2 King 9 - Nobonob Baibel

Jehu nug Israel dilag king bekkunu goɗen gokkaɗakppa tituanak awom

¹ Haen King Joram nug Jesril dayeye, Elisa nug propet dilag huuppan propet laa onigppa e uɗie, amegppa inam aum. “Na lamen nahip daug imuanppa ɠagattag takkan, olip goɗen hinai nakok imuppa aon, aab Ramot, Gileat wanppanu ukke!

² Haen na gona, Ramot tena amu, na Nimsi bekka Jehosapat, nug bekka Jehu antte! Jehu nug laikkud ele daaglag amunu, ag anam daappeg, na appe dob, omalppe, aa lag ooppa, oo laa ooppanab noya,

³ na hinai nakok amu aon, olip goɗen amu Jehu igippa gokkaɗona, na inam amegppa akkut. ‘Yawe Nug atte. Da na Israel dilag king bekkutnu goɗen gokkaɗakppa tituanidttem, awa atte.’ Aria, na amu hewona, na aib daame. Na od matulna bena, qaiqaɗ ukke!” awa aum.

⁴ Elisa nug nai amu amegppa mattia male, aakku nid bau, propet, nug aha, aab Ramot, Gileat wanppanu ukkom.

⁵ Haen nug ukka, Ramot aabppa teum amu, Jehu nug ban daup ikki laala ele nai mattinna daaegeg antta, nug aum. “Ban daup ikki, da nai laa ele nahipnu akkulnu uɗimi,” awa aum. Awa a, Jehu nug oɗ mettom. “Na aun amegppa nai akkut?” oɗ mettom. Oɗ mette, propet nug aum. “Da na, na ban daup ikki amu, da na amenppa nai akkul,” awa aum.

⁶ Propet nug anam a, Jehu nug ahe, aa lag ooppa noya, propet nug olip goɗen amu awa, Jehu igippa gokkaɗowa, nug Jehu amegppa aum. “Yawe, Israel dilag Kayak, Nug atte. ‘Gemu da na Israel dilag king bekkutnu goɗen gokkaɗakppa tituanidttem. Na geha dahilad danab ah Israel gumadkkut.

⁷ Na Ahap baekkudppa waalagppa daattem, amu na nug baekkudppan oh aqappe mauhkkulag. Amuppa da geha kuin Jesebelnu hak nau heum amu eɗue nob mekkul. Ah amu nug anukka dahilad propet, am dahilad danab ele aqe mauhppig, am amunu nob.

⁸ Ahap baekkudppan oh am mauhadkkulag. Da heppi, Ahapnu huuppan nid danab bau ukka danab kaino ele Israel oolagppa beppig daatteb amu, laa begbeg maɗi nidte, o begbeg maɗi nid iittate, ag oh iitta mekkulag.

⁹ Da heppi, Nebat bekka Jeroboam baekkudppanu beum, Ahaiya bekka Basa baekkudppanu ele beum, anambia Ahap baekkudppa bekku.

¹⁰ Jesebelnu amu, nug mauheb, nug gaɗa danab ag ii boumana. Iitta! Geha nug gaɗa amu, qai ag Jesril aab okkai, ag appa aben laappa lakkulag,’ awa atte,” awa aum. Propet nug Yawe nai aum, nug amu oh mattia malowa, nug od matula ba, qaiqaɗ ukkom.

¹¹ Propet nug anam ana mala, qaiqaɗ ukke, Jehu nug eɗua laikkud ban daup ikki laala gumatta ukke, amu ag inam oɗ medappig. “Keeke eheɗ laa beumte? Keeke oh amu enaibtte daatte? Kaaka danab amu aɗinu uɗia na anittom?” aon oɗ medappig. Oɗ mettaeg amu, Jehu nug nai amu nob ma, inam aum. “Danab amunu amu, ag nuhig hak, amu nuhig mattiak ele ag aakku dootteb,” awa aum.

¹² Nug anam awa a, ag nai amu nob mena appig. “Amuam genab iitta. Na ig amenigppa tutukku appe dootu! Na hambuppun aib nai toname,” aon appig. Ag anam aeg, aakku Jehu nug ag amelagppa aum. “Danab amu nug da amelppa inam aum. ‘Yawe Nug inam atte. “Da na Israel dilag king bena daakkutnu, da goɗen gokkaɗakppa tituanidttem,” ’ awa atte,” awa aum.

¹³ Jehu anam a, aria ban daup ikki ag nai amu a doon, ag pahanab ahilkad ulahnu lamen elab aɗan uɗadna, laulag adqaɗ amuppa duqan tonaeg, Jehu nug adqaɗ amuppa hibaitta dayeye, amu ag trampet iwalnana, ag inam eppig. “Jehu nug gemu king beum,” aon eppig.

