2 King 3 - Nobonob Baibel

Israel ag gona, Moap ele ban heppig

¹ Jehosapat nug Juda dilag king dayaya, nuhig king dayaknu maɗ 18ppa Ahap bekka Joram nug Israel dilag king ba, nug maɗ 12 Samaria appa king dayom.

² Joram nug Yawenu neekkakppa eheɗ heum, amge nug mameg anig ele aa kobol naunab hepiɗ amu, nug anam ii heum. Iitta. Nug kayak hambuppuak Bal dottog mameg anukka heum amu loppaɗom.

³ Amge Joram nug Nebat bekka Jeroboam hipunin hatta he, Israel danab ah ag hipunin amu ele hadappig amu, Joram nug hipunin diig laippu amuib nug ele hattom. Nug hipunin amu hekkunu ii uua di-ii-mettom.

⁴ Amu Moap dilag king Mesa nug sipsip kuɗum bekkadttom. Amu nug Israel dilag king waappa dayom amunu, nug haen oh maɗ ohppa sipsip nakkud 100,000, takis bia, Israel king medatta, amu sipsip dawai 100,000 uɗilag, amu ele medattom.

⁵ Amge dimppa Ahap, Israel dilag king, nug mauhe, amu Mesa nug Israel dilag king bau ba daatte doya, haen amuppa Moap dilag king nug Israel dilag king waappa daakkunu uua, nuhig nai tappe neum.

⁶ Nug anam he, aakku King Joram nug Samaria uua aha oiyaya, nug Israel dilag ban danab oh qagmaattom.

⁷ Nug Israel ban danab qagmattatta, nug nai me, Juda dilag king Jehosapat toppa ukkom. Nug nai inam me ukkom. “Moap dilag king nug da waalppa daakkunu uua, dahil nai tappe neum amunu, da banelag gokkulnu hein bappaidmi daattem. Na doppe, da ele oh gokkunihnu elelete, o iitta?” Nug nai amu me ukkom. Nug me ukke, Jehosapat nug nai amu nob inam meum. “Da na ele oh gokkunih. Da na ele i laippu daattep. Ihintad danab ele ag anamib aakku, amu ihintad hos ele,” awa aum.

⁸ Aria, Jehosapat nug eɗua, Joram inam oɗ mettom. “Amu ig ib atten dim lamidta gopput, ban hekkunig?” awa oɗ mettom. Joram nug oɗmak amu nob ma inam aum, “Geha ig Edom dilag atu taɗakppa ib gotte, ib amu dim lamidta gokkunig,” awa aum.

⁹ Anam amunu, Israel dilag king Joram, Juda dilag king Jehosapat, amu Edom dilag king ele, ag ahan, ahilkad ban danab diieg, ag goppig. Ib amuam ib elab amunu, deɗ eblaih aɗit ele ib amuppa goppig. Ukkaegeg, ban danab dilag le, amu doɗ dilag le ele aon goppig amu, iitta meum.

¹⁰ Anam be amu, Israel dilag king nug aha, inam aum. “Imuam gadonnab gadon. Yawe Nug ig king ewam imu gemu Moap dilag king eppegppa meigkkunu, Nug qagmeikomte?” awa aum.

¹¹ Nug anam aum, amge King Jehosapat nug Joram inam oɗ mettom. “Yawenu propet laa, ig nug amegppa apput, ig geha attem hekkunig amu, nug Yawe amunu oɗ metteb, amegppa ab, nug ab ig doognignu laa iite daatte?” awa aum. Amu Israel dilag king Joramnu ban daup ikki laa dayaya, nug nai amu doya, nug inam nob meum. “Sapat bekka Elisa nug daatte. Anukka nug am propet Elaiyanu maɗi nid dayom,” awa aum.

¹² Ban daup ikki nug anam a amu, Jehosapat nug aum. “Yawenu nai am Elisa, nuhigppa daatte,” awa aum. Nug anam aum amu, king ewam, Israel dilag king, Juda dilag king, amu Edom dilag king ele, ag Elisa anidkkulagnu noppig.

¹³ Ag nona, nuhigppa teeg amu, Elisa nug Israel dilag king amu antta, nug amegppa inam aum. “Na aɗinu da gumiɗna uɗime? Na mamennu propet nug anukka gumatta gottom, am na aninnu propet nug anukka gumatta gottom amu, na amu gumadna golom,” awa aum. Elisa nug anam a amu, Israel dilag king nug Elisa amegppa aum. “Na amubia amananu oɗ medattem. Aɗinu? Yawe Nug nukka ig king ewam imu Moap dilag king eppegppa meikka qagmeikkom,” awa aum.

¹⁴ Joram nug Elisa amegppa anam a amu, Elisa nug eɗua, nug Joram amegppa aum. “Da am Yawenu maɗi nid, amu genab Yawe Nukka Ɠagattag Oh Ele Nug bau daatte, genab amubia da attem. ‘Juda dilag king Jehosapat nug na ele ii daalop amu, da na iɗun ii anidlom, o da na ele nai ii mattilop. Amge da Jehosapatnu dabmettem, nug am danab ena, da nuhignu hein, da nahip nai dookkul,’ ” awa aum.

