2 Pita 1 - Nobonob Baibel

Kayak Nug nukka Nug Kristen danab nuhignu tituanattom

¹ Da Saimon Pita, da am Jesus Kristusnu maɗi nid, amu totol danab ele, da pas imu yaattem. Da ag laa, ag ihinig Kayak, Jesus Kristus, Nug Padal ii maknu ehanittak ihinig daatte amu, Nug genab tutukku hak kobolib dim lamitta he, ag ooppa genab doyak enanag, ihinig bia, ag amu aoppig, da ahilagnu yaattem.

² Ag Kayak, amu Jesus Kristus, ihinig Naɗi, ahilahnu doyak ena aoppig amu, amuppa ahilah ehanittak okkai hamu mettak, amu ahilah maɗoɗ ele ahilagppa hanhan naɗi daaglahnu ool daatte.

³ Kayak Nug nuhig ɠagattag okkaippa, Nug keeke oh ig bau daat, genab tutukku hak danab daagnignu mekkom. Nug nuhig ena hak kobol, nuhig binag amahlak oppiaawak ele dabmaama, ig oninigppa e, ig Nug doottem, amu doyak amuppa Nug keeke amu oh ig mekkom.

⁴ Nug nuhig ena hak kobol, Nuhig binag amahlak oppiaawak ele amuppa Nug keeke enanag kuɗum oh ig megakkunu nai qakka aum amunu, amuppa ag wan imuppan kobol nau, ig beɗunig amu hekkunignu eeɗigtte ele amu, ag amu ele eɗidna, ag Kayak daatte bia daaglagnu elele daatteb.

⁵ Diig amununab amu ag kobol ena hekkulagnu dabmenana, wagai mena, kobol ena amu ooppa genab doyak ahilag ele ouaqateg! Amu ag doyak aon ahilag kobol ena ele ouaqateg!

⁶ Amu ag akka ahilag oiyak pehettak atognoak kobol aon, doyak ele ouaqateg! Amu ag uug doonna eɗidkkulagnuib dabmekkulagnu kobol aon, ag akka ahilag oiyak pehettak atognoak kobol ele ouaqateg! Amu ag genab tutukku hak kobol aon, ag uug doonna eɗidkkulagnuib dabmekkulagnu kobol ele ouaqateg!

⁷ Amu ag lailkad ele layam ena daaglagnu kobol aona, ag genab tutukku hak kobol ele ouaqateg! Amu ag oo mauhak kobol aona, lailkad ele layam ena dayak kobol ele ouaqateg!

⁸ Aɗinu? Ag kobol amu hekkulagnu henana, baubau tuɗidna hekkulag dayeb amu, kobol amu ag heppeg, amu ag Kristen, ag Jesus Kristus, ihinig Naɗi, nuhig kobol doona, kobol ena ele dim lamidkkulagnu meu anidkkulag.

⁹ Amge danab laa nug kobol digdig amu iitta ele amu, nug keeke uma daatte ii anidtte; nug am ameg gaɗuom daatte. Nug hipunin anukka heum ele amu, Kayak uhuqa mettom daug atiom.

¹⁰ Amunu, O lailad, Kayak Nug ag onilagppa ewa, ag tituanattom, diig amunu ag Nug dim lamidkkulagnu wagai meig! Aɗinu? Ag anam hena amu ag iinab nena qemana.

¹¹ Aria, ag kobol amu hekkulag amu, Kayak Nug ag diia, ag Nug ele laippu dayaknu ooppa elele doya aut auta awa heeb, ag ihinig Naɗi, Nug am ihinig Padal ii maknu ehanittak, Jesus Kristus, ag nuhig ɗo maɗoɗ hanhannu ooppa daaglag.

Propet nai, Kayaknu naippa daatte

¹² Ag keeke amu oh dootteb, doyak diig genabib ele aoppig amu, ag amuppa ɠagattag hippaidna daatteb, amge da amu ohnu hanhan dabmak ahilag maɗedakkulnu hettem.

¹³ Da amu hekkulnu am kobol tutukku doottem. Anam amunu, da bau daattem haen imuppa, da keeke amunu baubau ag amelagppa, dabmak ahilag maɗedakkulnu amu madikkul.

¹⁴ Aɗinu? Da ihinig Naɗi Jesus Kristus, Nug da ippuniɗom bia, haen elab iitta amu da beɗul imu uuidkkulnu doottem.

¹⁵ Amunu da ag ib ena ippunadkkulnu wagai mein daakkul. Aria, da anam hein, da mauhe goppi, dimppa amu ag nai imu hanhan dabmekkulagnu elele daaglag.

Kayaknu amahlak Kristus nuhigppa daatte

¹⁶ Ig kaya, hamu doyaknu am ittag qak ele, auntai laa nug nukka, nuhig dabmakppa he beppig amu, ig kaya amu laa aot, ihinig Naɗi Jesus Kristus, Nug wanppa uɗiom, Nug am ɠagattag ele, ig amunu ag amelagppa ii mattimut. Iitta. Ig amenigppanab, Nug am danab dagom onig ɠagattag ele anidmut, amu ig amunu ag amelagppa mattimut.

¹⁷ Haen Mame Kayak Nug Jesus binag huma, binag amahlak oppiaawak ele hab aabppanu mettom amu, ig doomut. Kayak Nug inam aum. “Imuam da Bekkal, da nuhignu ool mauhtte. Da nuhignu enanag doottem,” awa aum.

¹⁸ Ig Nug ele qaukoppa daamut amunu, ig baag amu hab aabppanu neene doomut. Qauko amuam Kayaknu tituanak daatte.

¹⁹ Amunu ig propet ag nai appig ele amu, ig nai amunu oonig unuqagppa genab doottem. Anam amu, ag propet nainu daulag human doon autna aweg! Aɗinu? Ahilag nai am hul, gatatu abenppa amahlala daatte bia daatte. Amu ag ahilag nai dabmenan daappeppeg, propet nai am anam amahalebeb ukkeb ukkeb, Jesus Nug eɗua na, ag oolagppa amahalkku batak am ena.

²⁰ Keeke laanu amu, ag anuqak doyeg! Amuam, laa nug nukka dabmak nuhigppa propet nai appig ele amu awa, diig oh mehuqkkunu elele iitta.

²¹ Aɗinu? Danab laa nug nukka nuhig dabmakppa propet nai ii aum. Iitta. Kayak Ouɗi Nug propet dabmak madette, ag nai Kayak toppanu uɗiom amu, ag madippig.