2 King 14 - Nobonob Baibel

Amasaia nug Juda dilag king beum

¹ Jehoahas bekka Jehoas nug Israel dilag king dayaya, nuhig king dayaknu maɗ aɗitppa amu, Joas bekka Amasaia nug Juda dilag king ba dayom.

² Amasaia nug maɗ 25 dayaya, nug king ba dayom. Nug king ba, nug maɗ 29 Jerusalem appa king dayom. Nug anig am Jerusalem ah onig Jehoadin.

³ Amasaia nug Yawenu neekkakppa kobol genab tutukku ele dim lamittom; nug mameg Joas heum bia, nug heum. Amge nug alag anukkanu King Dawit kobol heum, nug kobol anam ii heum; iitta.

⁴ Nug aabaabppanu mettid lag nakok ii loppaɗattom; daaegeg, danab ah ag aben amuppa tuɗidna gona, mana mettak henana, ag appa ele kalu danab ile muttuɗig enanag bette ele manappig.

⁵ Amasaia nug king ba daye ukke, king dayaknu ɠagattag nug eppegppa daye amu, nug kingnu ehanittak anuqak danab aɗit, aa nug mameg qeeh mauhom ele, nug aa aqate mauhpiɗ.

⁶ Nug he, aa mauhpiɗ, amge nug Yawenu haknunab nai, Ɗo Nai Buk, Kayak Nug Moses amegppa a, Moses nug bukppa yom amu, nug nai amu laa dim lamitta, danab amu, aa nug mameg qeeh mauhom, nug aa bekkalti ii aqe mauhppig. Haknunab nai amuam inam. “Ag nid dilag hipuninnu anig mameg ii aqappeg mauhkkulagoitte. Am anig mameg hipunin heppignu nid ii aqappeg mauhkkulagoitte. Aun laa nug eheɗ heum, am nukka nuhig eheɗnu qeppeg mauhkkuoitte; laa ii mauhma.” Nai amu daatte amu, Amasaia nug amu dabmaama, nug nai amu dim lamittom.

⁷ Haen laappa Amasaia nug nuhikkud ban danab ele ag Edom ban danab 10,000 ele oolnu noak onig Yunu Oolnu Noak appa nug qena, Amasaia nug nuhikkud ban danab ele ag banppa Edom eɗattona, aab Sela amu aoppig. Amasaia nug aab amu onig bau Joktel ataɗom. Gemu ⌊nai imu yaak haenppa⌋ ele, onig bau amuib atteb.

⁸ Dimppa Amasaia nug Israel dilag king Jehoasnu nai me ukkom. Jehoas nug Jehoahas bekka. Jehoahas nug Jehu bekka. Amu danab ag nai aon goppig amu, ag gona, Jehoas toppa tena, ag inam amegppa appig. “Amasaia nug atte. ‘Na nahipad daup ele ag uɗippeg, ig ban hetu!’ awa atte,” aon appig.

⁹ Amasaia nug nai amu me ukke, Jehoas, Israel dilag king, nug Juda dilag king Amasaianu nai inam nob meum. “Lebanon wanppa keeke qaun ele laa ad sida toppa nai me ukke, am inam amegppa aum. ‘Da ool inam daatte. Geha na aɗen da bekkal medappe, aa ewau matulak aoglah,’ awa aum. Keeke qaun ele nug anam mattiom, amge doɗ dakkuɗ laa aben amuppa oiyaya, nug keeke qaun ele amu tappe, keeke qaun ele nug aakku nauhom,” awa aum.

¹⁰ King Jehoas nug King Amasaianu nai amu anam nob ma, nug nai baula tuɗitta, inam mattiom. “Ao, da doottem, na ban hena, Edom aqona eɗadna, na gemu beɗuppa tak oittem. Na ban amu eɗidme, amge na nahip wanppaib daanna, gaman ahaɗ! Aɗinu na eheɗ nidakkunu hettem? Aɗinu na heppe, na, Juda ele nena qekkulag?” Jehoas nug nai amu Amasaianu eɗua me ukkom.

¹¹ Jehoas nug nai amu me ukkom, amge Amasaia nug King Jehoas nai aum dookkunu uue, amu Jehoas, nug Israel dilag king, nug nuhikkud ban danab ele ag Juda wanppa ban hekkulagnu uɗippig. Ag oh anam hena, ag Juda wanppa Betsemes appa ag nug uɗa tena, ban heppig.

¹² Ag ban hena, Israel dilag daup ag Juda dilag daup eɗatteg, Juda dilag daup ag oolna, laulkadppa goppig.

¹³ Amu Betsemes appa ag ban henana, banppa Israel dilag king Jehoas nug Ahasia alag Amasaia, nug Joas bekka, Juda dilag king amu, nug nug aɗom. Jehoas nug Amasaia aɗa, nug Jerusalem ukka, nug Jerusalem ooppa ukka he, nuhikkud daup ag Jerusalemnu aɗ laih laa od onig Epraim Od, appanu ukka ukka, od laa onig Daugppan Od, appa batak ag aɗ amu oh loppaɗppig. Aɗ laih amunu elab am 200 mita keeke.

