2 Samuel 1 - Nobonob Baibel

Laa nug Saul mauhomnu Dawit amegppa aum

¹ Aakku, Saul nug anam mauhom. Saul mauhe, Dawit nug Amalek danab eɗattomnu ukka, Siklak dayeye, deɗ aɗit uue,

² deɗ ewamppa danab laa, nug Saulnu haen tutu dayaknu aab kalappigppanu uɗiom. Nug nuhig lamen pattiɗatte dayeye, gappud ele igippa ma dayom. Nug uɗia, Dawit toppa ta, binag mekkunu, laippun gateg qaun o, gomela, iɗu wanppa meum.

³ Nug uɗia, anam he, Dawit oɗ mettom. “Na adeppan uɗime?” awa oɗ mettom. Oɗ mette amu, danab amu nug nob ma aum. “Da Israel dilag haen tutu dayaknu aab kalappigppanu ahe uɗimi. Kekeɗ ag iuppeg mauhkkulnu miagnab, amge da oole uɗimi,” awa aum.

⁴ Nug anam a amu, Dawit nug oɗ mettom. “Attem beum? Appe doyei!” awa aum. Dawit nug anam a amu, danab amu nug aum. “Kekeɗ ag Israel eɗatteg, Israel dilag daup ban abenppanu oolna goppig. Kekeɗ ag kuɗum aqaeg mauhppig, amu Saul, nug bekka Jonatan ele amu, aa ele mauhpiɗ,” awa aum.

⁵ Danab bau, nai amu awa uɗiom ele amu nug anam a, Dawit nug oɗ mettom. “Na attem hena, Saul, bekka Jonatan ele mauhpiɗnu amu doottem?” oɗ mettom.

⁶ Dawit nug oɗ mette amu, nid bau amu nug aum. “Da qauko onig Gilboa appa oikkulnu ii dabmemi, amge da attem hein, appa oiyeye, Saul nug hibaitta daakkunu nuhig ban aɗa dayom anidmi. Nug anam dayeye, kekeɗ dilag daup ag bannu karis attan daan, ban hetteb, daup ag hos attan daan, ban hetteb ele amu, ag gukkuittak uɗin, Saul aɗaglagnu uɗippig.

⁷ Ag anam hekkulagnu uɗin oiyegeg, Saul nug eɗua, da aniɗa, onilppa e, da wain, ‘Da aɗi hekkulnu oot daatte,’ awe oɗ mettami.

⁸ Da anam ai, Saul nug ‘Na aun?’ awa oɗ meɗe amu, da nug aum noob mein, ‘Da am Amalek danab,’ ami.

⁹ Da anam ai, nug da amelppa aum. ‘Anam dayeb amu, na gukkuiɗna uɗin, ⌊kekeɗ ag uɗin, eheɗ heiɗmananu⌋ yaaiɗppe mauhei! Aɗinu? Da guittak eheɗ awen, mauhkkulnu hettem, amge da ii mauhmi, dahil bau dayak ii iitta meum,’ awa aum.

¹⁰ Nug da amelppa anam aum, da nug guittak eheɗ nau awa, eɗua ena daakkunu elele iittanab anidmi amunu, da gukkuitten ukken, yaai mauhom. Da yaai mauhe, da king haɗ nug igippa dayom, amu eɗi nug eppegppa dayom ele uɗalate awe, na, na am dahil naɗi amu, da na medakkulnu awe uɗimi,” awa aum.

¹¹ Amalek danab nug anam a amu, Dawit, nuhikkud danab nug ele daappig amu, ag oh ahilkad lamen aɗan pattiɗadppig.

¹² Ag amu hena, ag kekeɗ ag Saul, nug bekka Jonatan, Israel dilag daup kuɗum, ag Yawenu daup amu, am Israel danab laa kuɗum ele aqaeg mauhppig am dabmeppig amunu, ag gaanna, ee ii laeg ukke uudoum.

¹³ Ag anam hewon, Dawit nug nid bau, nai amu awa uɗiom amu, nug oɗ mettom. “Na am ategted?” oɗ mettom. Oɗ mette am nid amu nug nob ma aum. “Da mam am, wan laihnu danab, nug Amalek buɗub, amge da Israel wanppa daattem,” awa aum.

