2 King 7 - Nobonob Baibel

¹ King nug anam a amu, Elisa nug nob ma, inam amegppa aum. “Na Yawenu nai doye! Yawe Nug inam atte. ‘Butti, haen inam biappa amu, danab ah ag Samaria aab okkainu aɗ odppa gona, ag geha plaua witppa hak 3 kilogram aoglagnu, ag 11 gram silwappaib daden mekkulag, o ag bali aeg 6 kilogram aoglagnu, ag amu ele 11 gram silwappaib daden mekkulag,’ awa atte,” awa aum.

² Elisa nug anam a amu, ban daup ikki laa king ehanidtte, nug king ele oh uɗipiɗ, nug Elisa nai amu a doya, nug nob ma inam aum. “Yawe Nug habnu od matulatta, ee kuɗum gokkaɗeb neeb mekkeb amu, ig men doɗo nakokppa ee anam ii daden memata,” awa aum. Nug anam a, Elisa nug danab amu amegppa aum. “Na amu attem, amge da ami am genabnab genab, keeke amu geha beeb na amenppa anidkkut, amge na ee amu nakok laa ii lamana,” awa aum.

Aram ban danab ag oolna goppig

³ Haen amuppa Samaria aab okkainu aɗnu od okkai, od amu dimittim amu danab waɗele, ag gaɗa oɗe nau ele, ag appa daappig. Ag daanna, ag akka ahilagnu inam appig. “Aɗinu ig hamu inam daatta, mauhak haen ameg mettem?

⁴ Ig ahat gota ee mattignignu, ig aab okkai ooppa gokkunig dayeb, aab okkai ooppa daatteb amu, ag ee iitta amunu, ig ooppa nota, geha ig enugnu mauhkkunig. Laa amu, geha ig hamu ippaib daatta, geha mauhkkunig. Amge ig inam hekkunig am elele. Ig Aram haen tutu dayaknu aab kalakppa gota, ig igakka ag eppelagppa mekkunig. Ig anam hepput, ag ig iqappeg mauhkkunig dayeb am, anamib. Amge ag ig uuigppeg bau daagnig dayeb amu, ig aakku bau daagnig,” aon appig. Ag anam madippig.

⁵ Ag anam aeg, aakku tueb me, ag ahan, Aram dilag haen tutu dayaknu aab kalakppa goppig. Ag gona, Aram dilag haen tutu dayaknu aab kalak giginppa wana, appa danab laa daaeg ii anadppig. Iitta.

⁶ Aɗinu? Aram ban danab amu oh oolna goppig. Amunu diig am, tueb amuppa Naɗi Nug he, Aram ag oqotti okkai dooppig; ban danab ameg naɗi, hos, bannu karis ele dilag oqotti okkainab bia doon, ag inam appig. “Israel ag Hit danab, Isip danab ele, ahilkad king daden matteg, ahilkad ban danab ag banenig uɗin, ig iqaglagnu uɗitteb,” aon appig. Ag anana, ag paha ahan, daappig aben amu uun, oolna goppig.

⁷ Aram dilag daup ag tueb amuppa ag amu doon, ag ahilkad keeke amu laa ii agappig. Iitta. Ag ahilkad keeke amu oh uun goppig; amuam ahilkad sel lag, hos, donki, keeke laa oh ele. Keeke amu oh haen tutu dayaknu aab kalakppa daatteb amu, am anam daaegeg, ban danab ag oh uuadna, mauhmananu oolna goppig.

⁸ Danab waɗele gaɗa oɗe nau ele amu, ag Aram dilag daup daappigppa gonana, Aram dilag haen tutu dayaknu aab kalak giginppa nona, ag sel lag laappa nona, ag ee, le ele anidna, amu ag laappig. Lawona, dimppa ag silwa, gol, am lamen ele sel lag amuppanu oh akkan gona, lokkumattona, ag eɗun gona sel lag laappan keeke amu ele ag oh akkan gona, lokkumadppig.

⁹ Dimppa amu ag akka akka nai inam madippig. “Ig hettem amu, ig tutukku ii hettem. Gemu am ig Israel, ihinigppa deɗ ena daye, ig gota, laa amelagppa mattignignu ii hettem. Ig keeke anidmut imu, ig gemu gota, ii awota, ig butti buttua aam beeb gota akkunignu ameg mak hekkunig dayeb amu, ig bu aognig amunu, ig gemu gota, king aɗi amelagppa apput doyeg!” akka akka anam aon appig. Ag anana, ag ahan goppig.

¹⁰ Ag anam awona, aria ag ⌊uudo, gatatu ele⌋ gona, Samaria aab okkaippa tena, ag aab okkainu aɗ odppa daanna, ag od gumak danab onilagppa eeg uɗieg, amelagppa appig. “Ig Aram dilag haen tutu dayaknu aab kalakppa gomut amu, appa danab laa daaeg ii anadmut. Danab daanna nai mattieg, baalag laa ele ii doomut. Iitta. Keeke ahilkad amu oh ag uun ukkaeg niiegeg anidmut. Ahilkad hos, donki ele amu, am oh muɗippa qakkaladppig anam daatteb. Ahilkad sel lag ele daappig, ag anamib aakku daatteb,” aon appig.

