2 Korint 10 - Nobonob Baibel

Pol nug, nug eheɗ heumnu nai tappe noum

¹ Da am Pol. Am danab laala ag nai da beɗulppa yaan, inam aon maditteb. “Nug ig ele daattem haenppa amu, nug nukka onig qe ne, ig ele daattem, amge haen nug piɗe dayaya amu, nug nai ɠagattag ig megatte,” aon atteb. Amge da Pol, da am Kristusnu kobol, Nug nukka Nug binagnu ii dabmaama, Nug dagom kobol, oo bodoettak kobol ele danab dilagppa heum, amubia da ahilagppa hein, nai madippi, ag dahil nai dooglagnu unuqadttem.

² Ag oolagppanu laala ag ihinignu, “Ag wan imuppan kobol aɗaladna oitteb,” aon atteb amunu, da attem. Haen ig ag gumadta gota, da dabmak eheɗ amu qeppi nekkunu daattem amunu, da nai ɠagattag ag amelagppa madipanu da ag unuqadttem; ag akka dabmak eheɗ amu qeppeg naɗ!

³ Danab laala ag ig wan imuppan kobol aot oittem atteb, amge iitta. Am genab, ihinig oiyak amu ig wanppa oittem, amge ig wanppa ban hetteb bia ii hettem.

⁴ Ban haknu keeke oh ig aɗattem amu, ag wanppan keeke iitta. Iitta. Ig aɗattem ele amuam Kayaknu ɠagattag ele, amuppa ig kekeɗnu ban haknu aben ɠagattag loppaɗttem.

⁵ Ig a ona a doak nau kobol, amu kobol laa oh ele ag Kayak oɗe ii dim lamidtteb amu, ig kobol amu oh loppaɗttem. Amu ig dabmak oh maniguadta, dabmak oh amu Kristusnu dabmak aakkuib dim lamidkkunu hettem.

⁶ Ig Kayaknu ban haknu keeke aɗattem amunu, ag oolagppan aun aɗi ag ⌊Kristusnu⌋ nai dim lamidtteb tatam doota, dimppa amu ig nai tappe nak danab nob nau mattagnig.

⁷ Ag keeke unuqagnab amu ii anidtteb. Danab laa nug nuhignu, “Da am genab tutukku hak danab, Kristusnu danab daattem,” ɠagattag dabmette dayeb amu, nug eɗua imu ele doyaɗ! Nug am Kristusnu danab daatte, amubia ig ele am Kristusnu danab daattem.

⁸ Am Naɗi Nug ig ahilag ooppa genab doyak ɠagattag qettagnignu uɗat amunu ehah mekkom. Ig anam hepput, ahilag ooppa genab doyak na qekkunu ii mekkom amunu, da ehah amu onig okkai humattem dayeb amu, da uɗal ele ii nema. Da aɗi hekkulnu attem am da hekkul.

⁹ Ag dahilnu, “Nug nuhig yaakppa nug hamu ig baɗak megatte,” dabmekkulagnu amu, da ool ii daatte. Ag anam aib dabmeppig!

¹⁰ Da attem amunu diig am, danab laala ag dahilnu inam atteb. “Ao, yaak nuhig amuam ɠagattagnab, uug ele amge nug uɗie, ig nug beɗu anidttem am ɠagattag iitta, nuhig nai amu ele bodoettak,” atteb.

¹¹ Am danab nai anam maditteb ele ag tutukku dabmena anidna, inam doyeg! Haen ig piɗe daatta, uɗugppa ahilagnu yaattem am ig ahilagppa gopput, ag ele oh daata amu, ig kobol uɗugppa yaamut amu aakkuib ig ag oolagppa ele hekkunig.

¹² Laa amu, ag oolagppa laala ag, “Ig am danab enanag,” aon atteb ele amu, ig amu dilag melemel amu aot, ig beɗunigppa meta doognignu elele iinab anidta dabmettem. Aria ig ahilag kobol ele aot, ihinig kobol melemel amuppa ii hettoɗittem. Iitta. Danab amu ag akka akka beɗulagppa doonna, ag akka ag epeɗiadtteb. Am danab amu ag ahilag kobolnu amu ag akka ahilag kobolib anidna, ahilag kobol melemel amuppa epeɗidtteb. Danab amu ag am doyak dabmak ena ele iitta.

¹³ Amge uɗat ig hettem, uɗat amunu danab laa nug ig ena hettem, o ig ena ii hettem akkunu elele iitta amu, ig uɗat amunu attem heta ig binanig mekkunig? Elele iitta. Amunu ig uɗat Kayak mekkom, ig amuib binag mekkunig, amu Kayak Nug uɗat mekkom ele amu, ag Korint danab ag uɗat amu ooppa daatteb.

¹⁴ Yo, ag uɗat Kayak ig hekkunignu aum ooppa daatteb amunu, ig ahilagppa gota uɗat hemut ele amu, ig Kayak nai tippalta ii gomut. Iitta. Ig nuhig nai aakku dim lamidta, Jesusnu Nai Ena ahilagppa batak mehuqmut.

¹⁵ Ig anam mehuqtata, ig uɗat danab laala heppig, danab laa nug ag ena heppig, o ag ena ii heppig akkunu elele iitta amu, ig attem heta, ig oninig humagnig. Iitta. Ig geha ag Korint, ag ahilag ooppa genab doyak ɠagattag beeb, ig ag oolagppa uɗat hettem amu ba, okkai tuɗitta elele daakkunu hettem.

¹⁶ Anam dayeb am geha ig Nai Ena amu aot, wan atu laala ag eɗatta wanak daatteb, ⌊danab laa uɗat appa ii hette amu,⌋ ig appa gota mehuqkkunig. Amuppa amu ig danab laa nug nuhig uɗat heumppa nota, ig binanig mekkunignu ib laa ii daama.

¹⁷ Amge Kayak nai ele binag maknu nai laa ippunigtte. Nai am inam. “Laa nug onig humak hekkunu oo daatte amu, nug Naɗi onig aakkuib humaɗ!”

¹⁸ Danab nug nukka nuhignu, “Da uɗat amu hekkulnu ena, elele daattem,” atte, amuam keeke hamu, amge danab Naɗi Nug nuhignu, “Nug uɗat amu hekkunu ena, elele daatte,” atte, amuam meu ele.