2 Korint 6 - Nobonob Baibel

¹ Ig Kayak ele oh uɗat hettem amunu, ag Kayaknu ehanittak okkai Nug hamu mattom amu, ag amu ii kakidmananu dabmekkulagnu ahilkad dabmak maɗedattem.

² Kayak Nug atte. “Haen da ii helom bia me da na ehanidkkulnu doyeye, da nahip unuqittak doyen ehanidmi. Ao, ehanitteb padal ii mak haenppa amu, da na ehanidmi,” awa aum. Doyeg! Gemu am Kayaknu ii helobia me ehanigtte haen. Gemu Kayak Nug eɗua awigkkunu dabmette.

Pol nug uug digdig doyom

³ Ig uɗat imu hetata daattem amu, danab ag ig anigna, uɗat imunu eheɗ doomnanu amu ig oiyak ihinig atognotata, danab ag ib apiɗidna nena qekkulagnu kobol laa ii hettem.

^4-5 Iitta. Ig am Kayaknu maɗi nid daattem ippunadkkunignu amu, ig uug digdig bak haenppa ig ɠagattag daat, uug amu doot maot oittem, amuppa amu ippunadttem. Ig ihinig kobolppa qagaiettak haenppa, oo doyak haenppa, aolak haenppa, oikkak haenppa, maniguittak inikkak haenppa, lamikkak haenppa, uɗat naɗi ɠagattag hak haenppa, niiak elele iitta haenppa, amu enug iqak haenppa ele amu, ig haen amu oh ig ɠagattag daat, uug maottem amuppa amu ig am Kayaknu maɗi nid ippunadttem.

^6-7 Laa amu, ig ihinig oppiak kobolppa, ihinig oo mettak kobolppa, ihinig laa dilagnu oo maɗoɗ dim lamittak kobolppa, ihinig laa dilagnu oo bodoettak kobolppa, Kayak Ouɗi ihinigppa daatteppa, ig ihinig oo mauhak kobol genabppa, ihinig nai genab mattiak kobolppa, amu ihinig Kayaknu ɠagattagppa keeke hak kobolppa, ig am Kayaknu maɗi nid daattem ippunadttem. Ig Kayaknu ban haknu keeke eppenig naɗiap-ppa, nanehppa ele aɗattem amuppa amu,

⁸ danab laala ag ig oninig humaegeg amu danab laala ag am ig oninig aɗaeg notte eleppa, amu danab laala ag am nai nau ig dimunigppa mattiegeg, danab laala ag ig kobol ena hettem amunu maditteb eleppa, ig amu ohppa ig am Kayaknu maɗi nid daattem ippunadttem. Am laala ag ihinignu hambuppuak danab anam doigtteb, amge ig am anam iitta, ig nai genabnabib madittem.

⁹ Danab laala ag dooigtteb amge, “Ig ag ii doyadttem,” aon atteb. Ig am danab mauhkkunu hette bia, amge ig ii mauhttem, ig am bau daattem. Ig bu megatteb, amge bu nug ig iqe ii mauhttem.

¹⁰ Ig am oonigppa uug elenab, amge haen oh ig maɗoɗppan gamag ahak doottem. Ig daɗek danab bia daattem, amge ig am danab kuɗum keeke kuɗum madattem. Ig am eppenigppa keeke laa ii daatte bia, amge keeke oh am ig aɗattem.

¹¹ Korint danab, ig ag amelagppa nai elab miag atiak mattita, ahilagnu amu, ig oo mauhak okkainab doottem.

¹² Ig ahilagnu amu ig oonig mauhtte ippunadttem, amge ag ihinignu oolag mauhtte amu, ag amu ig ii ippunigtteb.

¹³ Gemu da ag amelagppa attem amu, da danab nug bekkod dilagnu atte bia attem. Ag ihinig oo mauhak kobol nob mekkulagnu, ag ele ahilag oo mauhak ihinignu ippunikkeg!.

Pol nug Korint tamaniaknu danab dabmattom

¹⁴ Laa nug Jesusnu ooppa genab dootte ele, nug laa, Jesusnu ooppa genab ii dootte ele, nug nug ele layamnab aib dayom. Amu elele iitta. Aɗinu? Genab tutukku hak kobol, amu nau hak kobol ele aa oh laippu ouaqataknu elelete? Amahlak amu gatatu ele oh laippu ouqettepte?

¹⁵ Kristus Satan ele aa oolah laippu ele daaglahte? Danab Jesusnu ooppa genab dootte, amu danab laa nug ooppa genab ii dootte ele aa dabmak laippu aɗaglahte?

¹⁶ Ig Kayaknu mettid lag amu kayak hambuppuak dottolkad ele ouaqadkkunigte? Amu oh am iitta! Ag dootteb Kayak bauklel ele nuhig mettid lag amu igib iikku. Anukka Kayak Nug nuhikkud danab ah dilagnu inam aum. “Geha da ag ele oh daatta, ag oolagppa oikkul. Da ahilag Kayak daakkul, ag am dahilad danab ah daaglag.”

¹⁷ Nug anam aum, amu Nug baula ele aum. “Anam amunu, ag ahan hipunin danab uuadna, ag gona, aben laih piɗe daaglag. Ag keeke Kayaknu neekkakppa dubuttid ele aib aɗappig. Am ag anam heppeg, geha da dakka ag diiatten,

¹⁸ geha da ag Mamelag daakkul; ag am da bekkalad aɗelad daaglag. Da Naɗi Dakka Ɠagattag Oh Ele, da anam awe attem.”