2 King 21 - Nobonob Baibel

Manase Juda dilag king beum

¹ Manase nug maɗ 12 dayaya, nug king ba dayom. Nug king ba, nug maɗ 55 Jerusalem appa king dayom. Nug anig am Hepsiba.

² Nug king daya, nug Yawenu neekkakppa eheɗ heum. Nug wan anen anennu danab ah, Yawe he, Israel ag lamadppig ele, nug amu dilag kobol, Yawe Nug kobol amunu ooppa uuaknab dootte amu, nug kobol amu dim lamittom.

³ Nug mameg Hesekaia aabaabppanu mettid lag nakok loppaɗom amu, Manase nug lag amu eɗua buualattom. Nug kayak hambuppuak Bal binag maknu qaɗab ele hatta, nug kayak hambuppuak Aserah dabmekkulagnu biidod ele heum. Amuppa, Manase nug Israel dilag king Ahap heum, amubia nug ele amu heum. Manase nug anam ha, nug ele aam, kalam, hoɗopai ele noolagppa dup noa binalag meum.

⁴ Nug kayak hambuppuak dilag qaɗab Yawenu mettid lagppa aqom. Amge anukka Yawe Nug lag amunu inam aum. “Da Jerusalem appa amu, da onil aguppa daakkunu tituanmi,” awa aum.

⁵ Amu Yawenu mettid lag, lag amuppa haɗap aɗit ohppa Manase nug aam, kalam, hoɗoppai ele binalag maknu qaɗab aqom.

⁶ Manase nug amu ha, nug bekka mana, kayak hambuppuak laa mettom. Nug amu ha, nug emaɗ kobol, eman kobol ele dim lamitta, nug mauhak ele gamag danab, mauhak ele mattiak danab ele gumatta ukka, doyak mettaglagnu oɗ mattom. Nug Yawenu neekkakppa kobol eheɗ iɗu iɗu kuɗum heum. Manase nug hipunin huanak kuɗum amu Yawe noobppa haaha, amuppa nug he, Yawe Nug oo huana nauhom.

⁷ Manase nug kayak hambuppuak Aserah dabmekkulagnu biidod nug hoiyom ele, nug amu awa, nug Yawenu mettid lag ooppa meum. Amge Yawe Nug anukka Dawit, nug bekka Solomon ele lag amunu aa amelahppa inam aum. “Israel dilag huu okkai ohppanu wanelkadppanu amu, da mettid lag imu, Jerusalem ele, da imuppa da onil hanhan iguppa daakkunu, tituanatmi.

⁸ Amu danab ah dahilad ag pehettak dahil haknunab nai oh dim lamidna, ag dahil ɗo nai oh ele, Moses, dahil maɗi nid, nug ag mattom amu, ag amu ele dim lamidppeppeg, aria da geha baula wan anukka da ag mamelkad aɗi mattami, ag gemu daatteb ele, da baula heppi, ag amuppanu laih gona daan ii oimna,” awa aum.

⁹ Kayak Nug anam aum, ag dooppig, amge ag ii dim lamidppig. Iitta. Manase nug eeɗatte, Juda danab ag ib ena apiɗidppig. Ag ib ena apiɗidna, ag kobol eheɗnab heppig. Anukka Yawe ehanatte, Israel ag danab Kanan wanppa daappig ele aqaeg iitta meppig, amge Manase he, Juda danab ah ag Kanan danab ah amu, ag ahilag eheɗ hak eɗidna, eheɗ nau heppig.

¹⁰ Manase nug anam he, Yawe Nug nuhikkud propet, ag am nuhikkud maɗi nid amu, Nug ag oɗelagppa inam aum.

¹¹ “Juda dilag king Manase nug kobol nau, kobol amunu da oolppa uuaknab doottem, nug kobol amu iɗu iɗu heum, gemu ele hette. Anukka Amo aɗi ag kobol eheɗ heppig amu, nug amu eɗittak heum, gemu ele hette. Nug kayak hambuppuak dottolag hatta, noolagppa dup noa binalag meum. Nug kobol amu haaha he, Juda ag ele da noolppa hipunin heegeg uɗie, gemu ele hetteb.

