2 King 25 - Nobonob Baibel

¹ Sedekaia nug Nebukatnesarnu nai tappe neum amunu, Babilon dilag king Nebukatnesar nug nuhikkud daup oh ele ag ahan uɗin, Jerusalem danab ah ele ban heppig. Nebukatnesar, nuhikkud daup ele ag Sedekaia king dayaya, nuhig king dayaknu maɗ eblaih waɗeleppa, kalam eblaih laih elenu deɗ eblaih laih eleppa uɗin, Jerusalem guguittak daappig. Ag appa haen tutu dayaknu aab kalan daan, ag Juda danab Jerusalem daappig ele ban hekkulagnu aab amu talilittak bannu keeke bappaidppig.

² Ag digmena, anam Jerusalem oo mattan aqaknu maadna daaeg ukke ukke, King Sedekaianu king dayaknu maɗ 11ppa ag Juda eɗadna Jerusalem aoppig.

³ ⌊Babilon ag aab okkai talilidna daappig amunu, aab ooppa daappig ag dimittim gona, ee aoglagnu elele iitta.⌋ Ag anam daaeg ukke, Sedekaianu king dayaknu maɗ 11 ooppa, kalam ebqak waɗele, kalam amunu deɗ eblaih waɗeleppa ee iittanab meum. Danab ah ag ee laa aon lakkulagnu am iittanab iitta.

⁴ Juda ag anam eheɗ daaegeg, Babilon ag aab okkainu aɗ aakku heeg, giɗo naɗi dayom. Giɗo naɗi daye, Juda dilag daup Jerusalem daappig ele ag ⌊Sedekaia ele⌋ tuqan amuppa kingnu dadppa wana gona, aabnu aɗ laih laih doa qal mettak daapiɗ odppa wana, dimittim gona, ag oolna, atu onig Araba, appa gokkulagnu goppig. Babilon ag aab talilidna daappig, amge Juda dilag daup ag ib amu anidna, oolna goppig.

⁵ Ag anam oolppig, amge Babilon dilag daup ag dim lamadna gona, King Sedekaia nug uɗem okkai Jeriko guguittak appa ugekke, ag nug qe-eɗidppig. Sedekaianu daup oh ag laippu nug ele ii daappig; ag oolna, matatun laih laih gona daappig,

⁶ amunu Babilon ag Sedekaia aɗappig. Ag nug aɗan, Babilon dilag king nug ⌊Hamat wanppa⌋ aab onig Ripla appa dayom amunu, daup ag Sedekaia aon gona, appa Nebukatnesar eppegppa meeg, nug ag nuhignu aɗi aɗi hekkulagnu aum.

⁷ Ripla appa, Babilon dilag king nug a, Sedekaia amegppa anattette, ag bekkod oh aqaeg mauhppig. Anam heeg, Nebukatnesar nug a, ag Sedekaia ameg laih laih oh ahuɗeg nauhe, ag nug qakkaknu keeke brasppa hak, ag amuppa nug qakkona, ag nug aon, Babilon wanppa goppig.

Babilon ag Jerusalem heeg nauhom

⁸ Babilon dilag king Nebukatnesar nug king dayaya, nuhig king dayaknu maɗ 18ppa, kalam ebqak tanig ele, kalam amunu deɗ eblaih aɗitppa Nebusaradan, nug daup Nebukatnesar gumappig dilag okkai amu, nug Babilon dilag king ehanittak anuqak laa aakku, nug Jerusalem beum.

⁹ Nug ba he, Babilon dilag daup ag Yawenu mettid lag, kingnu lag enanagnab, amu danab ah onilag ele, nug ag laulkad oh ele Jerusalem appa manatteg eoppig.

¹⁰ Amu Nebusaradan, nug daup Nebukatnesar gumappig dilag okkai amu, nug a, Babilon dilag daup ag Jerusalemnu aɗ loppaɗeg nauhom.

¹¹ Am Nebusaradan, nug daup Nebukatnesar gumappig dilag okkai amu, nug danab ah haen amuppa Jerusalem appa daappig, am laa ag akka ahan gona, ag beɗulag Babilon dilag daup eppelagppa meppig ele, amu danab ah laa oh ele, nug ag oh diia, Babilon appa ag diia ukka laih me dayak danab ah daaglagnu ukkom.

¹² Amge Nebusaradan, nug daup Nebukatnesar gumappig dilag okkai amu, nug Juda danab ah daɗeknab laa, ag wan keeke iitta ele, ag dad okkaippa, grep dad eleppa uɗat hekkulagnu uuatte daappig.

¹³ Amu Babilon dilag daup ag Yawenu mettid lagnu biidod okkai ⌊aɗit⌋ brasppa hak, tappiɗ naɗi okkai brasppa hak onig Yu, tappiɗ keeke me dayaknu balal laala brasppa hak ele oeg aoɗatteg, ag akkan Babilon goppig.

¹⁴ Ag amu aon gonana, ag waa, sabol naunau, lam wik eeɗaknu keeke, tappiɗ, am keeke laa oh brasppa hak, Juda dilag mana mettak danab ag amuppa Yawenu mettid lag, amuppa uɗat heppig ele, Babilon ag amu ele aon goppig.

¹⁵ Nebusaradan, nug daup Nebukatnesar gumappig dilag okkai amu, nug tappiɗ, mana mettak danab ag amuppa kalu danab ile muttuɗig enanag bette ele manaknu uɗat hetteb, tiig amuppanu awa tauɗeb ukkaknu tappiɗ, keeke oh gol ena dubuttid iitta ele, o silwa ena dubuttid iitta eleppa hak amu, nug amu oh awa, Babilon ukkom.

