baag qakppa le amu mataɗna, Dawit gumidna goppig. Ag anam henana amu, Gera bekka Simei nug Jodan le mataɗowa, nug wana, king noobppa laippun gateg qaun o, gomela, iɗu wanppa meum.

¹⁹ Nug king noobppa anam dayaya, nug aum. “O dahil naɗi, na da dahil eheɗ hak matunu nob meɗakkutnu ool ii daatte. Na, na am dahil naɗi, dahil king, amu na Jerusalem uun gome, deɗ amuppan hak nau dahil na dabmettem doottem, amge na da kobol da hemi ele amu, na kobol amu daut atikkunu oɗ medattem. Na heppe, am na dautppa ii daamanu ool daatte.

²⁰ Aɗinu? Da doottem, da hipunin hemi, amu diig amunu gemu da Israel laa oh oolagppanu da anuqe uɗien, dahil naɗi, dahil king, da nug uɗa tekkulnu uɗimi,” awa aum.

²¹ Nug anam a, Seruia bekka Abisai nug aum. “Yawe Nug Dawit king daakkunu goɗen gokkaɗakppa tituanom, amge Simei nug King Dawit eheɗ laa awaknu anak waappa daakkunu aum. Amu diig amunu nug mauhaɗ!” awa aum.

²² Nug anam a, Dawit nug aum. “O Seruia bekoɗ, ahilah dabmak, am dahil dabmak ele laippu iitta. Gemu aa da uug meɗattep. Ig gemu hepput, Israel oolagppa danab laa mauhkku am enate? Iitta! Gemu da king daattem doottem amunu, laa nug ii mauhma,” awa aum.

²³ King Dawit nug anam awowa, nug eɗua, nuhig nai ɠagattag qetta, Simei amegppa aum. “Na ii mauhmana,” awa aum.

Dawit nug Mepibosetnu oo ena dayom

²⁴ Amu Saul alag Mepiboset, nug ele king uɗa tekkunu ukkom. Dawit nug Jerusalemnu aha ukkom, haen amuppa Mepiboset nug digma, ⌊Dawit mahittatta,⌋ nug baeg ii iha, id ii awa, lamen ele ii ihom ukke, King Dawit maɗoɗ ele eɗua uɗiom batak.

²⁵ Mepiboset nug Jerusalemnu aha, king uɗa te, King Dawit nug oɗ mettom. “Mepiboset, aɗinu na da ele oh ii gomuɗ?” awa oɗ mettom.

²⁶ Dawit nug anam oɗ mette, Mepiboset nug nob ma aum. “O dahil naɗi, dahil king, da, nahip maɗi nid da, da bael nau, da baelppa oikkulnu elele iitta amunu, da dakka, da oolppa inam ami. ‘Da donki dahil gomeppa dayeye gokkulnu amu, da heppi, laa nug donki dahil gomeppa dayaknu keeke babaitteb, da king ele oh gokkunih.’ Da oolppa anam ami, amge dahil maɗi nid Siba, nug da eheɗppa daakkulnu nug dahil nai ii dim lamitta, da uuiɗa ukkom.

²⁷ Nug anam he, nug na, na am dahil naɗi, dahil king, nug na amenppa da bael qeum. O dahil naɗi, dahil king, nug anam heum, amge na am Kayaknu engel bia daattem amunu, na attem dahilppa hekkutnu ena doottem amu, anamib he!

²⁸ Aɗinu? Na king, dahil naɗi, na heppe, da alal baegppan oh ig mauhlomnu elele, amge na amu ii hena, na hee, da, da am nahip maɗi nid, da nahip balalppa, laa ag iguppa daan, ee latteb ele, da ag oolagppa dayeye, ee lattem amunu, da keeke laa na eppenppa aokkulnu oɗ medakkulnu elele iitta,” awa aum.

²⁹ Mepiboset nug anam a, King Dawit nug aum. “Aakku elele. Na Siba ele aa wan da nug eppegppa memi amu, aa oppatya, laih nahip dayeb, laa nuhig dayad!” awa aum.

³⁰ Dawit nug anam a, Mepiboset nug king amegppa aum. “Na dahil naɗi, dahil king. Na maɗoɗ ele eɗun uɗime amunu, Siba nug wan oh aweb, nuhig daakku am nai iitta. Da anidttem amu, na ena anam eɗun uɗime amuib am keeke okkai,” awa aum.

Dawit nug Barsilai nai ena mettom

³¹ Am Gileat danab Barsilai, nug Rogelimnu aha, nug ele King Dawit omaleb, Jodan le mataɗoya, “Enad ukke,” ab, king nug Jerusalem tekkunu uɗiom.

