2 Samuel 15 - Nobonob Baibel

Apsalom nug eheɗ ha, mameg Dawit abenab awa, king daakkunu wagai meum

¹ Apsalom Dawit anidkkunu te, haen amu ukke, Apsalom nug oiyaknu karis awa, hos oiyaknu karis amu eeɗaknu ele diia, nug danab 50 ag nug noob aon, anuqna qaiettan gokkulagnu ele diiom.

² Nug anam ha, nug ele haen oh buttuanab aha, aab okkainu aɗ od guguittak ib giginppa daattom. Dayeye, laa nug layag nuhignu eheɗ heumnu dabmaama, king nug nai am doya bappaidkkunu uɗieye, Apsalom nug danab amu antta, amegppa, “Na atteg ted?” awa oɗ mette, danab amu nug aab diig, Israel dilag huu okkai attenppa dayom amu, nug Israel dilag huu okkai amu onig diia, “Da am nahip uɗat nid, da Israel dilag huu okkai imuppan danab,” awa nob ma attom.

³ Nug anam aawo, Apsalom nug attom. “O gadon, nahip nai am tutukku. Na ham-ii-bubuttem, amge kingnu danab laa nug nahip nai dookkunu laa ii daatte,” awa aum.

⁴ Apsalom nug anam awowa, nug nai tuɗitta attom. “King nug da wan imunu epeɗiak danab meiɗlo! Nug anam helo am, aun laa nug nai ele, o nug layag nuhignu eheɗ heum ele, nug dahilppa uɗieb, da genab nai nuhig bappaidlom,” awa attom.

⁵ Apsalom nug haen oh anam hettom. Nug anam haaha, aun laa nug uɗia, Apsalom noobppa dup nokkunu he amu, Apsalom nug pahanab eppeg bahia aɗe, danab amu dup nokkunu elele iitta, hibaitta dayeye, Apsalom nug danab amu ootuqidttom.

⁶ Israel oh ag king anidppeg, nug ahilag nai bappaidkkunu uɗippig ele, Apsalom nug amu oh dilagppa anam heehe, Israel danab oh ag eɗun, Apsalomnu oolag huana heehe, ag Dawitnu oolag huana ii heum.

^7-8 Apsalom nug anam heehe ukke, maɗ waɗele uue, nug king toppa teum. Ta amegppa aum. “Da Aram danab oolagppa Gesur appa dayeye, da keeke laa genabnab hekkulnu nai laa Yawe amegppa qakken inam ami. ‘O Yawe, na heppe, da eɗue tein, Jerusalem daakkul dayeb amu, da Hebron ukken, appa da na noomppa dup noin binan medakkul,’ ami amunu, na appe, da Hebron ukken, da keeke genabnab hekkulnu nai qakken ami amu, da anam bia hekkul,” awa aum.

⁹ Apsalom nug Dawit amegppa anam a, am King Dawit nug aum. “Ena, na maɗoɗ ele ukke!” awa aum. Nug anam aum amunu, Apsalom nug Hebron ukkom.

¹⁰ Nug Hebron teum, amge nug lokkumakppa he, nuhig nai awa ukkak danab ag Israel wan ohppa gona, ag Israel danab amelagppa appig. “Ag trampet baag gaappeg doon, ag danab ah laa oh dooglagnu, ‘Apsalom nug Hebron appa king daatte,’ aig!” aon appig.

¹¹ Amge Apsalom nug Hebron ii ugakka, haen amu nug danab 200 Jerusalemnu ag ele Hebron gokkulagnu oɗ mattom. Nug ag oɗ matte, haen amuppa ag ele oh Hebron goppig, amge ag Apsalom nug eheɗ ha, king abenab aokkunu dabmeum amu, ag amu nakok laa ii dooppig.

¹² Amu ag oh Hebron daanna, Apsalom nug mana mettak hattatta, nug Gilo ted laa Ahitopel, nug appag diig Gilonu aha, Hebron uɗia ehanidkkunu nai me ukke uɗiom. Ahitopel nug nuhig aab ikki am Gilon. Nug Dawitnu dabmak mettak danab laa dayom, ⌊amge nug matu lokkuma Dawit dimetta, Apsalom dim lamittom⌋. Apsalom nug anam heehe, danab baubau ag Apsalom nug mameg King Dawit lamitta, king aben awa, king daakkunu dabmak aoegeg ukke, kuɗum ag uɗin, Apsalom dim lamidppig.

