2 King 4 - Nobonob Baibel

Ah qab nug Elisa nug ehanidkkunu oɗ mettom

¹ Amu ah laa, gamu nug propet huu ameg laa, nug amuppa daya mauhom, danab amu qappu amu, nug Elisa gumitta uɗia, nug inam amegppa aum. “Danab okkai, danab dahil nug am nahip maɗi nid, nug mauhom. Na doottem, nug haen oh Yawenu ebehi oh bodoetta le mettom. Amge gemu danab nug lon mekke, eɗut ii mettamut ele aokkunu hette, amge da men doɗo iitta. Nug nid dahilaɗ aɗit amu diiata ukka heeb, nuhig begbeg maɗi nid daaglahnu uɗiom,” awa aum.

² Nug anam a, Elisa nug nai amu doya, nug ah qab oɗ mettom. “Da geha na ehanidkkulnu amu attemu? Na lautppa keeke aɗi daatte amu, na da amelppa appe doyei!” awa aum. Awa a, ah nug Elisa amegppa aum. “Da, nahip maɗi ah, da keeke laala iitta; olip goɗen nippud laappa big nakok aakkuib da laulppa daatte,” awa aum.

³ Nug anam a, aria Elisa nug ah amegppa aum. “Na gona, nahip mudippan laipad appe, nippud ooppa keeke iitta ele medappeg, ewam, aɗit keeke aib medappig, kuɗum mettaglag,” awa aum.

⁴ Nug anam ana, nug nai tuɗitta aum. “Na nippud amu akkan, na laut ooppa maattona, na lag ooppa gona, od amu manappe, na nakka begapaɗ ele ag akkaib daaglag. Aria, goɗen nippud laippu ahilagppa daatte amu, ag amuppanu gokkaɗppeg, nippud ooppa keeke iitta ele, amuppa noig! Digmak nippud laappa goɗen gokkaɗppeg noa, ambeeb, nippud ambak amu aon ona, daug laih meig! Ag tuɗidna anamib heppeg ukkeb ukkeb, nippud amu oh am goɗen eleib daaglag,” awa aum.

⁵ Elisa nug anam a, ah qab nug Elisa amegppa aum amu, nug aum bia oh ha malowa, nug laug od manom. Nug nukka bekoɗ eleib lakka daanna, nid aɗit aa anilah ehanidya, nippud aoya doya mettaeheh, nug goɗen gokkaɗeɗe, nippudppa noono, anam heeg ukke ukke, nippud amu ohppa goɗen noum.

⁶ Haen nippud oh goɗen inan malanna, ah nug bekka laa amegppa aum. “Nippud laa aon dona meɗe!” awa aum. Amge bekka nug aum. “Anai, nippud laa ii daatte. Oh goɗen ele ambeppig,” awa aum. Anam a amu, goɗen baula nippud amu ooppanu ii neum. Iitta.

⁷ Aakku ah qab nug ukka Elisa, nug Kayaknu danab amu, nug nug amegppa a, Elisa nug ah amu amegppa inam aum. “Gona, goɗen amu meppe, daden meppeg, men doɗo aon, danab nahipnu keeke nob eɗua mettaknu amu, na danab amu medappe, men doɗo laa daakku amu, na begapaɗ ele, ahilag ee daden mena lakkulagnu dayaɗ!” awa aum.

Sunem ah bekka mauhe, Yawe he, eɗua hibaittom

⁸ Deɗ laappa Elisa nug Sunem aabppa ukkom. Aab amuppa ah laa nug enub nakok kuɗum ele dayom. Ah amu nug Elisa uɗieb, nug laugppa nug gamu ele, ag oh daanna, oh ee lakkulagnu nakok eeɗa ha oɗ mettom. Aakku Elisa nug haen oh uɗia, nug ah amu laugppa ee lattom.

