2 King 8 - Nobonob Baibel

Sunem aab okkaippanu ah laa eɗua Israel wanppa uɗiom

¹ Haen laappa Elisa nug ukka, Sunem ah, ah amuib nug bekka amu anukka mauhe, Elisa nug eɗua maɗette ahom amu, Elisa nug ah amu amegppa aum. “Yawe Nug geha ihinig wanppa enug haen beeb, geha danab ah ag maɗ eblaih aɗit ele enug haen eenu tutu daaglagnu aum amunu, na ahan, na baenadppa diippe, ag gona wan laappa daappeg, enug haen maɗ eblaih aɗit ele malakku,” awa aum.

² Nug anam aum, aakku ah amu nug Kayaknu danab Elisa amegppa aum bia nug baekkudppa diie, ag ahan gona, enug haen maɗ eblaih aɗit ele ag Pilistia wanppa daappig.

³ Maɗ eblaih aɗit ele ukke, enug haen amu male, ah amu nug baekkudppa ele ag Pilistia wanppanu eɗun, Israel wanppa uɗin, nug king gumitta ukka, nug laug, am nuhig wan ele eɗua aokkunu king gadonppa oɗ metteb, ab doya aokkunu nug ukkom.

⁴ Ah nug king gumitta ukkom, haen amuppaib Gehasi, nug Kayaknu danab Elisanu maɗi nid, nug king ele nai madipiɗ. Mattiyya, king nug Gehasi amegppa inam aum. “Da amelppa anukka Elisa nug uɗat okkai okkai heumnu kaya appe dookkulnu ool daatte,” awa aum.

⁵ King nug anam a, Gehasi nug geha aakku Elisa nid nakok mauhe, nug maɗette eɗua ahom, nug amunu king amegppa mattieye, ah amu nugib bekka mauhe, Elisa maɗette eɗua ahom ele, nug uɗia beum; nug king gadonppa oɗ metteb, ab doya, nug laug, am nuhig wan ele eɗua aokkunu uɗiom. Gehasi nug ah am uɗia be, king amegppa aum. “O dahil naɗi, na king, antte! Ah amu nugib aakku, amu nid nuhig mauhom, Elisa maɗette eɗua ahom ele amu, nug ele aakku daattep,” awa aum.

⁶ Gehasi nug anam a, aria king nug Elisa keeke heum amu ah nug mattieb dookkunu ah oɗ mette, mattie doyom. Nug mattia male, dimppa amu king nug ehanittak anuqak nuhig laa onigppa e uɗie, amegppa inam aum. “Na ah imu, keeke nuhig oh eɗua aokkunu ehanidppe awaɗ! Keeke laa amu, na ehanidna, nug ukka, wan laappa dayeye, maɗ eblaih aɗit amu ooppa dad nuhigppa ee meu oum, nuhig daden men doɗo amu, nug aokkunu eleleppa bappaidkkut,” awa aum.

Hasael nug Benhadat qe mauhom

⁷ Haen laa Elisa nug Aram wanppa Damaskus ukkom, amu gemu Aram dilag king Benhadat nug oɗe meum. Oɗe me, laa nug amegppa aum. “Elisa, Kayaknu danab, nug uɗiom, ippa Damaskus daatte,” awa aum.

⁸ Aria, king nug nuhig ban daup ikki laa Hasael, nug amegppa aum. “Na keeke nuhig daakkunu hamu mettak laa aon, aɗan gona, Kayaknu danab Elisa anidna, nug da dahil oɗe imu iitta meeb, ena daakkulte o iittate amu, nug Yawe oɗ metteb, ab doyeb, ab dookkulnu oɗ mette!” awa aum.

⁹ Aakku Hasael nug Damaskusnu keeke ena ena digdig, Elisanu daakkunu hamu medakkunu awom. Keeke amu kamel 40 maoglagnu elele; nug keeke amu kamelppa ma awa, Elisa toppa ukkom. Ukka ta, nug Elisa amegppa inam aum. “Aram dilag king Benhadat, maɗi nid nahip, nug he, da na gumitte, nuhig oɗmak medakkulnu uɗimi. Oɗmak nuhig am, ‘Da dahil oɗe imu iitta meeb, ena daakkulte?’ Da amu na oɗ medakkulnu uɗimi,” awa aum.

¹⁰ Nug anam a, aria Elisa nug oɗmak amu inam nob ma amegppa inam aum. “Na gona, king amegppa inam appe doyaɗ! ‘Nahip oɗenu amu, na amunu ii mauhmana.’ Amge Yawe Nug da imu ippuniɗom, nug am geha ⌊ib laappa⌋ mauhkku,” awa aum.

¹¹ Elisa nug nai amu awowa, nug ameg behabe, Hasael neekkitta daye ukke, Hasael nug uɗa ne, dabmak kuɗum awewe, aria Kayaknu danab Elisa nug digma gayom.

¹² Elisa nug anam gaye, Hasael nug antta, nug Elisa oɗ mettom. “Danab okkai, na aɗinu gaattem?” oɗ mettom. Oɗ mette amu, Elisa nug nob ma inam aum. “Da gaattemnu diig am, da doottem, geha dimppa na kobol nau kuɗum, Israel danab ah dilagppa hekkut. Na geha Israel dilag aab ɠagattag aɗ ele loppaɗna, manadppe ewebeb, Israel nid bau amu, na qep elabppa aqappe mauhppeppeg, na nid naunau aɗualadna, huana buɗiadppe, wanppa nona mauhadppeppeg, na ah oolkad ele anadna, na qep elabppa oolag oppatadppe mauhadkkulag,” awa aum.

