2 Samuel 16 - Nobonob Baibel

Siba nug Dawit ee mettom

¹ Am Dawit nug Olipnu Qauko ta, laih noowo, Mepibosetnu ehanittak okkai Siba nug Dawit uɗa teum. Nug donki aɗit, gomelahppa bret 200 ma, grep meu qaɗaiettak batappatak 100 ma, ad fig meu qaɗaiettak batappatak 100 ele ma, nug wain doɗ gaɗappa inak laippu ele ma, nug keeke amu oh awa ukkom.

² Siba nug keeke amu oh awa uɗia, Dawit uɗa te, amu Dawit nug oɗ mettom. “Imu oh am attemun?” awa oɗ mettom. Oɗ mette amu, Siba nug eɗua nob ma aum. “Donki aa king, baekkudppa ele ag ⌊haen anen anen⌋ attan tena oiglagnu, bret kunum, ad meu ele am nid bau ag lakkulagnu, amu wain am laa ag atu taɗakppa oippeg, beɗulag gai-iitta meeb, ehanittak aoglagnu daaglag amu, am amu dilag,” awa aum.

³ Siba nug anam aum, amge Dawit nug oɗ mettom. “Amge Mepiboset, nug nahip okkai Saul alag amu, nug adeppa daatte?” awa oɗ mettom. Oɗ mette, Siba nug aum. “Nug Jerusalem daatte. Aɗinu? Nug, ‘Da alal king dayom amu, gemu Israel danab ah ag heppeg, da nug dayom bia king daakkul,’ atte,” awa aum

⁴ Siba nug anam a, Dawit nug aum. “Keeke oh Mepiboset eppegppa dayom am, gemu nahip daatte,” awa aum. Awa a am Siba nug aum. “Na dahil okkai, dahil king. Da am nahip maɗi nid. Na dahilnu ena dookkutnu ool daatte,” awa aum.

Simei nug Dawit eheɗ laa awaknu anak waappa daakkunu aum

⁵ Siba, Dawit ele aa anam mattieh ukke, King Dawit nug ukka ukka, Bahurim guguitta ukke, danab laa, nug Saul ele aab ikki laippu, nug aab amu nakok uua ukka, Dawit eheɗ laa awaknu anak waappa daakkunu nai mattiom. Nug am Gera bekka Simei.

⁶ Nug nai amu mattiaya, nug men naunau akke, Dawit nuhigppa, nuhikkud ehanittak anuqak danab dilagppa ele goppig. Dawitnu daup ag nug gumappig ele, ag oh Dawit heqo laih laih daappig, amge Simei nug amu ii dabmeum. Iitta. Nug nug, amu nuhikkud ehanittak anuqak danab ele men naunau akke ukka aqom.

⁷ Simei nug nai nau amu mattiaya, ewa aum. “Na qe mauhak danab, na ahan ukke! Na danab hamu, nahip-ppa ena laa ii daatte.

⁸ Na Saul buɗub kuɗum hee mauhppig amunu, Yawe Nug kobol nahip amunu noob nau iikku medatte. Na Saul abenab aon, king daattem, amge gemu diig amunu Yawe Nug king aben na eppenppanu aɗitta awa, na bekkat Apsalom medatte. Na am danab qe mauhak danab amunu, na iikku padal mettem,” ewa aum.

⁹ Simei nug anam ana e ukke ukke, Seruia bekka Abisai nug King Dawit amegppa aum. “Dahil okkai, dahil king, danab amu nug danab ena iitta, qai mauhak bia daatte, am aɗinu ig nug uupput, nug na eheɗ laa awaknu anak waappa daakkutnu nai unam atte? Na appe, da wain, duug oppi, beɗu laih ukkebeb, ikki am laih gokku,” awa aum.

¹⁰ Nug Dawit amegppa anam aum, amge King Dawit nug nob ma aum. “O Seruia bekoɗ, ahilah dabmak am dahil ele laippu iitta. Yawe Nug danab amu amegppa, ‘Wana, Dawit eheɗ laa awaknu anak waappa dayaknu nai a!’ aum dayeb, diig amunu ele nug hette dayeb amu, aun laa nug nuhignu, ‘Aɗinu na anam hettem?’ anaknu elelete? Iitta. Laa iitta,” awa aum.

