2 King 6 - Nobonob Baibel

Elisa nug propet laa ehanitte, hebeb aeg leppa noum am, eɗua awom

¹ Elisa nug propet huu ameg laa gumadttom. Gumattette, haen laa propet amu ag Elisa amegppa inam appig. “Lag imu, na ig qagmeigttemppa, lag imuam nakok. Ig elele daagnignu elele iitta.

² Na appe amu, ig Jodan leppa gota, ad aot, appa ig launig bau laa, amuppa qagmekkunignu buugnig,” aon appig. Ag anam aeg, Elisa nug aum. “Amu ena, am nai iitta,” awa aum.

³ Awa a, aria propet amu oolagppanu laa nug inam Elisa amegppa aum. “Danab okkai, na ahappe, ig, nahipad maɗi nid, ig na ele oh gokkunignu oonig daatte,” awa aum. A amu, Elisa nug aum. “Ena, gobeppeg oh gotu!” awa aum.

⁴ Aakku Elisa nug ele goppig. Ag gona, Jodan leppa tena, ag lag buuglagnu digmena ad aoppig.

⁵ Ag aonna, Jodan le ihippa ad laala aoegeg amu, ag oolagppanu propet laa nuhig hebeb aeg amu hiɗa, le ooppa noum. Hiɗa no, propet nug noa aokkunu elele iitta daye, uug okkai doya, nug inam eum. “O danab okkai, gadonnab, hebeb amu da danab laanu awe uɗimi, amu gemu aeg hiɗa le ooppa noum,” awa eum.

⁶ Nug anam e, aakku Kayaknu danab Elisa, nug inam oɗ mettom. “Aben adekkuppa hebeb aeg hiɗa, le ooppa noum?” awa oɗ mettom. Anam oɗ mette, propet nug hebeb aeg hiɗa leppa noum aben amu ippunitte, aria Elisa nug ad eppeg nakok laa okkula, buɗie leppa hebeb aeg noumppa no, hebeb aeg le ooppa niiom amu ba, le gaɗappa maya meum.

⁷ Elisa nug anam ha mala, nug propet amegppa aum. “Na paha hebeb aeg amu awe!” awa aum. A, aria danab nug eppeg bahie no, hebeb aeg amu awom.

Elisa nug Aram amelag hautom

⁸ Amu haen laa Aram dilag king, nuhikkud ban danab ele ag Israel wanppa banelag uɗippig. Uɗin, king nug nuhikkud ban daup ikki laala ele nai mattiona, king nug aben adekku ag haen tutu dayaknu aab ⌊nakok⌋ kalaglagnu dabma, anam haknu aum.

⁹ Amge Kayaknu danab Elisa, nug Aram ag aben amuppa haen tutu dayaknu aab ⌊nakok⌋ kalaglagnu heppig amu doya, nug nai imu Israel dilag kingnu me ukkom. “Aram dilag daup ag aben da iikku ippuanidttem, ag appa haen tutu dayaknu aab ⌊nakok⌋ kalaglagnu gona hetteb amunu, ag aben amuppa gomananu dabmeig!” Elisa nug nai amu me ukkom.

¹⁰ Haen oh Elisa nug anam heum amu, Israel dilag king nug he, danab laa nug ukka anidkkunu ukkom. Haen kuɗum Kayaknu danab Elisa, nug Israel dilag king nug nau aomnanu dabmettak nai amu nug mettom. Elisa nug Israel ag aben amuppa mauhnoak oimnanu anam heum.

¹¹ Kobol amu baubau be, Aram dilag king nug hak amu haen elab te antta, nug oppoɗi be ameg kokoɗ eppom. Nug anam doya, nug nuhikkud ban daup ikki laala onilagppa e uɗieg, nug inam oɗ mattom. “Ippa ig oonigppa danab aun nug haen oh Israel dilag king ehanidtte, ag appeg dookkulnu ool okkai daatte. Ag amu iite appeg dookkul?” awa oɗ mattom.

¹² Nug anam oɗ matte amu, nuhig ban daup ikki laa nug inam amegppa aum. “O king, ihinig naɗi, ig ihinig huuppan danab laa ii hette. Iitta. Israel dilag propet Elisa, nugib aakku hette. Keeke aɗi aɗi ig hekkunignu hettem amu, nug Israel dilag king amegppa atte. Nai oh na madittem amu, Elisa nug dootte. Na nahip niiak abenppa daanna nai madittem amu, Elisa nug doya, Israel dilag king amegppa atte,” awa aum.