¹³ Elisa nug nai amu mattie, Hasael doya, nug Elisa nai mattiom amu nob ma, inam oɗ meum. “Da, nahip maɗi nid, da qai laabia aakkuib amunu, da attem hein, keeke naɗi amu da anam hekkul,” oɗ meum. Oɗ me amu, Elisa nug amegppa aum. “Yawe Nug keeke imu da ippuniɗom; na geha Aram dilag king bekkut,” awa aum.

¹⁴ Aa nai mattiya malaya, Hasael nug eɗua King Benhadat gumitta ukke, king nug Hasael oɗ mettom. “Elisa aɗi nai na amenppa aum?” awa oɗ mettom. Nug anam oɗ mette amu, Hasael nug nob ma, king amegppa aum. “Elisa nug aum. ‘Na genabnab genab, oɗe nahip amu geha iitta meeb, na ena daakkut,’ aum.” Hasael nug anam Benhadat amegppa aum.

¹⁵ Amge wagɗe deɗ amuppa Hasael nug lamen teppu ele laa awa, leppa mewowa, awa ukka, king ameg nob hauta, ɠagattag aɗe, king nug hik aokkunu elele iitta daye ukke, mauhom. Mauhe amu, Hasael nug Benhadat abenabppa Aram dilag king dayom.

Jehoram nug Juda dilag king beum

¹⁶ Ahap bekka Joram nug Israel dilag king dayaya, nuhig king dayaknu maɗ tanig eleppa amu, Juda dilag king Jehosapat nug mauhe, nug bekka Jehoram nug mameg abenab awa, nug Juda dilag king beum.

¹⁷ Jehoram nug maɗ 32 dayaya, nug king ba dayom. Nug king ba, nug maɗ eblaih ewam ele Jerusalem appa king dayom.

¹⁸ Jehoram wau am Ahap aɗeg amunu, nug Israel dilag king, ag kobol eheɗ dim lamidppig, Ahap nug baekkudppa ele ag ele amu dim lamidna heppig amu, Jehoram nug ele amubia heum. Nug Yawenu neekkakppa eheɗ heum.

¹⁹ Amge Yawe Nug nuhig maɗi nid Dawitnu dabmak anuqak awom amunu, Jehoram eheɗ heum amu, Nug amunu nob ma, Juda wan heeb nauhkkunu, Nug amu hekkunu uuom. Nug haen oh Dawit buɗubppan danab laa king daakkunu nai ana qakkom amunu, Nug anam heum.

²⁰ Haen Jehoram nug Juda dilag king dayeye, Edom ag tappenak henana, ag baula Juda dilag king waappa ii daappig. Iitta. Ag ag oolagppanu, laa nug ahilag king daakkunu king abenabppa meppig.

²¹ Ag anam heppig amunu, Jehoram nug nuhikkud bannu karis oh amu diie, aab Sair appa Edom ele ban hekkulagnu ukkom. Nug nuhikkud daup ag bannu karis gumadtteb ele ag gona tena daaegeg, Edom ag uɗin, ag oo mattan aqaglagnu heppig. Ag anam heeg, Jehoram nug nuhikkud daup ag bannu karis gumatteb ele, ag tuqan ahan, ban ɠagattagnab hena, Edom nakok eɗadna goppig, amge nuhig ban danab laala ag ban hak uun, oolna ag wanelagppa goppig.

²² Anam amu, Edom ag eɗun, Juda waalagppa ii daappig; ahilag nai ele tabappeg nekkunu ii uuppig. Gemu ⌊nai imu yaak haenppa⌋ ele ag anamib daatteb. Haen amuppa ele aab Lipna danab ah ag ahan, tappe nak henana, Juda waappa ii daappig.

²³ Amu keeke kuɗum laa ele King Jehoram heum amu, kaya amuam ag buk laappa, buk amu onig am, Juda Dilag Kingnu Kaya, ag buk amuppa yaappig daatte.

²⁴ Dimppa Jehoram nug mauhe, ag Dawitnu Aab, appa nug mamekkud aɗi boumadppigppa nug boumppig. Nug mauhe, nug bekka Ahasia, nug mameg abenab awa, nug king beum.

Ahasia nug Juda dilag king beum

²⁵ Amu Ahap bekka Joram nug Israel dilag king dayaya, nuhig king dayaknu maɗ 12ppa amu, Jehoram bekka Ahasia nug Juda dilag king ba dayom.

²⁶ Ahasia nug maɗ 22 dayaya, nug king ba dayom. Nug king ba, nug maɗ laippu Jerusalem appa king dayom. Nug anig am Atalia. Atalia alag am Omri, Israel dilag king laa.

²⁷ Ahasia anig nug am Ahap buɗubppan uɗiom amunu, Ahasia nug kobol nau Ahap, nug baekkudppa ele heppig, nug amu dim lamittatta, nug Yawenu neekkakppa eheɗ heum. Kobol Ahap baekkudppa ag heppig, amubia nug ele heum.

²⁸ Amu haen laa King Ahasia nug ukke, nug Israel dilag king Joram, Joram nug Israel dilag king Ahap bekka amu, nug nug ele oh aa Aram dilag king Hasael ele aab Ramot, Gileat wanppanu, aa appa ban hekkulagnu gopiɗ. Aa goya ban heeheh, Aram dilag daup ag Joram guittak okkai medappig

²⁹ Aram dilag daup ag Joram guittak medappig amunu, King Joram nug eɗua, Ramot appa guittak awom, nug guittak amunu eɗua ena daakkunu Jesril ukkom. Joram nug Jesril appa eɗua, ena daakkunu daye, Juda dilag king Jehoram bekka Ahasia nug anidkkunu appa ukkom. Aɗinu? Joram, Ahap bekka, nug banppa guittak awom.