¹⁴ Jehoas nug anam ha, nug gol, silwa oh ele Yawenu mettid lagppanu, appan uɗat haknu keeke oh, amu king laug enanagnab, appanu en maknu oo anen anenppanu en oh ele awa ukkom. Jehoas nug amu oh awa, Juda danab ah laa ele aɗualatta, Juda ag baula ban hemananu, ag guppiɗ bia daaglagnu, nug ag ele diia, nug eɗua Samaria ukkom.

King Jehoas mauhom

¹⁵ Amu keeke kuɗum laa ele King Jehoas heum, nuhig uɗat ɠagattag laala heum, aria nug Juda dilag king Amasaia ele ban hepiɗ amu, kaya amuam ag buk laappa, buk amu onig am, Israel Dilag Kingnu Kaya, ag buk amuppa yaappig daatte.

¹⁶ Dimppa King Jehoas nug mauhe, ag nug Samaria appa Israel dilag king boumadppigppa boumppig. Nug mauhe amu, nug bekka Jeroboam nug abenabppa king ba dayom.

King Amasaia mauhom

¹⁷ Anam daye ukke, Jehoahas bekka Jehoas, Israel dilag king, nug mauhe, Joas bekka Amasaia, Juda dilag king, nug maɗ 15 baula daya, nug ele mauhom.

¹⁸ Amu keeke kuɗum laa ele King Amasaia heum amu, kaya amuam ag buk laappa, buk amu onig am, Juda Dilag Kingnu Kaya, ag buk amuppa yaappig daatte.

¹⁹ Amu Amasaia mauhomnu amu, nug Jerusalem dayeye, laa ag nug qeppeg mauhkkunu dabmak aon, ib madippig. Ag anam heeg ukke, ⌊amu hekkulagnu wagai meeg,⌋ Amasaia nug oola, Lakis ukkom, amge ag amu hekkulagnu heppig ele ag danab laa maatteg gona, Lakis appa ag ib anidna, nug qeeg mauhom.

²⁰ Ag qeeg mauhe, laa ag gaɗa hos attan mena, aon Jerusalem uɗin, Dawitnu Aab appa mamekkud aɗi boumadppigppa boumppig.

²¹ Aria, dimppa Juda danab ah oh ag Asaria, ⌊nug onig laa am Usia⌋, nug mameg Amasaia abenabppa king daakkunu otippig. Usia nug maɗ nuhig 16 dayaya, haen amuppa king beum.

²² Usia mameg Amasaia mauhe, Usia nug king ba daye, haen laa dimppa nug ukka, ban ha, aab Elat, kekeɗ ag amuppa daaegeg, nug eɗua awe, Judanu daye, nug eɗua babaittom.

Jeroboam laa Israel dilag king beum

²³ Joas bekka Amasaia nug Juda dilag king dayaya, nuhig king dayaknu maɗ 15ppa amu, Jehoas bekka Jeroboam nug Israel dilag king ba dayom. Nug king ba, nug maɗ 41 Samaria appa king dayom.

²⁴ Nug kobol eheɗ Yawenu neekkakppa heum. Nug Nebat bekka Jeroboam hipunin hatta he, Israel danab ah ag hipunin amu ele hadappig amu, nug hipunin amu hekkunu ii uua, di-ii-mettom.

²⁵ Amu Jeroboam nug king ii beum haenppa, haen amuppa kekeɗ ag Israel dilag wan laala aoppig. Amge Jeroboam nug gemu ban haaha, wan amu oh eɗua awom; amuam laih yawalti uɗitteppanu Lebo Hamatnu digma ukka, laih yau uɗitteppanu Mauhaknu Le, amuppa batak. Jeroboam nug anam haaha, nug Yawe, Israel dilag Kayak, Nug nuhig maɗi nid Amitai bekka, propet Jona oɗeppa nai aum amu, nug elele mettom. Jona nug am Gatheper aabppan danab laa.

²⁶ Yawe Nug amu heumnu diig am, Nug Israel dilag kekeɗ ag Israel danab ah oh uug okkai mattan heeg, eheɗ daaegeg ele anattom. Amu danab laa ag ehanadkkunu laa ii dayom, iitta.

²⁷ Yawe Nug anukka heeb, Israel oh ag iitta mena autna aoppeg, hab waappa amu, danab laa nug ahilagnu baula dab-ii-memanu, Nug ii aum. Iitta amunu, Nug Jehoas bekka, King Jeroboam ehanitte, Israel ag padal memananu nug ehanattom.

²⁸ Amu keeke kuɗum laa ele King Jeroboam heum, nuhig uɗat ɠagattag laala heum, aria nug Damaskus, Hamat ele eɗua diiatom amu, kaya amuam ag buk laappa, buk amu onig am, Israel Dilag Kingnu Kaya, ag buk amuppa yaappig daatte. Juda ag Hamat anukka gumappig.

²⁹ Dimppa Jeroboam mauhe amu, ag nug mamekkud aɗi, Israel dilag king, ag ag boumadppigppa nug boumppig. Nug mauhe amu, nug bekka Sekaraia nug abenabppa king ba dayom.