2 Korint 13 - Nobonob Baibel

Pol nug Korint danab nau aomnanu dabmettaknu nai mattom

¹ Gemu da haen ewam batak aakku ag gumatte gokkulnu hettem amunu, Kayak naippa nai inam daatte, ag dooglagnu attem. “Danab laa beɗuppa nai yaaglagnu dayeb amu, aɗi heehe anttomnu mattiak danab aɗit o ewam, ag danab laa eheɗ heum appeg amu, nai amunu am genab doyeg! Laippuib ab amu, ag genab bia aib dooppig.” Da goppi, ag ig ele nai laala ib amuppaib bappaidkkunig.

² Ag danab matu hipunin heppig, danab laa oh ele amu, da haen ebqak aɗit ahilagppa gomi, haen amuppa da ag ele oh daata, da kobol aɗi ag oolagppa hekkulnu amu aakku ai, ag dooppig. Aria, gemu ele da ippa dayeye, da am nai imu eɗue inam attem. Haen da baula eɗue ag gumatte ukke, da danab hipunin tatam heppig o iitta gemu hetteb amu, da nob madakkulnu ag ii uuadpa. Iitta!

³ Da anam heppi, ag genab tutukku dooglag. Kristus Nug da oɗelppa nai maditte. Doyeg! Kristus Nug ahilagnu ha, Nug uɗat nuhig ii bodoedatte. Iitta! Nug ahilagppa uɗat ɠagattag hette.

⁴ Genab, anukka Nug danab beɗu, danab beɗu gai-iitta daatte, amubia Nug beɗu am ɠagattag iitta, Nug danab beɗu awa daye amu, ag Nug ad emaitakppa atulppig, amge Kayaknu ɠagattagppa gemu Nug bau daatte. Amu ig ele danab beɗunig ele daattem amunu, ig ele ɠagattag iitta, amge Kayaknu ɠagattagppa ig Nug ele bau daattem amunu, geha ig nuhig ɠagattagppa ag oolagppa uɗat hepput, ag ehanittak aoglag.

⁵ Ag akka akka ag ahilag ooppa genab doyak am genabte, ⌊amuam ag Kristusnu, nuhig Nai Enanu ele aakkuib oolagppa genab dootteb,⌋ o ahilag ooppa genab doyak am genab iittate italna epeɗieg! Ag akka, ag oolag ma anttak metteg! Ag Jesus Kristus, Nug ag oolagppa daatte iite dootteb? Yo, ag ma anttakppa elele hetteb dayeb amu, Nug ag oolagppa daatte. Iitta am iitta.

⁶ Amu ag ig ma anttakppa elele daattem, ag amu anidkkulagnu ool daatte.

⁷ Ig Kayak Nug ag ehanatteb, ag kobol eheɗ laa ii hemananu unuqidttem. Ig danab laa ag ig ma anttakppa elele hettem anidkkulagnu amu, ig ahilagnu anam ii unuqidttem. Iitta. Danab ag ihinignu ena dooglagtai o iitta ena iitta dooglagtai, amuam keeke okkai iitta, amge ig ag Korint danab ag kobol tutukku hekkulagnu oonig daatte, aakkuib.

⁸ Aɗinu? Ig keeke laa hepput, doyak diig genabib tappeb nokkunu elele iitta. Iitta. Ig doyak diig genabib, amuppaib daagnig aakkuib am elele.

⁹ Ig am ɠagattag iitta daautut, ag ɠagattag daaegeg amu, ig amunu gamanig ahatte. Haen oh ig ag tutukku elelenab ahan daaglagnu Kayak unuqidttem.

¹⁰ Gemu da ippa dayeye, da ahilag nai imu yaami amu, amunu diig am, da nai imu yaappi, ag anidna ebqena, ag da yaami bia keeke bappaidppeg, geha da goppi ag ele daatta amu, uɗatnu ɠagattag, Naɗi Nug da meɗom imuppa, da amuppa ag epeɗiadkkulnu uɗat laa ii daama. Nug ɠagattag da meɗom imu am, ahilag ooppa genab doyak amu ɠagattag qedakkunu meɗom. Da heppi, ag nena qekkulagnu ii meɗom.

Humattak nai

¹¹ O lailad, da gemu nai bagqein, da ag humadttem. Ag tutukku elelenab bena daaglagnu dabmak aon oiyeg! Ag da nai attem imu doona, ag dabmak laippu aɗan, oolag laippu mena, maɗoɗ dayeg! Ag anam heppeg amu Kayak, Nug oo mauhak diig, oo maɗoɗ diig ele daatte, Nug ag ele oh daaglag.

¹² Ag Kristen kobol oppiaawak eleppa, ag nug humittak heig!

¹³ Kayaknu danab ah oppiaawak ele laa oh ag ag humadtteb.

¹⁴ Naɗi Jesus Kristusnu ehanittak okkai, Nug ig hamu megatte, Kayaknu oo mauhak, nuhig Ouɗi ele oo laippu dayak ele, keeke amu oh, ag oh ahilagppa daaglagnu ool daatte.