2 Korint 11 - Nobonob Baibel

Pol totol hambuppuak dilag hak miag atiom

¹ Ag da dabmeɗappeppeg, da nai hamu madikkulnu hettem imu amu, ag amu doobppeg, ag oolag ii nauhmanu ool daatte. Ag dooglagnuib dabmekkulag.

² Kayak Nug ig danab ihinignu huana dabmaama, Nug nukka ig nuhignu tituanikkom, amubia da ele ahilagnu anamib dabmettem. Ao, da ah makkun, oiyak nuhig oppiakib, nug mameg danab laanu ah daakkunu nug baeg aɗatte bia, da ag oppiak amubia daabppeg, ag Kristus medakkulnu hettem.

³ Amge da baɗattem. Mat nug lokkumakppa kobol kobol hekkunu doya auta awak kobol nuhigppa anukka Ewa bubuitte na qeum amu, amubia kobol anam laa ahilagppa ba eeɗatteb, ag oppiak kobolppa dayaknu ib apiɗidna, ag Kristusnuib daaglagnu daatteb ii dabmemananu ool baɗatte.

⁴ Aɗinu? Danab laala ag gumadna gona, Jesusnu nai kabolinna, ahilag dabmakppa nai ag amelagppa mehuqeg, ag aotteb. Jesusnu nai amu, da Jesusnu nai mehuqttem ele amu, aa laippu iitta, am laa. O iitta danab amu ag ouɗi laanu mehuqeg, ag aotteb. Nug am Kayak Ouɗi, ag anukka aoppig ele amu, Nug iitta, am laa. Amu ag nai diig laa mehuqeg, ag aotteb. Nai amuam Nai Ena, ag matu aoppig ele amu iitta, am laa. Danab ag kobol amu ag oolagppa hetteb ele, ag Korint danab ag agib dabmettan daanna, oolag hette.

⁵ Doyeg! Dahil dabmakppa, totol danab amu, ag danab amelagppa anuqak daatteb amu, da ag waalagppa nakok laa ii daattem.

⁶ Genabtai da nai mehuqak kobol am tutukkunab ii doottem, amge da am doyak aomi. Da haen oh, kobol dahil ohppa, da ag amu ippunadmi.

⁷ Da Kayaknu Nai Ena ag amelagppa mehuqen, da nob daden laa ahilagppanu ii awen, kobol amuppa da dakka da aɗailen nein, ag onilag humakkulnu aakkuib hemi amunu attemutai? Da kobol amu hemi amu, da amuppa eheɗ laa hemite?

⁸ Da Kristen tamaniak laalappanu men doɗo aomi. Amuppa ag da ehaniɗeg, da ahilagppa uɗat hemi. Da anam hemi amunu, da tamaniak laappa, ahilag keeke hamu aɗadmi.

⁹ Anukka, haen da ag ele oh daata, da keeke laanu tutu dayeye, da ag oolagppanu danab laa amunu uug ii mettami. Iitta. Da lailad aɗi ag Makedonianu ahan gona, Korint tena, da aɗi keeke laalanu tutu memi amu ag meɗappig amunu, da ag Korint danab ag uug nakok laa ii mattami; geha ele da anamib hekkulnu dabmettem.

¹⁰ Da Kayak nai mehuqkkulnu heinne, tatam da danab ag dooglagnu daatteb ele amu ag men doɗo meɗaglagnu appi, ag men doɗo meɗaglagnu, “Yo,” appeg, da Kayak nai mehuqkkulnu ii hettem. Da kobol amu uumi, da Kayaknu nai danab ah hamu madakkulnu dabmein hettem. Genab da Kristusnu nai dahilppa daattenu genab doottem, amubia laa nug heeb, da kobol binag ele hettem amu, da uukkulnu elele iittanab doottem. Da prowins Akaia appa, wan atu amu ohppa da anam hekkulnunab daattem.

