2 Samuel 13 - Nobonob Baibel

Amnon nug Tamannu eheɗ heum

¹ Amu dimppa amu, Dawit bekka onig Amnon nug eheɗ heum. Am inam. ⌊Amnon, Apsalom ele aa mamelah am Dawit, amge aa anilti piɗe piɗe.⌋ Am Apsalom appinag onig Tamar amu, nug ah iɗu tuqak ele, amu Amnon nug Tamarnu oo mauhom.

² Amnon nug anam nuhignu oo mauhom, amge Tamar nug ah makkun ⌊aya daaglahnu am ɗo ele⌋ amunu, Amnon nug Tamar ele attemtai laa hekkulahnu ib laa iinab antta, nug oo uug ele daye ukke, nug ebehi teum.

³ Anam daye amu, Amnon nug layag laa ele, nug Dawit awag Sama bekka onig Jonadap. Amu Jonadap nug hanhan aɗi hekkunu oo heum, aɗi aokkunu oo heum amu, nug anamib bekkunu ib digdigppa mattiaya keeke awom.

⁴ Jonadap nug hanhan oo hak nuhig am anam awawa oiyom, Amnon nug beɗu ena iitta anam daye, Jonadap nug antta, nug Amnon amegppa aum. “Na hanhan buttua ahan oittem, am na beɗun am gai-iitta oittem anidttem. Na king bekka, am aɗinu na anam oittem? Na amunu diig da amelppa appe dookkulnu ool okkai daatte amunu, appe doye!” awa aum. Nug anam a, amu Amnon nug nob ma aum. “Da amal appinag Tamarnu ool mauhtte, ⌊amge ib iitta⌋,” awa aum.

⁵ Nug anam a amu, Jonadap nug aum. “Na nahip niiak abenppa tena, na oɗe meme bia niippe, amu na mamen nug na anidkkunu uɗikku. Nug uɗieb amu, na inam akkut. ‘Da appinal Tamar nug uɗia, nug ee da lakkulnu da noolppa bappaittebeb da anidppippi, nug awa dahilppa uɗia, nug eppegppanab oɗelppa meebeb lakkulnu ool daatte.’ Na anam appe doyaɗ!” awa aum.

⁶ Jonadap nug a, Amnon nug oɗe meum bia haaha, niiak abenppa niieye, King Dawit nug anidkkunu uɗiom. Uɗie, Amnon ele nai mattiya amu, Amnon nug amegppa aum. “Da appinal Tamar nug uɗia, nug bret enanag laa da noolppa bappaittebeb da anidppippi, nug eppegppanab ee amu da oɗelppa meebeb lakkulnu ool daatte,” awa aum.

⁷ Nug anam a, Tamar nug kingnu lag enanagnab, appa dayeye, Dawit nug nai inam Tamar dookkunu me ukkom. “Na ahan, na awan Amnon laugppa gona, nuhig ee appa babaitte!” Dawit nug nai amu Tamar dookkun me ukkom.

⁸ Dawit nug nai amu me ukke doya, Tamar nug aha, awag Amnon laugppa ukka ta, Amnon nug niiak abenppa niieye anttom. Antta, nug Amnon noobppa bret amu hekkunu plaua, keeke elele kabolia manom.

⁹ Nug mana mala, nug bret manaknu keekeppanu awa, tappiɗppa ma, Amnon medakkunu heum, amge nug uuom. Nug ii laum. Nug ii lanana, nug nuhikkud maɗi nid maɗi ah ele oh ag laih gokkulagnu a, ag oh goppig.

¹⁰ Ag ukkaeg, Amnon nug Tamar amegppa aum. “Da na eppenppanu ee amu lakkulnu na ee am dahil niiak aben imuppa aon doppe lai!” awa aum. Nug anam a, Tamar nug bret nug manom amu, nug bret amu awa, nug awag Amnon medakkunu nuhig niiak abenppa ukkom.

¹¹ Nug Amnon lakkunu awa ukka, medakkunu heum, amge Amnon nug bret ii awom. Iitta. Nug Tamar aɗa aum. “O da appinal, doppe i niiɗu!” awa aum

¹² Nug anam a amu, Tamar nug nob ma aum. “O awai, na kobol Kayaknu doyak iittappa inam aib heme! Na wagai mena heppe, i aib niimuɗ! Aɗinu? Israel ooppa kobol imu bekkunu am ena iittanab iitta! Na kobol nau, eheɗ inam bia aib heme!