⁹ Haen laa ah amu nug gamu amegppa aum. “Da doottem, Elisa nug haen oh ig launigppa uɗieye, ig ele ee lattem amu, nug amu danab Kayaknu tituanak daatte

¹⁰ amunu, i lag koɗokko uɗem ukkak, i amuppa oo nakok laa heɗa, Elisanu uupuɗ dayebeb, i qaɗaqaɗ, balal, sia, amu lam ele, i keeke amu oh oo amuppa mekkunih. I anam hepuɗ, haen nug uɗia amu, nug aguppa daakku,” awa aum. ⌊Nug anam a, gamu aaɗa a, aakku anam hepiɗ.⌋

¹¹ Aria, deɗ laa Elisa nug eɗua, Sunem uɗia, nug niikkunu oo heppig, nug amuppa ta noa, hik awa niiom.

¹² Nug hik awowa, dimppa nug nuhig maɗi nid Gehasi amegppa aum. “Na nona, ah oo imu babaittom ele amu anidna appe, gumiɗa baɗ!” awa aum. Nug anam a, Gehasi nug ah amu onigppa e ta, ⌊Gehasi⌋ noobppa hibaitta dayom.

¹³ Dayeye, Elisa nug Gehasi nug ah amu inam oɗ medakkunu amegppa aum. “Na i ehanitkkutnu uɗat naɗi heme amunu, i nahipnu aɗi keeke hekkunihnu elele? I goɗa, king, o ban daup ikki anuqak, aa oolahppa laa amegppa nug keeke nahip laa hekkunu oɗ mettagnihte?” awa oɗ mettom. Nug anam oɗ mette, ah nug nai amu nob ma inam aum. “Da dahilad oolagppa ele ena elele daattem,” awa aum.

¹⁴ A amu, Gehasi ah nai aum amu Elisa amegppa a, Elisa nug aum. “Amge i keeke aɗi laa nuhignu hekkunih?” awa oɗ mettom. Oɗ mette amu, Gehasi nug aum. “Ah amu nug bekka laa iitta, nug gamu ele am kaino meum,” awa aum.

¹⁵ Aria, Elisa nug Gehasi amegppa ah onigppa eeb nokkunu a, Gehasi ah onigppa e noa, od oɗeppa hibaitta dayom.

¹⁶ Nug dayeye, Elisa nug ah amegppa aum. “Dimppa, maɗ laappa haen inamppa amu, na bekkat eppenppa aɗakkut,” awa aum. Nug anam a, ah nug nai nob ma, Elisa amegppa aum. “Iitta. Danab naɗi, na am Kayaknu danab, na aib da, nahip maɗi ah, na da buppuiɗme,” awa aum.

¹⁷ Nug anam aum, amge dimppa ah amu nug oo ele daya, maɗ laappa, kalam aum, amuppa Elisa amegppa aumbia, nug nid danab menuom.

¹⁸ Nug nid menue, nid nug ena ma, nakok okkai ma, nug deɗ laappa aha, mameg anidkkunu ukkom. Mameg nug uɗat nid ag wit dadppa wit okkulnana daaegeg, nug ag ele daappig.

¹⁹ Nid nug ukka dayeye ukke, nug mameg amegppa aum. “Da ikkil e, da ikkil e, huanak guiɗttede,” awa aum. Nid anam a amu, mameg nug nuhig maɗi nid laa amegppa aum. “Nid nakok imu maon, anig toppa ukke!” awa aum.

²⁰ Maɗi nid nug nid nakok amu mawa ukka, anig mette, anig nug dogoppa me niiom. Nid nug anig dogoppa niie ukke, am ameg tutukkuppa mauhom.

²¹ Nug mauhe, ah nug nid nakok gaɗa amu mawa, lag koɗokko uɗem ukkappa ta, oo amuppa noa, Kayaknu danab, Elisa, nuhig niiak abenppa me niieye, nug ba, od manowa na, dimittim ukkom.

²² Nug anam hewowa, nug gamu onigppa e uɗie, nug amegppa inam aum. “Na maɗi nid laa amegppa appe, nug donki awa uɗia meɗeb, aria da paha ukke, Kayaknu danab amu anttoya, da eɗue uɗikkul,” awa aum.

²³ Ah nug anam a amu, gamu nug wau oɗ mettom. “Aɗinu na gemunab gokkutnu hettem? Gemu am Sabat deɗnu hobul, o kalam baunu qagmak gamag ahak ele iitta,” awa aum. Nug anam a amu, ah nug amegppa aum. “Na maɗoɗib daye!” awa aum.

