2 King 23 - Nobonob Baibel

Juda ag Yawe waappa daan, Nug oɗe dim lamidkkulagnu nai qagappig

¹ Aria, King Josaia nug Juda dilag ikki danab oh, laa Jerusalemnu, laa Juda wanppa laih laihnu amu, nug ag onilagppa e uɗin qagmeppig.

² Josaia nug e, danab okkai amu ag uɗieg, nug Juda danab, Jerusalem danab ah, mana mettak danab, propet danab ele, nug ag ele oh ahan, Yawenu mettid lakka teppig. Danab oh, laa onig iitta, laa onig ele, amge onig okkainab iitta, amu laa onig okkainab ele, ag oh Yawenu mettid lag, amuppa teppig. Danab oh tena, Josaia nug Yawe, Israel danab ele nug tituanna nai qakkak heppig elenu buk, ag buk amu Yawenu mettid lag, appa laa eɗua anttom amu, nug amuppanu nai oh ebqe dooppig.

³ King nug nai amu ebqewowa, nug Yawenu mettid lag, amuppa biidod daugppa, nug aguppa, Yawe noobppa daye, nug nug tituana nai qakkak amu dim lamidkkunu nai baula qakkom. Nug nai amu qagakka, nug Yawe dim lamittatta, Yawenu haknunab anak, nuhig ɗo iɗu iɗu oh ele nug meu ohppa, oo ohppa ele dim lamitta, nug nug tituana nai qakkak bukppa nai aɗi aɗi dayom amu, nug nai amu ele dim lamidkkunu Yawe amegppa aum. Nug amu hekkunu amu, nug aɗi aɗi nai buk itoɗiak amuppa dayom ele, nug amu oh dim lamidkkunu aum. Nug anam he, dimppa danab ah oh ag ele nug tituana nai qakkak amu dim lamidkkulagnu appig.

⁴ Amu dimppa amu, King Josaia nug mana mettak ikki danab Hilkaia, am mana mettak laala nug waappa uɗat hetteb ele, amu Lewi buɗub ag Yawenu mettid lagnu od gumatteb ele, nug ag amelagppa inam hekkulagnu aum. “Ag gona, Yawenu mettid lag ooppa nona, keeke oh kayak hambuppuak Balnu, Aserahnu, am hoɗopai dilag ele amu, ag amu oh agappeg dimittim beig!” awa aum. Aria, ag keeke amu oh king amelagppa aumbia akkan dimittim uɗieg, king nug Jerusalem dimittim, le Kidronnu oolnu noakppa le daug daug uɗem dayomppa, nug appa manatte, keeke amu oh ewa male, nug uhuɗ amu akka, Betel aab okkaippa ukka meum.

⁵ King Josaia nug mana mettak danab ag kayak hambuppuak dilag mettid lag nakok, ag appa kalu danab ile muttuɗig enanag bette ele manadppig ele lamattom. Anukka Juda dilag king ag mana mettak danab amu ag Juda dilag aabaabppa kayak hambuppuak dilag mettid lag nakok, kayak hambuppuak dilag mettid lag nakok Jerusalem guguittak daappig, amuppa ele ag kalu danab ile muttuɗig enanag bette ele manadkkulagnu otiadppig. Mana mettak danab ag amu henana, ag kalu danab ile muttuɗig enanag bette ele, ag amu kayak hambuppuak Balnu, aamnu, kalamnu am hoɗopai huu mak ele amotppig. Amu king nug amu oh lamattom.

⁶ Nug kayak hambuppuak Aserah dabmekkulagnu biidod Yawenu mettid lag ooppa dayom ele appanu awa, Jerusalem dimittim ukka, le Kidronnu oolnu noakppa mane ewom. Dimppa nug amunu hamad awa bate, kalu ne, nug awa ukka, Jerusalem danab ah hamu, nug amu dilag matmatppa gokkaɗe, tamtam ukkom.

⁷ Josaia nug amu ha, nug ele danab ag danab danab ele gappai kobol hetteb laulkad, lag amu am mettid lag, nuhig tomppan keeke oh ele, am appa daappig amu, nug amu oh loppaɗattom. Amu ah ag kayak hambuppuak Aserahnu lamen hetteb ele amu, ag ele lag amuppa daappig.