¹² Aakku amunu, da Yawe, Israel dilag Kayak, da attem. ‘Geha da Juda danab ah oh, laa Jerusalemnu, laa Juda wanppa laih laihnu amu, da heppi, ag nauhna autna aoppeg, haen aab laalappanu danab ah ag geha keeke amu beumnu nai doon, ag eheɗ ottaina dabmak kuɗum ele aoglag.

¹³ Da Samaria dilagppa hemi, Ahap baekkudppa ele dilagppa hemi amu, da kobol amuib Jerusalem dilagppa hekkul. Da geha Jerusalem heppi nauheb, danab ah nuhikkud amu oh heppi iitta meppeg, amu Jerusalem nug tappiɗ ihak keeke iitta, hamu daatte, amubia daakku.

¹⁴ Amu dahiladnab danab ah laala oɗo yaak daaglag amu, da ii ehanadppi daappeg, da geha ag maadppi, kekeɗ eppelagppa goppeg, geha kekeɗ ag ban hena, eheɗ hattanana, ahilkad keeke ele aoglag.

¹⁵ Da geha anam hekkul. Aɗinu? Danab ah dahilad, ag mamelkad aɗi Isip uueg uɗie uɗie, gemu ele amu, ag dahil neekkakppa hipunin heegeg uɗie, gemu ele hetteb. Ag anam heegeg, da oppoɗil beum daatte,’ awe attem.” Yawe Nug nai amu propet oɗelagppa, Juda danab ah amelagppa aum.

¹⁶ Amu Manase nug Jerusalem appa danab ah eheɗ laa ii heppig kuɗum, huanak aqe mauhppig. Nug anam ha, amu nug ele he, Juda danab ah ag hipunin heppig. Ag hipunin amu henana, ag Yawenu neekkakppa eheɗ heppig.

¹⁷ Amu keeke kuɗum laa ele King Manase heum amu, hipunin nug heum ele amu, kaya amuam ag buk laappa, buk amu onig am, Juda Dilag Kingnu Kaya, ag buk amuppa yaappig daatte.

¹⁸ Manase nug mauhe, ag nug Usanu dad, kingnu lag enanagnab guguittak daatte amu, ag amuppa boumppig. Nug mauhe amu, nug bekka Amon nug abenabppa king ba dayom.

Amon nug Juda dilag king beum

¹⁹ Amon nug maɗ 22 dayaya, nug king ba dayom. Nug king ba, nug maɗ aɗitib Jerusalem appa king dayom. Amon anig am Harus aɗeg Mesulemet. Nug am aab Jotba ted.

²⁰ Amon nug Yawenu neekkakppa eheɗ heum. Nug mameg Manase heum, amubia nug heum.

²¹ Nug mamegnu kobol oh dim lamittom. Nug mameg kayak hambuppuak aɗi noolagppa dup noa binalag meum amu, nug ele ag noolagppa dup noa binag meum.

²² Nug Yawe, nug mamekkud aɗi dilag Kayak amu, nug Nug uuitta, nug Yawenu ibuppa ii oiyom.

²³ Amon king daya, anam heehe, nuhikkud ehanittak danab okkai ag nug qeppeg mauhkkunu dabmak aon, nai qakkan, ag king nug king laug enanagnab nuhigppa qeeg mauhom.

²⁴ Ag anam heeg, aria dimppa Juda danab ah ag kingnu ehanittak anuqak danab ag King Amon qeeg mauhom ele, ag ele aqaeg mauheg, ag Amon bekka Josaia tituanna, aon meeg, nug mameg abenabppa ahilag king ba dayom.

²⁵ Amu keeke kuɗum laa ele King Amon heum amu, kaya amuam ag buk laappa, buk amu onig am, Juda Dilag Kingnu Kaya, ag buk amuppa yaappig daatte.

²⁶ Amon nug mauhe, ag Usanu dadppa, appa boumppig. Amon nug mauhe amu, nug bekka Josaia mameg abenabppa king ba dayom.