2 Samuel 12 - Nobonob Baibel

Propet Natan nug Dawit daug batom

¹ Yawe Nug ena ii doyom amunu, Nug he, propet Natan nug aha, Dawit toppa ukka ta, nug amegppa aum. “Aab laappa danab aɗit daapiɗ, laa am enub danab, laa am daɗek danab.

² Enub danab nug sipsip, makau ele huanak.

³ Daɗek danab nug keeke iittanab, nug sipsip balat laippu, nug daden meum, amu aakkuib. Nug sipsip balat laippu aakkuib, amu nug begitta auta awewe, sipsip nug danab amu, amu nug bekkod ele oh oippig. Danab amu nug ee nuhig laih laa awa, sipsip mette laum. Kap nuhig, amuppa ele le laum. Danab nug sipsip amu eppegppa aɗe niiom. Nug danab amu aɗeg bia dayom.

⁴ Anam daye, deɗ laa ɗo danab laa nug enub danab laugppa ta dayeye, enub danab nug sipsip nuhig o makau laa qa, ee ha, ɗo danab metteb lakkunu uua, nug daɗek danabnu sipsip balat aɗitta awa, ɗo danab lakkunu qa, ee nuhig babaittom,” awa aum.

⁵ Natan nug anam a, Dawit oo huana nauhe, nug aum. “Yawe genab bau daatte, genab amubia danab amu nug mauhkku am elele.

⁶ Nug eheɗ nau heum, nug oo doyak nakok laa ii doyaya heum. Nug sipsip balat laippu qeum amunu, nug sipsip balat waɗele daɗek danab amu eɗua medakkuoitte. Nug amu hekkunu iinab uuma,” awa aum.

⁷ Dawit nug anam a amu, Natan nug eɗua amegppa aum. “Danab kobol nau amu heum am naib! Yawe, Israel dilag Kayak, Nug na amenppa atte. ‘Da na Israel dilag king daakkutnu goɗen gokkaɗakppa tituanitti, na king daattem. Da hei, Saul ii nitte mauhme.

⁸ Saul, nug nahip okkai dayom amu, da nuhikkudppan oh, amu nug wauud, ag na waatad daaglagnu ele da na mettami. Da na Israel dilag king, Juda dilag king ele daakkutnu ehah mettami. Da amu oh mettami, amu na keeke amunu, “Am keeke nakok,” doome dayeb amu, na oɗ meɗalom, da amu tuɗitten, laa okkainab ele mettalom.

⁹ Amunu aɗinu na da Yawe, na dahil nainu ena iinab doon, eheɗ nau amu heme? Na hee, kekeɗ ag Hit danab Uraia qep elabppa qeeg mauhom. Ao, ag nug qeeg mauhe, na nug wau, nahip ah daakkunu aome. Ge, na hee, Amon danab ag qep elabppa Uraia qeeg mauhom.

¹⁰ Na amu heme, na dahilnu ena iinab doon, na Hit danab Uraia wau nug nahip ah daakkunu aome amunu, butti aɗi alag ebqak nahip ohppa amu, buɗunppan laa, o laihppan laa ag na buɗunad laala aqappeg mauhkkulag.’ ” Yawe Nug Dawit amegppa Natan oɗeppa anam mattie doyom.

¹¹ Natan nug Kayaknu nai Dawit amegppa anam awowa, nug tuɗitta aum. “Yawe nug inam ele atte. ‘Na baenadppa dilagppanab uug naunab beeb dookkut. Da heppi, na amenppanab laa na baenadppan laa nug na waatad diieb, amunppa, danab ah noolagppa ag nug ele niiglag.

¹² Na eheɗ heme amu, na lokkumakppa heme, amge da hekkulnu attem amu, da Israel danab ah oh noolagppa, ag anidkkulagnu hekkul.’ Yawe Nug anam atte,” awa aum.

¹³ Natan nug anam Dawit amegppa a, Dawit nug aum. “Da Yawe, nuhigppa hipunin aakku hemi,” awa aum. Awa a amu, Natan nug ⌊Dawit nug oo eɗua auta autanab awe doya, nug⌋ aum. “Yawe Nug hipunin nahip aakku uhuqa mettom. Na ii mauhmana,

¹⁴ amge na Yawe, nuhignu ena iinab doon hee, kekeɗ nuhig ag nuhignu, ‘Keeke hamunab,’ dootteb amunu, nid danab nahip kobol imuppanu amu, nug mauhkku. Nug bau ii daama,” awa aum.

¹⁵ Natan anam ana mala aha, lakka ukke, Yawe Nug he, Dawit bekka Uraia wau menuom amu, nug oɗe meum.

¹⁶ Oɗe me, Dawit nug Kayak heeb, nid amu eɗua ena daakkunu oo doyakppa unuqittom. Nug ee oh lanaknu kud ma dayaya, tuqan ohppa nug laug oo laa, nug amuppa wanppa niiom.