Dawit nug Apsalomnu nai doya, nug aha, Jerusalem uua, laih ukkom

¹³ Danab kuɗum ag gona, Apsalom dim lamittegeg amu, nai awa ukkak danab laa nug uɗia, Dawit amegppa aum. “Israel laa oh bia ag Apsalom dim lamidna, nuhignu oolag hette,” awa aum.

¹⁴ Danab amu nug Dawit amegppa anam a, Dawit nug nuhikkud ehanittak anuqak danab nug ele Jerusalem daappig oh amelagppa aum. “Ahappeg! Ig oolta, laih gokkunigoitte! Aɗinu? Ig amu ii hekkunig, Apsalom nug uɗia, ig ohnab iqeeb mauhkkunig. Ig iguppa nakok daagnig dayeb, Apsalom nug paha aha uɗia, ibppa keeke oo mekka, iqeeb mauhpput, aab okkai imuppan danab ah aqeeb mauhkkulag amunu, ig geha iikku paha ahat gotu! Butti iitta; gemu!” awa aum.

¹⁵ Dawit nug anam a, nuhikkud ehanittak anuqak danab ag nob mena appig. “O ihinig okkai, ihinig king, ig am nahip maɗi nid amunu, na aɗi hekkutnu dabmekkut amu, ig naib dim lamidkkunig,” aon appig.

¹⁶ Ag anam aeg, King Dawit nug wauud amge wauudnab iitta 10 ag daanna, lag enanagnab, ag lag amu, amu lag amunu keeke ele atognoadkkulagnu ana, nug, nug baekkudppa ele ag oh ahan goppig.

¹⁷ King nug ugekke, danab ah laa oh ag nug dim lamittegeg, ag gona, lag laa nakok uma, aab daugppanab daatte, appa tena, ag appa ag baelag yaan daappig.

¹⁸ Ag anam daaegeg, Dawitnu ban daup oh anuqna nug noobppa laippuppa tappan ukkaeg, danab Dawit gumappig, amuam Keret danab, Pelet danab ele, amu danab 600 laa, ag anukka Gat appa Dawit ele daan, dimppa Dawit ele oh uɗippig amu, ag ele nug noobppa goppig.

¹⁹ Amu Dawit nug Gat danab Itai antta, nug amegppa aum. “Na wan laihnu danab, na appan diigppa ii daattem amunu, na ig gottem imu ele oh gokkunignu oot ii daatte dayeb, na eɗun teppe, aabppa king Apsalom ele daaglah.

²⁰ Na tumainab iikku da ehaniɗkkutnu uɗime. Amu gemu da heppi, na ig ele ɗo danab, lag iitta bia da atu atten, da amu ii doottem ele, na ig ele anam oignig am ena iitta amunu, na, na baenadppa ele ag eɗun gokkulag am nai iitta. Amu Kayaknu oo bodoettak kobol, nuhig oo metta ii uuak kobol ele nahip-ppa daakkunu ool daatte.” Dawit nug Itai amegppa anam aum.

²¹ Dawit nug anam aum, amge Itai nug king aum, nug amu nob ma aum. “O dahil naɗi, dahil king, Yawe Nug genab bau daatte, dahil king na ele gemu genab bau daattem, genab amubia na adeppa gona daakkut, da, da nahip maɗi nid, da ele aguppa genab daakkul. Da anam hein, bau daakkultai, o da, da anam hein mauhkkultai, amge da dabmak ii baolipa,” awa aum

²² Itai nug anam a, Dawit nug aum. “⌊Am ena! Na oot hette anamib⌋ laa dim lamadna laippuppa tappan ukke!” awa aum. Dawit nug anam aum amunu, Gat danab Itai, nug, nuhikkud daup, ag oh baelkadppan laa daappig ele, ag Dawit noobppa laippuppa tappan goppig.

²³ Aab dimittimnu danab ah oh ag king, nuhikkud ele ag ukkaegeg anadna, ag huana gaappig. Goppig ele amu, laa ag anuqna gona, ag oolnu noak onig Kidron mataɗadna malaeg, king nug ele mataɗe, ag gona, ag oh atu taɗakppa gokkulagnu goppig.