¹³ Na imu hekkut dayeb am dahilnu attemnab? Da uɗa nak nau guittak ele doyeye, uukkulnu ib laa iitta. Am nahipnu ele attemnab? Na imu hekkut am, Israel oh ag nahipnu, ‘Nug am danab nau,’ akkulag. Na kobol nau imu ii hemananu, na king oɗ medappe, da na waat daakkulnu ab, i ewau daagnihnu oɗ medattem. Aɗinu? Da doottem, na king oɗ medappe, nug da na waat daakkulnu am aib ii ama,” awa aum.

¹⁴ Tamar nug anam aum, amge Amnon nug nuhig nai dookkunu uuom. Nug uua, nuhig ɠagattag am Tamarnu ɠagattag eɗittom amunu, nug wagai me, Tamar ele niipiɗ.

¹⁵ Amnon nug anam ha male, nug nuhig dabmak eɗue, Tamarnu nau ninig ele doyom amunu, tatam nug Tamarnu oo mauhom, gemu nug nuhignu nau ninig ele doyom; am nau ninig ele doyak nuhig, amuam oo mauhak tatamnu eɗittak, huanaknab dayom. Nug anam doya, nug Tamar amegppa aum. “Ahan ukke!” awa aum

¹⁶ Nug anam a, Tamar nug nob ma aum. “Iitta! Aib! Na eheɗ iikku heme, amge na lamiɗppe gokkul dayeb amu, eheɗ hak amu, am eheɗ hak tatam heme eɗidkku,” awa aum. Nug anam aum, amge Amnon nug nuhig nai dookkunu uuom.

¹⁷ Nug dookkun uua, nug nuhig maɗi nid nug ehanittom ele amu, nug nug onigppa e uɗie, nug amegppa aum. “Na ah imu lamidppe, dimittim ukkeb, na od manan, lok qe!” awa aum.

¹⁸ Amnon nug anam aum amunu, nuhig maɗi nid nug Tamar lamitte ukke, nug od mana, lok qeum. Amu haen amuppa Tamar nug lamen elab bala kuɗum ele takka oiyom. Aɗinu? King aɗekkud makkun daappig, ag lamen anam takkan oippig.

¹⁹ Tamar nug lamen anam takka oiyom amu, nug lamen amu pattiɗa, nug uhuɗ igippa ma, nug eppeg oh igippa ma, ⌊dup noa,⌋ huana gayaya ukkom.

²⁰ Nug anam he, Apsalom nug amegppa aum. “Na awan Amnon nug nahip-ppa eheɗ heum doottem. O da appinal, nug na awan, gemuib na toettan daye! Nug eheɗ heittomnu na gemu aib dabmak nittom!” awa aum. Nug anam a amu, Tamar nug awag Apsalom laugppa, oo doyak ele nukka, piɗe bia aakku dayom.

²¹ Amu haen King Dawit nug Amnon heumnu doya amu, nug oppoɗi huanak be, ameg kokoɗ eppom.

²² Amu Apsalom nug, nug Amnon amegppa nai ena nakok laa, o nai eheɗ nakok laa ii mattiom, amge nug Amnon he, nug appinag uɗa nak nau guittak ele doyaya oiyom dabmeum amunu, nug Amnonnu nau ninig ele doyom.

Apsalom nug Amnon qe mauhom

²³ Amu anam daye ukke, maɗ aɗit uue, Apsalom nug danab laa ag nuhikkud sipsip uɗilag otaɗkkulagnu onilagppa e, ag aab laa onig Balhasor, Epraim guguittak, ag appa sipsip uɗilag otaɗegeg, Apsalom nug king bekkod oh ag appa gona, oo gamag ahaknu hobul nug heeb anidkkulagnu aum.

²⁴ Amge Apsalom nug tatam king toppa ta, amegppa aum. “Da, nahip maɗi nid, da hei, danab laa ag dahil sipsip uɗilag otaɗtteb. Ag otaɗegeg, da hobul ahilag hekkul hettem, amu na, nahipad anuqak danab ele ag oh appa goppeg, ig oh hobul amuppa daagnignu oɗ medattem,” awa aum.

