2 Korint 3 - Nobonob Baibel

Tituanak baunu maɗi nid, nai ahilagnu

¹ ⌊Laa atteb bia⌋ nai imuppa ig baula digmeta, uɗat imu haknu ena dooigkkulagnu hettemte? O iitta, ag Korint danab ag ig uɗat imu haknu ena dooigkkulagnu, danab laala hetteb amubia, danab laa ag ihinignu ad uɗug laa yaappeg mattagnigte? O iitta ag Korint ag ihinignu ad uɗug amubia laa yaaglagte? Amu oh iitta!

² Am danab laala ag ig dooigkkulagnu uɗug yaak, amuam ag Korintib aakku. Yaak amuam uɗugppa ii yaak. Iitta. Kristus Nug ig oonigppa ye, danab oh ebqekkulagnu daatte.

³ Ig ag oolagppa daat ehanattut, ag oolagppa genab dooppig amu, danab oh ag Kristus Nug nukka yaaknu uɗug amu yom anidtteb. Nug ya mekke, ig aot oittem. Nug gauppa, men mahappa, ii yom. Iitta. Nug Kayak Bauklel Ouɗippa danab oolagppa yom.

⁴ Kristus he, ig Kayak noobppa ahilagnu genab anam doottem.

⁵ Genabnab ig ikkaib uɗat imu hekkunignu am elele iitta. Keeke anam daatte amunu, ig ikka keeke laa hemut amunu ii amata. Iitta. Kayak Nug nukka he, ig uɗat imu hekkunignu elele daattem.

⁶ Kayak Nug he, ig elele daata, ig nug tituana nai qakkak baunu maɗi nid daattem. Tituanak bau imu amu, nuhig ɗo nai yaak laa iitta. Iitta. Nug am Kayak Ouɗinu keeke. Ɗo nai yaak, amuam danab qe mauhtte, amge Kayak Ouɗi Nug danab bauklel medatte.

Tituanak bau am enanag

⁷ Kayak Nug ɗo nai amu men mahappa ya otaɗa, Moses eppegppa me awom amu, ɗo nai amu ig oh dim lamidkkunignu am elele iitta. Amunu ɗo nai, nuhig uɗat amu ig ihinig hipuninnu oonig ii eɗuebeb, ig mauhta padal mekkunignu daatte. Amge Kayak Nug ɗo nai amu bekkunu he, nuhig binag amahlak oppiaawak ele ba, Moses iɗuppa amahlele, Israel ag nug iɗuppa neegkkulagnu elele iitta daappig. Moses nug ɗo nai mattia male, dimppa amu Kayaknu amahlak nug iɗuppa amu aakku iitta meum.

⁸ Ɗonu binag amahlak oppiaawak ele am okkai, amge Kayak Nug danab ah nuhig Ouɗi madakkunu heum amu, nug tituana nai qakkak amuam tituanak alag eɗidtte; nuhig binag amahlak oppiaawak ele am tituanak alag binag amahlak oppiaawak ele eɗidtte.

⁹ Aɗinu? Ɗo nai, nuhig uɗat am nug ig epeɗikka, hipuninnu nob nau aognignu atte, amge nug am binag amahlak oppiaawak ele. Anam daatte amunu, nug tituana nai qakkak bau nug he, danab ah ag genab tutukku hak danab bena daatteb amu, amuam binag amahlak oppiaawak naɗinab iittate?

¹⁰ Binag amahlak oppiaawak ele anukkanu am dimnu bia iitta. Dimnu binag amahlak oppiaawak ele, amuam laa tatamnu eɗittaknab; tatamnu am binag amahlak oppiaawak iitta bia daatte.

¹¹ Keeke haen tutuib daakkunu beum amu, nug am Kayaknu binag amahlak oppiaawak ele beum. Amunu keeke hanhan daakkunu beum ele, amuam binag amahlak oppiaawak naɗinab ele.

¹² Ig tituanak bauppa ehanittak aognignu dabmak aɗat oittem amunu, ig ii baɗat, nai miagib madittem.

¹³ Moses heum bia amu ig ii hettem. Nug Israel ag iɗuppa amahlak dayom ii anidppeppeg, ukka iitta mekkunu, nug iɗu hautaknu lamen qattippa iɗu hautom.

¹⁴ Amge Israel danab ag dabmak ahilag am ɠagattag eppom daatte. Anukkanu uɗie gemu ele anam. Ag haen amu oh tituanak alagnu yaak amu ag ebqeppig, gemu ele ebqetteb, amge ag amunu meunab ii dooppig, gemu ele ii dootteb. Danab nug iɗu am iɗu hautaknu lamen qattippa hautak daatte, ahilag dabmak am amubia ina daatte. Ag ii aotteb. Iitta. Danab nug Kristusnu ooppa genab dootte dayeb, Kayak Nug lamen amu maut-tte.

¹⁵ Ao, Israel ag gemu ele Mosesnu ɗo nai ebqenana, ag oolag ii maidtte, lamen qatti ag oolag hautak bia aakku daatte.

¹⁶ Amge haen danab nug oo eɗue, Naɗi oo medatte amu, aria Kayak Nug lamen amu maute, nug oo aakku maidtte.

¹⁷ Naɗi Nug am Ouɗi daatte, amu Naɗinu Ouɗi Nug danab laa, nuhigppa daatte dayeb, keeke laa danab amu aɗa ii maniguidma. Iitta. Hamu elele enaib daakku.

¹⁸ Amu keeke laa ig iɗunig ii haut-tte, Naɗinu binag amahlak oppiaawak ele ihinigppa uɗiaya, aam ameg lettodppa ya gotte, ig nuhig binag amahlak oppiaawak ele amubia heta daattem amu, Naɗi Nug ig Nug bia daagnignu baolikkekke, ig nuhig binag amahlak oppiaawak ele tuɗid tuɗid aot daattem. Naɗi Nug am Ouɗi, amu Nug anam aakku hette.