¹³ King nug nai amu doya, nug ikki danab amu amelagppa haknunab aum. “Ag gona, Elisa nug aben adeppa daatte amu mattin anidna appeg, da heppi, ban danab ag gona nug aɗaglag,” awa aum. Nug anam a, ag gona, Elisa mattin anidna, ag, “Nug Dotan aabppa daatte,” ag nai amu eɗun meeg uɗiom.

¹⁴ Aria, king nug Elisa Dotan aabppa daatte doya, nug ban danab ameg naɗi otia, hos, bannu karis ele matte, aoglagnu goppig. Ag tuqan gona, aab okkai amu talilidppig.

¹⁵ Ag gona, talilidna daaegeg, Kayaknu danab, Elisa, nuhig maɗi nid nug buttuanab aha, nug lag dimittim ukka, Aram ban danab, hos, am bannu karis ele uɗin, aab okkai amu oo mettan talilidna daaegeg antta, nug ukka, Elisa amegppa inam aum. “O danab okkai dahil, i nauhmuɗ daattep! Aram uɗin, ig oo megappig. Ig attem hekkunig?” awa aum.

¹⁶ Nug anam aum, amge Elisa nug aum. “Aib baɗame. Aɗinu? Ban danab ig ehanigkkulag ele amu, ag am ameg okkainab oo mekkan taliligppig daatteb amu, ag am eɗattak,” awa aum.

¹⁷ Elisa nug anam awowa, nug inam unuqittom. “O Yawe, dahil maɗi nid ameg oppatppe, ig ehanigkkulagnu ameg naɗi daatteb amu, nug anadkkunu oɗ medattem,” awa unuqittom. Aria, Yawe Nug maɗi nid amu ameg oppate, hos, bannu karis ele kuɗumnab qauko nakok kuɗum Elisa daatteppa, ag amuppa elele mette, ambena daaegeg anattom. Hos am bannu karis ele daappig anttom amu, ag am aab aɗu, amge aab aɗu amu dottog am hos, bannu karis dottolag dayom.

¹⁸ Anam amu, Aram ag Elisa aoglagnu uɗieg, Elisa nug ahilagnu Yawe unuqitta, inam aum. “O Yawe, na heppe, danab uɗippig umu ag amelag gatatu maneb, geha ag neegkkulagnu elele iitta daaglagnu oɗ medattem,” awa unuqittom. Awa anam oɗ me, aria Elisa oɗ meum bia, Yawe he, Aram amelag gatatu manom.

¹⁹ Yawe anam he, Elisa nug Aram ban danab gumatta ukka, inam amelagppa aum. “Ag aab laa, amuppa gokkulagnu oolag daatte ele, ib amu ag ootot aqom. Imuam aab ag gokkulagnu hetteb ele, am aab amu iitta. Ag ib imuppa aab amuppa gokkulagnu, am ele elele iitta. Amge ag ahan, da dim lamiɗppeg, geha da ag omaladppi gota, danab ag anidkkulagnu maditteb ele amu, ag anidkkulag,” awa aum. Nug anam awa a, ag ahan, Elisa dim lamitteg, nug ag omalatte, Samaria aab okkaippa goppig.

²⁰ Elisa omalatte gona, dimppa ag gona, Samaria aab okkaippa nona, Elisa nug Yawe unuqitta inam aum. “O Yawe, na Aram danab imu amelag oppatppe, ag eɗun neegkkulagnu oɗ medattem,” awa aum. Elisa nug anam unuqitte, Aram ag amelag oppate, ag neegna, ag Dotan ii daatteb, iitta ag Samaria aab okkaippa daatteb anidppig.

²¹ Ag anam gona, Samaria tena daaegeg, haen Israel dilag king nug Aram ban danab amu anatta, nug Elisa inam oɗ mettom. “O dahil danab okkai, da aqadkkulte? Da aqadppi mauhkkulagte?” awa oɗ mettom.

²² Nug anam oɗ meum, amge Elisa nug inam amegppa aum. “Na aib aqappe mauhppig. Na ban hettem haenppa kekeɗ aɗualadttem amu, na ii aqai mauhtteb amunu, ameg imu ele aqappe ii mauhmana. Iitta. Na ee, le ele madappe, ag ee, le ele amu lawona, dimppa ag eɗun, ahilag king gumidna gokkulag,” awa aum.

