2 Samuel 11 - Nobonob Baibel

Dawit, Batseba ele

¹ Aria, anam daye ukke, aam haen digmekkunu heehe, haen amu king ag ahan, ban haknu gotteb ele, haen amuppa Dawit nug he, Joap, Dawitnu daup dilag okkai laala, am Israel dilag daup oh ele ag Amon ele ban hekkulagnu goppig. Ag gona, ban henana, ag Amon dilag daup aqaeg mauheg, aab okkai ahilag Raba heppeg nauhkkunu oo mattan aqaknu maadna daappig. Ag anam heppig, amge Dawit nug Jerusalem appa dayom.

² Dayaya, tueb laappa Dawit nug niiak aben nuhigppanu aha, nug laug, koɗokko uɗem ukkak ele amuppa ta oiyom. Nug oiyaya, neekke ukke, nug ah laa le layeye anttom. Ah amu nug iɗu tuqaknab ele.

³ Anttowa, Dawit nug he, laa nug ah amu nug aun am diig dookkun ukkom. Ukka doya, eɗua uɗia, nug Dawit amegppa aum. “Ah amu nug Batseba, nug Eliam aɗeg. Nug Hit danab Uraia wau,” awa aum.

⁴ Nug anam a, Dawit doyowa, nug nuhig ehanittak laala ag gona, ah amu omalna uɗilagnu he goppig. Nug he ukkaeg, ah ele oh uɗieg, Dawit nug ah amu ele niipiɗ. Ah amu nug ii uɗiom haenppa kalam qak nuhig male, nug Kayak ele ouqeya daaglahnu elele iitta daamanu, nug ahilag ɗo bia nug Kayak ele ouqa dayaknu elele daaglahnu babaittak oh ha malom. Dawit nug ah amu ele niioya, ah amu nug aha, eɗua nug laugppa ukkom.

⁵ Ah amu nug eɗua, nug laugppa ukka daye ukke, nug oo ele daya antta, nug nai laa Dawitnu, “Da ool ele,” laa eppegppa me, nug awa ukka, Dawit mettom.

⁶ Nug nai amu me ukke, Dawit doya, nug nai laa Joapnu, “Na heppe, Hit danab Uraia nug uɗiaɗ!” nug nai amu nai awa ukkak danab mette, awa ukka, Joap mette, Joap nug he, Uraia nug Dawit toppa teum.

⁷ Uraia nug uɗia te, Dawit nug Joap attem dayomnu oɗ metta, daup ag ele attem daappignu oɗ metta, ban amu attem ukkomnu ele oɗ mettom

⁸ Dawit oɗ mette, Uraia nug amunu mattia male, Dawit nug aum. “Na lautppa gona, le layona, hik nakok aokkut,” awa aum. Nug anam aum amunu, Uraia nug Dawitnu lag enanagnab uuitte, King Dawit nug he, laa nug keeke ena laa Uraia, nuhig hamu mettak daakkunu, nug keeke amu Uraia laugppa awa ukkom.

⁹ Uraia nug Dawitnu lag enanagnab, appanu aha ukkom, amge nug laugppa ii ukkom. Iitta. Nug Dawit laug odppa, Dawitnu gumak danab niippigppa, appa niiom.

¹⁰ Uraia nug appa niieye, laa nug Dawit amegppa, “Uraia nug lakka ii ukkom,” a doya, Dawit nug Uraia oɗ mettom. “Aɗinu na lautppa ii gome? Na umanu iite uɗime?” awa oɗ mettom.

¹¹ Dawit nug anam oɗ mette, Uraia nob ma aum. “Tituanak Nainu Kunup, Israel daup, Juda daup ele ag laih goppig, pehppa daatteb. Dahil okkai Joap, daup ele ag lakka ii daatteb. Iitta. Ag haen tutu dayaknu aab kalakppa daatteb. Ag anam daatteb, am da attem hein ukke, da laulppa tein, ee, le ele lappi, dahil ah ele niignih? Da amu heina, am da eheɗ helom. Na genab bau daattem, genab amubia da anam iinab hepa,” awa aum.

^12-13 Uraia nug anam a, Dawit nug aum. “Na gemu ele iguppa daappe, butti da heppi, na eɗun gokkut,” awa aum. Anam aum amunu, Uraia nug deɗ amuppa, Jerusalem dayom. Nug daye, deɗ amu dimugppa wagɗe, deɗ amuppa Dawit nug Uraia nug ele ee lakkulahnu a, Uraia nug Dawit ele ee lapiɗ. Aa ee layaya, Dawit nug le ɠagattag nakok huana Uraia mette lawowa, kaaka qeum. Kaaka qeum, amge nug lakka niikkun ii teum. Iitta. Nug Dawitnu gumak danab niippigppa, appa nuhig heɗigppa niiom.

