2 Korint 2 - Nobonob Baibel

¹ Amunu da eɗue, ag gumatte ukke, nai dahilppa baula guittak madappi, ag oolag uug daamanu dabmein ii gomi.

² Aɗinu? Da ag oolagppa uug madappi amu, aria laa nug da oo gamag ahak meɗakkunu iitta! Ag akka!

³ Da nai matu ahilagnu yaami amu, da diig imunu yaami. Ag da maɗoɗppan gamag ahak meɗaglagnu daatteb, amge ⌊ag uug laala ii bappaidppeg da ahilagppa golom amu, da oolppa uug doolom amunu,⌋ haen da ukken, ag uug laala ii bappaidppig anttena, da oolppa uug doopanu nai amu yaami. Ahilagnu amu, da ag aɗi kobol tutukku hekkulagnu maɗoɗppan gamag ahak meɗatte dootteb amu, da ag ele amunu maɗoɗppan gamag ahak dootteb genab doomi.

⁴ Da anukka ahilag uɗugppa nai uug ele yaami, haen amuppa amu da ahilagnu oolppa uug nau, amu guittak ele doyeye, da huanak ele gaami. Am da ad uɗug yaami amuppa da ag oolag uug medakkulnu ii yaami. Iitta. Da ad uɗug yaami amu, ag da ahilagnu ool okkai mauhtte, amu dooglagnu yaami.

Korint ag danab eheɗ heumnu hipunin uhuqna mettaglag

⁵ Danab aun nug he, uug beum amu, nug da uug ii meɗom. Nug ag uug mattom, amge da nug eheɗnab doomanu amu, da ag oh uug mattom ii attem. Iitta. Nug am ag oh oolagppan laib laib ag aakku oolag uug mattom.

⁶ Ahilag danab kuɗum ag danab amu eheɗ heumnu bu medappig, amuam aakku elele. Ag aib baubau huanaknab medappig.

⁷ Amunu uug naunab danab amu tonamanu, ag bu mettak amu uuna, ag nuhig hipunin amu uhuqna mettan, ag oo mekkunu nug oo aweg!

⁸ Uug okkai amu nuhigppa bemanu, da ahilag oo mauhak nuhignu ippunidkkulagnu ahilkad dabmak maɗedattem.

⁹ Da ad uɗug anukka yaami amu, da ahilag kobol attemunab, da ag amelagppa nai keeke ohnu ain ippunadttem amu, ag nai amu dim lamidttebte o iittate, amu da dookkulnu yaami.

^10-11 Ag danab laanu hipunin uhuqna medatteb dayeb, aria da ele hipunin amu uhuqen medattem. Amu hipunin laa da uhuqen medakkulnu dayomtai o iitta ii dayomtai, amge anam dayom dayeb, da uhuqen mettami ele amu, da ahilagnu dabmak anuqak awen, Satan nug ig bubuikka eɗigmanu, da Kristus noobppa hipunin amu uhuqen mettami. Satan nug ig ib digdigppa ig eɗigkkunu hette amu, ig amunu kaaka ii daattem.

Troas appa Pol nug oo uug doyom

¹² Anukka da Kristusnu Nai Ena mehuqkkulnu Troas tei, Naɗi Nug dahil ib amu od matulom,

¹³ amge da ool maɗoɗ ele ii daami. Aɗinu? Da layal Taitus da nug ii anidmi amunu, da Troas danab uuatte, da ukke, Makedonia temi.

Kristusnu ɠagattagppa totol ag ban eɗidtteb

¹⁴ Am gemu da Kayak amegppa, “Ena heme,” awe attem. Nug ig ehanikkekke, ig Kristusnu ɠagattagppa ban eɗidtata, Kayak nai mehuqutut, danab ag aakku Kristusnu dootteb. Doyak amuam muttuɗig enanag aben ohppa gotte, amubia hette.

¹⁵ Aɗinu? Danab laa nug ad uɗug muttuɗig enanag ele eɗippa me, muttuɗig otte amubia, ig Kayak noobppa Kristusnu muttuɗig enanag daatta, danab Kayak eɗua diiom, ag padal mekkulagnu ii oitteb, amu danab ag oolagppa genab ii dootteb, padal mekkulagnu oitteb ele amu, ag oh Kristusnu muttuɗig dootteb. Amge ag oh ahilagppa amu, muttuɗig amuam laippu bia ii daatte. Iitta.

¹⁶ Danab laala ag Kayaknu oolagppa genab ii dootteb, padal mekkulagnu oitteb ele amu, ag am muttuɗig ena otte amubia ii dootteb; ag eheɗ, mauhak beɗak uɗig otte anam bia dootteb, amge danab ag oolagppa genab doona, padal ii memananu oitteb amu, ag am muttuɗig ena otte amubia dootteb; ag am bau dayak muttuɗig dootteb. Ig anam bia daattem amge aun nug uɗat anam hekkunu elele? Ig oh am elele iitta.

¹⁷ Danab kuɗum laa ag oinna, Kayak naippa men doɗonu uɗat hetteb ele amu, ig amubia ii hettem. Iitta. Ig Kristusnu daatta, maɗi nid Kayak maatte gotteb bia, ig oonig oppiaawak eleppa Kayak noobppa nai amu mehuqttem.