2 King 10 - Nobonob Baibel

Jehu nug Ahap baekkudppa oh aqaeg mauhppig

¹ King Ahap bekkod, ag Samaria aab okkaippa daappig, ahilag ebqak am 70. Ag anam daaegeg, Jehu nug uɗug laa yaalatta me, Samaria ukkom. Pas amuam Jesril dilag ehanittak anuqak danab ⌊oolna, Samaria goppig⌋, Israel dilag ikki danab, amu Ahap bekkod gumattak danab ele dilagppa ukkom. Nug nai uɗugppa yom am inam.

² “Ahapnu huu amu, ag ag ele daatteb. Ag am bannu keeke; amuam bannu karis, hos, ban lat, ban haknu keeke laala ele, amu aab okkai ɠagattag aɗ ele, ag keeke amu oh ele. Amunu haen ag da uɗug yaami imu aona amu,

³ ag Ahapnu huuppan danab ena, kalu mettak ele laa ag oolagppanu laa tituanna appeg, ahilag king beeb, ag nug king daakkutai, iitta da king daakkultai, ag da ele nug qaknu bappaidna heig!” awa aum.

⁴ Jehu nug anam aum, amge gabman ikki danab amu, ag nai amu aon, ag baɗak eheɗ nau doon, ag inam appig. “Jehu nug king aɗit nug aa eɗatom amunu, geha ig am attem heta, nug eɗidkkunignu elele daagnig? Ig am elele iitta,” aon appig.

⁵ Ag anam anana, danab nug kingnu lag enanagnab gumom, amu laa nug aab okkai amunu gawana dayom, aria ikki danab, amu Ahap bekkod gumattak danab ele, ag oh nai laippu ana, nai inam meeg, Jehu toppa ukkom. “Ig am nahip maɗi nid daata, naib dim lamidkkunignu heta, bappaidta daattem. Ig danab laa king mekkunignu ii tituanmata. Na aɗi keeke laa hekkutnu oot daatte amu, keeke amu na hekkutib hekkut,” aon appig.

⁶ Ag anam heeg, aria Jehu nug uɗug laa yaalatta, ikki danab amu dilag me ukke, nug inam amelagppa aum. “Ag da ehaniɗkkulagnu, ag da oɗel dim lamidkkulagnu oolag daatte dayeb amu, ag ahilag okkai Ahap, ag nug bekkod oh ag aqeg! Aqappeg mauhppeg, ag ikkilag oh okkuladna akkan, butti haen inamppa da gumiɗna, Jesril uɗieg!” awa aum. King Ahap bekkod 70 ag Samaria aab okkaippa daatteb amu, ag aab okkai amunu ikki danab ele daanna, danab okkai amu ag gumadnana, sul keeke madappig.

⁷ Amge haen danab okkai amu ag Jehu uɗug yom amu aona, ag King Ahap bekkod ag gumadppig ele, ag nid 70 amu oh aqaeg mauheg, ikkilkad okkulna, kalegppa inadna, meeg Jesril appa Jehu toppa ukkom.

⁸ Ag anam heeg, Jehu nug Ahap bekkod aqappig, ikkilkad okkulak amu meeg Jesril ukke, haen nug nai amu doya, aria nug haknunab inam aum. “Ag ikkilkad okkulak amu aab okkainu aɗ odppa ameg aɗitppa qagmeppeg ukkeb, wagkkaɗaɗ!” awa aum.

⁹ Aria, wagkkaɗe buttua Jehu nug aha, aab okkainu aɗ odppa ukka, ikkilag okkulak amu antta, danab ah kuɗum ag appa qagmak daaegeg, nug hibaitta dayaya, inam amelagppa aum. “Ag beɗulagppa am aab iitta. Da dakkaib dahil danab okkai Joram tabappi nokkunu dabmein, da nug qei mauhom. Amge aunnab nug ameg imu aqom?

