2 Samuel 17 - Nobonob Baibel

¹ Apsalom nug anam ha male, Ahitopel nug Apsalom amegppa aum. “Na appe, da daup 12,000 epeɗiatten heppi, ig oh tuqan imuppa ahat, Dawit dim lamidkkunig.

² Ig gota, Dawit aɗi ag beɗulag gai-iitta, bodoettak ele daappeg, ig gota tepput, Dawit aɗi ag eheɗ nau baɗan oolppeppeg, da king aakkuib qeppi mauhkku.

³ Da nug qeppi mauheb, da danab ah laa oh omaladppi, nahip-ppa uɗignig. Danab laippu nug mauhkkunu oot hette amu, nug mauheb, laa oh ag maɗoɗ ele eɗun uɗiglag,” awa aum.

⁴ Ahitopel nug anam a, Apsalom, Israel dilag ikki danab oh ele ag nai amunu ena dooppig.

⁵ Apsalom, Israel dilag ikki danab oh ele ag ena dooppig, amge Apsalom nug aum. “Appeg, Ark danab Husai nug uɗia, nug ele nuhig dabmak imunu ab dootu!” awa aum.

⁶ Nug anam a, ag aeg, Husai nug uɗie, Apsalom nug amegppa aum. “Ahitopel nug ulum nai imu ig mekka, ig inam inam hekkunignu aum. Nahip dabmakppa amu, ig nug aum bia hekkunig am enate? Iitta dayeb amu, na nahip dabmak appe doognig,” awa aum.

⁷ Apsalom nug anam a, Husai nug aum. “Ahitopelnu nai tatamnu am ena, amge ulum nai imuam enanag iitta bia anidttem.

⁸ Na doottem. Na mamen, amu nuhikkud daup danab ele ag am ban haknu doyak danab. Ag bea anig, laa nug bea amu nakkud diie, bea anig amu paha ban huana hette, ag ban anam bia hetteb. Keeke laa ele amu, na mamen nug haen kuɗum banppa dayom, nug ban haknu kobol oh doya malom. Nug heeb, gemu tuqan imu nuhig daup danab oh ag ele ii niimna.

⁹ Ge, geha iikku nug ⌊nuhikkud danab ele⌋ ag men oɗe laappatai, o adekkuppatai ag lokkumak aguppa daatteb amunu, ⌊nahip daup ag goppeg,⌋ Dawit, nuhig daup ele ag lokkumak daappigppan ahan, banelag gona ban heppeg, nahipad daup laala mauhkkulag dayeb, laa nug amu doya, ‘Dawit nug Apsalomnu daup huanak aqom,’ akku.

¹⁰ Nai amubia aheb amu, nahipad daup oh baɗaglag. Ge, nahip daup laa nug laion, doɗ laa oh ii baɗadtte bia daatte, daup amu nug hanhan keeke laanu ii baɗatte, ooppa ɠagattag doyakib dootte, amge nug nai amu doya, nug ele eheɗnab baɗakku. Aɗinu? Israel oh ag na mamennu, nug ban danabnab daatte doon, nuhig daup ag ban hekkulagnu ag oolag ɠagattag doyak okkai daatte ele dootteb.

¹¹ Anam amunu, dahil dabmak am inam. Na heppe, Israel dilag ban danab ohnab, aab onig Dan, appanu ukka ukka, Berseba aabppa batak, na heppe, ban danab amu ohnab ag nahip-ppa uɗiglag. Danab amu ahilag ebqak am yu ihippa abuɗ niitte amubia. Danab amu oh ag uɗippeg, na ag noolag aoppe, ag oh ban hekkulagnu gokkulag.

¹² Ge, ig anam gota, Dawit nug adeppa anidkkunig amu, ig aguppanab ban hekkunig. Ig ban hekkunig, am baito buttua wan oh tonatte, amubia ig nug am nuhikkud daup oh ele tonadta aqapput, laippu laa bau ii daama. Ohnab mauhkkulag.

¹³ O iitta, ig gobupput, Dawit nug aab okkai laa, aab amuam aɗ ele, nug appa daakkunu gokku dayeb amu, Israel laa oh ag muɗi aon, aab amuppa gona, aab amu loppaɗna, muɗippa qakkan eeɗppeg, oolnu noakppa nokku. Ag anam heppeg ukkeb, aab amu maha nakoknab laa dayom, amuppa ii daama. Iitta. Ohnab oolnu noakppa noa lokkumak daakku.” Husai nug Apsalom amegppa anam aum.

¹⁴ Husai nug anam a, Apsalom, Israel danab laa oh ele ag appig. “Ark danab Husainu ulum nai am Ahitopelnu ulum nai eɗidtte,” aon appig. Ag doon, dabmena appignu diig am, Yawe Nug Ahitopelnu ulum nai elelenab na qeeb, Apsalom nug padal mekkunu dabmak awe ɠagattag eppom daye, Nug Husai ehanittom.

¹⁵ Am Husai nug anam Apsalom aɗi amelagppa mattia mala, nug ukka, mana mettak danab aɗit Sadok, Abiatar ele, nug aa amelahppa aum. “Ahitopel nug Apsalom, Israel dilag ikki danab ele amelagppa nai mattiaya, nug ag inam inam hekkulagnu aum, amge da ag inam inam hekkulagnu ag amelagppa ami.

