2 King 13 - Nobonob Baibel

Jehoahas nug Israel dilag king beum

¹ Ahasia bekka Joas, nug Juda dilag king dayaya, nuhig king dayaknu maɗ 23ppa amu, Jehu bekka Jehoahas nug Israel dilag king ba, nug maɗ 17 Samaria appa king dayom.

² King Jehoahas nug Nebat bekka Jeroboam hipunin hatta he, Israel danab ah ag hipunin amu ele hadappig amu, nug nuhig kobol amu dim lamittatta, nug Yawenu neekkakppa eheɗ heum. Nug hipunin amu hekkunu ii uua di-ii-mettom.

³ Nug anam he amu, Yawe Nug Israel dilagnu oo huan nauhe, Nug Aram dilag king Hasael, aria dimppa Hasael bekka Benhadat, nug Aram dilag king be, Yawe Nug nug ele, Nug aa uuate, aa haen kuɗum Israel banppa eɗadpiɗ.

⁴ Aria, King Jehoahas nug Yawe ehanidkkunu unuqitte, Yawe Nug Jehoahasnu unuqittak amu doyom. Aɗinu? Yawe Nug doyom, Aram ag eheɗ huanak Israel dilagppa heppig.

⁵ Aakku Yawe Nug danab laa Israel ehanatta, nug Aram eppelagppanu eɗua diikkunu otie, eɗua diiom amunu, Israel ag eɗun, ahilag dayak ena anukka daappig bia appalagppa daappig.

⁶ Amge Israel ag Jeroboam hipunin hatta he, Israel danab ah ag hipunin amu ele hadappig amu, ag hipunin amu hekkulagnu ii uun, di-ii-medappig. Iitta. Ag tuɗidna heppig. Laa amu, ag heeg, kayak hambuppuak Aserah dabmekkulagnu biidod am Samaria appa tuɗitta dayom.

⁷ Haen amuppa Jehoahas nug ban danab nuhig amu kuɗum iitta. Aɗinu? Aram ag Israel ban danab kuɗum huanak aqaeg mauhppig. Aram ag Israel eheɗnab hadappig amunu, gemu Israel dilag daup ag hos attan daan, ban heppig am 50ib daappig; bannu karis am 10ib daappig. Amu Israel dilag ban danab laa ag baelagppa oinna, ban heppig ele amu, ahilag ebqak am 10,000 aakkuib.

⁸ Keeke kuɗum laa King Jehoahas heum, nuhig uɗat ɠagattag ele amu, kaya amuam ag buk laappa, buk amu onig am, Israel Dilag Kingnu Kaya, ag buk amuppa yaappig daatte.

⁹ Dimppa Jehoahas nug mauhe, ag nug Samaria appa boumppig. Nug mauhe, nug bekka Jehoas, nug abenabppa king ba dayom.

Jehoas nug Israel dilag king beum

¹⁰ Joas nug Juda dilag king dayaya, nuhig king dayaknu maɗ 37ppa amu, Jehoahas bekka Jehoas nug Israel dilag king ba, nug maɗ 16 Samaria appa king dayom.

¹¹ King Jehoas nug Yawenu neekkakppa eheɗ heum. Nug Nebat bekka Jeroboam hipunin hatta he, Israel danab ah ag hipunin amu ele hadappig amu, nug nuhig kobol amu dim lamittom. Nug hipunin amu hekkunu ii uua, di-ii-mettom.

¹² Amu keeke kuɗum laa ele King Jehoas heum, amu nuhig uɗat ɠagattag, nug Juda dilag king Amasaia ele ban hepiɗ amu, kaya amuam ag buk laappa, buk amu onig am, Israel Dilag Kingnu Kaya, ag buk amuppa yaappig daatte.

¹³ Dimppa Jehoas nug mauhe, ag Samaria appa Israel dilag king boumadppigppa boumppig. Nug mauhe amu, Jeroboam ⌊laa⌋ nug abenabppa king ba dayom.

Elisa mauhom

¹⁴ Haen Jehoas nug Israel dilag king ba dayeye, haen amuppa Elisa nug oɗe okkai awa dayeye, Israel dilag king Jehoas nug anidkkunu ukka, mahitta gayaya inam aum. “Mama dahil, mama dahil. Na Israel dilag ehanittak danab ɠagattag. Na Israel dilag daup ag bannu karis attan daan, ban hetteb, daup ag hos attan daan, ban hetteb ele, na amubia daattem,” awa aum.

