2 King 5 - Nobonob Baibel

Naman beɗuppa gaɗa oɗe nau ele iitta meum

¹ Naman nug am Aram dilag kingnu ban daup ikki anuqak. Yawe ehanitte, nug ban kuɗum eɗattom amunu, kingnu neekkakppa, nug danab okkainab dayom. King nug nuhignu oo huana heum. Naman nug ban haaha, nug ban ebehi ele heum, amge nug gaɗa oɗe nau ele.

² Amu haen laa Aram ag banelag gona, Israel dilagppa keeke aona oinna, ag Israel nid ahin laa aɗan aon, eɗun goppig. Ag eɗun gona heeg, nid ahin amu nug Naman waunu maɗi ah dayom.

³ Nug anam dayaya, dimppa nid ahin amu nug nuhig okkai Naman wau amegppa aum. “Da oolppa amu, danab nahip nug propet Samaria daatte gumitta ukkeb, propet nug oɗe nuhig heeb, nug geha ena daakku doottem,” awa aum.

⁴ Nid ahin nug anam awa a, Naman nug nai amu doya aha, king gumitta ukka, Israel nid ahin nai aum amu king amegppa aum.

⁵ Nug king amegppa a, aria king nug inam Naman amegppa aum. “Na gokkut am enanag. Da geha Israel dilag kingnu uɗug laa ye medappi, na uɗug amu aon gona medakkut,” awa aum. King nug anam anana, uɗug amu ya, Naman mette, aakku Naman nug aha, 340 kilogram silwa awa, 70 kilogram gol awa, nug lamen 10 ele awa aha, Samaria ukkom.

⁶ Naman nug Aram dilag king uɗug yom amu awa, Israel dilag king gumitta ukka mette, Israel dilag king nug uɗug amuppa yaak inam ebqeum. “Uɗug yaami imuam dahil maɗi nid Naman, nuhignu yaami. Nug gaɗa oɗe nau ele, amu na heppe, nug eɗua ena daakkunu da pas imu nahip-ppa iikku mei ukkom.” Aram dilag king nug anam ye dayeye, Israel dilag king nug ebqa anttom.

⁷ Israel dilag king nug uɗug amu ebqewowa, nug oo uug dayom. Nug oo uug dayeye, nug nuhig lamen elab aɗa pattiɗa, nug aum. “Da am Kayakte? Da heppi, danab mauheb, heppi, nug eɗua, bau ena daakkunu elelete? Da doottem, Aram dilag king nug banel uɗia, iweb mauhkkulnu ib mattiaya, danab imu gaɗa oɗe nau ele dahilppa me uɗiom, aakkuib,” awa aum.

⁸ Nug anam a, aria haen Elisa, Kayaknu danab, nug Israel dilag king nug oo uug daye, nuhig lamen elab pattiɗom, nug nai amu doya, nug nai inam king dookkunu me ukke amegppa aum. “Aɗinu na ootppa uug doon, nahip lamen elab pattiɗme? Appe, danab amu da gumiɗa uɗieb, ⌊Kayak heeb,⌋ nug propet laa Israel wanppa daatte, nug amu dookku,” awa aum.

⁹ Elisa nai amu me ukke, Israel dilag king nug doya, nug Naman amegppa a, Naman nug nuhig karis attan ta ugekke, karis laala ahan dim lamitteg, ag oh gona, Elisa laug odppa teppig.

¹⁰ Tena daaegeg, Elisa nug nai awa ukkak danab laa nug ukka, Naman amegppa inam akkunu a, ukka aum. “Na gona, Jodan leppa haen eblaih aɗit ele le laappe, geha nahip oɗe amu iitta meeb, na beɗun eɗua ena daakku,” awa aum.