¹⁷ Dawit nug anam heehe, nug baekkudppan ikki danab ag appeg, nug ahakkunu nuhigppa gona heeg, nug ahakkun uuom. Nug uua, nug ag ele ee lakkulagnu ele uua, ii heum.

¹⁸ ⌊Dawit nug anam heum, amge⌋ deɗ eblaih aɗitppa nid amu aakku mauhom. Nid mauhe amu, Dawitnu maɗi nid ag nug amegppa anam akkulagnu baɗappig. Aɗinu? Ahilag dabmak am inam dayom. “Nid amu bau dayeye, ig Dawit amegppa ehanittak nai mattiutut, nug ii awom. Nakok laa ii dabmeum. Gemu nid aakku mauhom amunu, ig nug amegppa attem hetata, amunu madipput dookku? Ig anam helom am, nug nukka nug beɗuppa attem hekku?” aon appig

¹⁹ Ag anam otiptip-ppa mattiegeg, Dawit anatta, nid mauhom dabma, nug oɗ mattom. “Nid aakku mauhomte?” oɗ mattom. Oɗ matte amu, ag appig. “Yo, nid aakku mauhom,” aon appig.

²⁰ Ag anam aeg, Dawit nug wanppanu ahom. Nug aha, le layowa, beɗu babaitta mala, nug lamen dubuttid iitta takka, nug Yawe laugppa ukka, Yawe noobppa dup noa binag meum. Nug amu ha mala, nug eɗua, lakka ukka, nuhig maɗi nid ee mettaglagnu a, ag mettaeg laum.

²¹ Nug anam he, nuhig maɗi nid ag nug oɗ medappig. “Na hettem ele amu, na attemununab hettem? Nid amu nug bau dayom, haen amuppa na ee ohnu kud mena ii lanana gaanna daame, amge gemu nid amu mauhe, na ahan, ee lattem.” Ag anam Dawit oɗ medappig.

²² Ag anam oɗ mettaeg, Dawit nug amelagppa aum. “Nid amu nug bau dayeye, da, ‘Yawe Nug dahilnu oo gai-iitta doya oo meɗa ehaniɗeb, nid iitai mauhkku,’ dabmemi amunu, da ee ohnu kud mein daye gaami.

²³ Amge gemu nid amu aakku mauhom amunu, da tuɗitten, ee ohnu kud mein daakkulnu am ehanidkkute? Da heppi, nug mauhakppanu eɗua ahakkute? Da qinob nug daatteppa gokkul, amge nug dahilppa eɗua ii uɗima,” awa aum.

²⁴ Amu oh ba ukke amu, Dawit nug wau Batseba oo doyak ge iitta doomanu ehanitte, nug ele oh niipiɗ. Aa niiya, dimppa Batseba nug nid menue, aa nug onig Solomon ataɗpiɗ. Amu Yawe Nug Solomonnu oo mauhom.

²⁵ Yawe Nug nid amunu oo mauhom amunu, Nug propet Natan nug ukka, nid onig Jedidia ataɗkkunu me ukkom.

Dawit nug Amon dilag aab okkai onig Raba eɗittom

²⁶ Amge amu oh ba ii malom, haen amuppa Joap nug Raba appa Amon danab ele ban heppig. Ag ban henana, aab amu ooppa aben aɗ ɠagattagnab ele amu Joap eppegppa daakkunu daye,

²⁷ nug nai inam Dawit dookkunu me ukkom. “Da Raba ele ban heta, da aben danab ah ag le itatteb ele, da aben amu aomi, da eppelppa daatte

²⁸ amunu, na Israel dilag ban danab laa oh onilagppa eppe, gumiɗna uɗippeg, ag doppeg, na heppe, nahipad daup oh ag aab okkai imu oo mattan aqaknu maadna daappeg, na aab okkai imu eɗidkkut. Iitta dayeb, da aab okkai imu eɗidppi, danab ah ag da aab imu aominu onil okkai meɗaglag.” Joap nug Dawit nai amu dookkun me ukkom.

²⁹ Joap nug nai amu me ukke, Dawit doya he, nuhikkud daup laa oh uɗieg, ag ukkaeg, Raba ele ban hena, ag eɗadppig.

³⁰ Amu Dawit nug king haɗ Amon dilag king igippan aɗitta awa he, laa nug igippa meum. King igippan bala amuam golppa hak, nuhig uug am 34 kilogram. Gol amu qaɗeppa men digdig, daden nob okkainab ele qataqak daappig. Amu Dawit nug en okkai, naɗi ele aab okkai amuppanu awa ukkom.

³¹ Amu Dawit nug ele he, aab amuppan danab ah ag uɗat ɠagattag, hebebppa, hal aenppa hak, soppa ele henana, ag brik, lag keeke haknu hadappig. Nug aab okkai amuppa anam ha, nug Amon dilag aab ohppa ele anam heum. Nug anam ha male, Dawit nug nuhikkud daup oh ele ag eɗun, Jerusalem goppig.