¹¹ Aɗinu da anam hettem? Da ahilagnu oo mauhak ii doottem amunute? Iitta! Kayak Nug da ahilagnu ool mauhtte, amuam Nug dootte.

¹² Amge danab laala, ag akka onilagib humaglagnu oolag daatte amunu, ag danab amelagppaib mattin, kobol da hettem bianab ag hettebnu atteb, amge kobol amunu gaɗaib hetteb ele amu, da ahilag ib amu oo nekkulnu iikku uɗat heinne, da uɗat hettem bia anamib baubau hekkul.

¹³ Danab amu ag am totol danab hambuppuak. Ag am hambuppuak uɗat danab, ag danab amelagppa totol danab bia daatteb, amge ag gaɗalag aakkuib Kristusnu totol danab daatteb.

¹⁴ Ag Korint daatteb ele amu, ag amunu aib ottaippig. Aɗinu? Ig doottem, Satan nug nukka hanhan kobol nuhig he eɗue, nug gaɗappaib amahlak engel bia bette.

¹⁵ Anam amunu nuhikkud maɗi nid ag ele hambuppun henana, ag danab amelagppa, “Ig genab tutukku hak kobolnu maɗi nid daattem,” aon akkulag dayeb, ig Kristen danab, ig amunu dabmak okkai ii aomta. Ig ii ottaimta. Geha dimppa ag uɗat hetteb, amuppa ag nob ahilag aoglag.

Pol nug totol uɗatppa uug kuɗum mawom

¹⁶ Nai imu da matu mattimi ele amu, gemu da bau madikkulnu hettem. Danab laa nug dahilnu, “Nug am danab Kayak dab-ii-maama ii dim lamidtte ele,” aib dabmeum, amge ag dahilnu anam dabmekkulagtai. Am ag dahilnu anam dooglag dayeb, ag danab Kayak dab-ii-maama ii dim lamidtte ele laa ag nug dabmenan, nai nuhig dootteb, amubia ag da dabmeɗappeg, da ele dakka dahilppa aɗi beum, Kayak Nug da eppelppa aɗi aɗi uɗat heum amu da ainne, amuppa da onil humak bia heppi dooglag.

¹⁷ Nai imu da Naɗi oɗeppanu awe ii attem. Iitta. Da amunu ⌊appi, ag da tutukku aniɗna, dahil nainu genab doona dim lamidkkulagnu⌋ da dakka, danab nug Kayak dab-ii-maama ii dim lamidtte ele hette bia, da onil humak nai bia madikkulnu hettem.

¹⁸ Danab kuɗum ag wan kobol dim lamidna, ag akka onilag humatteb, amubia ⌊da ag Korint danab, ag nai tutukku, da ag amelagppa ami ele, ag amunu oolagppa genab dooglagnu,⌋ da ele laa ag hetteb bia, da ele nai mattien, onil humak nai bia madikkul.

¹⁹ Ag Korint, ag akka ahilagnu ag am doyak dabmak ena ele dootteb, amge ag danab ag Kayak dab-ii-menana ii dim lamidtteb ele doyadna dabmattan daaegeg, danab amu ag Kayak dab-ii-menana ii dim lamidtteb ele amu ag nai tutukku iitta aakku madatteb!

²⁰ Ao, danab laa nug ag nugib waappa daaglagnu atte dayeb, o nug keeke ahilag amu oh aotte dayeb, o nuhig hambuppuakppa ag diitte dayeb, o nug enaen ma duttunadtte dayeb, o nug eppeg oohap ta, hippelkad mataɗadtte amu, aria ag nuhig nai, nuhig kobol ele epeɗilob am ena, amge ag anam ii hetteb amunu, nug aakku anam hette.