⁸ King Josaia nug he, mana mettak danab oh ag Juda wanppan aab laalappa daan, aabaabppanu mettid lag nakokppa mana mettak heppig ele amu, ag appanu eɗun Jerusalem goppig. Nug amu he, nug ele aabaabppanu mettid lag nakok, Geba ukka Berseba batak, appa mana mettak danab ag kalu danab ile muttuɗig enanag bette ele manadppig amu, nug aben amu oh hatte, dubuttid teum. Amu nug ele Jerusalemnu aɗnu od onig Josuanu od, appa nug aab amunu mettid lag nakok laala daappig amu, nug amu ele oh he nauhattom. Josua nug am aab okkai Jerusalemnu gawana dayom. Od amuam od okkai Jerusalem ooppa noaknu nanehppa dayom.

⁹ Mana mettak danab ag aabaabppanu mettid lag nakokppa mana mettak danab daaegeg, king nug diiatte, Jerusalem uɗippig amu, ag Yawenu mettid lag, amuppa, qaɗab amuppa mana mettak hekkulagnu elele iitta, amge ag mana mettak danab laa, ag aabaabppanu mettid lag nakokppa uɗat ii heppig amu, ag ag ele, bret yis iitta laappig.

¹⁰ Amu danab ag aben onig Topet, aben amuam oolnu noak onig Hinom Bekkanu Oolnu Noak, appa dayom amu, ag aben amuppa eɗun gona, ag bekkalkad, aɗelkad aqan manan, kayak hambuppuak Molek mettaglagnu baula hemananu, King Josaia nug aben amu ele he, dubuttid teum.

¹¹ Anukka Juda dilag king laala ag, “Aam nug kayak laa,” dabmeppig. Ag anam dabmenana, ag aam noobppa dup nona binag meppig. Ag amu henana, ag hos dottolkad aamnu tituanadna medappig. Dottolkad amuam ag Yawenu mettid lagnu haɗap-ppa, kingnu ehanittak anuqak danab laa onig Natanmeleknu oo guguittak daappig. Ag appa daaegeg amu, Josaia nug akka ukkom. Amu Josaia nug anam hewowa, nug ele bannu karis aamnu tituanadna medappig amu he eoppig.

¹² King laug koɗokko uɗem ukkakppa amu, lag oo laa dayom. Lag oo amunu amu, ag, “King Ahasnu Lag Oo,” atteb. Amu anukka Juda dilag king laala ag lag oo, oo amu guguittak qaɗab laala aqeg daappig. Laa amu, King Manase nug Yawenu mettid lagnu haɗap aɗit, nug amuppa qaɗab laala aqe daappig. Aria, King Josaia nug qaɗab amu oh loppaɗa he, maha naunau daappig. Dimppa nug qaɗab loppaɗak, kinipan amu akka ukka, oolnu noak onig Kidron, appa akke ukkom.

¹³ Amu anukka King Solomon nug kayak hambuppuak dilag mettid lag nakok laala Jerusalemnu laih aam bedeppa, Olipnu qaukoppanu yau uɗitteppanu, appa nug qaɗab aqe daappig. Solomon nug mettid lag nakok amu Saidon dilag kayak hambuppuak uɗig wak ele Astoret, Moap dilag kayak hambuppuak uɗig wak ele Kemos, am Amon dilag kayak hambuppuak Molek, Yawe nug kayak hambuppuak amu, nuhignu ooppa uuaknab dootte ele amu, Solomon nug kayak hambuppuak amu dilag qaɗab amu hattom. Mettid lag nakok amu daaegeg, amu King Josaia nug amu oh hatte, dubuttid teum.

¹⁴ Josaia nug men gappi aoɗe, huppu huppu neeg, kayak hambuppuak Aserah dabmekkulagnu biidod okkulatte neeg, nug danab mauhppig ebehilkad kuɗumnab awa, aben keeke amu daappigppa akke ukkaeg, aben amu oh tonappig.

¹⁵ Amu Josaia nug amu oh ha, nug ele Nebat bekka Jeroboam nug hipunin hatta he, Israel danab ah ag hipunin amu ele hadappig, nug anukka aab Betel appa mettid lag nakok, qaɗab laa ele qe daapiɗ amu, Josaia nug Betel appanu mettid lag nakok, qaɗab amu ele he nauhom. Nug amunu men he aoɗeg kalu ne, nug kayak hambuppuak Aserah dabmekkulagnu biidod, appa dayom ele, nug amu ele mane ewom.