¹¹ Dawit nug anam anan, nug Abisai, nuhikkud ehanittak anuqak danab ele oh amelagppa nai tuɗitta aum. “Da bekkalnab, da nug menumi ele, nug da iweb mauhkkulnu hette. Danab imu nug Benyaminppanu danab, nug Saul ele tiig laippu, nug da eheɗ laa awaknu anak waappa daakkulnu dabmekkun elele amunu, uuppeg dayaɗ! Yawe Nug nug anam akkunu aumtai amunu, ig uupput haɗ!

¹² Nug anam heebeb, Yawe Nug uug nau dahilppa gemu beum antta, Nug nai nau danab imu dahilnu maditte ele dabmaama, eɗua ehaniɗa heeb, da ena daakkultai,” awa aum.

¹³ Dawit nug anam aum amunu, nug, laa nug ele goppig amu, ag oh qauko nakok daugppa ib qetakppanu ukkaegeg, Simei nug nakok attan ib iittappa ugakka, nug nai nau mattiaya, men naunau buɗiatte ahilagppa ukke, gappud ele appua e ukke layattom.

¹⁴ Amu King Dawit aɗi ag gona, Jodan leppa tena, ag beɗulag bodoettom. Ag anam doon, Dawit, ⌊laa oh ele ag⌋ aguppa hik aoppig.

Apsalom nug Jerusalem te, Ahitopel, Husai ele ulum nai medapiɗ

¹⁵ Dawit aɗi ag anam gona, Jodan le guguittak daaegeg, Apsalom, Israel danab laa oh ele ag Jerusalem teppig. Ag teegeg, Ahitopel nug Apsalom ele oh tepiɗ.

¹⁶ Ag oh anam teeg, Ark danab Husai, nug Dawit layag amu, nug Apsalom toppa ta, nug aum. “Na king daattem, nahip bau dayak am elab taɗ! Na king daattem, nahip bau dayak am elab taɗ!” awa aum.

¹⁷ Husai nug anam a, Apsalom nug aum. “Na genab Dawitnu oo mauhaknab doolom amu, na inam helomte? Aɗinu na nug ii dim lamidme?” awa oɗ mettom.

¹⁸ Apsalom nug anam oɗ mette, Husai nug aum. “Iitta! Aɗinu? Laa Yawe, amu Israel danab ah imu ele ag king daakkunu tituanak daatte amu, da nuhig ehanittakib daakkul. Da nug ele daagnih.

¹⁹ Am keeke laa amu, da aun waappa dayeye ehanidkkul? Da king dayom bekka noobppa iite daakkul? Da na mamen noobppa daamibia, da na noomppa daakkul,” awa aum.

²⁰ Husai nug anam a, Apsalom nug eɗua, Ahitopel oɗ mettom. “Nahip dabmakppa, ig attem hekkunig? Ig gemu aɗi ib dim lamidkkunig?” awa oɗ mettom.

²¹ Nug anam oɗ mette, Ahitopel nug nob ma aum. “Na mamen nug wauud amge wauudnab iitta eblaih tanig ele ag iguppa daanna, kingnu lag enanagnab, amu lag amunu keeke ele atognoadkkulagnu a, ag iikku daatteb amunu, na ah amu ele gemuib niippeg, Israel laa oh ag amunu nai doon, ag na hee, na mamen nug nahipnu eheɗ nau dootte dooglag. Ag anam doon, ehanidkkulagnu ɠagattag aoglag,” awa aum.

²² Ahitopel nug anam a, Apsalom nug ena doya, nug he, ag peh lag king laug attan, koɗokko uɗem ukkakppa heppig. Ag anam heeg, appa Israel oh noolagppa Apsalom nug mameg wauud amge wauudnab iitta ele niippig.

²³ Haen amuppa danab ah ag Ahitopelnu ulum nai, ag nai amunu, “Kayaknu uɗitte amunu, nai nuhig am enaib,” dooppig. Dawit, Apsalom ele oh, aa ele anam doopiɗ.