2 King 2 - Nobonob Baibel

Kayak Elaiya awa, hab attan ukkom

¹ Amu Elaiya, Elisa ele aa Gilgalnu ahaya ukkaeheh, Yawe Nug Elaiya awa, hab aabppa ulah kilibobppa gokkunu haen miag doum.

² Aa digmeya goyaya, Elaiya nug Elisa amegppa aum. “Na inam daye! Aɗinu? Yawe Nug da Betel gokkulnu aum,” awa aum. Nug anam aum, amge Elisa nug aha, inam amegppa aum. “Yawe Nug genab bau daatte, na ele genab bau daattem, genab amubia, da na ii uuidpa,” awa aum. Awa a, aakku aa oh Betel gopiɗ.

³ Propet huu ameg laa ag Betel appa daappig amu, ag uɗin anatna, ag Elisa amegppa inam appig. “Gemu Yawe Nug nahip danab okkai geha nahip-ppanu awa gokku; na amu doottemte o iitta?” aon Elisa oɗ medappig. Aon oɗ mettaeg amu, Elisa nug ag appig amu nob ma inam aum. “Ao, da doottem. Ag baula amunu aib appig,” awa aum.

⁴ Aa Betel appa daayya, Elaiya nug Elisa amegppa inam aum. “Elisa, na inam daye! Aɗinu? Yawe Nug da Jeriko gokkulnu amelppa aum,” awa aum. Nug anam aum, amge Elisa nug aum. “Yawe Nug genab bau daatte, na ele genab bau daattem, genab amubia, da na ii uuidpa,” awa aum. Awa a, aakku aa oh Jeriko aabppa gopiɗ.

⁵ Amu propet huu ameg laa appa Jeriko daappig amu, ag Elisa toppa uɗin, inam amegppa appig. “Gemu Yawe Nug nahip danab okkai geha nahip-ppanu awa gokku; na amu doottemte o iitta?” aon Elisa oɗ medappig. Ag anam oɗ mettaeg, amu Elisa nug nob ma aum. “Ao, da doottem. Ag baula amunu aib appig,” awa aum.

⁶ Aa Jeriko appa daayya, Elaiya nug Elisa amegppa inam aum. “Na inam daye! Aɗinu? Yawe Nug da le Jodan gokkulnu amelppa aum,” awa aum. Nug anam aum, amge Elisa nug aum. “Yawe Nug genab bau daatte, na ele genab bau daattem, genab amubia, da na ii uuidpa,” awa aum. Awa a, aakku aa oh gopiɗ.

⁷ Aa ukkaeheh amu, propet ameg amunu danab 50, ag aa dim lamatna goppig. Amu aa goya, Jodan leppa noya, le daugppa hippaidya daapiɗ. Aa anam daaeheh, propet 50 ag piɗe laih hippaidna daanna, ag neekkeg ukke, Elaiya, Elisa ele anatppig. Aa ele oh ii daappig.

⁸ Elaiya, Elisa ele aa anam le daugppa daayya, Elaiya nug nuhig ulahnu lamen elab uɗa awa itoɗia, amuppa le makkuɗe, le oppata, laih laih nanehppa, naɗiap-ppa ele ukkaeh, wan qaɗaiette, aa noya goya mataɗpiɗ.

⁹ Aa mataɗyaya, Elaiya nug Elisa amegppa inam aum. “Da na uuidkkulnu haen am miag dotte. Yawe Nug geha da awiɗeb gokkul amunu, geha tatam da na ehanidkkulnu amu, da aɗi keeke hekkulnu na oot daatte?” awa aum. Nug anam awa, Elisa oɗ mette, Elisa nug oɗeppa awa, amegppa inam aum. “Nid mamelag nug nuhig keeke oppate, nid ebqak gane daatte, ebqak amubia, amu laippu laa ele ne, nid danab naanaeg nug obatak aɗit aotte, nid laa oh obatak laippu aotteb, amubia na Kayaknu ɠagattag aon, propet uɗat heme, ɠagattag amu na da obatak aɗit meɗakkutnu ool daatte,” awa aum.

¹⁰ Elisa nug anam a, Elaiya nug nob ma aum. “Na keeke amunu da oɗ meɗattem amu, amuam oɗmak uug ele. Amge haen Yawe Nug da awiɗa ukkeb, na da aniɗkkut dayeb, geha na ɠagattag amu aokkut. Haen da gottem amuppa na da ii aniɗkkut amu, na amu ii aomna,” awa aum.

¹¹ Nug a amu, aa amu mattiya ukkaeheh, aakku aa gopiɗ gamalahppa laippun aab dittiak beum; aab amuam hos dottog, oiyaknu karis iɗu ele bia. Aab amu ba, gamalahppa ukka he, piɗe piɗe daaeheh, aria ulah kilibob amu uɗia, Elaiya awa, hab aabppa ukkom.