¹⁶ ⌊Amge Josaia nug amu ii heum haenppa,⌋ nug eɗua neekke ukke, boumak aben laala qauko nag laa dayom, amuppa neekka, amu nug maɗi nid amelagppa appa gona, danab mauheg boumadppig ebehilkad aon uɗiglagnu a, ag aon uɗieg, Josaia nug ebehilag amu Jeroboamnu qaɗab amuppa maattowa, amote ewe, qaɗab aakku dubuttid teum. Nug kobol heum amu, anukka Yawe Nug keeke amu bekkunu propet laa oɗeppa mehuqom, amu Josaia nug he, Yawe nai aum amu, am anamib beum.

¹⁷ Josaia nug danab ebehilag amu mane eweg, nug neekke ukke, nug boumak abennu at laa daye antta, nug oɗ mattom. “Amuam aɗitai?” awa oɗ mattom. Oɗ matte amu, Betel danab ag nob mena, amegppa inam appig. “Amuam Judanu propet, nug Kayaknu danab, nuhig boumak aben. Nug anukka uɗia, na gemu qaɗab amunu keeke heme amu, nug amunu mehuqom,” aon appig.

¹⁸ Ag aeg doya, Josaia nug ag amelagppa aum. “Ag boumak aben nuhigppa amu, ag aɗi keeke laa aib heppig. Ag heppeg, laa nug danab amu ebehippa aɗitai keeke laa aib heum,” awa aum. Josaia anam aum amunu, ag nug ebehi amu ii aoppig. Aria, Samarianu propet laa ebehi amu ele uueg dayom.

¹⁹ Israel dilag king ag anukka Israel wanppa aabaabppa kayak hambuppuak dilag mettid lag nakok hatteg daappig amu, Josaia nug loppaɗattom. Israel amu, ag kobol ahilag amuppa heeg, Yawe Nug oppoɗi beum. Aria, gemu Josaia nug Betel aabppa heum bia, nug Israel wanppanu aabppa, nug amuppa ele anamib heum.

²⁰ Nug kayak hambuppuak dilag mettid lag nakok ohppan mana mettak danab daappig amu, nug ag oh aɗualatta, ahilkad qaɗab amu attan maatta, aqe mauhattegeg, laa ele nug danab mauhadppig ebehilkad amu qaɗab amuppa manatte eoppig. Nug uɗat amu ha malowa, aria nug eɗua Jerusalem ukkom.

Josaia he, Israel danab ah ag Pasowanu Hobul heppig

²¹ Dimppa King Josaia nug nai inam me, danab ah dilagppa ukkom. “Nug tituana nai qakkaknu bukppa nai daatte amu, amubia ag Yawe, ahilag Kayak, ag Nug binag mekkulagnu Pasowanu Hobul gamag ahak ele heig!” ⌊Nug nai amu me ukke, danab ah doon, aria ag king aumbia heppig.⌋

²² Danab Kayak Nug epeɗiatte, ag Israel danab ah gumadppig, amu dilag haenppanu digmeeg uɗie, Israel, Juda ele dilag king dilag haen batak amu, Israel danab ah ag Pasowanu Hobul haen amuppa heppig bia ii heppig.

²³ Josaia nug king dayaya, nuhig king dayaknu maɗ 18ppa ag Yawenu Pasowanu Hobul gamag ahak ele heppig. Ag Pasowanu Hobul Jerusalem appa gamag ahak ele heppig.

Josaia nug kobol eheɗ laa oh Juda wanppa daappig lamattom

²⁴ Josaia nug danab ag danab mauhak ele gamag danab, mauhak ele mattiak danab amu, nug ag lamattom. Laa amu, nug kayak hambuppuak dottolkad danab ag laulkadppa maatteg daatteb, amu kayak hambuppuak dottolkad danab ag laulkadppa maatteg daatteb laala oh akke ukkom. Amu ohnu amu, Yawe nug ooppa uuaknab dootte, am Josaia nug amu oh Jerusalem appa, am Juda wan ohppa ele he ii daappig. Aɗinu? Nug Kayaknu ɗo nai oh, ɗo nai bukppa dayom, mana mettak danab Hilkaia nug buk amu Yawenu mettid lagppa anttom amu, nug ɗo amu oh dim lamidkkunu oo dayom.

