2 Pita 2 - Nobonob Baibel

Propet hambuppuak dilag kobol nau

¹ Propet hambuppuak ag anukka danab oolagppa oidppig amubianab ippunittak danab hambuppuak ag geha ag gemu daatteb, ag oolagppa bena oiglag. Amu ag geha lokkumakppa hambuppualadppeg, kobol adekku dim lamidkkulagnu amu dabmekkulag. Hambuppuak kobol amu ag keeke heeg nauhtte. Amu ele, danab amu ag Naɗi Yawe, Nug ag hipuninnu qagaiettakppanu eɗua uhuqattom ele amu, ag Nug guhuɗidkkulag amunu, danab amu ag aakku akka padal mekkulagnu hetteb.

² Am ele, geha danab laa kuɗum ag danab amu, ahilag kobol nau aon dim lamidkkulag amunu, danab kuɗum laa ag ib genabnu nai nau akkulag.

³ Ippunittak danab hambuppuak amu ag men doɗo baubau awaknu hik aqebeb, ag geha ippunittak kobol genab iitta, ahilag dabmakppanu aakkuib ag ippunadnana, men doɗo aoglagnu hekkulag, amge Kayak Nug ameg ii amuhe niitte. Iitta. Nug ag nob nau madakkunu meum daatte; ag ii eɗidmana.

⁴ Kayak Nug engel hipunin heppig ele amu he, ag iite padal meppig? Yo, Nug geɗatta he, aben eheɗppa noppig. Nug aben gatatu ele amuppa qakkalattom daatteb. Amu ag epeɗiak haen ameg men daatteb.

⁵ Amu Kayak Nug he, Noanu haenppan danab laa ohnab iite padal meppig? Yo, Noa, nug am genab tutukku hak kobolnu mehuqak danab amu, Kayak Nug nug, amu eblaih aɗit ele laa ag akka aakkuib atognoattom; danab laa oh, ag am Kayaknu nuhig haknu ele uuak danab amu, le hiɗ naɗippa padal meppig.

⁶ Amu Kayak Nug he, aab okkai aɗit, Sodom Gomora ele, aa iite padal mepiɗ? Yo, Nug he, aab naɗi ewatom. Kobol amu danab laa oh ag aab okkai aɗit nauhpiɗ, amu dilah haen dimppa daanna, Kayaknu nuhig haknu ele uuak danab oiglag amu, ag Sodom Gomora danab padal mak aoppig anam aakku ahilagppa uɗikku, ag amu anidna dabmekkulagnu heum.

⁷ Kayak Nug haen amuppa Lot, nug am genab tutukku hak danab, nug nai tappe nak danab dilag kobol eheɗnabnu ameg bahi yom ele amu, Kayak Nug nug nauhmanu ehanittom.

⁸ Lot, nug am genab tutukku hak danab, nug ag oolagppa dayeye, deɗ deɗ ppa nug kobol nau ahilag amegppa antta, daugppa ele doya, nug ena iinab doyaya, guittak ele doyom.

⁹ Aria, Kayak Nug amu oh ahilagnu anam heum amunu, Nug danab ag Nug noobppa genab tutukku hak danab daatteb amu, Naɗi Nug ag uug oh, ahilagppa betteb amu amuppanu diia atognoadkkunu doya auta awawa, Nug danab ag Nug noobppa genab tutukku hak danab iitta ele, Nug ag diia, nob nau awaknu hettoɗiak haen ameg mena daaglagnu maadkkunu ele doya auta aotte.

¹⁰ Kayaknu kobol amuam, nug genab danab laa ag ahilag oo hak naunab dim lamidnana, Kayak oɗe dim lamittaknu ena iinab dootteb, am ag tonadkku. Ippunittak danab hambuppuak amu, ag akka ahilagnu ag am ɠagattag doonna, ag laanu dab-ii-menana, ag hab aabppan engel dilagnu baeg qak nai mattiglagnu ii baɗatteb.

¹¹ Anam aakku, amge engel ag ahilag ɠagattag okkainab, ebehi ele, ag hambuppuak ippunittak danab imu eɗattak, amge ag Naɗi noobppa danab nau amu, ahilagnu baeg qak nai ii mattinna, nai ag beɗulkadppa ii yaatteb.