³² Barsilai nug am danab kaino; maɗ nuhig 80. Nug enub danab amunu, King Dawit nug Mahanaim dayeye, nug ee keeke mettom.

³³ Amu Barsilai nug Dawit gumitta te, nai mattiyya, Dawit nug amegppa aum. “Na da ele, i oh Jodan le mataɗa, i oh Jerusalem teɗa, da na atognoidkkul,” awa aum.

³⁴ Dawit nug anam aum, amge Barsilai nug eɗua, nob ma aum. “O dahil king, da kaino memi. Da tuɗitte, haen elab wanppa ii daakkul amunu, da na ele Jerusalem teɗa daagnihnu am da ena ii doottem.

³⁵ Da maɗ dahil am 80 teum daatte. Da keeke kuɗumnu, atten am enanag, keeke atten am enaib dookkulnu elele iitta. Da, da nahip maɗi nid amu, da ee lainne, da ee o le miti tutukku dookkulnu elelete? Da danab ah ahi edatteb, da ag baalag tutukku ena dookkulnu elelete? O dahil naɗi, dahil king, da na ele oh goɗa daalop amu, da uug okkai na mettalom. Amu da anam helom am ena iitta.

³⁶ Da, da nahip maɗi nid amu, da na ele oh Jodan le imu mataɗa, da ib tutuib na ele oh goɗa, na gobeppe, da eɗuen uɗikkul. Na dahilnu ena hekkutnu attem, amge da aɗi kobol enanag laa hemi amunu, na anam helom?

³⁷ Da appal diigppa, mama anai ele mauheh boumatppigppa dayeye mauhkkulnu amu, na appe, da, da am nahip maɗi nid amu, da eɗuen, appal diigppa gokkulnu oɗ medattem. Da anam hekkulnu hettem, amge dahilppanu laa am iikku; nug Kimham, nug am nahip maɗi nid amu, na appe, nug na, dahil naɗi, dahil king amu, nug na ele le imu mataɗya gokkulah. Nug na ele oh goya, na nuhignu attem hekkutnu oot daakku dayeb amu, na anamib he!” awa aum.

³⁸ Barsilai nug anam a, Dawit nug aum. “Am ena. Kimham da ele oh le mataɗɗa gokkunih, amu na da nuhignu aɗi hekkulnu oot hette ele amu, da anamib hekkul. Amu na ele aɗi da eppelppanu aokkutnu oot daatte dayeb amu, da anamib hekkul,” awa aum.

³⁹ Aa anam mattiya malaeh, danab oh, King Dawit ele Jodan mataɗppig. King nug mataɗa, nug Barsilai ootuqitta, itittak ena mette, Barsilai nug eɗua, lakka ukkom.

Israel danab, Juda danab ele ag naippa nug mehqeppig

⁴⁰ Haen King Dawit nug Jodan le mataɗa, Gilgal ukkom amu, Kimham ele anam heum. Amu Juda dilag daup oh, Israel dilag daup laih ele, ag oh king omalna, le mataɗna, ag appa goppig.

⁴¹ Ag anam heeg, haen elab iitta Israel laa ag ahan, king toppa uɗin, nug amegppa appig. “Aɗinu Juda danab, ag ig ele oh, ig awag amag ele amu, aɗinu ag yab danab hetteb bia heegeg, ig ii dooutut, ag na, na am ihinig king amu, ag na, na baenadppa, nahipad ban danab ele omaladna Jodan le mataɗna uɗippig?” aon oɗ medappig.

⁴² Ag Dawit anam oɗ medappig, amge Juda ag ahan, nob meppig. Ag nob mena, nai inam madippig. “King nug ig ele tiinig laippunab amunu, ig hemut. Ag aɗin oolag nauhtte? Ig kingnu keeke laa ig lakkunignu aomutte? Ig nuhig keeke laa ig eppenigppa aɗat, aot gomutte?” aon appig.

⁴³ Ag anam aeg, Israel danab ag nob mena appig. “Ig Israel, ig am huu okkai eblaih laih ele, ag Juda, ag am laippuib amunu, nug ihinig king daakkunu am diig okkai ele, ahilag eɗittak. Anam daatte amunu, aɗinu ag ihinignu keeke hamunab dootteb. Ig tatam ig omalpput, Dawit uɗikkunu iite mattimut?” aon appig. Ag anam appig, amge Juda danab ag nai ɠagattagnab, Israel dilag nai eɗittak, Israel danab amelagppa madippig.