2 King 22 - Nobonob Baibel

Josaia nug Juda dilag king beum

¹ Josaia nug maɗ eblaih ewamppaib dayaya, nug king ba dayom. Nug king ba, nug maɗ 31 Jerusalem appa king dayom. Josaia anig am Adaia aɗeg Jedida. Nug am aab Boskat ted.

² Josaia nug Yawenu neekkakppa kobol genab tutukku ele dim lamittom; nug alag Dawit kobol oh heum bia, nug heum. Nug ib ena dim lamittom. Nug ib eheɗppa ii ukkom.

Ag Yawenu mettid lag, ag appa Ɗo Nai Buk Anidppig

³ Josaia nug king dayaya, nuhig king dayaknu maɗ 18ppa nug nai yaak danab Sapan, nug nai awa gokkunu me, Yawenu mettid lakka ukkom. Sapan mameg am Asalia, nug alag am Mesulam. Josaia nug Sapan amegppa inam aum.

⁴ “Na gona, mana mettak ikki danab Hilkaia anidna, amegppa appe, danab ah ag men doɗo aon dona, laa Yawenu mettid lag od gumaegeg madappig amu, Hilkaia nug amu oh ebaqaɗ!

⁵ Laa amu, na Hilkaia appe, nug nuhikkud ele ag men doɗo amu aon, danab Yawenu mettid lag babaittaknu uɗat gumak danab daatteb amu, ag ag eppelagppa meppeg, ag uɗat nid lag bappaidtteb amu, ahilag uɗatnu nobnu mattaglag.

⁶ Uɗat hetteb ele amu, amuam lag hak danab, amu menppa lag hak danab ele. Laa ele, ag plang, men otaɗa babaittak ele, ag amu ele Yawenu mettid lag bappaidkkulagnu daden maadkkulag.

⁷ Anam amge da doottem, laa ag uɗat gumak danab dilagnu genab elele dooglagnu elele amunu, uɗat gumak danab ag men doɗo amuppa aɗi aɗi uɗat hekkulag amu, ag mana mettak ikki danab amegppa ab dooglagnu uɗat laa ii daatte,” awa aum.

⁸ ⌊Aria, Sapan nug ukka, king aumbia heum. Nug anam he amu, mana mettak ikki danab Hilkaia nug nai amu doya mala,⌋ nug Sapan, Sapan nug nai yaak danab amu, Hilkaia nug nug amegppa inam aum. “Da buk laa Yawenu mettid lag, amuppa dayeye anidmi. Buk amuam Yawenu Ɗo Nai Buk,” awa aum. Hilkaia nug anam ana amu, nug buk amu Sapan mette, Sapan nug ebqeum.

⁹ Nug buk amu ebqewowa, nug King Josaia toppa ukka, nug amegppa inam aum. “Ehanittak anuqak danab nahipad ag men doɗo Yawenu mettid lag, amuppa dayom amu aon, lag babaittak uɗat gumak danab madappig,” awa aum.

¹⁰ Nug anam ana amu, Sapan, nug nai yaak danab amu, nug nai amu tuɗitta, king amegppa inam aum. “Mana mettak ikki danab Hilkaia nug buk laa da meɗom,” awa aum. Nug anam awowa, aria nug buk amu kola, king dookkunu ebqeum.

¹¹ Nug ebqeeqe, king nug Kayaknu Ɗo Nai Bukppa dayom amu doyaya, nug ooppa uugnab doya, nuhig lamen elab aɗa pattiɗom.

¹² King anam ha, nug mana mettak danab Hilkaia, Sapan bekka Ahikam, Mikaia bekka Akbor, nai yaak danab Sapan, amu kingnu ehanittak danab Asaia ele amelagppa haknabnu nai imu aum.

¹³ “Ag da, Juda danab ah oh ele, ag ig oh ig ounkad daanna, ag gona, buk imu laa nug anttom amu, ag buk imunu nai, ag amunu Yawe oɗ medappeg, ig aɗi hekkunignu ab dooglag. Ig mamenkad aɗi ag nai amu ii dim lamidppig, ag nai amu oh aɗi aɗi ippunigtte ii heppig amunu, Yawe Nug ihinignu oo nauhak okkai dootte,” awa aum.

¹⁴ King Josaia nug amelagppa haknunab nai amu mattie, mana mettak danab Hilkaia, Ahikam, Akbor, Sapan, Asaia ele oh gokkulagnu aum ele ag oh ahan, propet ah Hulda oɗ mettaglagnu goppig. Hulda nug Tikwa bekka Salum wau. Tikwa mameg am Harhas. Hulda gamu Salum nug kingnu lamen gumak danab dayom. Hulda nug Jerusalem appa, obatak ebqak aɗitppa dayom.

¹⁵ Ag gona teeg, Hulda nug ag amelagppa aum. “Yawe, Israel dilag Kayak, Nug inam atte. ‘Laa nug ag da gumiɗna uɗiglagnu maatte uɗippig ele, ag nug amegppa inam appeg doyaɗ!

¹⁶ Yawe Nug inam atte. “Da heppi, uug naunab aben imuppa, danab ah aben imuppanu dilagppa ele, buk Juda dilag king ebqeum eleppa yaak oh niitte bia bekku.

¹⁷ Aɗinu? Juda danab ah, Israel danab ah ele ag oh da dimeɗan uuiɗegeg uɗie, gemu ele hetteb. Ag kalu danab ile muttuɗig enanag bette manan, kayak hambuppuak madappig. Ag eppelagppa kayak hambuppuak dottolkad hadappig amunu, diig amunu, da oppoɗil beum. Da anam doyeye, oppoɗi bak dahil am wan imunu danab ah dilagnu dayeb ukkeb, ⌊hamu⌋ ii iitta mema. ⌊Iitta! Nob mettak malak aakkuib am iitta mekku,⌋” ’ awa atte.

¹⁸ Anam amunu, ag Juda dilag king, nug ag Yawe nai dooglagnu maatte uɗippig ele, ag nug amegppa inam appeg doyaɗ! Yawe, Israel dilag Kayak, Nug nai na doome, Nug nai amunu inam atte.

¹⁹ ‘Na dahil nai laa, nai amuppa uug naunab wan imuppa, wan imunu danab ah ele dilagppa bekkunu daatte, amuam uug beeb, wan imuam nauhakib dayeb, ippan danab ah ag eheɗ laa awaknu anak waappa daaglag, na nai amu doon, na uug doon, na nakka na da noolppa na onin qe ne, na nahip lamen elab pattiɗna, da noolppa amen leb neum amunu, da nahip unuqittak doomi.’ Yawe Nug anam atte.

²⁰ ⌊Amu Yawe Nug inam ele king amegppa atte.⌋ Anam amunu, da heppi, na daanna, maɗoɗ ele mauhppe, ag na gaɗan ele na mamenad aɗi boumadppigppa boumidkkulag. Na uug naunab da heppi, aben imuppa bekku amu, na uug amu ii anidmana.” Hulda nug anam ag amelagppa a, ag nai amu aon, ag eɗun gona, king amegppa appig.