²⁵ Josaia nug am king enanag. Nug meu ohppa, oo ohppa, ɠagattag ohppa ele Yawe dim lamidkkunu, Mosesnu ɗo nai atte bia heum. Anukka amu king laa Josaia eɗua, Yawe dim lamidkkunu heum bia, laa ii dayom. Iitta. Dimppa ele, king laa nug bia laa ii beum. Iitta. Josaia nug oh eɗattom.

²⁶ Josaia nug kobol ena kuɗum heum, amge King Manase nug kobol nau kuɗumnab heum, amuppa nug he, Yawe Nug Juda dilagnu oppoɗi beum, amu nuhig oppoɗi bak amu ii iitta meum.

²⁷ Yawe Nug inam aum. “Da kobol anukka Israel wanppa hemi ele amu, da kobol amuib Juda wanppa hekkul. Da geha lamadppi, ag appalag uun, wan laappa uma gona, da noolppa ii daamna. Da ele Jerusalem aab okkai, amu dahil mettid lag ele, lag amunu da, ‘Da onil am aguppa daakku,’ ami amu, da aab, lag amu ele dimatakkul,” awa aum.

Josaia mauhom

²⁸ Amu keeke kuɗum laa ele King Josaia heum amu, kaya amuam ag buk laappa, buk amu onig am, Juda Dilag Kingnu Kaya, ag buk amuppa yaappig daatte.

²⁹ Haen Josaia nug king dayeye, Isip dilag king Neko, nug Isip ban danab diie, Yupretis leppa Asiria dilag king ehanadkkulagnu goppig. King Neko anam he ukkaegeg, Josaia nug amunu nai doya aha, nuhikkud ban danab diie gona, Isip dilag king ele ban hekkulagnu ag uɗalag tekkulagnu goppig. Ag Megido aabppa ban hena, Isip ag Josaia qeeg mauhom.

³⁰ Josaia mauhe, nuhikkud maɗi nid ag nug gaɗa aon, bannu karisppa mena, aon Megidonu eɗun Jerusalem goppig. Ag Josaia gaɗa nuhig boumak abenppa boumppig. Aria, Juda ag Josaia bekka Jehoahas aon, nug king bekkunu goɗen gokkaɗakppa tituanna heeg, nug mameg abenabppa king ba dayom.

Jehoahas nug Juda dilag king beum

³¹ Jehoahas nug maɗ 23 dayaya, nug king ba dayom. Nug king ba, nug kalam ewamib Jerusalem appa king dayom. Nug anig am Jeremaia aɗeg Hamutal. Nug am Lipna aabppanu ah.

³² Jehoahas nug Yawenu neekkakppa eheɗ heum; nug mamekkud aɗi heppig bia, nug heum.

³³ King Neko, Isip dilag king, nug Jehoahas, Juda dilag king, nug Jerusalem appa king daamanu, nug Hamat wanppa, Ripla aabppa maniguittakppa meum. King Neko nug anam ha, nug he, Juda ag nug takis medappig; men doɗo medappig, nuhig melemel amu 3,400 kilogram silwa, am 34 kilogram gol.

Jehoiakim nug Juda dilag king beum

³⁴ King Neko nug anam ha, nug Josaia bekka laa Eliakim awa he, Eliakim nug mameg Josaia abenabppa king ba dayom. Neko nug Eliakim onig bau laa metta, Jehoiakim ataɗom. Nug amu ha malowa, King Neko nug Eliakim amag Jehoahas awa, eɗua Isip ukke, Jehoahas nug appa dayaya mauhom.

³⁵ King Jehoiakim nug silwa, gol ele King Neko medakkununab aum amu, nug Juda danab ah oh dilagppanu awom. Nug amu aokkunu amu nug he, Juda danab anen anen ahilag melemelppa takis King Nekonu medattom. Danab men doɗo kuɗum ele ag am okkai medappig, danab men doɗo kuɗum iitta ele, ag am nakok medappig. Aria, Jehoiakim nug silwa, gol ele amu awa me, King Neko toppa ukkom.

³⁶ Jehoiakim nug maɗ 25 dayaya, nug king ba dayom. Nug king ba, nug maɗ 11 Jerusalem appa king dayom. Nug anig am Pedaia aɗeg Sebida. Nug am Ruma ted.

³⁷ Jehoiakim nug Yawenu neekkakppa eheɗ heum; nug mamekkud aɗi heppig bia, nug heum.