2 Pita 3 - Nobonob Baibel

Genabnab genab, geha Naɗi nug uɗikku

¹ O lailad, imuam ad uɗug aɗit batak ahilagnu yaami. Uɗug aɗit ohppa nai yaami amu, ag tatam dooppig, amge da ag dabmak ahilagppa keeke amu oh genabnab dooglagnu, da dabmak maɗattak nai aakku yaami.

² Amu da ag Kayaknu propet ag nai appig, amu ag daulagppa dokkunu, ihinig Naɗi, Nug ihinig Padal ii maknu ehanittak ele daatte amu, nuhikkud totol danab ag Nug oɗeppanu haknunab nai aon ag amelagppa madippig amu, da nai aɗit amu oh ag daulagppa dob, ehanadkkunu ool daye yaami.

³ Amu ag tatam inam dooglagnu, daulagppa dokkunu ele amelagppa attem. Gog tak haenppa eheɗ hak danab laa ag bekkulag. Amu ag beɗu kobol eheɗ ahilag dim lamidna, kobol ena genab amu aon aon qettana imidkkulag.

⁴ Ag ihaklel henana, “Jesus uɗikkunu nai qakka aum amu adekku?” akkulag. Laa ele ag, “Ig mamenkad ag Nug eɗua uɗikkunu ameg men daaegeg ukke mauhppig, amge digmakppan uɗie gemu ele wanppanu keeke beppig daatteb bianab gemu ele daatteb!” aon akkulag.

⁵ Anam, amge digmakppa Kayak Nug oɗeppa nai aawo, hab wan ele beeh, Nug he, wan le ooppanu ba, le eɗitta dayom amu, ag amu doonna daulag atitte.

⁶ Amu leppa ele Kayak Nug he, le hiɗ naɗi ba, haen amuppanu wan atu awe padal meum.

⁷ Amubia Kayak oɗeppa hab wan ele gemu daattep amu, aa geha aab ewakppa daaglahnu aum daattep. Hab wan gemu daattep amu daapeɗ ukkeb, deɗ laa Kayak Nug danab ag Kayaknu nuhig haknu ele uuak danab daatteb epeɗiatteb padal mekkulag, deɗ amuppa hab wan ele gemu daattep am aab ewakppa daaglah.

⁸ Amge keeke laippu imu amu, ag aib daulag atiom. O lailad, Naɗinu neekkakppa amu deɗ laippu amu maɗ 1,000 ele otiak laala ii daatte. Iitta. Nuhig neekkakppa Nug haen aɗit amu laippuib bia dootte. Maɗ 1,000 amu deɗ laippu bia daatte, amu deɗ laippu amu maɗ 1,000 bia daatte.

⁹ Danab laala ag, “Naɗi Nug eɗua uɗikkunu nai qakka aum amu, paha eɗua ii uɗia hette,” dabmetteb, amge anam iitta. Iitta. Nug ahilagnu oo bodoettak ele daatte. Nug danab laippu laa padal mekkunu oo ii daatte. Iitta! Nug danab oh ag oolag eɗukkunu oo okkai daatte amunu, Nug haen madatte.

¹⁰ Naɗinu deɗ am yabhok danab nug danab ii dabmetteb haenppa oitte, amubia uɗikku. Deɗ amu geha oqotti naɗinab oobob, hab iitta meeb, habppan keeke, amuam aam, kalam, keeke, keeke amu oh eon iitta mebeppeg, wan, amu keeke oh wanppa daatteb ele, amuam Kayak epeɗiadkkunu miag atiak daaglag.

¹¹ Keeke oh kobol anamppa padal mekkulag amunu, ag am attem daaglagnu daatteb? Ag danab oppiaawak ele, Kayaknu genab tutukku hak danab ele daaglagnu daatteb.

¹² Ag anam daanna, ag Kayaknu deɗ, deɗ amuppa hab, amu nuhig keeke oh ele aabnu gakkaɗakppa eon iitta mekkulag amu, ag deɗ amu tappaɗidnana oiyeg!

¹³ Amge Kayak Nug hab bau, amu wan bau ele megakkunu nai qakka aum amunu, ig keeke amunu neegttem. Amuppa genab tutukku hak kobol aakkuib daakku.

¹⁴ Amunu O lailad, ag keeke amu ameg mena daatteb amunu, ag oolagppa oppiak daaglagnu, ag danab oolagppa kaliak laa iitta ele daaglagnu, ag Kayak, Nug ele maɗoɗ daaglagnu, ag wagai menana dayeg!

¹⁵ Naɗi Nug danab dilagnu oo bodoettak ele dootte, Nug amuppa ag oolag eɗueb, Nug ag eɗua diiadkkunu haen madatte, ag amunu dabmenan antteg! Amu ig lainignab Pol, Kayak Nug nug ele doyak dabmak ena ele mettom, uɗug ahilagnu yom amu, nai imu amuppa ele anam daatte.

¹⁶ Pol nug uɗug laala ele yaalattom, amu amuppa nug keeke oh da yaami, nug amunu ele yom. Nuhig yaakppa keeke laala doya oo maittaknu am uug ele, amu danab laala, ag am danab doyak elele ii awak, ag ooppa genab doyaknu mehuqak oh pehettak ele ii dootteb amu, ag Polnu nai amu ebqena, mehuqak augigiak, ag Kayaknu nai laala mehuqak augigiak hetteb bia hena, ag akka ag nob nau aoglagnu aakku ib bappaidtteb.

¹⁷ Amunu O lailad, ag keeke amunu dooppig daatteb amunu, ag akka guppiɗ ahilkad ag eppelagppa aɗan, nai tappaeg nak danab ag ag eeɗadppeg, ag ahilag ib eheɗppa gona, ag Kristus eppegppanu, ag aguppa enanag daatteb amu, ag appanu nena qemananu, ɠagattag dayeg!

¹⁸ Amge ihinig Naɗi Jesus Kristus, Nug am ihinig Padal ii maknu ehanittak daatte, ag nuhig ehanittak okkai hamu mettak, amu nuhig doyak ena ele, amu waappa ena daanna, amuppa okkai mekkulagnu uɗat heig! Ig Nug binag naɗi gemu, haen oh ele metu! Genab.