¹⁰ Amge keeke imu beum am hamu iitta. Yawe Nug Ahap, nug bekkod ele dilagnu aum amu, imuppa ig nai amu laa oh ele am meu bekku anidta doognig. Yawe Nug anukka nuhig maɗi nid propet Elaiya oɗeppa aum amu, gemu elele mettom,” awa aum.

¹¹ Jehu nug anam ana, nug Ahapnu huu, nuhikkud ehanittak okkai, laikkud ena, am nuhikkud mana mettak danab ele Jesril daappig, nug amu oh ele aqe mauhppig; laippu laa ii uue dayom. Iitta.

Jehu nug King Ahasia laikkud aqe mauhppig

¹² Aria, Jehu nug nuhikkud ban danab ele Jesril uun, Samaria gokkulagnu goppig. Jehu nug ukka, sipsip gumak danab dilag aben, Bet Eked atteb, appa amu

¹³ nug Juda dilag king Ahasianu huu laala ibppa uɗalag ta, nug inam oɗ mattom. “Ag am aun aɗi?” awa oɗ mattom. Oɗ matte, ag nuhig oɗmak amu noob inam meppig. “Ig am King Ahasianu huu, ig Jesril gottem. Ig gota, king bekkod, amu Jesebel, nug kuin anignu ehah aɗa daatte ele amu, nug bekkod ele humadkkunignu gottem,” aon appig.

¹⁴ Aria, Jehu nug anam aeg doya, nug nuhikkud huu amelagppa haknunab inam aum. “Ag danab amu aɗualatteg! Amge aɗualadnana, aib aqappig!” awa aum. Awa a, aakku ag danab amu oh aɗualadppig. Ag aɗualadna, Bet Eked appa le moɗ laa dayom amu, ag amuppa Ahasia huu danab amu oh appa aqaeg mauhppig. Laa uueg ii ukkom. Iitta. Ebqak ahilag oh am 42.

Jehu nug Ahapnu laa oh ele aqe mauhppig

¹⁵ Jehu nug nuhikkud ban danab ele ag appanu ahan, Jehu nug ukka, Rekap bekka Jonadap, nug Jehu anidkkunu ugekke antta, Jehu nug humittatta, amegppa inam aum. “Da nahip dabmak amunu ool huan daatte, amge na dahilnu attem doottem? Da keeke hemi amu, na amunu na oo gamag ahak doottem, o iitta?” awa oɗ mettom. Jehu nug Jonadap anam oɗ mette, Jonadap nug Jehu aum am nob ma, inam aum. “Ao, da na ele i oonih laippu daatte,” awa aum. Nug anam a, aria Jehu nug amegppa aum. “Ena, amu na anam doottem dayeb, na eppen meppe doob, i eppeg aɗak heɗu!” awa aum. Awa a, aakku Jehu nug Jonadap eppegppa aɗa eeɗe, bannu karis attan te,

¹⁶ Jehu nug Jonadap amegppa inam aum. “Na doppe, da ele goɗa, geha na da Yawe Nugib dim lamidkkulnu wagai mettemnu, na dahil yag-nab-bak amunu doottem anidkkut,” awa aum. Jehu nug anam ana he, Jonadap nug ele oh aa bannu karisppa Samaria gopiɗ.

¹⁷ Haen aa goya, Samaria teya, Jehu nug Ahap buɗub laa oh aqe mauhppig. Laippu laa ii uuom. Iitta. Yawe Nug anukka propet Elaiya oɗeppa nai aum amu, amubia nug heum.

Jehu nug Balnu danab okkai oh aqom

¹⁸ Aria, Jehu nug Samaria danab ah oh onilagppa e uɗin qagmeeg, nug ag amelagppa inam aum. “Anukka King Ahap nug Bal waappa dayaya nug oɗe dim lamittom, amge da nug heum eɗittak, amu huana hekkul.

