2 King 15 - Nobonob Baibel

Usia nug Juda dilag king beum

¹ Jeroboam nug Israel dilag king dayaya, nuhig king dayaknu maɗ 27ppa amu, Amasaia bekka Usia nug Juda dilag king beum.

² Usia nug maɗ 16 dayaya, nug king ba dayom. Nug king ba, nug Jerusalem appa maɗ 52 king dayom. Nug anig am Jerusalem ah onig Jekolia.

³ Usia nug Yawenu neekkakppa kobol genab tutukku ele dim lamittom; nug mameg Amasaia heum bia, nug heum.

⁴ Nug anam heum, amge Usia nug aabaabppanu mettid lag nakok ii loppaɗattom. Daaegeg, danab ah ag aben amuppa tuɗidna gona, mana mettak henana, ag appa ele kalu danab ile muttuɗig enanag bette ele manappig.

⁵ Amu Yawe Nug he, gaɗa oɗe nau ele Usia qa, ii uuitte ukke, nug mauhom batak am anam dayom. Amunu Usia nug kingnu lag enanagnab amu uua, lag laappa ukka dayaya, nug king dayom, amge nug bekka Jotam nug kingnu uɗat amu haaha, king laug am wan ele gumeeme ukke, mameg Usia mauhom batak.

⁶ Amu keeke kuɗum laa ele King Usia heum amu, kaya amuam ag buk laappa, buk amu onig am, Juda Dilag Kingnu Kaya, ag buk amuppa yaappig daatte.

⁷ Usia mauhe, ag nug gaɗa Dawitnu Aab, appa nug mamekkud aɗi boumadppigppa, aben amu guguittak nug boumppig. Nug mauhe amu, nug bekka Jotam nug mameg abenabppa king ba dayom.

Sekaraia nug Israel dilag king beum

⁸ Usia nug Juda dilag king dayaya, nuhig king dayaknu maɗ 38ppa Jeroboam bekka Sekaraia nug Israel dilag king ba dayom. Nug king ba, nug kalam eblaih laippu eleib Samaria appa king dayom.

⁹ Sekaraia nug Yawenu neekkakppa eheɗ, mamekkud aɗi heppig bia heum. Nug Nebat bekka Jeroboam hipunin hatta he, Israel danab ah ag hipunin amu ele hadappig amu, Sekaraia ele nug hipunin amu hekkunu ii uua, di-ii-mettom.

¹⁰ Amu Jabes bekka Salum nug Sekaraia qeeb mauhkkunu dabmak awom. Anam dabme ukke, dimppa nug danab ah noolagppa Sekaraia qe mauhe, Salum nug Sekaraia abenabppa king ba dayom.

^11-12 Kobol amu beum amu, kobol amuppa Yawe aum, nai amu aakku elele mettom. Yawe Nug anukka Jehu amegppa inam aum. “Da geha heppi, na buɗun buɗun doobob ukkeb, ahilag ebqak waɗele batak na buɗunppanu danab laa nug Israel dilag king ba, sia kingppa daakku,” awa aum. Amu keeke laala oh Sekaraia nug heum amu, kaya amuam ag buk laappa, buk amu onig am, Israel Dilag Kingnu Kaya, ag buk amuppa yaappig daatte.

Salum nug Israel dilag king beum

¹³ Aria, Usia nug Juda dilag king dayaya, nuhig king dayaknu maɗ 39ppa amu, Jabes bekka Salum nug Israel dilag king ba dayom. Nug king ba, nug kalam laippuib Samaria appa king dayom.

¹⁴ Aria, haen amuppa Gadi bekka Menahem nug aab Tirsa uua, Samaria ukka, Salum qe mauhe, nug Salum abenabppa king ba dayom.

¹⁵ Amu keeke laala oh Salum nug heum amu, kaya amuam ag buk laappa, buk amu onig am, Israel Dilag Kingnu Kaya, ag buk amuppa yaappig daatte.

¹⁶ Haen Menahem nug nuhikkud huu ele ag Tirsa uun, Samaria gokkulagnu gonana, ag gona Tapua aabppa teppig. Teppig, amge Tipsa ag Menahem, nuhikkud huu ele aab ahilag ooppa nokkulagnu uuppig amunu, Menahem, nuhikkud huu ele ag ban hena, aab ahilag amu heeg nauha auta awe, appanu danab ah am aqan, aab laala Tipsa guguittak daatteb, appan danab ah ele aqan, ah oolkad ele amu diin, oolag oppateg mauhppig.

Menahem nug Israel dilag king beum

¹⁷ Usia nug Juda dilag king dayaya, nuhig king dayaknu maɗ 39ppa, Gadi bekka Menahem nug Israel dilag king ba dayom. Nug king ba, nug maɗ 10 Samaria appa king dayom.

¹⁸ Nug Yawenu neekkakppa eheɗ heum. Nug Nebat bekka Jeroboam hipunin hatta he, Israel danab ah ag hipunin amu ele hadappig amu, Menahem nug king dayaya, haen amu oh nug hipunin amu hekkunu ii uua, di-ii-mettom.

