2 Korint 12 - Nobonob Baibel

Kayak keeke kuɗum tuleglegppa Pol ippunittom

¹ ⌊Korint danab, ag beɗulagppa⌋ da dakka da danab nug nukka onig humak hette bia hekkulnunab daatte. Genab, onig humak kobol am ig ii ehanigtte, amge da tuleglegppa keeke lokkumak laala, Naɗi Nug da amelppa miag atiom amu, da amunu ele madikkulnu iikku hettem.

² Da danab laa nug Kristusnu daatte amu, da nug doottem. Anukka maɗ 14 ii ugekke, Kayak Nug nug awe, attan ukka, hab ewamppa teum. Nug beɗuppa dayaya teumte o iitta nug ouɗi aakkuib teum amu, da ii doottem. Kayak Nugib dootte.

³ Da Kayak danab amu awa, Paradisppa ukkom amu da doottem, amge nug beɗuppa dayaya teumte, o iitta nug ouɗi aakkuib ukkom amu da ii doottem, Kayak Nug dootte.

⁴ Amge Paradis appa nug nai diig laa doyom, danab nug nai amu ig danab ihinig naippa mehuqkkunu elele iitta, amu nai amu mehuqaknu am ele gun ele.

⁵ Danab amubia aakkuib amu da nug onig humakkulnu ool daatte, amge da dakka da onil humak bia ii hepa. Iitta. Da dakka ɠagattag iitta amu, da amunu onil humak bia akkul. Da ɠagattag iitta daaiyi, Kristus Nug dahilppa uɗat hette amu, da amunuib onil humak bia hekkul.

⁶ Genab, da dakka onil humakkulnu elele; da helom amu geha da danab nug Kayak dab-ii-maama ii dim lamidtte ele hette bia ii helom. Iitta. Da nai genabib mattilom. Amge da amu ii hettem. Aɗinu? Laa nug dahil kobol da hettem antta, nai da mehuqttem ele doyaya, amuppa aakkuib nug da tutukku dooiɗkkunu ool daatte.

⁷ Tatam danab laanu mattimi amu daib. Paradisppa amu Kayak Nug da keeke ippuniɗom ele, amuam keeke okkainab. Amunu diig amunu Kayak Nug da dakka onil huan humapanu Nug da beɗulppa keeke laa, qaun bia, da yaaiɗkkunu meɗom. Amuam Satannu maɗi nid, nug da dakka onil huan humapanu tappiɗeb nekkulnu daatte.

⁸ Da haen ewam Naɗi Nug beɗulppanu keeke amu uhuqkkunu unuqmi,

⁹ amge Nug da amelppa inam aum. “Dahil ehanittak okkai hamu medattem ele, amuppaib na elele daattem. Aɗinu? Dahil ɠagattag am danab ag gai-iitta daatteb ele, ag ɠagattag aon daaglagnu daatteb amu, dahil ɠagattag ahilagppa aakku uɗat enanagnab hette.” Naɗi Nug anam aum amunu, da ɠagattag iittanu ool uug ii daatte. Iitta! Da amunu Kristusnu ɠagattag aakkuib dahilppa daakkunu maɗoɗppan gamag ahakib doyeye, aɗi keeke da hekkulnu da gai-iitta daattem amu, da amunu onil humakkul.

¹⁰ Anam amunu haen da Kristusnu uɗat hekkulnu amu da ɠagattag iitta, haen da Kristusnu uɗat hettem, danab ag amunu da eheɗ heiɗtteb, haen da Kristusnu uɗat hettem, da amunu uug digdig da beɗulppa doottem, amu haen da Kristusnu uɗat hettem, danab ag amunu heeg, da eheɗ daattem ele amu, da haen amuppa oolppa enanagnab doottem. Ao, haen da ɠagattag iitta daattem amu, haen amuppaib aakku da ɠagattagnab daattem.

Pol Korint dilagnu dabmeum

¹¹ Da nai madittem imuam danab nug Kayak dab-ii-maama ii dim lamidttenu nai bia, amge ag akka da nai imu inam madikkulnu duttuniɗeg, da madittem. Aɗinu? Ag dahilnu, “Nug ena hette,” pasppa yaaglagnu am aib iitta, amu kobol elele, ag helob am ena, amge ag anam ii heppig. Genab, da amu keeke hamu, amge da gaɗalagib totol danab ahilkad amu ag waalagppa ii daattem.

