2 Korint 9 - Nobonob Baibel

Kayaknu danab ah Jerusalemnu ehanattaknu nai

¹ Da Kayaknu danab ah oppiaawak ele ⌊Juda daatteb⌋ ehanattaknu tuɗitten yaakkulnu ii daatte.

² Aɗinu? Da ag uɗat amu hekkulagnu ag oolag geɗatte doottem amunu, da haen oh Makedonia danab noolagppa ag onilag hume, inam amelagppa attem. “Akaia danab Korint daatteb amu, ag maɗ tumai ukkomppa uɗat amu hekkulagnu bappaidppig.” Amu ag ehanittak uɗat imu hekkulagnu ɠagattag heegeg, Makedonia danab ag amu doona, kuɗumnab ag ele amu hekkulagnu oolag geɗatte.

³ Amge da nai mattieye, ag onilag humattem, nai amu geha hamu bia daamanu, ag da ami amubia ag men doɗo qagmena, meppeg daakkunu da lailad hei, aakku ag gumadna gotteb.

⁴ Laa amu ig ag ehanittak uɗat amu hekkulagnu appig am hekkulag oonigppa genab doot, ⌊ig amunu Makedonia danab amelagppa mattimut⌋ amunu, Makedonia danab laala ag ig ele oh gokkunig dayeb, ig Korint danab ag men doɗo ii bappaidppig anidpput amu, geha ig amunu uɗa nak doognig, ag ele anamib dooglag.

⁵ Amunu da lailad amelagppa appi, ag anuqna ag gumadna gokkulagnu am ena, da anam dabmemi. Ag gona heppeg, ehanittak keeke ag amu bappaidkkulagnu appig amu, da ii ukkak haenppa bappaidkkulag. Ag Korint ag anam bappaidkkulag dayeb, mettaknu am oo gamag ahak ele; am oo nauhak laa iitta.

⁶ Amge ag imu tutukku anidna doyeg! Danab nug ee tumu kuɗum ii ebatte, nug ee kuɗum ii aotte. Aria danab nug kuɗum ebatte, nug kuɗum aotte.

⁷ Ag anen anen oh ahilag dabmakppa, ag akka ag oolag tutukku elele anidna, ahilag dabmakppa gane mattaglagnu dabmak aon, matteg! Danab laa nug keeke oo qeebeb, ehanittak keeke maama, dabmak nuhigppa, “Ag ɠagattag wagai mena heppig amunu, da mattami,” ii dabmema. Iitta. Kayak Nug danab nug oo gamag ahehe, ehanittak keeke laa medatte, Nug nuhignu ooppa ena dootte.

⁸ Amu ag haen oh bau daaglagnu keeke ohppa eleleib daanna, ag keeke kuɗumppa uɗat ena oh hekkulagnu, Kayak Nug heeb, ehanittak okkai hamu mettak oh ag tuɗitta tonadkkunu elele.

⁹ Kayak naippa nai laa kobol amunu am inam daatte. “Genab tutukku hak danab nug daɗek danab huana ehanadtte. Ao, nuhig genab tutukku hak kobol am hanhan alet daatte.”

¹⁰ Kayak, Nug ee eppaknu danab ee tumu madatte, Nug ee digdig danab oh lakkulagnu ele madatte amu, Nug geha ag keeke oh elele matteb, ag laa madappeg, aria ag Korint ag geha genab tutukku hak kobol ahilag amu nug tuɗid okkai maama, ag laa daɗek daatteb keeke kuɗum mattaglagnu elele daaglag.

¹¹ Ag geha keeke kuɗumnab ele daanna, ag keeke kuɗum hanhan lainkad ⌊bau daaglagnu keekenu tutumak ele⌋ mattaglagnu elele. Amu ahilag ehanittak keeke laa aoglag amu, ag amunu geha Kayak amegppa, “Ena heme,” aon akkulag.

¹² Ag uɗat anam henana, ag Kayaknu danab ah oppiaawak ele ehanadppeg, laala ag keekenu tutu daatteb amu ag elele daaglag. Amge amunuib iitta. Ag Korint aɗi ag kobol amu anam heppeg, Juda laa, ag daɗek daatteb ele amu, ag Kayak amegppa, “Ena heme,” okkainab akkulag.

¹³ Ag layag ehanittaknu uɗat imu hekkulag amu, geha ahilag kobol amu heeb, ag am genab Kayaknu danab daatteb am miag atiak bekkulag. Am geha ig lainkad ag ag Korint danab, ag Kristusnu Nai Ena dim lamidttebnu atteb amu, ag genab anam hetteb anidna, ag Kayak binag mekkulag. Aria, geha ag ahilag ehanittak okkai ag madappig doonna amu, danab ag amuppa geha ag oh amu Kayak onig humaglag.

¹⁴ Am geha danab oh ag Kayak Nug ehanittak okkai, ag Korint ag hamu mattom anidna dooglag, amuppa geha ag ahilagnu oolag enanag doon, Kayak Nug ag itittak ena madakkunu unuqidkkulag.

¹⁵ Ehanittak Kayak ig megatte am okkainab, ig nai amu oh mehuqkkunignu elele iitta. Ehanittak amunu ig Kayak amegppa, “Ena heme,” aakkuib akkunig.