²¹ Genab, ig am kobol danab amu ag hetteb bia ahilagppa laa iinab hemut amunu da, “Ig eheɗ hemut,” ii apa. Amge danab laa nug ɠagattag ma, nukka nuhigppa aɗi keeke onig humak medatte, nug amunu maditte amu, dahilppa ele anam daatte; da ele amunu madikkulnu elele. Gemu amu da dahil nai mattiak am danab nug Kayak dab-ii-maama ii dim lamidtte elenu nai mattiak bia madittem.

²² Totol danab hambuppuak amu ag am Hibru danabte? Aria, da ele am Hibru danab. Ag Israel danabte? Aria, da ele am Israel danab. Ag am Abraham buɗubte? Aria, da ele am Abraham buɗub.

²³ Ag Kristusnu maɗi nidte? (Da gemu dahil dabmak eɗile, da nai madittem.) Kristusnu uɗatppa amu da ag eɗadttem. Dahil hak ɠagattagppa da ag eɗadmi, Jesusnu nai mehuqaknu maniguittakppa dayak am da ag eɗadmi. Danab ag da muɗi qaun eleppa mataɗileg, kuɗumnab batom, amuppa da genab ag eɗadmi. Aria, laa ele, haen kuɗum da mauhkkulnu miag daami, ag am anam bia iitta.

²⁴ Haen tanig ele Juda danab ag buppa da mataɗileg ukke, 39 batom.

²⁵ Haen ewam ag ad teppu iittappa da oiɗppig, ag haen laippu menppa oiɗkkulagnu men eppig. Haen ewam da yuppa oiiyi, uug be uub nauha aut autanab awom. Tuqan, aam ele laippu da yuppa maya memi.

²⁶ Da haen kuɗum ib uma amu gomi. Da leppa padal mekkulnu hemi. Danab nau ibppa daanna, danab ukkaegeg, makkuɗadna keeke ahilag aɗuadtteb ele amu, ag eppelagppa heeg nauhkkulnu hemi. Da lailad ag eheɗ heiɗkkulagnu heegeg, iitta aɗi danab ele, ag da eheɗ heiɗkkulagnu heppig. Aab okkaippa ag da eheɗ heiɗkkulagnu heppig, atu taɗakppa danab iittappa, ag eheɗ heiɗkkulagnu heppig. Yuppa da padal mak abenppa daami amu, Kristen tamaniak ooppanu hambuppuak danab, ag ele da eheɗ heiɗkkulagnu heppig.

²⁷ Da uɗat digdig huanak hemi. Haen kuɗum da tuqan uɗat heinne, niiak laa ii niimi. Da enug iwewe, le baal ele diiom. Haen kuɗum da ee elele iitta daami, amu ulah iwe, lamennu tutu daami.

²⁸ Aria amuib iitta. Deɗ deɗppa da Kristen tamaniak dabmadakkulnu dabmak kuɗum aoiyi, uug amuam uugnab beɗulppa doottem.

²⁹ Am danab auntai laa nug ɠagattag iitta dootte amu, da ele ɠagattag iitta bia iite doottem. Am danab auntai laa nug laanu eeɗakppa hipuninppa na qette amu, da amunu oo nauhak okkainab iite doottem.

³⁰ Am ib laa ii daatte dayeb, da dakka da onil humak bia hekkulnab daatte dayeb amu, aria da dahilnu aɗippa da ɠagattag iitta, da amuppa onil humak bia hekkul.

³¹ Kayak, Naɗi Jesus Mameg, ig Nugib haen oh binag mekkunig amu, Nug dootte, da ham-ii-bubuttem.

³² Am Damaskus appa King Aretasnu ehanittak laa, nug gawana, nug Damaskus aab okkainu aɗub odppa od gumak danab maatteb, ag da aɗailppeg, maniguittakppa meiɗkkunu heum,

³³ amge da lailad laala ag da kalegppa iniɗna, aab okkainu aɗnu ulah ippu laappa paɗaileg, da dimittim nomi. Anam heeg, da Aretasnu ehanittak amu nug eppegppan oole gomi.