2 Korint 5 - Nobonob Baibel

Beɗunig bau aognig

¹ Wanppan keeke haen tutuib daatte, hab aabppanu keeke am hanhannu ele amunu, ig imuam dabmettat doottem. Ig gemunu beɗunig am wan imuppaib oiyaknu daatte. Keeke hanhannu iitta, danab nug peh haen tutuib daakkunu hette, amubia. Anam daatte amu, aria peh nug nauhtte, amubia ig beɗunig gemunu nauhppeg amu, Kayak Nug beɗunig laa, lagnab bia, hab aab appa megakkunu daatte. Lag amuam Kayak Nug heum; danab laa ii heum. Nug hanhan daakku.

² Gemu Nug hab aabppanu lag, ig lamen mettem amubia ihinigppa mekkunu oonig huana daatte.

³ Aɗinu? Nug hab aabppanu keeke amu awa, ihinigppa meeb amu, geha ig danab beɗu miag atiak daatte amubia ii daamta.

⁴ Ao, ig peh lakka daatta, ig uug dootta aiqagattem, amge ig wan imuppanu beɗunig imu uut, hamu daagnignu oonig ii daatte. Iitta! Ig hab aabppanu beɗunig, wan imuppanu beɗunig qaɗeppa mepput dayebeb, wan imuppanu beɗunig, ag mauhkkulagnu daatteb ele amu, ag hab aabppanu beɗunig, ag hanhannu daatteb amu, ag oolagppa daanna eɗuna, bauklel hanhannu keeke daaglagnu oonig daatte.

⁵ Kayak Nugib ig anam daagnignu ib babaittom daatte. Kayak Nug genabnab genab geha keeke amu oh megakkunu ippunigkkunu Nug nuhig Ouɗi, keeke lonnu onig awak bia, ig mekkom.

⁶ Diig amunu amu ig hab aabppanu beɗunig aognignu dabmak aottem; ig ii aognignu ii dabmettem. Ig anam dabmetata amu, ig imu ele doottem. Ig wan imuppa oiyaknu beɗunig ele oitata amu, ig Naɗi ele hab aabppa appa ouqak ii daattem.

⁷ Aɗinu? Ig Nug ele ouqak daagnig, nai amunu amu gemu ig dayak amunab ii anidttem, amge gemu oittem imuppa am ig geha Nug ele daagnignu, ig oonigppa genab doot oittem.

⁸ Amge da ami aakku, ig hab aabppanu beɗunig aognignu dabmak aottem. Ig ii aognignu amu ii dabmettem. Ig wan imuppanu beɗunigppa daagnignu am ena doottem, amge ig beɗunig imu uuidpput, Naɗi ele appanig diigppanab daagnignu amu, ig amunu enanag doottem.

⁹ Anam daatte amunu, ig ii mauhmut, haen imuppa, ihinig mauhak dimppa ele amu ig kobol oh, Naɗi Nug oo daatte, amubia hekkunignu dabmak ɠagattag aottem.

¹⁰ Aɗinu? Ig doottem, geha ig oh Kristusnu hettoɗiak abenppa daagnig. Aria haen ig beɗunig imuppa daatta, ig kobol nau hettem ele dayeb amu, geha ig amunu nob nau aognig. O iitta ig daatta, ig kobol ena hettem dayeb amu, geha ig amunu nob ena aognig. Yo, ig geha anen anen kobol hemutnu nob amuib aognig.

Danab Kayak ele oo laippu dayaknu uɗat

¹¹ Amu ig Naɗinu ebehi oh bodoetta le mak doottem amunu, ig danab ag nuhignu oolagppa genab dooglagnu uɗat okkai hettem. Kayak Nug ig dooikka malom; Nug noobppa am ig miag bemut daattem. Amu ag ele ig anam dooikkulagnu ool naɗi daatte.

¹² Nai amuppa amu, ag ig uɗat imu haknu ena dooigkkulagnu ii hettem. Iitta. Ig ag ihinignu maɗoɗppan gamag ahak doon, ag danab ag dimittimnu keeke aakkuib, danab ag amu anidkkulagnu elele, ag amunu anuqak doon binag metteb, amge ag ooppan keeke, danab ag amu anidkkulagnu elele iitta, ag amunu anuqak ii doon binag ii metteb ele noob mekkulagnu elele daaglagnu nai imu yaattem.

¹³ Ig Jesusnu oonigppa genab dootta, kobol laala, wanppan danab ag amunu, “Kaaka kobol,” aon atteb ele amu, ig amu hettem dayeb amu, ig Kayaknu dabmetata hettem. O iitta ig nai unuqag, doyak ena eleppa nai madittem dayeb amu, ig ag ehandadkkunignu hettem.

¹⁴ Aɗinu? Kristus nuhig oo mauhak amuib ig uɗat imu hekkunignu maɗeɗikkom. Amunu diig am ig imunu tutukku ena doottem; danab laippu Nugib ig danab oh ig abeninig awa mauhom. Nug ig ounig daya mauhom, amuppa ig oh aakku mauhmut.

¹⁵ Nug danab oh abenlagppa mauhomnu diig am, Nug danab oh daatteb, ag akka ahilagnuib dabmena ii oimnanu heum. Iitta. Ag am laa, Nug danab ehanatta mauhe, Kayak he, Nug eɗua hibaittom amu, ag nuhignu dabmenana oiglag.

¹⁶ Anam amunu gemu amu, ig oo alagppan kobolppa baula danab laa ib amuppa ii epeɗittem. Genab, anukka ig oo alagppan kobolppa Kristus epeɗimut, amge gemu ig anam ii hettem.

¹⁷ Amunu aun nug Kristusnu daatte, nug am danab bau. Anukka dayom amubia am iitta. Nuhigppa keeke oh am bau daatte.

¹⁸ Am Kayak nukkaib he, amu oh bette. Anukka ig nuhig kekeɗ daamut, amge Kristusnu uɗat okkaippa amu Nug he ig Nug ele oonig laippu bemut daattem. Anam daautut, ig danab laa amelagppa Kayak Nug ag eɗua diieb ag Nug ele oolag laippu daaglagnu oo daatte apput dooglagnu meikkom.

¹⁹ Amu nai ihinig amu iikku. Kayak Nug Kristusnu uɗatppa danab ah oh ele oolag laippu daaglagnu ib babaitta, Nug ag ahilag hipuninnu nob madakkunu ii dabmeum. Aria Nug he, danab ah ag Nug ele oolag laippu bekkulagnu ib babaittak daatte, Nug nai amu mehuqaknu uɗat amu ig mekke hettem.

²⁰ Ig Kristus oɗe aota, nuhig nai madittem. Kayak, Nug ig oɗenigppa ag nai madatte bia amu, ig Kristus onigppa danab oh amelagppa, ag kekeɗ kobol uuna, ag Kayak ib babaittom ele amu, ag ib amu dim lamidna, Kayak ele oolag laippu daaglagnu unuqadttem.

²¹ Kristus Nug eheɗ laa ii heum amge Kayak he, Nug ihinig mana mettak dayeye, Kayak Nug hipunin ihinig oh awa, laippu qagma Nug qaɗeppa me, Nug mawom. Anam amunu, gemu Kayak Nug Kristusnu uɗat okkaippa ig anikka, ihinignu, “Genab tutukku hak danab,” awa akkunu elele.