Jehu nug Israel dilag king Joram qe mauhom

^14-15 Amu haen Joram, Israel dilag ban danab oh ele ag aab Ramot, Gileat wanppanu, ag appa daanna, Aram dilag king Hasael aab amu aomnanu nug ele ban heppig amu, Aram dilag ban danab Joram guittak mettaeg, nug eɗua ena daakkunu Jesril ukka, appa dayom. Appa dayeye, propet nug Jehu amegppa nai mattie, Jehosapat bekka Jehu, nug Nimsi alag amu, nug Joram abenab awa, king daakkunu dabmak awa, laikkud ag, “Jehu nug gemu king beum,” eegeg antta, aakku amu hekkunu dabmak awa, laikkud amelagppa inam aum. “Ag inam daakkunu oolag daatte dayeb amu, ag laa nug aab okkai Ramot imu uua ukka, Jesril appa ab doomnanu ib oh maadna dayeg!” awa aum.

¹⁶ Nug anam ana, Jehu nug nuhig bannu karis attan ta, Ramot uua, Jesril ukkom. Aɗinu? King Joram nug beɗuppa guittak awa, elele ii daya, Jesril appa hik aokkunu dayom. Haen amuppa Juda dilag king Ahasia nug ele Joram anidkkunu Jesril no, Joram ele daapiɗ.

¹⁷ Amu haen aɗi uɗitte anittak danab Jesril aabppa lag attan ta ukkak ⌊menppa hak⌋, amuppa dayom amu, nug Jehu, nuhikkud ban danab ele uɗiegeg anatta, nug ewa, inam aum. “Da ban danab uɗiegeg anadttem,” awa eum. Nug anam e, Joram nai amu doya, nug haknunab aum. “Appeg, ban danab laa nuhig hos awa, qaiqaɗ gumatta ukka, ag anatta, ‘Ag maɗoɗ ele uɗittebte?’ awa oɗ mettaɗ!” awa aum.

¹⁸ Awa a, aakku ban danab laa hos nuhig awa, qaiqaɗ Jehu aɗi anadkkunu ukkom. Ukka anatta, nug Jehu amegppa inam aum. “King nug na oɗ medatte. ‘Na maɗoɗ ele uɗittemte?’ awa oɗ mette,” awa aum. Nug anam a, Jehu nug nai amu nob ma inam aum. “Amuam nahip keeke iitta. Na dona, ig dim lamikke!” awa aum. Amu aɗi uɗitte anittak danab lag attan ta ukkak menppa hakppa dayaya, nug ban danab amu eɗua ii uɗie antta, nug nai me, king toppa ukke, nug inam aum. “Na ban danab laa me ukkom amu, nug ukka gumatta teum, amge nug eɗua ii uɗitte,” awa aum.

¹⁹ Anam be amu, aakku King Joram nug ban danab laa hos attan oiyom ele he, gumatta ukkom. Ban danab amu nug ukka, Jehu aɗi gumatta tewowa, nug inam amegppa aum. “King nug na oɗ medatte. ‘Na maɗoɗ ele uɗittemte?’ awa oɗ mette,” awa aum. Nug anam a, Jehu nug nai amu nob ma inam aum. “Amuam nahip keeke iitta. Na dona, ig dim lamikke!” awa aum.

²⁰ Aɗi uɗitte anittak danab nug ban danab amu ele eɗua ii uɗie antta, nug nai me, king toppa ukke, inam aum. “Na ban danab laa me ukkom, amge nug ele ii eɗua uɗitte. Amu danab nug bannu karis attan dayaya uɗitte ele amu, nug karis lamidtte am Nimsi bekka Jehu bia doottem. Aɗinu? Nug kobol kaaka, amubia nug lamidtte anidttem,” awa aum.

²¹ Nug anam a, aria King Joram nug haknunab aum. “Dahil karis amu bappaidna meɗeg!” awa aum. Awa a, ag karis babaitteg, Israel dilag king Joram nug nuhig karisppa te, Juda dilag king Ahasia nug karis nuhigppa te, aa qaiqaɗ Jehu uɗa tekkulahnu gopiɗ. Aa goya, Jesril ted Nabotnu wan maha, nuhig daye, Ahap awom amu, aa amuppa Jehu uɗa tepiɗ.

²² Haen Joram nug Jehu antta, nug Jehu inam oɗ mettom. “Na maɗoɗ ele uɗittemte?” awa oɗ mettom. Oɗ mette, aria Jehu nug nai amu nob inam aum. “Na anin Jesebel nug kayak hambuppuak noolagppa dup noa binalag maama, onig awak kobol ele hette. Na aninnu kobol nau amu oh amu, aakku gemu ba okkai mette amunu, maɗoɗ am attem daakku?” awa aum.

²³ Jehu anam a amu, Joram nug Jehu nai aum doya, nug pahanab nuhig karis aɗa, eɗua oola ugakka, nug King Ahasia onigppa inam eum. “Danab imu nug heeb, da iitta mekkulnu uɗiom!” awa eum.

²⁴ Nug anam ewa oola ukkom, amge Jehu nug lat pimala e, lat doɗo ukka, Joram gomeppa qe, lat aeg ukka, uttu taub nuhig ele awe mauha, nug na qa, nuhig karis ooppa noum.