²⁴ Aria, ah nug paha dayaknu keeke donki qaɗeppa ma qakka, attan ta, nug maɗi nid amegppa aum. “Haen i goɗaɗa amu, na heppe, donki nug paha paha ukkaɗ! Donki heppe, qinonob gokkunu ool dayeb amu, geha da na amenppa akkul,” awa aum.

²⁵ Aakku ah nug maɗi nid ele Karmel qaukoppa, Elisa anidkkulahnu gopiɗ. Goya, aa piɗe ibppa uɗieheh amu, Kayaknu danab Elisa nug neekke uɗie anata, nug nuhig maɗi nid Gehasi amegppa inam aum. “Umu am Sunem ah uɗittede, antte!

²⁶ Qaiqaɗ gona, nug uɗittede anidna, nug, amu nug gamu, am bekka ele ag ena daattebtai, o iittatai oɗ mette!” awa aum. Nug anam a, Gehasi nug ukke, ah amu ele nug uɗa teya, oɗ mette, ah nug amegppa aum. “Keeke oh elele daatte,” awa aum.

²⁷ Ah amu nug anam aum, amge haen nug qaukoppa, Kayaknu danab Elisa gumitta ta amu, nug gateg qaun o, gomela, Elisa baeg aɗom. Aɗe, Gehasi nug ah anam he antta doa, ah mauteb, piɗe ukkakkunu heum. Nug anam heum, amge Kayaknu danab Elisa, nug Gehasi amegppa aum. “Uuppe, nug uug okkainab laa ele amunu hette. Anam, amge Yawe nug da amelppa ah imu, nuhig uugnu amu ii aum,” awa aum.

²⁸ Nug anam a, aria ah nug amegppa aum. “Danab okkai, nahip nai, na ae Kayak Nug da nid amu meɗom, da na amunu oɗ ii mettami. Amge da am inam amenppa ami. ‘Na aib hambuppuiɗme,’ ami.”

²⁹ Elisa nug nai amu doya malowa, aria nug Gehasi amegppa inam aum. “Ahan bappaidna, dahil dudqak hokkat amu aon, eppenppa aɗan, na paha Sunem gokkut. Amu na gonana, ibppa danab laa anidna, aib na nug humidme. Am danab laa nug na humitteb amu, na nai nuhig aib nob meme. Na ah imu laugppa tutukku gona, na dahil dudqak hokkat amu nid nakok iɗuppa me!” awa aum.

³⁰ Elisa nug Gehasi amegppa anam aum, amge nid anig nug Elisa nug gokkunu ii he antta, nug inam Elisa amegppa aum. “Yawe genab bau daatte, genab amubia da na uuitten ii gopa!” awa aum. Nug anam a amu, aakku Elisa nug ahe, ah amu ele Sunem aabppa gopiɗ.

³¹ Aa gopiɗ, amge Gehasi nug anuqa ukka, Elisanu dudqak hokkat amu nid nakok amu iɗuppa meum. Nug meum, amge nid nug beɗu ii awa oiye, laa ii nutuom, iittanab iitta amunu, Gehasi nug eɗua ukkom. Nug ugakka, ibppa Elisa, amu Sunem ah ele anata, nug Elisa amegppa inam aum. “Da ukkena, na ame bia da hemi, amge nid nakok amu ii ahom,” awa aum.

³² Nug anam a, Elisa nug uɗia ba, lakka ta, nug attan ta, lag oo nuhig amu od oɗeppa ukka, neekke no, nid nakok gaɗa amu nuhig niiak aben balalppa mauhak niieye, antta,

³³ nug lag ooppa noa, od manom. Nug nid nakok amu eleib lag ooppa daayya, aria Elisa nug Yawe unuqittom.

³⁴ Unuqittowa, nug niiak aben balalppa ta ukka, nid nakok gaɗa tona, nug oɗe, ameg, iɗu, eppeg am nid gaɗa amu oɗe, ameg, iɗu, eppeg eleppa ma tonom. Aria, nug anam dayeye, nid nakok gaɗa amu eɗua beɗu gakkaɗom.

