2 Korint 8 - Nobonob Baibel

Kristen ag lailkad ehanadkkulagnu nai

¹ O lailad, ig Kayak Nug nuhig ehanittak okkai hamu mettak Makedonia Kristen tamaniak matte, ag amuppa aɗi hetteb amu ag amu dooglagnu akkunignu hettem.

² Ag uug okkaippa ma anttak aoppig; amu ag ele daɗek daatteb, amge ag maɗoɗppan gamag ahak okkai dootteb amunu, ag Kristen laa qagaiettakppa daatteb dilagnu dabmena, ehanadkkulagnu ag men doɗo huanak qagmeppig.

³ Da amu antten doomi amunu, iikku da amu awe miag mettem. Ag men doɗo nakokib, amge ag mekkulagnu elele daappig aakkuib ii meppig. Iitta. Ag amuam tuɗittak, laa ele, amu eɗittak okkainab meppig. Ag akka ag amu hekkulagnu dabmena heppig.

⁴ Ag ig ena apput, Kayaknu danab ah oppiaawak ele Juda daatteb ele amu, ag ehanadkkulagnu ii daye daye unuqppig.

⁵ Ig anukka Makedonia danab dilagnu, “Geha ag men doɗoib laala mekkulag,” amut amge ag men doɗoib ii meppig. Iitta. Makedonia danab ag akka ag meulkad oh aon, ag akka Naɗi eppegppa mewona, Kayak oo daatte amu dim lamidna, aakku ihinigppa ele anamib heppig.

Uɗat danab laala geha Korint uɗiglag

⁶ Anam daatte amunu ig Taitus, nug ag Korint danab ag oolagppa uɗat heehe, ag ehanittak amu bappaidkkulagnu digmeppig ele amu, nug heeb, ag uɗat amu paha malaglagnu ig nug amegppa amut.

⁷ Amge keeke ohppa, amuam ahilag ooppa genab doyakppa, Kayak nai mehuqakppa, ahilag doyakppa, Kayaknu uɗat pehettaknab hakppa, amu ihinignu oo mauhak kobol ahilagppa ele, ag kobol eleleib hetteb, amubia gemu ag danab ehanittak uɗat ena imu ele enaib heig!

⁸ Da ami amuppa amu, da ag ɗo ii madattem. Iitta. Amge da danab laala ag uɗat pehettak hetteb ele andette, ag Korint ag aɗi heppeg ele anttena, da ahilag oo mauhak am keeke hamutai o iitta keeke genab eletai dookkul.

⁹ Ag ihinig Naɗi Jesus Kristusnu ehanittak okkai hamu mettak kobol dootteb. Nug am keeke oh Mameg, amge Nug ag ehanadkkunu ha, Nug keeke iitta ele dayom. Nug ha, keeke iitta ele dayomnu diig am, amuppa ag Kayak noobppa enub danab daaglanu elele.

¹⁰ Imu dahil dabmak amu iikku ag amelagppa attem. Maɗ tumai ukkomppa ag Korint danab, ag ehanittak uɗat amu hekkulagnu, laa oh ii dabmeppig haenppa, ag digmen dabmeppig. Ag anam heppig, amu ag ele anuqna, men doɗo digmena bappaidppig.

¹¹ Anam amunu, gemu ag uɗat amu hena, gog teig! Anukka uɗat amunu ag oolag paha ottaiom, anamib gemu ag amu hena maleg! Ag ahilag keeke gane amu melemelppa heig!

¹² Danab nug layag ehanitta, keeke medatte, nug ele kobol amunu oo huan daatte dayeb, Kayak kobol amunu elele ena dootte. Kayak Nug danab nug nuhig keeke aɗi aɗi ele, amu ohnu aakku dabmaama, danab amunu kobol amu hettoɗidtte. Danab nug keeke nakokib amge nug laa ehanadkkunu nuhig keekeppanu nakok madatte amu, Kayak noobppa am danab keeke kuɗum ele am nug laa ehanadkkunu nuhig keekeppanu keeke kuɗum madatte bia daatte.

¹³ Ig Juda danab, gemu ag tutu mena daatteb ele amu, ag ena daappeg, ag Korint ag am eheɗ daaglagnu ii attem. Iitta. Ag oh keekenu laippu eleleib daaglagnu oonig daatte.

¹⁴ Am gemu haen imuppa ag Korint ag keeke okkai ele daatteb amunu, ahilag keeke amuppanu amu ag heppeg, danab ag gemu keekenu tutu daatteb ele ag aoglag. Aria, anam daappeg amu, dimppa ag Korint ag tutu meppeg, aria danab ag Juda daatteb ele, ag keeke kuɗum aona, aria ag eɗun ag ehanadkkulag. Kobol amuppa geha ag oh keekenu laippu eleleib daaglag.

¹⁵ Amuam Kayak naippa yaak daatte bia. Nai amuam inam. “Danab nug maana kuɗum awom amu, nug kuɗumnab, laa hamu daakkunu iitta. Aria, danab nug nakokib awom amu, nug qakub ii meum.”

¹⁶ Aria, da am Kayak amegppa, “Ena heme,” attem. Aɗinu? Nug Taitus ehanitte, nuhig dabmak, dahil bia, laippu awa, nug ele ag ehanadkkunu oo huan daatte.

¹⁷ Ig nug aɗi hekkunu amegppa amut amu, nug ig oɗenig dim lamidkkunu eleleib doyom, amge nug ele uɗat amu hekkunu oo huan daye, nug nukka nuhig dabmakppa ag gumatta gotte.

¹⁸ Aria ig lainig laa meut, nug ele oh gottep. Am Kristen tamaniak ohppa lainig amu nug Nai Ena mehuqkkunu am nug ɠagattag ele amunu, tamaniak oh ag nug binag metteb.

¹⁹ Amuib iitta. Kristen tamaniak danab ag nug ig ele oh oitta, ehanittak uɗat imu oh hekkunignu otippig. Ig uɗat imu oh hetata amu, ig Naɗi onig humagnignu, ig uɗat imu hekkunignu oo geɗak doottem amu ele danab ippunadkkunignu hettem.

²⁰ Laa ele amu, ig geha danab laa nug ig ehanittak okkai kobol imu hettem, amunu nai eheɗ laa akkunu oonig ii daatte. Ig oonig anam ii daatte amunu ig lainig nug ig ele oh oignignu hettem.

²¹ Am ig ehanittak kobol imu ib tutukkuppaib Naɗi amegppa hekkunignu dabmettem. Amge ig Nug amegppaib tutukku hekkunignu aakkuib ii hettem. Iitta. Ig danab ag ele ig kobol tutukkuppa hettem anidkkulagnu hettem.

²² Aria, ig am ig lainig laa ele meut, nug aa ele oh gotteb. Ig haen kuɗum uɗat digdigppa ig nuhig hak meta anidmut, am nug uɗat amu hekkunu nug elele ɠagattag heum. Gemu nug ag Korint daatteb amu, ag aɗi hekkulagnu appig amu ag hekkulagnunab daatteb dootte amunu, nug am uɗat amu hekkunu elelenab dootte.

²³ Taitus nuhignu amu, ag inam anidkkulag. Nug am dahil kadoi, ag ehanadkkunu dahil uɗat laippu. Aria ig lainti aɗit amu, aa am Kristen tamaniak oh dilag maɗi nid, ahilah uɗatppa aa Kristus binag mettep.

²⁴ Aria, ag oo mauhak ahilag amu ag ippunadppeg, Kristen tamaniak oh ag ahilag oo mauhak genabnab dooppeg amu ag dooglag, ig ag Korint hamu binalag ii mettem.