²⁵ Apsalom nug anam a amu, King Dawit nug aum. “O bekkal, iitta! Ig oh gokkunig dayeb, na ihinignu ee keeke bappaidkkutnu am uug okkai na mettagnig,” awa aum. Dawit nug anam a, Apsalom nug gokkulagnu wagai meum, amge Dawit nug nuhig dabmak ii eɗuom. Dabmak nuhig ii eɗue, ii gomananu tuɗitta aum, amge nug Apsalom hobul amu hekkunu itittak ena mettom.

²⁶ Dawit nug anam he amu, Apsalom nug aum. “Na ii gokkut dayeb amu, na appe, Amnon nug ig ele ig oh hobul amuppa daagnignu oɗ medattem,” awa aum. Apsalom nug Dawit anam oɗ mette, Dawit nug aum. “Aɗinu nug na ele oh gokkulah?” awa oɗ mettom.

²⁷ Dawit nug anam aum, amge Apsalom nug wagai meeme, Dawit nug Amnon, nug bekkod laa oh ele gokkulagnu aum.

²⁸ Dawit nug ag oh gokkulagnu aum amunu, Apsalom nug nuhikkud danab amelagppa haknunab nai inam aum. “Amnon nug wain nakok okkai lab, kaaka nakok qeeb, da ag amelagppa, ‘Ag Amnon qeig!’ appi amu, ag qeppeg mauhaɗ! Ag aib baɗappig. Aɗinu? Da ag inam hekkulagnu iite ai dooppig? Ag ɠagattag daan, ag oolagppa ɠagattag doyeg! Ag heig!” awa aum.

²⁹ Apsalom nug aum amunu, nuhikkud danab ag nug oɗe dim lamidna, Amnon qeeg mauhom. Ag qeeg mauhe, king bekkod laa oh ag baɗan, ahan, miul ahilkad attan tena, oolna goppig.

³⁰ Ag oolna Jerusalem tekkulagnu ukkaegeg, danab laa nug tatam Jerusalem ta, Dawit amegppa aum. “Apsalom nug na begapad ohnab aqe mauhppig. Laippu laa ii daatte,” awa aum.

³¹ Nug anam a, Dawit doya, nug hibaitta aha, lamen pattiɗa, ukka wanppa niiom. Nug anam he, nuhig maɗi nid ag oh ele lamen pattiɗadna, nug talilidna hippaidna daappig.

³² Ag anam heppig, amge Dawit awag Sama bekka Jonadap nug Dawit amegppa aum. “O danab naɗi. Na Apsalom nug na begapad oh aqe mauhppig aib dabmeme. Iitta! Amnon nug nukka mauhom. Aɗinu? Amnon nug Apsalom appinag Tamarnu eheɗ heum, haen amuppa Apsalom nug Amnon qeeb mauhkkunu dabmaama oiyeye uɗiom.

³³ O dahil naɗi, na dahil king, na nai laa begapad oh mauhppignu nai uɗiom amu, na nai amunu aib dabmeme, aib oot uug naunab dayom. Aɗinu? Amnon nugib mauhom,” awa aum.

³⁴ Amu nug bekkod dilagnu nai anam Dawit toppa te, Jonadap nug nai amu Dawit amegppa mattiom, amge haen gamag amuppa Apsalom nug oola ukkom. Anam daye ukke, danab nug aɗi uɗitte anittak danab amu, nug neekke ukke, danab kuɗum qaban uɗitteppanu uɗinna, qauko nakok igippa neegeg anattom. Anatta, nug ukka, Dawit amegppa aum. “Da danab kuɗum Horonaim ukkaglagnu ibppa, qauko nakok heqo laihppa uɗiegeg anadmi,” awa aum.

³⁵ Nug anam a, Jonadap nug king amegppa aum. “Antte! Da, nahip maɗi nid, da ami amubia na begapad ag uɗin, iikku bekkulagnu uɗitteb,” awa aum.

³⁶ Nug nai mattia male, haen amuppanab king bekkod ag uɗin benana, ag huana mahinna beeg, king nug nuhig maɗi nid ele ag huana gaappig.

³⁷ Dawit nug bekkanu deɗ kuɗum mahiom, amge Apsalom nug oola, Amihut bekka Talmai, Gesur dilag king, nug ele daaglahnu ukkom.

³⁸ Am Apsalom nug oola, Gesur ukka, appa maɗ ewam dayom.

³⁹ Anam daye ukke King Dawit nug Amnonnu oo meum amunu, nug Apsalom anidkkunu oo huana heum.