¹⁵ Elisa nug anam awowa, nug aum. “Heppeg, danab laa harp qak dootte ele uɗiaɗ!” awa aum. Nug anam a, danab harp qak doyak ele uɗia, harp qeeqe, Yawenu ɠagattag amu Elisa, nuhigppa uɗiom.

¹⁶ Nug anam heehe, aria Elisa nug amelagppa mattia aum. “Yawe Nug inam atte. ‘Ippa le anukka gottom, amge qaɗaiettom, aben oolnu noak imuppa ag le ippu kuɗum amuppa heig!

¹⁷ Aɗinu? Ag geha gu, ulah ele laa ii anidmana, amge le nug oolnu noak imuppa amba gokku amunu, ag, ahilkad makau, am ahilkad doɗ laa oh ele, ag oh le elele lakkulag,’ ” awa aum.

¹⁸ Elisa nug nai amu awowa, nug tuɗitta aum. “Yawe Nug keeke imu hekkunu am uug iitta. Nug ag le madakkunu am keeke okkai iitta, am keeke nakoknab. Ele amu, Yawe Nug Moap ag eppelagppa maadkku.

¹⁹ Ag ahilag aab ɠagattag aɗ ele amu, ag eɗadna aona, ag aab okkai oh ele eɗadna aoglag. Ag eɗadna awona, geha ag ad ena ahilkad amu oh ag oadna, ahilkad le qeppuɗia bak oh ag keldoadna, wan ahilkad ee eppaknu aben ena ohppa amu, ag men agappeg nona tonadppeg, nauhak dayeg!” awa aum. ⌊Elisa nai mattia male, king ewam ag ahan, nug uuidna gona aeg, daup ag le ippu naunau bia buualadppig.⌋

²⁰ Aria, deɗ amu iitta me, wagɗe, deɗ amuppa, buttua, amuam buttuanu mana mettak haen, haen amuppa Edom appanu le uɗia, oolnu noak amu oh tonom.

²¹ Amu Moap ag nai inam aakku matu dooppig. “King ewam ag banelag uɗitteb,” dooppig. Doon, ag danab oh ban haknu elele, laa am nid bau, laa am danab kaino amu, ag amu oh onilagppa eeg uɗin qagmena, dimppa ag uɗin Moap wan, Edom wan ele tomppa bannu bappaidna daappig.

²² Aria, Yawe Nug Juda aɗi ehanadkkunu le me uɗiom, deɗ amu wagɗe, Moap ag buttua ahaeg, aamnu amahlak amu le ye, le oh kokoɗnab, tiig bia dayeye, Moap ag piɗe daanna, neekkeg ukke anidppig.

²³ Moap ag amu anidna, ag inam appig. “Antteg! Umu am tiilag. Daup amu ag akka akka aakku kekeɗ mena, ban hena, ag kuɗum aqaegtai, tiilag neum wanppa daatte,” aon appig. Ag anam awona, ag ele appig. “Doppeg, ig ahilag abenppa gota, keeke ahilag am aotu!” aon appig.

²⁴ Moap ag anam ana, ag Israel haen tutu dayaknu aab kalakppa goppig, amge haen ag gona teeg amu, Israel ban danab ag ahan, Moap eheɗ aqaeg ukke, Moap ag eɗun oolppig. Ag ooleg, dimppa Israel ag gona, Moap wanppa oinna, ag Moap kuɗumnab, huanak aqappig.

²⁵ Ag amu henana, ag aab ahilkad hatteg nauhna autna aoppig. Israel ag Moap wan amu aben ohppa gona oinna, wan laih laala, dad haknu aben ena, amuppa ban danab ag men akkan akkaeg nona, wan amu tonom. Le qeppuɗia bak ahilag ele oh keldoadna, ad ena ena oh ele oadppig. Ag aab ahilkad oh heeg nauheg, aab laippuib anam bia ii dayom. Aab amu onig Kirheres. Aab amu dayeye, ban danab ketapol eppig ele ag aab amu talilidnana, ag men eeg, aab amu ooppa noum.

²⁶ Ag anam heegeg, Moap dilag king nug kekeɗ ag nug eɗidkkulagnu wagai mena ɠagattag daan, amu hekkulagnu daaeg antta, aakku ban danab nuhikkud 700 ag qep elabppa ban haknu doya auta awak ele, ag ahilkad qep elab akkan, wagai mena aab uun oolna, Edom dilag king anidkkulagnu goppig. Amge ag hekkulagnu elele iitta.

²⁷ Aakku Moap dilag king nug aha, nuhig nid danab tatamnu, dimppa nug abenabppa king daalo ele, nug nid amu awa, qe mauhe, nug Moap dilag kayak hambuppuak medakkunu manaknu ofa heum. Nug mana mettak amu aab okkainu aɗ, amu attan heum. Aakku Israel ameg naɗi aab amu oo mettan daappig amu, nug anam he anidna, ahilagnu oppoɗi be ameg kokoɗ eppak huanak dayom doon, ag eɗun ahilag wanppa goppig.