¹² Iitta. Da dakka da ag Korint ag oolagppa dayeye, da am totol danab daattem uɗat dahilppa ippunadmi. Uɗat da uug doyaya eɗittaknuib dabmak awewe hemi am, Kayak dabmettaknu kobol danab haknu elele iitta digdig, uɗat ɠagattagnab, aria kobol danab hekkunu elele iitta laala ele.

¹³ Da Kristen tamaniak laappa kobol laa hettem, anamib aakku ahilagppa ele hettem. Laippuib amu da ahilagppa ii hemi. Amuam da uug madette, ahilagppa ehanittak laa ii aomi. Gadon ag dahil hak nau amu uhuqna meɗeg!

¹⁴ Aria, gemu da haen ewam batak ag gumatte gokkulnu hein bappaidttem. Da geha ukke, keeke ahilag amu ii aɗadpa. Doyeg! Da keeke ahilag aokkulnu ool ii daatte. Iitta. Da ag diiadkkulnu ool daatte. Ag dootteb, nid ag mamelkad anilkad ehanadkkulagnu keeke bappaidkkulagnu ii daatte. Iitta. Mamelkad anilkad ag nid ehanadkkulahnu keeke qagmetteb.

¹⁵ Aria, da am dahil keeke oh ahilagnu agappi gokkunu uug laa ii doottem. Am dahil bau dayak ele, ag ehanadkkulnu maoppi gokkunu uug ii doottem. Da oo mauhak ahilagnu huanak doottem dayeb, ag amu anidna, ag dahilnu oo mauhak nakokib dooglagte?

¹⁶ Nai amunu aakku elele, anam dayaɗ! Amge ag laala am dahilnu inam aon atteb. “Genab, nug ihinig keeke miag atiakppa amu ii aotte, amge nug nai ittag mattiak danab amunu, nug bubuittak kobol haaha, ig noonig yaaya eeɗigtte,” aon atteb.

¹⁷ Amge attemnab? Da danab laala maatti, ag gumadna goppig, amuppa da ahilagppa eheɗ laa hemite? Am da ahilagppa danab laa hambubuittette, nug eppegppanu nuhig keeke laa aɗidmite?

¹⁸ Da Taitus amu ig lainig imu ele aa oh maate, aa oh ahilagppa gokkulahnu amelahppa ami, am Taitus nug hambuppua, ahilag keeke laa aɗomte? Am nug da ele i Kayak Ouɗi laippu amu Nuhig ɠagattagppa i iite oittep? I ib laippuppaib iite oittep?

¹⁹ Da ii doottem. Ag ihinignu, “Ag ig ahilagnu, ahilag haknu ele ena dooglagnu anam yaatteb,” dabmettebtai. Amge iitta. Ig Kristusnu daattem amunu, ig Kayak noobppa nai imu madittem. O lailad, gadonnab, da nai yaami imu oh amu ahilag ooppa genab doyak amu ɠagattag qedakkulnu yaami.

²⁰ Haen da ag gumatte ukke tein, da ag danab attem daaglagnu ool daatte amu, da anam bia ii anadkkulnu, ag ele da aniɗna, da danab attem daakkulnu oolag daatte, ag anam bia ii aniɗkkulagnu amu, da ool ii daatte. Da nai a ona a doak kobol, dahil doya laa aomanu doyak aɗa dayak kobol, nai hak kobol, obatak obatak dayak kobol, baeg qak kobol, dimug nai mattiak kobol, beɗuppa tak kobol, Kristen tamaniak kaboliak kobol ele amu, da amu anidkkulnu ool ii daatte.

²¹ Am da eɗue ag gumatte goppi, Kayak Nug ag matu hipunin heppig, Nug hipunin amu ippuniɗeb, ag noolagppa da uɗal nekkunu ool ii daatte. Geha da danab ah kuɗum ag hipunin digdig, kobol dubuttid ele, gappai kobol, hipaɗu ahak kobol ele heppig, ag amunu oolag ii eɗuom ele anttena amu, da amunu gaakkul, amge da anam antten gaakkulnu ool ii daatte.