¹¹ Ag aɗnu od gumak danab ag nai amu aeg doon, laa appa daappig ele ag baalag okkaippa eegeg, laa doon, ag nai amu king, nuhikkudppan ele amelagppa appig.

¹² Ag aeg, king nug tuqan amuppaib nai amu awa, nug aha, nuhikkud ban daup ikki amelagppa inam aum. “Aram dilag dabmak amu da doottem; ig eenu tutu metta, enug daattem amu, ag amu dootteb. Amunu ag haen tutu dayaknu aab kalak amu uun gona, ahilag aab dimittim aben laappa lokkumppig daatteb. Ag anam daappeg, ig aab uut dimittim gopput, ag uɗin, ig aɗaegna, ihinig aab okkai imu geha ag aoglag. Ag diig amunu anam hetteb.” King nug ag amelagppa anam aum.

¹³ King nug anam a amu, nuhig ban daup ikki laa nug amegppa nob ma, inam aum. “Ig inam hekkunignu da ool daatte. Ig danab laala maadpput gona, Aram dilagppa aɗi keeke beum amu, ag anidna, eɗun uɗin appeg doognig. Aɗinu? Aram ag ig danab maadpput gokkulag, ag ag aqappeg mauhppeg, amuam ig Israel laa oh hekkunig, anambiaib daakku. Ge, ag mauhkkulag dayeb, ig laa oh mauhkkunignu daattem, am amubia aakkuib. Amu ig danab laala epeɗiadkunig amu, ag hos tanig ele aab okkai imuppa ii mauhppig daatteb, ag amu diiadna, ag amu hekkulagnu gokkulag,” awa aum.

¹⁴ Nug anam a, aria ag danab laala epeɗiatteg, king nug hos, bannu karis aɗit ele mattowa, nug he, keeke aɗi Aram dilagppa beum amu anidkkulagnu goppig.

¹⁵ King nug he, nuhikkud danab ag gona, Aram goppig baelag mattan gona, Jodan leppa batappig. Ag baelag mattan gonana, ibppa Aram ag paha gokkulag henana, ag keeke kuɗumnab mauhnoak akkaeg ukkom niiegeg anidppig. Ahilag ban lamen, am keeke laala ele. Anttona, ag eɗun gona, king amegppa appig.

¹⁶ Ag uɗin aeg doye, haen danab ah ag Aram ag oolna gona, keeke amu uun goppig, nai amu doon, ag paha ahan, Aram dilag haen tutu dayaknu aab kalakppa gona, keeke uun goppig amu, amu oh ag aoppig. Ag wit plaua, bali aeg ele huanak agappig amunu, ag amu daden mekkulagnu hena, ag inam daden meppig. Wit plaua 3 kilogram aoglagnu, ag 11 gram silwappaib daden meppig, o ag bali aeg 6 kilogram aoglagnu, ag amunu ele 11 gram silwappaib daden meppig; Yawe aum bia heppig.

¹⁷ King nug ban daup ikki laa nug ehanidtte ele, nug nug aab okkainu aɗ od okkai amu gumakkunu otia me ukka gumom. Ban daup ikki amu nug aɗ od okkai amu guguitta hibaitta dayom. Nug anam dayom, amge haen danab ah ag aab okkai ooppanu bena, dimittim Aram daappig abenlagppa keeke aoglagnu qaiqaɗ gona uɗinna ehalegeg, nug na qa wanppa niieye, tappaeg tappaeg mauhom. King nug Kayaknu danab, Elisa laugppa ukke, Elisa nug danab amu amegppa aumbianab akku beum. Anukka king nug Elisa anidkkunu ukke, Elisa nug propet nai mattiom, nai amu gemu ba, elele mettom.

¹⁸ Kayaknu danab Elisa, nug king amegppa aum, amubianab beum. Nug inam aum. “Butti, haen inam biappa amu, danab ah ag Samaria aab okkainu aɗ odppa gona, ag geha plaua witppa hak 3 kilogram aoglagnu, ag 11 gram silwappaib daden mekkulag, o ag bali aeg 6 kilogram aoglagnu, ag amu ele 11 gram silwappaib daden mekkulag,” awa aum.

¹⁹ Amge ban daup ikki gemu mauhom amu, nug Elisa nai aumnu, nug nob ma inam aum. “Antte! Yawe Nug habnu od matulatta, ee kuɗum gokkaɗeb neeb mekkeb amu, ig men doɗo nakokppa ee anam ii daden memata,” awa aum. Nug anam a amu, Kayaknu danab Elisa nug ban daup ikki amu amegppa aum. “Genabnab genab, keeke amu geha beeb na amenppa anidkkut, amge na ee amu nakok laa ii lamana,” awa aum.

²⁰ Elisa nug anam aum, amu anamnab ban daup ikki amu nugib aakku aab okkainu aɗ od guguitta hibaitta dayeye, danab ah ag ee aoglagnu qaiqaɗ aab okkai ooppanu bena, dimittim gonana ehaleg, nug na qa wanppa niieye, tappaeg tappaeg mauhom.