¹⁶ Biidod okkai aɗit brasppa hak, tappiɗ naɗi okkai brasppa hak onig Yu, tappiɗ keeke me dayaknu balal laala brasppa hak ele, Solomon he, ag Yawenu mettid lagnu heppig amu, keeke amu ohnu am brasppa hak, amu uug naunab nau ele. Danab nug skelppa ma, bras amunu uug anidkkunu elele iitta.

¹⁷ Biidod okkai aɗit brasppa hak amu, elab anen anen ahilah am 8 mita. Biidod anen anen ikkilahppa ikki tonaknu keeke laa dayom. Ikki tonaknu keeke aɗit amu oh amu, ahilag elab am 1 mita, 30 sentimita ele. Ikki tonaknu keeke aɗit amu qaɗelahppa bala brasppa hak dayom ele amu, laa am sen lo akkak bia, laa am ag ad pomigranet meu dottog daappig.

¹⁸ Nubusaradan, nug daup Nebukatnesar gumappig dilag okkai amu, nug Juda dilag mana mettak ikki danab Seraia, mana mettak danab Seraia waappa dayom Sepanaia, amu Yawenu mettid lag od gumak danab ewam ele maniguatta,

¹⁹ nug danab ah haen amuppa Jerusalem appa daappig oolagppanu nug daup dilag okkai ban danab gumom ele, kingnu ulum mettak danab tanig ele, nai yaak danab nug danab ag kingnu daup daaglagnu daappig ele, ag onilagppa e doppig, amu danab 60 laa ele Jerusalem daappig ele amu, Nebusaradan nug ag ele oh diiom.

²⁰ Nebusaradan, nug daup Nebukatnesar gumappig dilag okkai amu, nug danab amu oh diia, Ripla ukkom. Babilon dilag king nug appa dayom.

²¹ Ripla am Hamat wanppa dayom. Nebusaradan nug danab amu diia, Ripla ukke, King Nebukatnesar nug he, aqaeg mauhppig. Anam amu, Juda danab ah ag ahilag wan uun gona, Babilon appa diia ukka laih me dayak danab ah daappig.

²² Amu Babilon dilag king Nebukatnesar nug Ahikam bekka Gedalaia, Sapan alag, nug nug Juda danab ah dilag okkai daakkunu tituanom.

²³ Amu Juda dilag daup okkai laa, ag ahilkad daup ele ag ⌊Babilon dilag daup ag Babilonnu uɗin, Juda dilag aabaab eɗadna diippig, haen amuppa ag aabppa ii daappig, ag aab dimittim atu laih laihppa daappig. Ag anam daanna,⌋ ag Babilon dilag king nug Ahikam bekka Gedalaia, nug Juda wannu gawana daakkunu tituanom doyona, ag Gedalaia gumidna, Mispa goppig. Ag goppig ele am, Netania bekka Ismael, Karea bekka Johanan, Tanhumet bekka Seraia, nug Netopa danab, aria Maka danab laa, nug bekka Jasania ele. Ag am ahilkad daup ele oh goppig.

²⁴ Ag gona teeg, Gedalaia nug ag ena daaglagnu ag amelagppa nuhig nai ɠagattag qetta aum. Am nug aum. “Ag Babilonnu ehanittak anuqak danab aib baɗadppig. Ag wan imuppa daan oinna, ag Babilon dilag king waappa daan, nuhig maɗi nid daaglag dayeb amu, ag enaib daaglag,” awa aum.

²⁵ Gedalaia nug anam dayom, amge maɗ amuppa kalam eblaih aɗitppa Netania bekka Ismael, nug Elisama alag, nug am king tiigppan laa, amu nug danab eblaih laih ele Mispa goppig. Ag gona tena, ag Gedalaia qeeg mauhe, Juda danab, Babilon danab ele ⌊nug ehanidkkulagnu⌋ nug ele Mispa appa daappig amu, ag ag ele aqaeg mauhppig.

²⁶ Ag amu heeg dimppa amu, ban daup ikki ag, danab ah oh ele, laa ag am danab okkai, laa ag danab okkai iitta, ag oh geha Babilon ahilagnu aɗi hekkulag dabmena baɗappig amunu, ag ahan, Juda wan uun, Isip goppig.

Babilon dilag king nug he, Jehoiakin nug maniguittak uuom

²⁷ Aria, Nebukatnesar nug Juda dilag king Jehoiakin awa, Babilon wanppa awa ukka laih me dayak danab daakkunu ukkom, maɗ amuppan digma ukke, maɗ 36 uue, maɗ 37 ooppa danab onig Ewil Merodak nug Babilon dilag king abenab awom. Nug awa, nug he, ag Juda dilag king Jehoiakin maniguittakppanu aon meeg, dimittim uɗiom. King Ewil Merodak nug maɗ amuppa kalam 12ppa, deɗ 27ppa anam heum.

²⁸ Ewil Merodak nug Jehoiakin amegppa nai ena mattia, Ewil Merodak nug king laa oh nug ele Babilon daappig amu, nug Jehoiakin amu oh dilag aben eɗittak mettom.

²⁹ Nug anam heum amunu, Jehoiakin nug baula maniguittak lamen ii takkom. Iitta. Nug lamen hamu maatta, hanhan nug King Ewil Merodaknu balalppa ee lattom. Nug anam ee laawo ukke ukke, nug mauhom.

³⁰ Deɗ oh Babilon dilag king nug Jehoiakin ee mette lattom. Jehoiakin nug bau dayeye, Babilon dilag king Ewil Merodak nug anamib Jehoiakin ee mette laawo ukke, nug mauhe batom.