2 Samuel 14 - Nobonob Baibel

Dawit nug he, Absalom nug eɗua Jerusalem uɗiom

¹ Amu Seruia bekka Joap nug Dawit Apsalomnu oo huana heehe, nug eɗua anidkkunu oo okkai dayom ele doyom

² amunu, Joap nug he, laa nug aab onig Tekoa ukka, nug appanu ah doyak dabmak ena ele omale uɗipiɗ. Ah amu nug uɗie, Joap nug ah amu amegppa aum. “Na mahiaya oiyak bia ippu hak hena, na mahiaknu lamen mena, na beɗun anttak ena daakkunu goɗen laa beɗun ii laidmana, auntai nahip-ppan laa mauhe, haen elab na dub mena oittem bia ippu hak hena,

³ na king toppa tena, na da gemu aɗi madikkutnu ippunidkkul amu, na nug amegppa mattie!” awa aum. Joap nug anam mattia, nug ah amu Dawit amegppa aɗi madikkunu ippunittom.

⁴ Joap nug anam he, Tekoa ah amu nug aha, King Dawit toppa ta, nug king binag mekkunu nug laippun gateg qaun o, gomela, iɗu wanppa ma, nug aum. “O dahil naɗi, dahil king, na ehaniɗkkutnu ool daatte,” awa aum.

⁵ Nug anam a, King Dawit nug, “Aɗi uug nahip-ppa beum daatte?” awa oɗ mette amu, ah amu nug aum. “Da am genab ah qab daattem. Da gamul mauhom.

⁶ Da, da am nahip maɗi ah amu, da nid danab aɗit ele. Amu da bekkalaɗ aɗit amu, aa datta oiya, aa nug qeyaya, auntai laa nug aa otiatak iitta daye, laa nug laa qe mauhom.

⁷ Am gemu da gamulnu aab ikki laa oh ag ahan uɗin, ag da amelppa, ‘Ig nug qepput mauhkkunu amu, na bekkat, nug layag qe mauhom ele amu, na nug ig mekke!’ aon atteb. Ag anam atteb, amge oolagppanab ag ihinig wan aoglagnu oolag hette amunu, ag da bekkal qeppeg mauhkku dayeb amu, ag wan amu aoglag. Ag da bekkal qeppeg mauhkku dayeb amu, kobol amuppa ag heppeg, da dakkanab, ehanittak laa iitta daakkul; aab ottag laippuib qaɗabppa dayebeb, laa nug ukka ottag amu aokku, da qaɗab amubia daakkul. Ag amu hekkulag dayeb amu, da gamul onig Israel ooppa ii daama. Ag amu hekkulag dayeb am, da gamul nug ii dayom bia daakku,” awa aum.

⁸ Ah nug anam mattie, King Dawit doya, nug aum. “Na ahan lakka ukke! Da uug imunu nai babaitten medakkul,” awa aum.

⁹ Dawit nug anam aum, amge Tekoa ah nug aum. “O dahil naɗi, na king. ⌊Am da doottem, na laa nug da bekkal qeeb mauhmanu akkut dayeb amu, na ɗo laa aakku tippalkkut amunu, uug imu babaittaknu amu, aab laa am laa beɗuppa daakku dayeb,⌋ aab amu da beɗulppa, da baeladppa beɗulagppa ele dayaɗ! Aab na beɗunppa, nahip gumikkakppa ele aib dayom,” awa aum.

¹⁰ Ah nug anam aum amu, Dawit nug aum. “⌊Na amunu baula aib dabmeme.⌋ Laa nug keeke imunu na amenppa baula ab amu, na omalppe gumiɗya uɗipeɗ, nug baula uug iinab mettama,” awa aum.

¹¹ Nug anam a amu, ah nug aum. “O dahil king, anam dayeb, laa nug qe mauhak danab nob ma qeeb mauhkkunu daatte amu, nug amu hemanu na Yawe, nahip Kayak, na Nug onig aon, nahip nai ɠagattag qettan, am laa nug da bekkal qeeb ii mauhmanu akkutnu ool daatte,” awa aum. Nug anam a amu, king nug aum. “Yawe Nug genab bau daatte, genab amubia laa nug eheɗ nakok laa na bekkat beɗuppa iinab hema,” awa aum.