¹⁹ Haen Menahem nug king dayeye, Asiria dilag king Tiklat Pileser, nug nuhig ban danab diie, banelag uɗin, Israel ele ban hekkulagnu uɗippig. ⌊Tiklat Pileser onig laa am Pul.⌋ Anam heehe, Menahem nug Tiklat Pileser nug Israel dilagppa ban hak uua, geha nug Menahem ehanitteb, king ɠagattag Israel wanppa daakkunu ha, nug 3,000 kilogram silwa awa, Tiklat Pileser mettom.

²⁰ Menahem nug 34,000 kilogram silwa amu Asiria dilag king, Tiklat Pileser medakkunu ha, nug danab men doɗo ele, amu oh dilagppa laib laib 600 gram silwa takis dayaknu awa mettom. Mette, Tiklat Pileser nug Israel uuatta ukkom.

²¹ Keeke laala oh King Menahem heum amu, kaya amuam ag buk laappa, buk amu onig am, Israel Dilag Kingnu Kaya, ag buk amuppa yaappig daatte.

²² Amu Menahem nug mauhe, nug bekka Pekahia nug abenabppa king ba dayom.

Pekahia nug Israel dilag king beum

²³ Usia nug Juda dilag king dayaya, nuhig king dayaknu maɗ 50ppa, Menahem bekka Pekahia nug Israel dilag king ba dayom. Nug king ba, nug maɗ aɗitib Samaria appa king dayom.

²⁴ Pekahia nug Yawenu neekkakppa eheɗ heum. Nug Nebat bekka Jeroboam hipunin hatta he, Israel danab ah ag hipunin amu ele hadappig amu, Pekahia nug hipunin amu ii uua, di-ii-mettom.

²⁵ Amu Pekahianu ban daup ikki laa, Remalia bekka onig Peka, nug Pekahia qeeb mauhkkunu dabmak awa, nug Gileat danab 50 laa diia, nug ag ele gona, Samaria appa Pekahia nug kingnu lag enanagnabnu laih aɗ ɠagattagnab ele, nug amuppa noa dayeye, aben amuppa nona qeeg mauhe, ag Argob, am Arie ele oh aqatona, Peka nug Pekahia abenabppa king ba dayom.

²⁶ Amu keeke laala oh Pekahia nug heum amu, kaya amuam ag buk laappa, buk amu onig am, Israel Dilag Kingnu Kaya, ag buk amuppa yaappig daatte.

Peka nug Israel dilag king beum

²⁷ Usia nug Juda dilag king dayaya, nuhig king dayaknu maɗ 52ppa am Remalia bekka Peka nug Israel dilag king ba dayom. Nug king ba, nug maɗ 20 Samaria appa king dayom.

²⁸ Nug Yawenu neekkakppa eheɗ heum. Nug Nebat bekka Jeroboam hipunin hatta he, Israel danab ah ag hipunin amu ele hadappig amu, Peka nug hipunin amu ii uua, di-ii-mettom.

²⁹ Haen Peka nug king dayeye, Tiklat Pileser, Asiria dilag king, nug banelag uɗia, Israel eɗatta, nug ahilag aab Iyon, Abel Betmaka, Janoa, Kedes, Hasor ele oh diia, nug Gileat wan, Galili wan, amu Naptali wan oh ele awa, nug danab ah aab, o wan amuppa daappig am diia, Asiria ukka he, ag aguppa daappig.

³⁰ Aria, haen Usia bekka Jotam nug Juda dilag king dayaya, nuhig king dayaknu maɗ 20ppa Hosia bekka Ela nug Remalia bekka Peka qeeb mauhkkunu dabmak awa, nug Peka qe mauhe amu, nug Peka abenabppa king ba dayom.

³¹ Amu keeke kuɗum laa ele King Peka heum amu, kaya amuam ag buk laappa, buk amu onig am, Israel Dilag Kingnu Kaya, ag buk amuppa yaappig daatte.

Jotam nug Juda dilag king beum

³² Remalia bekka Peka nug Israel dilag king dayaya, nuhig king dayaknu maɗ aɗitppa amu, Usia bekka Jotam nug Juda dilag king beum.

³³ Jotam nug maɗ 25 dayaya, nug king ba dayom. Nug king ba, nug Jerusalem appa maɗ 16 king dayom. Nug anig am Sadok aɗeg Jerusa.

³⁴ Jotam nug Yawenu neekkakppa kobol genab tutukku ele dim lamittom; nug mameg Usia heum bia, nug heum.

³⁵ Amge Jotam nug aabaabppanu mettid lag nakok ii loppaɗattom. Daaegeg, danab ah ag aben amuppa tuɗidna gona, mana mettak henana, ag appa ele kalu danab ile muttuɗig enanag bette ele manappig. Amu Jotam nug Yawenu mettid lag, nug lag amunu aɗnu od onig Od Attan heum.

³⁶ Amu keeke kuɗum laa ele King Jotam heum amu, kaya amuam ag buk laappa, buk amu onig am, Juda Dilag Kingnu Kaya, ag buk amuppa yaappig daatte.

³⁷ Haen Jotam nug king dayeye, Yawe Nug Aram dilag king Resin, am Remalia bekka Peka, Israel dilag king ele uuate, aa ahilti ban danab ele ag gona digmena, Juda ele ban heppig.

³⁸ Amu Jotam nug mauhe, ag nug Dawitnu Aab, amuppa nug mamekkud aɗi boumadppigppa boumppig. Aab amuam nug mamekkud aɗi dilag aab. Nug mauhe amu, nug bekka Ahas nug abenabppa king ba dayom.