2 Korint 1 - Nobonob Baibel

Pol nug Kayak amegppa, “Ena heme” aum

¹ Da Pol amu, Kayak Nug nukka da totol danab meiɗe, da Kristus Jesusnu totol danab daattem. Da ig lainig Timoti ele i ad uɗug imu yaattep, amu i ag danab ah Kayaknu Kristen tamaniak Korint daatteb, ahilagnu amu Kayaknu danab ah oppiaawak ele oh prowins Akaia appa daatteb, amu oh dilagnu ele yaattep.

² Ig Mamenig Kayak amu Naɗi Jesus Kristus ele, ahilah ehanittak okkai hamu mettak, amu ahilah maɗoɗ ele ahilagppa daaglahnu oonih daatte.

³ Ig Kayak binag humatu! Nug am Kayak ihinig, Naɗi Jesus Kristus Mameg. Nug am oo gai-iitta doya oo metta ehanittaknu kobol Mameg daatte. Ele amu Nug am oo mak mettaknu oo awaknu Kayak daatte.

⁴ Uug oh ihinigppa bette amu, Kayak Nug ig oo mak megakkunu ig oonig aotte. Anam amunu, ig danab uug digdig ele dootteb amu, ig ag oo mak aoglagnu ag oolag aognignu elele daattem.

⁵ Aɗinu? Kristus guittak mawom, amubia ig guittak maottem. Anam amu, amubia oo mak Kristus ⌊Kayak eppegppanu awom,⌋ oo mak amu ig tonikka aut auta aotte.

⁶ Am ig uug maottem dayeb amu, uug mawak amunu diig am ag Korint ag ⌊Jesusnu nai doon⌋ ag oo mak aona, padal memananu ehanittak ele aoglagnu aakku daatte. Amge Kayak Nug ig oo mak megakkunu oonig aokku dayeb amu, amunu diig am ag Korint ag amu anidna, ag ele oo mak amu aona, amu ag ele uug ig maottem bia, ag tuɗidna uug doyaya eɗittaknuib dabmak awak kobol dim lamidna maon oiglagnu ɠagattag madatte.

⁷ Amu ig ag ena daaglagnu oonigppa genab ɠagattag doottem. Aɗinu? Ag ig ele oh guittak maottem, anam bia ele ag ig ele oh oo mak aottem.

⁸ O lailad, ag imu dooglagnu oonig daatte. Asia taliliakppa ihinigppa uug beppig amu, uug amu okkainab, ig tonikka, ɠagattag ihinig oh eɗittom. Ig anam anidta, dabmak ihinigppa amu ig, “Geha ig mauhkkunig,” anam doomut.

⁹ Genabnab, ig uug doota, “Ig mauhkkunig” amut, amge anam beumnu diig am ig ikka ihinig ɠagattagnu am ii dabmemata, ig Kayaknu ɠagattag dabmekkunignu beum. Nug danab mauhppig amu heeb, ag eɗun hippaidkkulagnu Kayak.

^10-11 Ig mauhkkunignab doomut, amge Kayak Nug ig eɗua awikkom; butti ele anamib hekku. Ag ahilag unuqittakppa ehanigppeppeg, Kayak Nug geha ig eɗua awikkeb, ig ena daagnignu nuhignu oonigppa genab doottem. Anam heppeg amu, geha danab ah kuɗum laa ag ele unuqidppeg, Kayak Nug ig ehanikkeb, aria geha danab ah kuɗum ag ihinignu dabmenana, Kayak Nug keeke hette amunu Nug amegppa, “Ena heme,” aon akkulag.

Pol nug Korint danab ii hambuppualattom

¹² Aria, ig keeke laanu maɗoɗppan gamag ahak doottem. Ihinig ooppan oiyak ippunittaknu ulum am keeke amuam genab ippunigtte. Keeke amuam inam. Ig wanppa oimut, gemu ele oittem amu, ig Kayaknu oppiaawak kobol amu nuhig hambuppuak iitta kobol ele aot oimut. Ig danab dabmakppa ii hemut. Iitta. Ig Kayaknu ehanittak okkai hamu megatte, ig amuppa hetata amu, ig ag Korint daatteb oolagppa huana hemut.

^13-14 Ig nai laa yaattem ele amu, ag nai amu ebqena diig dooglagnu elele. Anam amu, gemu ag nai amu oh diig ii dootteb, amge ag Naɗi Jesusnu deɗppa da ag oolagppa uɗat hein, Jesusnu nai mehuqi, ag doon oolag eɗuom amu, Kayak Nug amunu binalag mekku, amubia ag nai mehuqak uɗat Kayak meɗom, ag nai amu doon, oolag eɗuom, amuppa da dahil uɗat Kayak meɗom hei gogppa te, Nug da ele binag mekkunu, ag tuɗidna doon, diig oh dooglagnu ool daatte.

¹⁵ Da ag ahilag dabmak dahilnu am enaib oolppa genab doye, ag ehanittak aɗit aoglagnu amu da ahilagppa haen aɗit gokkulnu maittak aomi.

¹⁶ Da inam dabmemi. Da ahilagppa tatam ukkena, da ag uuatten, Makedonia ukkoya, geha da Makedonia uuatte eɗue, ag gumatte goppi, ag da meiɗppeg, Juda gokkulnu dabmemi.

¹⁷ Da anam hekkulnu ool maittom, amge anam ii beum amunu, da oɗelppa nai eɗuak eɗuak hamu madittemte? O da nai keeke hekkulnu attem amu da hamu naiibtai, wanppan danab nai atteb amubia amu da, “Ao,” o “Iitta,” hamu madittemte? Anam iittanab. Da nai oh genabib attem.

¹⁸ Kayak Nug aɗi keeke hekkunu atte, Nug genab oo metta ii uuak kobol dim lamitta hette, amubia genab ig nai oh ag amelagppa attem amu ig ao, iitta ele, nai aɗit amu oh ouaqat-ta ii madittem.

¹⁹ Aɗinu? Silas, Timoti amu da ele ig ag oolagppa nai mehuqmut amu, nai amuam Kayak Bekka, Jesus Kristusnu nai. Amu Kristus Nug “ao” amu “iitta” ele ii ouaqatom. Iitta. Kristus Nug aɗi atte am genabib atte.

²⁰ Ao, Kayak Nug keeke oh hekkunu nai qakka aum amu, ag oh Kristus nuhigppa meu otteb. Kristus nuhigppa, ig “Genab, anam dayaɗ!” atata, nai amuppa ig Kayak binag mettem.

²¹ Amu Kayak Nug, ig ag ele ɠagattag megekke, ig oh Kristusnu danab ɠagattag daattem. Kayak Nug ig goɗen gokkaɗakppa tituanikka,

²² Nug ig nuhignab daattemnu epponak keeke nuhig ihinigppa mewowa, ig keeke Nug megakkun babaittom amu genab aognignu amu doognignu, Nug nuhig Ouɗi, keeke lonnu onig awak bia, ig oonigppa meum.

²³ Da hambuppualadttem dayeb amu, aria Kayak Nug dahil hambuppuak amu heeb miag atikkunu ool daatte. Amge iitta. Da nai genabib inam attem. Da ag uug madakkulnu ool ii dayom amunu, da haen gamagppa ahilagppa golom bia, da Korint appa ii gomi.

²⁴ Ag ahilag ooppa genab doyakppa daatteb amunu, ig ahilag ooppa genab doyak gumagnignu ii hettem. Iitta. Ig ag maɗoɗppan gamag ahak dooglagnu ig ag ele, ig tamanit, uɗat hettem.