²³ Elisa nug anam a, Israel dilag king nug hobul naɗi Aram ban danab dilag ha matte, ag ee, le ele amu laeg, aria Israel dilag king nug he, ag eɗun ahilag king gumidna goppig. Anam beum amunu, Aram ban danab amu ag eɗun, baula Israel dilag wanppa keeke yab aoglagnu ii uɗippig. Iitta.

Aram ag Samaria aab okkai talilidna oo medappig

²⁴ Dimppa maɗ laala ukke, Aram dilag king Benhadat nug nuhikkud ban danab oh qagmatta diie, ag Samaria ele ban hekkulagnu gona, aab okkai amu oo mettan, aqaglagnu maadna daappig.

²⁵ Haen amuppa, Aram dilag daup ag aab dimittim anam daaegeg, am Samaria ag ahilagppa enug haen laa be, ag eenu tutunab daappig. Aram ag aab okkai amu haen elab oo mettan, aqaglagnu maadna daaegeg, danab ag ee aon, eɗun ooppa nokkulagnu elele iitta. Anam daye, danab laa nug donki ikkiib laa daden mekkunu oo daye heum amu, nug 1 kilogram silwa daden meum. Danab laa nug ai uppuɗil beɗulag nakok biig 250 gram daden mekkunu oo daye amu, nug 55 gram silwappa daden meum.

²⁶ Anam daye, deɗ laa Israel dilag king nug aab okkainu aɗ amu attan ta, qaɗe matta oiyeye, ah laa king onigppa ewa inam aum. “Dahil danab okkai, dahil king, na da ehaniɗe!” awa aum.

²⁷ Nug anam ewa a, king nug ah amegppa inam aum. “Amu Yawe Nug na ii ehanitteb, da am na attem ehanidkkul? Amu da ee aeg adeppan awen ehanidkkul; da wain ele adeppan awen ehanidkkul?” awa aum.

²⁸ King nug ah amegppa anam awowa, nug eɗua, oɗ meum. “Attem daatte?” awa oɗ meum. Oɗ me amu, ah nug nob ma, king ameppa aum. “Deɗ laa ah imu da amelppa inam aum. ‘Gemu i geha nid danab nahip tatam qeɗa lawoɗa, aria wagɗeb butti amu, geha ii dahil nid danab lakkunih,’ ” awa aum.

²⁹ I anam aɗaɗa, aakku i nid danab dahil amu battiɗ lamuɗ. Aria, wagɗe deɗ amuppa nid nuhig lakkunihnu ami, amge iitta. Nug nid nuhig amu lokkumom.

³⁰ Ah nug nai amu mattie, king nug ahnu nai amu doya, aria nug lamen elab nuhig aɗa patiɗom. Nug aɗ attannu ii neum, aɗ attan oiyeye, danab ah oh ag nug anttegeg, nuhig lamen elab patiɗom. Nug nuhig lamen elab patiɗom, amu lamen amu waappa nug lamen heɗiag ele beɗu qaɗeppa takka oiyeye anidppig.

³¹ Anam amu king nug aum. “Da gemu Sapat bekka Elisa baag otaɗppi mauhkku. Da heppi, nai amu meu ii beeb amu, Kayak bu okkainab meɗakkunu ool daatte,” awa aum.

³² King nug anam anana amu, nug he, danab laa Elisa qeeb mauhkkunu ukkom. Haen amuppa amu, Elisa nug laugppa dayeye, ikki danab laala laugppa uɗieg oh daappig. Amge danab king me ukkom, nug ukka ii teete, Elisa nug ikki danab amu inam amelagppa aum. “Antteg, king ihinig nug am danab qe mauhak danab. Nug gemu danab laa he, nug da baal otaɗkkunu uɗitte. Amge danab uɗitte amu, haen nug uɗia lakka bekkunu heebeb, danab amu nug lag ooppa nemanu ag od ɠagattag aɗeg!. Nuhig okkai am uma iitta nug iite dim lamidtte?” awa aum.

³³ Elisa nug ikki danab amu amelagppa nai amu mattiaya, ii gog teum, haen amuppa danab king me uɗiom aakku be, king ele nug uɗia ba, nug Elisa amegppa inam aum. “Yawe Nug ihinigppa uug naunab imu he beum. Aɗinu da Nug ameg baula mekkul?” awa aum.