2 Korint 7 - Nobonob Baibel

¹ O da gamalad, Kayak Nug ihinignu nai qakka anak amu aum amunu, ig meunignu, amu ouɗinignu dubuttid ele oh geɗidta, ig Kayaknu ebehinig oh bodoetta le mak dootta, ig meunig ohppa Kayaknu oppiaawak ele daat oitu!

Pol nug maɗoɗppan gamag ahak doyom

² Ag oolag amu ig mekkeg! Ig danab laa, nuhigppa eheɗ laa ii hemut. Ig heut, danab laa nug hipunin danab ii dayom. Ig danab laa buppuidtata, nuhig keeke laa ii aɗamut.

³ Da nai imu attem amu, da ag beɗulagppa nai yaak ii hettem. Iitta. Amge da matu ami aakku. Ig oonig amu ag madattem amunu, ag mauhkkulag amu, aria ig ag ele oh mauhkkunignu uug ii doottem. Am ag bau daaglag amu, aria ig ag ele oh bau daagnignu uug ii doottem.

⁴ Da nai tutukku miag ag amelagppa attem, da ag tutukku oittemnu oolppa genabnab doottem. Da ahilagnu enanagnab doottem. Da oo ɠagattag qettak doottem. Uug kuɗum ihinigppa betteb, amge amu ohppa da maɗoɗppan gamag ahak huanak doottem.

⁵ Aɗinu? Ig uɗit Makedonia beta, ig beɗunigppa maɗoɗ laa ii dayom. Iitta. Ig daatta, adeppa adeppa neegmut amu, danab eheɗ heikkulagnu daappig anadmut. Ig beɗunig dimittim am nug qak dayeye, oonigppa baɗak digdig dayom.

⁶ Amge Kayak, Nug danab oo uug ele oo mak medatte amu, Nug he, Taitus gumikka uɗie, amuppa ig oonigppa oo mak doomut.

⁷ Am Taitus uɗiom amuppaib ig oonigppa oo mak ii doomut. Iitta. Ag Taitus oo mak mettaeg, nug nai amu awa uɗia, ig amenigppa mattie, ig oonigppa oo mak doomut. Am laa amu, Taitus nug ig amenigppa ag da aniɗkkulagnu oolag huan daattenu, kobol naunu ag oolagppa eheɗ doyona gaattebnu, ag dahilnu dabmak huan aottebnu aum amunu, da maɗoɗppan gamag ahak huana doomi.

⁸ Da doottem, yaak dahil tatamnu amu he, ag oolagppa guittak dooppig, amge amunu amu da oolppa uug eheɗ laa ii doottem. Genab, anukka amu da amunu oolppa uug doomi, amge gemu am iitta. Da doottem, yaak amu ag oolag guittak mattom, amge amu haen tutuib.

⁹ Gemu da gamal ahatte. Da ag oolag uug dayom amunu, gamal ii ahatte. Iitta. Ag oolag uug dayom, amuppa ag oolag eɗuom amunu, da gamal ahatte. Kayak Nug haen danab hipunin hette, danab amu nug, “Da hipunin hemi,” doyaya, ooppa guittak dookkunu dabmette, amubia ag dooppig amunu, ihinig nai amu he, ag eheɗ laa ii aoppig.

¹⁰ Ooppa guittak doyak, Kayak Nug he bette amu, oo guittak doyak amuam he, ig danab aakku oonig eɗutte. Kobol amuppa Kayak Nug ig eɗua awigtte. Danab amunu am eheɗ laa ii dooma, amge ooppa guittak doyak, wannu kobolppa bette ele amu, ooppa guittak doyak amuam he, mauhak bette.

¹¹ Ag imu dabmetteg! Ooppa guittak doyak, Kayak Nug ag amubia dooglagnu oo dayom amu, nug he, kobol digdig meu ena ele ahilagppa beum. Ooppan guittak amu nug ag tappaɗatte, ag Kayak pehettak dim lamidkkulagnu wagai metteb. Ooppan guittak amu nug ag tappaɗatte, ag ahan, aɗi keekenu oolagppa uug daatte amunu epeɗin elele medappig. Ooppan guittak amu nug danab laa eheɗ heum amu ag bappaidkkulagnu maɗattom, amu ag oo ottaiak ele dooppig. Aria ooppa guittak amu nug he, ag ig anigkkulagnu ag oolag gayom, amu ag ihinignu dabmak huan aoppig. Ooppa guittak amu nug he, ag toliattak uɗat hekkulagnu wagai meppig. Uug babaittak uɗat oh ag hetteb amu, ag eleleib hetteb, ahilagnu aɗi laa mattignig? Ag uɗat amu eleleib hetteb.

¹² Amunu am genab, anukka da kobol laa amunu uɗugppa ahilagnu yaami, amge da danab nug eheɗ heum amu danab laa, laa nug nuhigppa eheɗ heum ele, amu dilah dabmein ii yaami. Iitta. Da ag Kayak noobppa ag genab ag oolag ig megatteb amu dooglagnu da ad uɗug amu yaami.

¹³ Kobol eleleib ahilagppa daatte anidmut, amu diig amuppa ig oo ɠagattag qettak doottem. Ig diig amunu oo ɠagattag qettak doottem, amge amuib iitta. Keeke laa ele daatte. Amuam ag oh Taitus ɠagattag qettaegeg, nug gamag ahom, ig amu anidta, amu ig amunu ele enanagnab doottem.

¹⁴ Da anukka Taitus amegppa ag hettebnu ag onilag humami, amu ag anamib ena heppig amunu, da uɗal ii nette. Iitta. Nai oh ig ag amelagppa mehuqmut am nai genab dayom, anamib aakku ig Taitus noobppa ag onilag humamut, am nai amu oh ele am genabib.

¹⁵ Taitus nug ag gumatta ukke, ag nuhignu oolag ena doonna, ag eheɗ laa hemananu baɗan, ag nug aon amu ag oh nuhig nai amu dim lamidppig. Ag anam heeg, nug ag anam heppig amu dabmaama, tatam nug ahilagnu oo mauhom, gemu nug ahilagnu oo mauha auta aotte.

¹⁶ Gemu amu da ag kobol oh tutukku hekkulagnu hetteb genab doottem amunu, da gamal ahatte.