¹² King nug anam a amu, ah nug aum. “O dahil naɗi, na king, na appe, da, nahip maɗi ah, da nai nakok laa madikkul hettem,” awa aum. Nug anam a, king nug aum. “Na appe,” awa aum.

¹³ Dawit nug anam a amu, ah nug aum. “Na laa nug da bekkal qeeb mauhmanu ame, amge Kayaknu danab ah, Israel, ag oh ag na bekkat nug eɗua uɗikkunu oolag hette. Na ame, amuppa na nai aɗit ele madittem. Na da ehaniɗna, laa da bekkal qeeb mauhmanu attem, amge na bekkat, nug eheɗ heumnu laih piɗe daatte amu, na nug eɗua uɗikkunu ii attem.

¹⁴ Le wanppa gokkaɗe, iitta me, danab nug eɗua aokkun elele iitta, amubia ig oh mauhkkunigoitte, amge Kayak Nug haen oh danab mauhkkunu daatte he ii mauhtte. Iitta! Nug heeb, danab ah ag nuhigppanu uma daatteb ag eɗun dona, Nug gumidna daaglagnu ib maditte.

¹⁵ O naɗi, dahil na dahil king, danab ah ag heeg, da baɗami amunu, da na anitten madikkulnu uɗimi. Da, da nahip maɗi ah amu, da inam dabmemi. ‘Da king amegppa uug dahil appi doyeb, da nug aɗi haaha ehaniɗkkunu appi amu, nug anam hekkutai,’ dabmemi.

¹⁶ Amu da imu ele dabmemi. ‘King nug dahil nai dookku amunu, Nug ehaniɗa, laa ag da, da bekkal ele nitappeg mauhɗa, i wan Kayak i aunih daakkunu metom eleppa ii daamɗanu hetteb ele amu, nug heeb, ag hekkulagnu elele iitta daaglag,’ dabmemi.

¹⁷ Amu da, nahip maɗi ah, da ele dabmemi. ‘Dahil naɗi, dahil king, nug Kayaknu engel bia, nug aɗi kobol am ena, aɗi kobol am nau amu, nug oo maittak awaknu ehah awom daatte amunu, nug heeb, da oolppa uug iitta, maɗoɗ ele daakkul,’ aakku dabmemi,” awa aum. Nug anam awowa amu, nug nai tuɗitta, Dawit amegppa aum. “Yawe, Nug nahip Kayak amu, Nug na ele daaglahnu ool daatte,” awa aum.

¹⁸ Tekoa ah doyak dabmak ena ele nug anam a amu, King Dawit nug aum. “Da keeke laanu oɗ medappi, na amunu nob ii lokkummnanu attem,” awa aum. Nug anam a, ah nug aum. “O dahil naɗi, na king, na aɗi appe dookkul,” awa aum.

¹⁹ Ah nug anam a amu, Dawit nug oɗ mettom. “Joap nug na ame bia appe dookkulnu aumte?” awa oɗ mettom. Oɗ mette, am ah nug aum. “O naɗi dahil, na king, na gemu genab bau daattem, genab amubia laa nug hambuppuidkkunu elele iitta. Aɗi am genab daatte amu, na anidkkut. Ao, nahip maɗi nid Joap nug da inam hekkulnu ana, nug da aɗi nai na amenppa akkulnu ele da amelppa aum.

²⁰ Amge nug amu heumnu diig am, uug gemu daatte, uug am iitta mekkunu heum. Na, na dahil naɗi, na Kayaknu engel nug doyak dabmak ena ele, na amubia daattem. Na anam daanna, na aɗi keeke, aɗi kobol wan imuppa bette amu, na amu ohnab doottem,” awa aum.

²¹ Ah nug anam a, King Dawit nug Joap amegppa aum. “Am ena, da na dabmeme bia hekkul. Na gona, nid bau Apsalom omalppe uɗieɗ!” awa aum.