²⁵ Aria, Jehu nug Bitkar, Bitkar nug ban daup ikki laa, nug Jehunu bannu karis lamittom amu, nug nug amegppa aum. “Joram gaɗa amu aon buɗippe, Jesril danab Nabotnu wanppa ukkaɗ! Yawe Nug anukka nug Joram mameg, King Ahapnu nai aum amu, na nai amu dautppa dottete? Ii ihinih bannu karisppa Ahap dim lamidɗa ukkauɗuɗ Yawe Nug Ahap amegppa inam aum.

²⁶ ‘Da, Yawe, da tumai keeke na heme amu, da anidmi. Danab ag na oot niiom dim lamidna, ag Nabot, bekkod ele aqaeg mauheg da anadmi. Amunu da, Yawe, da nai genab attem. Eheɗ hak nau nahip amu, da geha Nabotnu wan na yab aome, da wan amuppa da hak nau amunu nob eɗue medakkul,’ awa aum.” Jehu Nug anam awowa, nug tuɗitta, Bitkar amegppa aum. “Amu Yawe Nug nai aum bia amu, na Joram gaɗa amu aon buɗippe, Nabotnu wanppa ukkaɗ!” awa aum.

²⁷ Haen Juda dilag king Ahasia nug King Joram mauhe antta, nug nuhig karis attan dayaya, awa oola, Bet Hagan aabppa gokkunu ukkom. Ugekke, Jehu nug nuhikkud ban danab ele ag Ahasia lamidna gonana, nug nuhikkud ban danab amelagppa Ahasianu, “Ig nug ele qetu!” awa ewawa ukkom. Ag lamitteg gona, Gur ukkak ibppa, aab Ibleam guguittak nug karisppa ugekke, haen amuppa ag qeppig. Ag qeppig, amge Ahasia ii mauha, nug oola, ippu metta ukka, Megido aabppa ta, appa amu, nug mauhom.

²⁸ Nug mauhe, nuhig maɗi nid ag nug gaɗa amu aon, karis laappa mena, ag aon eɗun, Jerusalem gona, Dawitnu Aab, appa ag nug mamekkud aɗi boumadppigppa nug boumppig.

²⁹ Amge amu oh ii nak haenppa, Ahap bekka King Joram nug Israel dilag king dayaya, nuhig king dayaknu maɗ 11ppa amu, Ahasia nug Juda dilag king beum.

Kuin Jesebel mauhom

³⁰ Jehu nug nuhikkud ele ag Ahasia lamittona, haen ag eɗun Jesril uɗiegeg, Jesebel nug appa dayaya, nug Joram mauhom, nug nai amu doya, nug bala amegppa ma, nug ikki uɗug ele bala mettowa, king laug amu gililppa ulah ibuppa hibaitta neekke, ibppa no dayeye,

³¹ Jehu nug uɗia, aab okkainu aɗ od okkai amuppa no antta, Jesebel nug Jehu onigppa ewa inam aum. “Na maɗoɗ ele uɗittemte? Na Simri, nug nuhig okkai qe mauhom, amubia na heme amunu, dabmak awe!” awa aum.

³² Jehu nug amu doya, nug neekke, attan lag amu gililppa ulah ibuppa te, nug inam ewa aum. “Aun am huu dahilppa daatte? Aun?” awa eum. Awa e, maɗi nid hipab qak ele aɗit, o ewam king laugppa daappig, ag Jehu nai aum amu doon, lagnu gililppa ulah ibuppa hippaidna neekkeg no, Jehu antteg,

³³ Jehu nug amelagppa aum. “Ag ah amu aon, buɗippeg naɗ!” awa aum. Awa a, aakku ag Jesebel aon, buɗieg no, Jehunu hos aa gaɗa amu tappaya ukkaeheh, Jesebel tiig ukka, lagnu gilil laitta, hos ele layatom.

³⁴ Dimppa Jehu nug king lag ooppa noa, ee laum. Nug ee, le ele lawowa, aria nug amelagppa aum. “Gemu Kayak Nug ah nau amu eheɗ laa awaknu anak waappa daakkunu aum amu, nai amu aakku meu be anidppig. Amge nug am king laa aɗeg amunu, nug gaɗa boumeg!” awa aum.

³⁵ Nug anam aum, amge haen danab ag Jesebel gaɗa boumkkulagnu dimittim goppig, ag nug gaɗa appa ii anidppig. Iitta. Ag ikki ebehi, baeg, eppeg ele aakkuib niie anidppig.

³⁶ Aakku ag eɗun gona, ag amunu Jehu amegppa aeg, aria Jehu nug amelagppa aum. “Keeke beum amu, am Yawe Nug nuhig maɗi nid Elaiya, Tisbe ted, Nug nug oɗeppa aum amu, gemu meu mettom. Nug aum. ‘Jesebelnu amu, nug mauheb, nug gaɗa danab ag ii boummana. Iitta! Geha nug gaɗa amu, qai ag Jesril aab okkai, ag appa aben laappa lakkulag.

³⁷ Laa nug Jesebel gaɗa antta, “Imuam Jesebel,” amananu, nug gaɗa am geha Jesril aab okkai dimittim, appa dadppa doɗ biig wan qaɗeppa daatte, nug gaɗa am amubia daakku,’ aum,” awa aum.