¹² Amge hambuppuak ippunittak danab ag am keeke ii doottebnu dabittak nai maditteb. Ag am doɗ dabmak iitta ele daatteb bia daatteb. Ag am doɗ dakkuɗ ag aɗi aɗi hekkulagnu daatteb amu, ag dabmenan ii hetteb. Iitta. Ag hakib hetteb, amubia ippunittak danab hambuppuak imu ag anam hetteb. Ag am doɗ pelemppa aɗualadta, aqadkkunignuib menuattak bia daatteb. Ag geha doɗ dakkuɗ bia padal mekkulag.

¹³ Ag am eheɗ heppig amunu, ag nob eheɗ aoglag. Amu ag amunppa miag atiakppa kobol nau ohnu mauhnoak hekkulagnu oolag ahak ele oitteb. Danab nau amu ag hobul, ag Kristen hetteb ele amu, hobul amuppa wana, oo gamag ahak nau ele ag oolagppa daatteb. Ag anam daanna amu, ag am gaɗanigppa ah lanak o gakanenig daatte, amubia daanna, ag oolagppa ee lanan daatteb.

¹⁴ Hambuppuak ippunittak danab amu ag ewau pakkua gappai hak kobol hekkulagnu ah oh neekkadnana daatteb, ag hipunin hekkulagnu oolag ahakib daatte. Ag kobol amu henana, laa ag kobol tutukku dim lamittaknu bodoettak amu eeɗatteh, ag hipunin hetteb. Ag baubau awaknu hik aqeeqe men doɗo awaknu kobol amu, ag amu doon autna aotteb. Ag eheɗ laa awaknu anak waappa daanna oitteb.

¹⁵ Hambuppuak ippunittak danab amu, ag ib tutukku ettan, ib eheɗppa gotteb. Ag Beor bekka Balam, nug ib dim lamittom ele dim lamidtteb. Balam nug men doɗonu oo mauhe, kobol nau haaha, men doɗo aokkunu dabmeum.

¹⁶ Amge Balam nug kobol nau amu uukkunu, doɗ donki, doɗ amu nai ele ii maditteb, nug danab baag awa propet Balam amegppa nai mattia, daug batom.

¹⁷ Aria, hambuppuak ippunittak danab amu ag am lenag qaɗaiedappig bia; ag am bud ulah iwalatte gotteb bia ele amunu Kayak Nug aben gatatu teppu naunab ele ahilagnu babaittom daatte.

¹⁸ Danab amu ag akka ag beɗulag human, keeke okkai heppignu hambuppun maditteb. Ag beɗulagppan kobol naunu mattiegeg, danab laa kobol tutukku digmena dim lamidtteb ele amu, ag kobol nau amunu ittag aqebeb dim lamidkkulagnu dabmetteb.

¹⁹ Hambuppuak ippunittak danab amu ag danab laa ag uhuqak aoglagnu nai anan qagatteb, amge ag aakku hipuninnu begbeg maɗi nid daatteb. Ag hipuninnu begbeg maɗi nid daattebnu diig am aɗi keeke danab laa eɗittom daatte, danab amu nug keeke amu waappa daatte ele amu, danab nug keeke amunu begbeg maɗi nid daatte.

²⁰ Amu danab ag ihinig Naɗi Jesus Kristus, Nug Padal ii maknu ehanittak ihinig ele daatte amu, ag Nug doon, amuppa ag wanppan kobol nau uutteb, amge ag eɗun kobol nau amunu baula hekkulagnu watteb dayeb amu, danab amu ag aakku qagaiettak tatam nakok bia aoglagnu daappig, amge gemu amu ag qagaiettak naɗinab aoglagnu daatteb.

²¹ Anam daatte amunu, ag kobol tutukkunu ib ii doolob, amuam nau, amge ag ib ena doonna, eɗun ib eheɗ oina, ag Kayaknu ɗo nai ag aoppig ele dimettaglag dayeb, amuam naunab nau.

²² Amu oiyak ehanittaknu nai tutu aɗit laa aa genab attep. Nai amuam inam. “Qai nug bahowa, nug eɗua awa latte.” Amu laa ele, “Bo laa nug beɗu leppa ihak ele amu, nug eɗua hikoɗ laatte.” Nai amu ahilagnu atte.