²⁴ Amu mana mettak danab Sadok, Abiatar ele, Lewi buɗubppan mana mettak danab iitta, ag appa daappig ele amu, ag Dawit ele oh goppig. Lewi buɗubppan mana mettak danab iitta, ag Kayaknu Tituanak Nainu Kunup kontrak inak ele maoppig. Ag Kayaknu Tituanak Nainu Kunup maon nona, aab okkai dimittim meeg dayeye, Abiatar nug doɗ manatta, Kayak medette, aab okkaippan danab ah gokkulagnu ahappig ele, ag oh gona malaeg, nug amu uuom.

²⁵ Ag amu hena malaeg, Dawit nug Sadok amegppa aum. “Na Kayaknu Tituanak Nainu Kunup aon, eɗun aab okkaippa ukke! Yawe Nug dahilnu ena dookkun dayeb, Nug heeb, da eɗue ukken, Tituanak Nainu Kunup amu, Nug laug baula anidkkul,

²⁶ amge Nug dahilnu ena ii dootte dayeb, da Nug eppegppa daattem. Nug dahilppa attem hekkunu ena dootte amu, Nug anamib haɗ!” awa aum.

²⁷ Dawit nug anam anan, nug nai tuɗitta mana mettak danab Sadok amegppa inam ele aum. “Na propet danab daattem amunu, na eɗun, aab okkaippa maɗoɗ ele gokkut. Na, na bekkat Ahimas, aria, Abiatar am nug bekka Jonatan ele, ag oh eɗun ukkeg!

²⁸ Ag gobeppeg, da ukken, atu taɗakppa Jodan leppa, le baag qak daattebppa appa, laa nug ukka, nahip nai ab dookkulnu ameg mekkul,” awa aum.

²⁹ Dawit nug anam aum amunu, Sadok, Abiatar ele aa Kayaknu kunup maoya, eɗuya Jerusalem teya, aa aguppa daapiɗ.

³⁰ Aa eɗuya goya daapiɗ, amge Dawit nug ugakka, Olipnu Qauko taata gayom. Nug ikki hauta, baeg gaɗa ele ii meum. Danab ah oh nug ele goppig amu, ag ele ikkilag hautna, gonana gaappig.

³¹ Ag ukkaegeg, laa nug Dawit amegppa aum. “Ahitopel nug Apsalom ehanidkkunu, nug nug ele daattep,” awa aum. Nug amu a, Dawit doya, nug Yawe unuqitta, “O Yawe, na heppe, Ahitopel nug Absalom dabmak tutukku iittappa ulum nai medakkunu oɗ medattem,” awa aum.

³² Ag anam gona gona, Dawit nug Olipnu Qauko igippa, danab ah aguppa Kayak noobppa dup nona Nug binag meppigppa, nug aguppa te, Ark danab Husai nug matu ta, appa dayom, nug ooppa guittak doya, lamen elab nuhig pattiɗa, gappud ele igippa ma, anam dayaya, Dawit uɗa teum.

³³ Nug uɗa te, Dawit nug amegppa aum. “⌊Na paha gokkutnu elele iitta amunu,⌋ na da ele oh gokkunih am uug laa dahilppa ana bekku bia.

³⁴ Amge na eɗun, Jerusalem daappe, Apsalom nug eɗua Jerusalem teeb, na nug amegppa inam akkut. ‘O king, da nahip maɗi nid laa daakkul hettem. Da na mamenu maɗi nid daami, amge gemu da nahip maɗi nid daakkulnu ool daatte.’ Na anam appe dookku. Na anam hekkut dayeb amu, na da ehaniɗna, Ahitopel nug ulum nai Apsalom mettebeb, na dabmak amu heppe, na qekkunu hekkut.

³⁵ Mana mettak danab aɗit Sadok, Abiatar ele aa appa daaglah amunu, na kingnu lag enanagnab, na appa nai aɗi dookkut amu, na aa amelahppa akkutnu elele.

³⁶ Sadok bekka Ahimas, amu Abiatar bekka Jonatan, aa ele appa mamelti ele daatteb amunu, na aɗi nai doon heppe, nid aɗit amu aa uɗiya, apeɗ dookkul,” awa aum.

³⁷ Dawit nug anam aum amunu, nug layag Husai nug eɗua ukke, Apsalom nug Jerusalem aab okkaippa teete, nug ele teum.