¹⁶ ⌊Amu Apsalom nug dahil nainu ena doyom, amge nug nuhig dabmak eɗueb, Ahitopelnu dabmak dim lamidkku dayeb amu,⌋ King Dawit nug laa nug ele daatteb oh mauhkkulag amunu, aa paha nai awa ukkak danab laa mepeɗ, nug ukka, Dawit amegppa inam anaɗ! ‘Ag atu taɗakppa Jodan leppa, le baag qak daattebppa aib daappig. Ag Jodan le paha mataɗeg! Ag hambuppunna, “Ig niiota, butti le mataɗkkunig,” aib appig. Ag le ii mataɗkkulag dayeb, ⌊Ahitopel aumbia, danab 12,000 uɗin ban hekkulag dayeb amu,⌋ ag ohnab mauhkkulag.’ ” Husai nug Sadok, Abiatar ele amelahppa anam aum.

¹⁷ Amu Apsalom, nuhikkud ehanittak ele ag dabmak eheɗ aomnanu Sadok, Abiatar ele bekkalti Jonatan, Ahimas ele aa miag atiak, aab okkai ooppa uɗiya, eɗuya laih gokkulahnu elele iitta amunu, nid aɗit amu aa aab dimittim aben laa onig Enrogel, aa appa daapiɗ. Aa anam daaeheh, Sadok, Abiatar ele aa Husainu nai dooya, aa maɗi ah laa nug nid aɗit amu amelahppa ab, aa goya, King Dawit amegppa Husainu nai akkulahnu meeh ukka, amelahppa a, aa goya, Dawit amegppa apiɗ.

¹⁸ Amge nid laa nug Ahimas, Jonatan ele anatom amunu, nug ukka, Apsalom amegppa aum. Ahimas, Jonatan ele aa anatom dooya, aa paha ahaya, Bahurim goya, appa danab laa laugppa tepiɗ. Danab amu laug haɗap-ppa le moɗ laa dayom, amu nid aɗit amu aa moɗ amuppa nopiɗ.

¹⁹ Aa amuppa noeh, lag amu mameg wau nug le moɗ amu ameg tonaknu keeke awa, amuppa ameg tona, nug ee aeg ele awa, ameg tonaknu keeke ee aeg amu ele tonom amunu, danab laa nug neekkeb ukkeb, le moɗ uukku daatte ii anidma.

²⁰ Ah amu nug anam he, haen Apsalomnu daup ag uɗin amu, ag ah amu oɗ medappig. “Ahimas, Jonatan ele aa adeppa daattep?” aon oɗ medappig. Oɗ mettaeg, ah amu nug nob ma aum. “Nid aɗit amu aa le nakok umu mataɗya malapiɗ,” awa aum. Anam a, daup ag aa anatkkulagnu mattialatna oippig, amge ag aa ii anatppig. Ag ii anatppig amunu, ag eɗun, Jerusalem goppig.

²¹ Apsalomnu daup ag eɗun, Jerusalem gokkulagnu ukkaegeg, nid aɗit amu aa moɗppanu beya, aa goya, King Dawit apeɗ dookkunu gopiɗ. Aa goya teya, amegppa inam apiɗ. “Ahitopel nug Apsalom inam inam hekkunu aum amunu, na paha ahan, le imu mataɗe!” aoya apiɗ.

²² Aa anam apiɗ amunu, Dawit, danab ah nug ele goppig ele, ag oh ahan, Jodan le mataɗppig. Ag mataɗegeg, buttua wakkaɗeɗe, laippu laa nug le amu heqo laihppa ii dayom. Iitta. Ohnab mataɗna malappig.

²³ Ag anam mataɗppig, amge Ahitopel nug Apsalom nug nuhig ulum nai ii dim lamittom antta, nug donki nuhig gomeppa dayaknu keeke qakka, nug donki attan ta nug appag diigppa gokkunu ukkom. Nug ukka, nug laugppa Gilo appa teum. Nug ta, nuhig keeke oh babaitta mala, nug nugakka muɗi laa awa, baagppa qakke dayeye, nug beɗu aiha, nug mauhom. Nug anam he, ag nug gaɗa mamegnu boumak abenppa boumppig.

²⁴ Amge Dawit nug Jodan mataɗa ukka, Mahanaim te, Apsalom, Israel dilag daup oh ele ag Dawit lamidna, ag Jodan le mataɗppig.

^25-26 Ag Jodan mataɗna, ag gona, wan onig Gileat, ag appa haen tutu dayaknu aab kalappig. Am Joap nug Apsalom ele ii dim lamittom amunu, Apsalom nug Amasa nug nuhig daup dilag okkai daakkunu otiom. Amasa nug danab onig Jeter bekka. Jeter nug am Ismael buɗub, amu nug wau am Nahas aɗeg Abigel. Nug Joap anig Seruia makkeg.

²⁷ Apsalom aɗi ag aguppa daappig, amge tatam, haen Dawit nug Mahanaim uɗie amu, Nahas bekka Sobi, Amiel bekka Makir, amu Barsilai ele ag uɗippig. Sobi nug am Amon danab, nug apag diig am Raba. Makir nug appag diig am Lodebar, amu Barsilai nug Gileat ted, nug appag diig am Rogelim.

^28-29 Ag uɗin, ag heɗig, tappiɗ, waa keeke, aon uɗippig. Ag keeke amu aon uɗin, ag wit aeg, bali aeg, wit ganuɗak ele, ee aeg manik ele, bin, am bin diig laa onig lentil, uppuh leppu, huh ɠagattag eppom, sipsip, amu sis makau huhppa hak ele aon uɗippig. Am Dawit aɗi ag atu taɗakppa oiyegeg, beɗulag bodoette, enug aqe, le baalag ele diiom dooppig amunu, ag ee amu Dawit aɗi ag lakkulagnu aon uɗippig.