¹⁴ Nug anam a amu, Dawit nug nug oɗ mettom. “Yawe Nug Saul king daakkunu goɗen gokkaɗakppa tituanom, amu na attem hena, na nug qekkutnu ii baɗame?” awa aum.

¹⁵ Nug anam awowa, Dawit nug nuhig danab laippu onigppa e uɗie, “Gona, nid amu qeppe mauhaɗ!” awa amegppa aum. Dawit anam a, nuhig danab amu nug wana, nid amu makkuɗe mauhom.

¹⁶ Aɗinu? Dawit nug nid amu amegppa tatam inam aum. “Na nakka, na, ‘Da danab laa, Yawe danab amu king daakkunu goɗen gokkaɗakppa tituanom amu, da nug qei mauhom,’ ame amunu, nahip nai amu na yaaittette, nahip mauhak na beɗunppa daatte,” awa aum.

Dawit nug nai laa oo doyak ele Saul, Jonatan ele dilahnu mattiom

¹⁷ Amu Dawit nug anam hewowa, nug nai oo doyak ele Saul, nug bekka Jonatan ele dilahnu mattiom.

¹⁸ Nug mattia mala, nug ippunittak danab ag Juda danab ah nai oo doyak ele amu ippunadppeg, daulagppa daakkunu aum. Nai amu onig am “Lat,” amu ag buk Jaser, amuppa yaappig.

¹⁹ Nai amuam inam. “O Israel danab ah, gadonnab gadon. Ahilag okkai, ag binag amahlak oppiaawak ele, ag qaukoppa mauhppig niitteb. Ao, gadonnab, ban danab ɠagattag kuɗum ag nena qena niitteb.

²⁰ Pilistia aɗelkad oolag gamag ahamanu amu, laa nug nai amu Gat appa aib mattieb dooppig. Ao, Pilistia danab, ag iitta aɗi amu, ag aɗelkad oolag gamag ahamanu amu, laa nug nai amu Askelon appa aib mattieb dooppig.

²¹ Gu, baito ele Gilboa wanppan qaukoppa aib neum. Ao, ee aegnu ofanu keeke ele wan amuppa aib ba, meu oum. Aɗinu? Aben amuppa kekeɗ ag heeg, danab okkai, ɠagattag ele, nuhig guppiɗ am dubuttid tak ele dayom. Ao, gemu amu, laa nug Saulnu guppiɗ goɗenppa ii bappaidtte.

²² Jonatan nug latppa heeb, ban danab tiilag nekkunu ii baɗom. Saul nug qep aɗa heeb, ban danab nena qekkulagnu ii uuom.

²³ O gadon, Saul, Jonatan ele. Aa bau daaeheh, danab ah ag ahilahnu oo mauhak dooppig. Ao, aa bau daaeheh, danab ah ag aa ele daaglagnu oolag heum. Aa bau daayya, aa laippu anam daapiɗ; mauhakppa ele aa laippu daayya mauhpiɗ. Ai igel nug nuhig haknu paha paha hagagaɗa gotte; amge Saul, Jonatan ele ai igel eɗidya hepiɗ. Doɗ laion nug ebehinab ele; amge Saul, Jonatan ele aa laionnu ɠagattag eɗidya oipiɗ.

²⁴ O ag Israel ah, ag Saulnu gayeg! Aɗinu? Nug he, ag lamen kokoɗnab tagattappig. Ao, nug he, ag bala golppa hak meppig.

²⁵ O gadon, ig Israel, ihinig ban danab ɠagattag, ag banppa nena qeppig. Ao, Jonatan nug qaukoppa mauhom niitte.

²⁶ O da amal Jonatan, da ool nahipnu huana dootte. Da nahipnu enaib doomi. Na dahilnu oot okkainab mauhom, amu da oo mauhak amunu enanag doomi. Ge, oo mauhak nahip amu, amuam ah nug danabnu oo mauhtte eɗittak.

²⁷ O gadonnab gadon. Ban danab ɠagattag ag nena qeppig niitteb. Ag qep elab keeke, ag amuppa ban heppig ele amu, keeke amu oh aakku iitta meum.” Dawit nug Saul, Jonatan ele dilahnu mahiak nai amu mattiom.