¹⁵ Nug anam he amu, Elisa nug Jehoas amegppa inam aum. “Na gona, lat tanig, lat doɗo ele aon uɗie!” awa aum. Awa a amu, Jehoas nug ukka, lat tanig, doɗo ele awa uɗiom.

¹⁶ Aria, Elisa nug Jehoas amegppa aum. “Na eppenppa lat awe!” awa aum. King nug anam he, Elisa nug eppeg laih laih oh, am king eppeg laih laih oh qaɗeppa, attan meum.

¹⁷ Aa anam daayya, Elisa nug king amegppa aum. “Na gililppa ulah ippu aam bedeppa neekkaknu amu, na amu matule!” awa aum. Nug anam a, Jehoas nug anam he, Elisa nug, “Lat doɗo e!” awa aum. Awa a, king nug lat anam he, amu Elisa nug aum. “Lat doɗo amuam Yawenu lat doɗo, Aram eɗadkkutnu. Amu haen na Apek aabppa, na Aram ele ban hena, geha na ag oh maladkkut,” awa aum.

¹⁸ Elisa nug anam awowa, nug king amegppa tuɗitta aum. “Nahip lat doɗo amu akkan aɗe!” awa aum. Awa a, king nug lat akka aɗe, Elisa nug aum. “Na lat doɗo amuppa wan makkuɗe!” awa aum. Awa a, aakku Jehoas nug haen ewam wan makkuɗa batom.

¹⁹ Nug anam he, Kayaknu danab, Elisa, nug amu antta, nug oo nauhe, nug king amegppa aum. “Na wan makkuɗme amu, haen tanig ele, o eblaih laippu anam makkuɗlom. Am na anam helomlob, aria geha na Aram oh aqan maladlom. Amge gemu amu na geha haen ewam na ag eɗadkkut aakkuib,” awa aum.

²⁰ Aakku dimppa amu Elisa nug mauhe, ag nug ⌊men oɗeppa⌋ boumppig. Amu maɗ ohppa gakkaɗak haen digmakppa amu, Moap danab ag ban hena, danab aqadna, ahilkad keeke aotteb amu, amunu ameg laala ag uɗin, Israel wanppa Israel danab ah eheɗ hadattappig.

²¹ Amu deɗ laa Israel laala ag danab mauhak gaɗa amu boumona, haen amuppa ag Moap danab amu laala uɗieg anadna, ag danab mauhom gaɗa amu buɗieg, moɗ Elisa ebehi niitte, amuppa noum. Amu haen danab mauhom gaɗa noa ukka, Elisa ebehi aɗe amu, danab mauhom amu nug eɗua bau ma, baegppa aha hibaittom.

Aram ag eɗun gona, Israel ele ban heppig

²² Amu Jehoahas nug Israel dilag king dayeye, haen amu ohppa haen kuɗum Aram dilag king Hasael nug ukka, Israel eheɗ hattom.

²³ Amge Yawe Nug Israel dilagnu oo bodoette enanag maɗoɗ ele hak kobol dim lamitta, Nug ahilagnu ele oo bodoetta le meum. Nug nug tituana nai qakkak anukka Abraham, Aisak, Jakop ele heppig amu, Nug amu dabmeum amunu, Nug Israel ehanatta, Nug ag eheɗ ii hatta, Israel Nug noobppa daatteb amu lamatteb, laih gokkulagnu Nug oo ii dayom. Iitta. Tatam, gemu ⌊nai imu yaak haenppa⌋ ele, anamib.

²⁴ Dimppa Hasael nug mauhe amu, nug bekka Benhadat nug abenabppa Aram dilag king dayom.

²⁵ Amu Israel dilag king Jehoas nug nuhikkud ban danab ele ag ukkaeg, Hasael bekka Benhadat, Aram dilag king, ag nug ele ban hena, Jehoas nug nuhikkud ban danab ele ag ahan, Benhadat nuhikkud ban danab ele eɗadna, Jehoas mameg Jehoahas nug Israel dilag king dayom haenppa, Aram ag Israel dilag aab aoppig amu, ag eɗun aoppig. Jehoas nug Benhadat haen ewam banppa eɗittom.