³⁵ Elisa nug anam hewowa, nug eɗua aha, nug lag ooppa nakok ukka uɗiak oiya, nug eɗua tatam heum bia, nid nakok gaɗa amu eɗua tonom. Aakku, nid nakok nug haen eblaih aɗit ele ihia, nug ameg oppata neekkom.

³⁶ Nug anam he, Elisa nug Gehasi onigppa e do, nug ukka, nid anig amegppa ab uɗikkunu amegppa a, nug Elisa aum bia ukka, nid anig amegppa a uɗia, nug lag koɗokko uɗem ukkappa ta, lag ooppa no, Elisa nug ah amegppa aum. “Na nid danab nahip aon ukke!” awa aum.

³⁷ Nug anam a, ah nug uɗia, Elisa noobppa gateg qaun o, gomela, iɗu wanppa meum. Ah nug anam hewowa, nug aha, nid nuhig awa ukkom.

Elisa nug he, ee laa eɗua ena beum

³⁸ Amu deɗ laa enug haen Israel wanppa uɗie, Israel danab ah oh ag eenu tutu daappig. Haen amuppa Elisa nug eɗua ukka, Gilgal aabppa, appa dayeye, amu deɗ laa propet huu ameg laa ag nug gumidna uɗin, ag nuhigppa sul nai aonna daaegeg, nug nuhig maɗi nid amegppa aum. “Na waa okkai aon mena, danab imu lewa lakkulagnu keh gehie,” awa aum.

³⁹ Amu propet amu oolagppanu laippu laa nug aha ukka, nug lewa amu haknu keh laala antta aokkunu ukkom. Nug ukka, muɗi gub dakkuɗ laa meu antta, “Lanaknu ena,” anana, nug kuɗum bia akka, lamen nuhig piia, aguppa maattom. Aria, nug awa uɗiowa, meu amu oppate, naunau ne, waappa oh battiom. Amge nug keh amu, am attemu nug ii doyom.

⁴⁰ Aria, ag lewa danab amu lakkulagnu tappiɗppa gokkaɗna madappig, amge danab ag lewa amu digmena lanan doon, ag Elisa onigppa inam eppig. “O Kayaknu danab, lewa imu iqeb mauhkkunig,” enana, ag lewa amu lakkulagnu elele iitta.

⁴¹ Ag anam eeg, Elisa nug plaua witppa hak laala akkan dona mettaglagnu amelagppa a, aon doeg, nug plaua amu waa lewa eleppa gokkaɗe no, lewa amu eɗun gokkaɗna, danab amu lakkulagnu amelagppa aum. Nug anam he, lewa amu, amuppa aɗitai eheɗ laa ii dayom; lanak ena beum.

Elisa nug propet danab 100 ee mattom

⁴² Dimppa haen laappa, danab laa Balsalisa appanu Kayaknu danab Elisa gumitta uɗiom. Nug bali bret 20, bali tatam oɗuomppanu hak amu, nug amu Elisanu awa uɗiom. Amu awa uɗia, nug ee aeg bau awak ele bek laippuppa inak, nug amu ele awa uɗia mettom. Awa uɗia mette, aria Elisa nug nuhig maɗi nid amegppa aum. “Ee amu aon, propet danab umu madappe lakkulag,” awa aum.

⁴³ Nug anam aum, amge maɗi nid nug Elisa amegppa aum. “Ee imuam nagnag, propet danab 100 ag ee imu eɗidtteb; lappeg oolag iinab aɗama,” awa aum. Nug anam aum, amge Elisa nug eɗua maɗi nid amegppa aum. “Am elele. Na bret amu propet danab madappe, ag lakkulag. Aɗinu? Yawe Nug atte. ‘Ag geha bret amu lappeg, oolag dittieb, big daakku,’ awa atte,” awa aum.

⁴⁴ Aria, maɗi nid nug ee amu propet danab matte, danab ag ee amu laeg, oolag dittie, ee big dayom, Yawe aum bia.