¹¹ Elisa he, danab amu nug ukka, anam a, Naman nug nai amu doya, nug oo nauhe, nug Elisa laug uua aha ugakka, nug inam aum. “Dahil dabmak am inam dayom. Da goppi, propet amu nug dimittim da gukkuiɗa doa aniɗeb daaɗa, nug Yawe, nuhig Kayak, nug Nug unuqitta, eppeg da beɗul laih oɗe ele amu attan bahieb ukkeb, eɗua aweb dokku. Nug anam heeb, oɗe beɗulppa iitta meeb, da ena daalom. Amge iitta.

¹² Nug da amelppa da ukke, Jodan leppa laakkulnu aum, amge Damaskusnu le aɗit laa, laa onig Abana, laa onig Parpar, le aɗit amu Israel dilag le oh eɗadttep. Da le aɗit amu, amuppa laappi, oɗe beɗulppa iite iitta mekku?” awa aum. Nug anam anana, aakku Naman nug oppoɗi huana be, ameg kokoɗ eppe ukkom.

¹³ Ukkom, amge Namannu maɗi nid ag gumidna doeg, nai mattin, ag nug amegppa appig. “O ihinig danab okkai, propet amu nug na keeke laa uɗat okkai ele hekkutnu amenppa alo amu, ig doottem, na helom. Amge nug na keeke anam haknu laa ii mattiom. Iitta! Nug na amenppa tutukku le laappe, nahip oɗe amu iitta mekkunu aum. Amunu na nuhig nai, ‘Na le laan, ena bekkut amu, na amu dim lamidkkut amu enaib,’ ” aon appig.

¹⁴ Ag anam aeg, aakku Naman nug Jodan leppa ukka, nug noa, Jodan le haen eblaih aɗit ele layom; nug Elisa, Kayaknu danab, nug aum bia heum. Naman nug Jodan le laye amu, aria nug beɗuppa gaɗa oɗe nau ele, oɗe amu iitta me, nug beɗu gaɗa am bau, ena, nid nakok gaɗalag bia ena beum.

¹⁵ Anam beum, amu dimppa Naman nug nuhikkud huu ele ag eɗun, Kayaknu danab Elisa, nug gumidna gona, Naman nug Elisa noobppa hibaitta dayaya, nug inam amegppa aum. “Antte, genabnab genab, gemu da doottem, wan ohppa amu Kayak laa ii daatte. Iitta. Israel dilag Kayak Nugib Kayak daatte. Amunu gemu da, nahip maɗi nid, da keeke nahip daakkunu hamu na medakkulnu ool daye, medakkulnu oɗ medattem,” awa aum.

¹⁶ Nug anam aum, amge Elisa nug amegppa inam aum. “Yawe, da am nuhig maɗi nid amu, ⌊Nug, da iitta, Nug he, na ena daattem amunu,⌋ Yawe Nug genab bau daatte, genab amubia da keeke laa ii aopa,” awa aum. Amu Naman nug Elisa keeke amu aokkunu nakok wagai meum, amge nug ii awom. Iitta.

¹⁷ Elisa nug anam he, aria Naman nug Elisa amegppa inam aum. “Na da keeke nahip daakkunu hamu medakkulnu hemi ii aokkut dayeb am, nai iitta, amge na appe, laa ag Israel dilag wanppan wan, miul aɗit mawaknu elele, ag wan amu da meɗaglagnu oɗ medattem. Aɗinu? Da, nahip maɗi nid, da baula manaknu ofa, o mana mettak laala ele kayak laa ii medapa. Iitta! Yawe aakkuib medakkul ⌊amunu, da daattemppa nuhig qaɗab wan amuppa qekkulnu hettem⌋.

¹⁸ Amge da, nahip maɗi nid, da Yawe Nug dahil hipunin laippu imuib uhuqa meɗakkunu ool daatte. King dahil nug haen oh ukka, kayak hambuppuak Rimonnu mettid lag appa Rimon noobppa dup noa binag mette. Da nug ele daattep amunu, nug da ele haen oh lag amu ooppa noɗa, king nug da eppel aɗatte amunu, haen nug Rimon noobppa dup noa binag mekkunu noobppa gateg qaun otte amu, da ele gatel qaun ottem. Da amu hettem amu, hipunin dahil amu Yawe Nug uhuqa meɗakkunu da ool daatte,” awa aum.

