2 Korint 4 - Nobonob Baibel

Pol danab ah amahlak mattom

¹ Kayak Nug ihinignu oo gai-iitta doya oo mekka ehanikka, uɗat imu ig mekkom amunu, ig oo bai noak ii doottem.

² Iitta. Ig kobol uɗa nak ele, laa lokkumakppa hetteb amu, ig kobol amu dimettota, hambuppuak kobolppa ele ig ii oittem. Am ig Kayak nainu ele amu ig baolita ii hettem. Iitta. Ig Nai Ena tutukku miag mehuqttem, amu amuppa ig danab oh ig am aun ippuanadttem. Ig amu heut, ag ig Kayaknu neekkakppa attem daattem oolagppa dooglagnu elele.

³ Amge Nai Ena ig mehuqttem ele imu, nai amu lokkumak daatte dayeb, am danab ag padal mekkulagnu oitteb ele, ag amelagppaib lokkumak daatte.

⁴ Danab amu ag Jesusnu oolagppa genab ii dootteb. Aɗinu? Satan, nug wan imunu kayak hambuppuak daatte, nug ag Kristusnu dabmak pehettak aomnanu ib oo neum. Nug anam heum amunu ag Kristus, Nug genab Kayak attem daatte bianab daatte, ag nuhignu Nai Enanu amahlak, Kristus Nug binag amahlak oppiaawak ele ippunigtte amu, ag amu ii anidtteb.

^5-6 Anukka Kayak Nug aum. “Gatatu ooppa amahlak nug amahlaɗ!” awa aum. Kayak anam aum, amu Nug ele he, ig Jesus iɗuppa Kayak binag amahlak oppiaawak ele anidta doottem amunu, ig ikka ihinignu nai ii mehuqttem. Iitta. Ig Kristus Jesus, Nug am Naɗi daatte, anam mehuqtata, Jesusnu nai dim lamidttem, amuppa amu ig ahilag maɗi nid daattemnu ele mehuqttem.

⁷ Ig Kayak binag amahlak oppiaawak elenu doyak aomut, amge ig am danabib, waa wanppa hak amubia, ig keeke ena amu aot, laa oh ag ɠagattag okkainu diig am Kayak, ig iitta, amu dooglagnu daattem.

⁸ Aben ohppa uug ihinigppa bette, amge ig amuppa neta qeta autanab ii aottem. Aɗinu keeke laala ihinigppa bette amu, ig oonig ii maidtte, amge ig amunu baag qetak ii doottem.

⁹ Am danab nau ag ig eheɗ heigtteb, amge Kayak Nug ig ii uuigtte. Ag ig oikkeg, neta qettem, amge ig nauha auta awaknab ii daattem.

¹⁰ Ig danab laa oh ag Jesusnu bauklel ihinigppa anidkkulagnu ig Jesus Nug haen oh mauhak ib oɗeppa dayom bia ig mauhak ib oɗeppa daattem.

¹¹ Yo, ig bau daattem ele, haen oh ig bau daat, Jesusnu dabmak anuqak aot daautut, Jesusnu bau dayak ig mauhaknu beɗunig imuppa miag atiak bekkunu, danab ag ig iqappeg mauhkkunignu hetteb.

¹² Anam amunu, ig mauhak ibppa daatta, Jesusnu nai mehuqutut, ag Korint, ag nai amu oolagppa genab doona, bauklel aotteb.

¹³ Kayak naippa, nai laa daatte am inam. “Da Yawenu oolppa genab doomi amunu, da ⌊nai⌋ ami.” Danab Sam nai amu yom ele nug Yawenu ooppa genab doyom, amubia ig Jesusnu oonigppa genab doottem amunu, ig madittem.

¹⁴ Aɗinu? Ig doottem, Kayak Nug he, Naɗi Jesus Nug eɗua hibaittom, anamib geha Nug ig ele, Jesusnu ɠagattagppa ig ele maɗekkeb, ig eɗut hippaidpput amu, Nug ig ag ele oh omaikkeb gota, Nug ele oh laippu ouqak daagnig.

¹⁵ Kayaknu ehanittak okkai hamu megatte amu gemu danab kuɗum laala ahilagppa ambeebeb, ag Kayaknu, “Ena heme,” okkainab anana, ag Nug binag attan humaglagnu, keeke imu oh beum amu, ag ehanadkkunu beum.

Ooppa genab doyakppa ɠagattag awaknu nai

¹⁶ Ig am dabmak amu aottem amunu, Kayak uɗat hekkunignu amu ig ii bodoedattem. Ao, genab, ig beɗunig amuam nauhkkun hette, amge deɗ oh Kayak Nug ig oonig bau ɠagattag medatte.

¹⁷ Amu inam. Ihinigppa uug bette amuam nakokib; am haen tutu aakkuib daatte. Geha dimppa hab aabppa amu ig bau hanhan, ena dayak amu aognig. Hab aabppa bau ena dayak amuam ig beɗunignu uug nakok imu huanak eɗadtte.

¹⁸ Anam daatte amunu, keeke ig amenigppa anadttem ele, ig amunu keeke am anuqak dab-ii-mettem. Iitta. Ig keeke ig amenigppa ii anidttem ele, ig amunu am keeke anuqak dabmak aottem. Aɗinu? Keeke ig amenigppa anidttem ele am haen tutuib daakku, amge keeke ig amenigppa ii anidttem ele am geha hanhan daakku.