²² King nug anam a amu, Joap nug king binag mekkunu laippun gateg qaun o, gomela, iɗu wanppa ma, nug king itittom. Itittowa, nug king amegppa aum. “Na, na dahil naɗi, na king, na gemu da na aɗi hekkutnu oɗ mettami, na amuib hekkutnu attem amunu da, nahip maɗi nid, da gemu na dahilnu ena doottem, da amu aakku doottem,” awa aum.

²³ Joap nug anam awowa, nug aha ukka, nug Gesur ukka, nug Apsalom omala, eɗua Jerusalem uɗiom.

²⁴ Amge Joap, Apsalom ele a Jerusalem teeh, King Dawit nug Joap amegppa aum. “Apsalom nug ippa uɗia, da ii aniɗma. Iitta. Nug laugppa ukka dayaɗ!” awa aum. Nug anam aum amunu, Apsalom nug ukka, laugppa ta dayaya, nug ukka, Dawit anidkkunu elele iitta amunu, nug mameg ii anttom.

Apsalomnu kaya

²⁵ Amu Israel ooppa danab laa nug Apsalom bia ii dayom. Nug am iɗu tuqaknab; beɗu ele, am anttak nuhig enanag. Beɗu ohppa duɗupa, keeke kaliak, o eheɗ nakok laa ii dayom. Nug anam daye, danab ah kuɗum ag nug am anam amunu, ag nug binag meppig

²⁶ Am nug ikki uɗug elabnab dayom. Anam daye ukke, haen atten atten laala, ikki uɗug am uugnab doyom, diig amunu haen amuppa nug haen anen anenppa he, danab otaɗom. Nug otaɗe ukka, ikki uɗug nug otaɗom ele amu, ikki uɗug amunu uug am 2.3 kilogram. Uug amuam king uugnu melemel meum, am amu dim lamittom.

²⁷ Apsalom nug nid ele. Nug bekkod ewam, aɗeg laippu ele. Aɗeg onig am Tamar. Nug okkai ma, nug ah iɗu tuqaknab ele dayom.

²⁸ Anam daye ukke, Apsalom nug maɗ aɗit Jerusalem appa dayaya, nug king gumitta taknu aib dayom amunu, nug king nakok laa ii anttom.

²⁹ Apsalom nug king nakok laa ii antta, nug Joap ukka, King Dawit amegppa nug king anidkkunu ab dookkunu, Joapnu nai me ukkom, amge Joap nug Apsalom toppa ukkak uua, ii ukkom. Nug ii ukkom amunu, Apsalom nug baula Joap nug gumitta uɗikkunu nai me ukkom, amge Joap nug haen amuppa ele ukkak uua, ii ukkom.

³⁰ Joap nug anam he, Apsalom nug nuhikkud maɗi nid amelagppa aum. “Antteg! Joapnu dad okkai tomppa nug bali eppom ele amu, dad amuam dad okkai dahil heqo laihppa daatte amunu, ag gona, bali dad amu amotppeg ewaɗ!” awa aum. Apsalom nug aum amunu, nuhikkud maɗi nid ag dad amu amoteg ewom.

³¹ Ag anam heeg, Joap nug Apsalom laugppa ta, nug oɗ mettom. “Aɗinu nahip maɗi nid ag dad dahil amoteg, ewa iitta meum?” awa oɗ mettom.

³² Joap nug anam a, Apsalom nug aum. “Antte! Da na nai imu aon gona, king medakkutnu oninppa emi. Nai amuam inam. ‘Aɗinu da Gesur uue uɗimi? Da na ii anidttem amunu, da appaib daalom am ena.’ Da na anam king amegppa akkutnu na oninppa emi. ⌊Da na gona, king amegppa anam akkutnu hemi, amge na ii dabmenana, ii uɗime amunu, da hei, dahil maɗi nid ag kobol amu heppig.⌋ Amge gemu amu, da king anidkkulnunab dabmettem. Da anidppi, da eheɗ laa hemi dayeb amu, nug da iweb mauhei!” awa aum.

³³ Apsalom nug anam a, Joap ukka, King Dawit amegppa amu a, Dawit nug Apsalom onigppa e, Apsalom nug uɗia, Dawit noobppa gateg qaun o, gomela, iɗu wanppa meum. Nug anam ha, eɗua ahe, King Dawit nug Apsalom ootuqittom.