¹⁹ Naman nug anam a amu, Elisa nug amegppa aum. “Na ootppa maɗoɗ ele ukke!” awa aum. Elisa nug anam a, aria Naman nug Elisa uuitta noa, nakok uma ugekke,

²⁰ amu Kayaknu danab, Elisanu maɗi nid Gehasi nug nukka nuhig dabmak he be, nug inam aum. “Danab okkai dahil nug Aram danab Naman keeke medakkunu awa uɗiom ele, nug amu aokkunu uue, nug eɗua awa gotte. Aɗinu nug keeke amu uue, Naman nug eɗua awa gotte? Amunu da Yawe Nug genab bau daatte, genab amubia da qaietten, Naman dim lamitte ukke, nuhig keeke laala appi meɗakku,” awa aum.

²¹ Nug anam dabma, nukka anam mattia, nug aha, qaietta Naman dim lamitta ukkom. Dim lamitta ukke, Naman nug neekka, danab laa nug dimugppa qaiqaɗ dim lamitta uɗie antta, nug karis attannu aha noa, nug uɗa tekkunu ibppa hibaitta dayeye, Gehasi ukka te, Naman nug Gehasi inam oɗ mettom. “Na maɗoɗ ele uɗittemte?” awa oɗ mettom.

²² Naman oɗ mette amu, Gehasi nug Naman amegppa aum. “Da maɗoɗ ele uɗimi, amge danab okkai dahil nug da na amenppa akkulnu he uɗimi. ‘Gemu propet huuppan danab aɗit laa aa da laulppa uɗipiɗ. Aa amu propet ameg laa, Epraim wanppa, qauko qauko daattebppa, aa appanu uɗipiɗ. Uɗipiɗ amunu, na aa 34 kilogram silwa, am lamen aɗit ele matakkutnu oɗ medattem,’ awa atte,” awa aum.

²³ Gehasi nug anam a amu, Naman nug Gehasi amegppa aum. “Da silwa 34 kilogram aakkuib ii medapa. Iitta! Da 64 kilogram medakkul,” awa aum. Nug anam anana, nug aokkunu nakok wagai ma, nug lamen aɗit propet aɗit dilahnu ele awa mettowa, nug silwa, amu lamen ele bek aɗitppa itowa, nug nuhig maɗi nid aɗit he, aa keeke amu maoya, anuqya ukkaeheh, aa Gehasi ele goppig.

²⁴ Ag gona, laugppa tena, Gehasi nug keeke amu oh maɗi nid aɗit eppelahppanu awa, lag ooppa mawa ukka mewowa, nug he, maɗi nid aɗit aa eɗuya Naman gumidya gopiɗ.

²⁵ Aa ukkaeheh, Gehasi nug noa, nuhig okkai Elisa noobppa dayom. Dayeye, Elisa nug antta oɗ mettom. “Gehasi na adeppa gowona uɗime?” awa oɗ mettom. Oɗ mette amu, Gehasi nug aum. “Da, nahip maɗi nid, da adebtag laa ii gomi,” awa aum.

²⁶ Nug aum, amge Elisa nug Gehasi amegppa aum. “Da ouɗil amu na ele daaeheh, amu haen danab nug uɗan tekkunu karis aɗa oola na, hibaitta dayom ele amu, da doomi. Gehasi gemu am men doɗo, o lamen, o olip dad, o grep dad, o sipsip, o makau, o maɗi nid, o maɗi ah awaknu haen iitta.

²⁷ Na Namannu men doɗo keeke laala ele aome amunu, Naman beɗuppa gaɗa oɗe nau ele dayom amu, gemu eɗua na beɗunppa ba, geha huu nahip dimppa bekkulag ag ele hanhan oɗe amu aoglag,” awa aum. Nug anam a, Gehasi nug Elisa uuitte, gaɗa oɗe nau amu nug beɗuppa ba, beɗu gaɗa amu hakkab eppa, sno bia dayom.