¹⁴ Nug anam he, wagɗe buttua Dawit nug Joapnu uɗug laa yom. Nug ya, nug Uraia awa ukka, Joap medakkunu mettom.

¹⁵ Yaak amuppa amu, Dawit nug Joap ebqa hekkunu inam yom. “Na heppe, Uraia nug ban adekkuppa ɠagattagnab daatte amu, nug aben amuppa danab anuqak daatteb oolagppa dayaɗ! Na anam heppe, nug appa dayebeb, ban huanaknab aheb, kekeɗ ag nug qeppeg mauhkkunu ag laa oh nug uuidna, bittumttum gobeppeg, kekeɗ qeppeg mauhkku,” awa yom.

¹⁶ Dawit nug anam ye ukke, Joap nug ebqeum. Nug nuhikkud daup ele ag Amon dilag aab okkai onig Raba, aab amu oo mattan aqaknu maadna daanna, Joap nug aben adekkuppa Amon daup ɠagattag daappig doyom amunu, Uraia appa ban hekkunu meum.

¹⁷ Joap nug anam he, Uraia appa dayeye, aab okkai amuppan daup ag dimittim uɗin, ban hena, ag Dawitnu daup laala aqaeg mauheg, ag Hit danab Uraia ele qeeg mauhom.

¹⁸ Anam be, Joap nug ban heum nai oh Dawit dookkunu nai awa ukkak danab laa ukka ab dookkunu me ukkom.

¹⁹ Amge nai awa ukkak danab nug ii ukkom, gokkunu dayeye, Joap nug amegppa aum. “Na ban imu attem gottenu nai oh king amegppa appe am,

²⁰ nug ana oo nauhkkutai. Nug oo nauhkku dayeb, nug na inam oɗ medakkutai. ‘Aɗinu ag ban hekkulagnu aab okkainu aɗ guguittak anam daappig? ⌊Aɗ amu menppa hak, teppu ele amunu⌋ ag Amon daup ag aɗ attan daanna, lat doɗo eppeg nekkunu iite dooppig?

²¹ Ag aun nug Gideon bekka Abimelek qe mauhom iite dootteb? Abimelek nug Tebes danab ele ban henana, nug aɗ amu guguittak ukke, ah laa, nug aab okkainu aɗ attan dayaya, ee aeg ganuɗaknu men okkai buɗie noa, ikki aoɗe mauhom. Aɗinu ag aabnu aɗ guguittak appa wappig? Ag kaaka heppig!’ King nug anam akkutai. Nug anam anan, oɗ medakku dayeb amu, na inam appe doyaɗ! ‘Amge nahip maɗi nid laa mauhom ele amu, nug am Hit danab Uraia.’ Na anam a!” Joap nug nai awa ukkak danab amegppa anam aum.

²² Joap nug amu mattia male, nai awa ukkak danab nug ukka Dawit toppa te, Nug keeke oh Joap mattia madikkun aumbia Dawit amegppa mattiom.

²³ Nug aum. “Kekeɗ ihinkad ag ahilag ɠagattag am ihinig ɠagattag eɗittom amunu, ag lamigna, aab dimittim ig ele ban hekkunignu uɗippig, amge ig wagainab metat, lamattutut, ag eɗun aab okkai ahilag aɗ odppa goppig.

²⁴ Ig anam heutut, Amon daup aɗ attan daappig amu, ag lat doɗo eeg ne, nahipad danab laala aqaeg mauhppig. Laa mauhom am nahip maɗi nid Uraia, nug am Hit danab,” awa aum.

²⁵ Nai awa ukkak danab nug anam mattia male, Dawit nug aum. “Na Joap amegppa inam appe doyaɗ! ‘Na oot uug aib dayom. Aɗinu? Ban hak haenppa laa mauhtte, laa ii mauhtte, o laa mauhtte, laa ii mauhtte. Amunu aib dabmeme! Na aab okkai amu eɗidna, heppe nauhkkunu, amuib na dabmenan, na ban huan he!’ ” King Dawit nug nai awa ukkak danab amegppa anam anana, nug tuɗitta aum. “Na Joap oo ɠagattag qedakkutnu anam akkut,” awa aum.

²⁶ Aria, Uraia mauhe, nug wau Batseba doya, nug gamu mahittom.

²⁷ Nug mahitte ukke, elele te, Dawit he, nug laugppa te, aa ewau matulak aoya, ewau daayya, Batseba nug Dawitnu nid danab awom. Nug nid danab awom, amge Dawit kobol heum ele amu, Yawe Nug amunu ena ii doyom.