¹² Elisa nug ulah kilibob amu Elaiya awa ukke antta, inam baag okkaippa eum. “Mama dahil, mama dahil. Na Israel dilag ehanittak danab ɠagattag. Na Israel dilag daup ag bannu karis attan daan, ban hetteb, daup ag hos attan daan, ban hetteb ele, na amubia daattem,” awa eum. Elaiya nug ukke, Elisa nug baula Elaiya ii anttom amunu, Elisa nug ooppa uugnab doyom. Nug anam doyom amunu, nug nuhig lamen elab dimittimnu amu aɗa, gamagppa pattiɗom. Pattiɗe, aɗit daapiɗ.

¹³ Haen Elaiya nug awe attan te, dimittimnu lamen nuhig amu uɗitta eɗua wanppa neum, Aria, gemu Elisa nug Elaianu lamen amu awa, nug eɗua Jodan leppa ukka, le daugppa hibaitta dayom.

¹⁴ Elisa nug Elaianu lamen amuppa Elaiya heum bia le makkuɗom. Haen nug le makkuɗaɗa, nug inam aum. “Yawe, Elaianu Kayak, Nug adeppa daatte?” awa aum. Awa a, le oppata, laih laih nanehppa, naɗiap-ppa ele ukka, ɠagattag dayeye, Elisa nug noa ukka, le daug laih teum.

¹⁵ Propet huu ameg laa Jerikonu 50 ag uɗin gukkuidna appa daappig amu, Elisa nug keeke amu he anidppig. Anidna, ag appig. “Antteg! Ɠagattag anukka Kayak Nug Elaiya mettom amu, gemu am Elisa, nuhigppa daatte,” aon appig. Awona, ag uɗin, nug uɗa tena, ag gatelag qaun o, gomelna, iɗulag wanppa meppig.

¹⁶ Aria, ag anam hewona, ag nug amegppa inam appig. “Ig am nahipad maɗi nid. Ihinig huuppa am kalu mettak danab 50 daatteb. Danab 50 amu geha ag gona, nahip danab okkai mattiglagnu oonig daatte. Yawenu Ouɗi Nug awa ukka, qaukoppatai, o aben oolnu noak laappatai keeke, Nug appa me daattetai,” aon appig. Ag anam appig, amge Elisa nug amelagppa aum. “Aib. Ag heppeg gona aib madippig,” awa aum.

¹⁷ Amge propet ameg amu ag oɗ mettan, duttunna heeg heeg, Elisa nug ii hekkun elele iitta doya, nug amelagppa aum. “Aria, ag attebde. Ag maadppeg ukkeg!” awa aum. Awa a, aakku ag danab 50 otiatteg gona, deɗ ewam madippig, amge ag Elaiya ii anidppig.

¹⁸ Aria, ag eɗun uɗippig, Elisa nug Jeriko appa amelag meeme, nug propet amu inam amelagppa aum. “Da ag ii gomananu iite ami? Amge ag nai dahil amu ii dooppig,” awa aum.

Elisa nug he, le laa ena beum

¹⁹ Elisa nug Jeriko appa dayeye, aab okkai amuppanu danab ag uɗin amegppa inam appig. “Danab okkai, na antte! Aab imuppa dayaknu am enanag. Na aakku anidttem. Amge le am nau, ena iitta. Wan ele am meu ena ii otte,” aon appig.

²⁰ Ag anam aeg amu, Elisa nug inam amelagppa aum. “Ag gona, tappiɗ bau laa aon, yu kalu aon, ooppa mena, aon uɗieg!” awa aum. Nug anam a, ag aakku Elisa aum bia heppig.

²¹ Aria, Elisa nug le qeppuɗia bak amuppa ukka, nug yu kalu buɗie, leppa noono, nug aum. “Yawe Nug inam atte. ‘Da, Yawe, da hei, le imu ena beum daatte. Am gemu digma ukka, le nug baula heeb, danab ag ii mauhmana, wan ele am meu okku,’ awa atte,” awa aum.

²² Nug anam a, le amu eɗua ena beum, le amu haen amuppanu ena daye uɗie, gemu ⌊nai imu yaak haenppa⌋ ele, anam daatte, Elisa aum bia, le eɗua ena beum daatte.

Nid ag Elisa awa awa qettak heppig

²³ Dimppa Elisa nug Jerikonu aha, Betel gokkunu ukkom. Ugekke, nid aabppanu nakok kuɗum ag dona, aab dimittim uɗin, ag Elisa anidna, awa awa qettak nai inam appig. “Eee bikkan ele na, na tena ukke, na tena ukke, na bikkan ele, na ippa aib daame,” anam appig.

²⁴ Ag amu heegeg, Elisa nug eɗua neekkattatta, Yawe onigppa ag eheɗ laa awaknu anak waappa daaglagnu aum. Aria, pahanab bea aɗit atu ooppanu beya goya, nid oolagppanu nid 42 amu oh guittak okkai madapiɗ.

²⁵ Aria, Elisa nug appanu aha ta, Karmel qaukoppa ukkom. Appanu amu, nug eɗua noa, Samaria ukkom.