¹⁹ Aakku gemu ag Balnu propet danab oh, nuhikkud mana mettak danab oh, amu danab oh ag nug noobppa dup nona binag metteb ele onilagppa eppeg uɗin qagmeig! Ag heppeg, laippu laa qagmak amu ii eɗidma; oh uɗiglag. Aɗinu? Da Balnu mana mettak okkai hekkul. Laa nug qagmak imuppa ii uɗikku amu, nug am bau ii daama; nug mauhkku,” awa aum. Amge Jehu nug nai amuppa danab ah Bal noobppa dup nona binag meppig ele buppulattatta, nug danab oh ag Bal, nug noobppa dup nona binag meppig ele aqeeb iitta mekkulagnu heum.

²⁰ Jehu anam ana, nug aum. “Ag Bal binag maknu deɗ laa tituaneg!” awa aum. Nug anam awa a, aakku ag qagmak amu hekkulagnu deɗ meppig.

²¹ Aria, Jehu nug nai amu me, Israel oh dilagppa ukke, danab Bal noobppa dup nona binag meppig ele oh ag uɗin qagmeppig. Laippu laa aabppa ii dayom. Iitta. Ag oh uɗin, kayak hambuppuak Bal laug amu ooppa noeg, lag amba, uɗia odppa beum.

²² Danab amu ag lag amu ooppa nona malaeg, Jehu nug ukka, danab mettid amuppan danab bala maknu lamen gumatte ele amegppa aum. “Na danab ag Bal noobppa dup nona binag metteb, na amu dilag lamen elab akkan, amu dilagppa panin madappe, ag mena, Balnu mettid heig!” awa aum. Awa a, aakku nug lamen amu akka, panie aoppig.

²³ Aria, dimppa Jehu nug Rekap bekka Jonadap ele aa Bal laug amu ooppa noya, Jehu nug danab ag Bal noobppa dup nona binag metteb ele, nug ag amelagppa aum. “Laala ag Yawe noobppa dup nona binag metteb ele, ag ag oolagppa daaglag am ena iitta amunu, ag akka akka neegna oin, nug italna anidna autna aweg! Laa ag Bal noobppa dup nona binag metteb, ag aakkuib dayeg!” awa aum.

²⁴ Nug nai amu amelagppa ana male, aakku nug Jonadap ele aa lag oo, qaɗab daatte amuppa mana mettak laala, amu manaknu ofa hekkulahnu nopiɗ. Amge Jehu nug tatam danab amu ag uɗin ii qagmeegeg, nug ban danab 80 otiowa he, nug ameg mena, lag amu dimittim daappig. Nug ag amelagppa a dooppig. “Danab ameg amu ag Bal noobppa dup nona binag mak danab amu, ag oh ag aqappeg mauheg! Am ban danab laa nug danab amunu laippu laa uueb gokku amu, nug nug abenabppa nug mauhkku.” Jehu nug anam aum.

²⁵ Amu Jehu nug manaknu ofa ha malowa, nug dimittim ukka, ban danab amu, nug ahilag okkai ele inam amelagppa haknunab aum. “Ag lag ooppa nona, ag amu oh aqappeg mauheg! Ag laippu laa ii uuppeg oola goma! Iitta,” awa aum. Nug anam a, ag lag ooppa nona, qep elabppa ameg amu oh aqaeg mauhppig. Ag aqona, ag gaɗalag buɗieg, dimittim ukkaeg, ag eɗun gona, Balnu mettid lag nakoknu oo ooppanab dayom amu, ag appa goppig.

²⁶ Ag appa nona, ag Bal laug ooppanu biidod, danab ag amu binag metteb ele amu, ag amu aon, dimittim gona, manaeg ewom.

²⁷ Aria, ag kayak hambuppuak Bal dottog amu aon, heeg nauhe, nug laug amu ele heeg nauhom. Ag lag amu heeg nauhe, ag heeg, lag amuam biilag laugib daye uɗie, gemu ⌊nai imu yaak haenppa⌋ ele, am anamib daatte.

²⁸ Aakku Jehu nug Israel aɗi ag kayak hambuppuak Bal noobppa dup nona binag meppig, ahilag kobol amu nug ib amuppa he, ag baula Bal noobppa dup nona binag ii meppig; ag uuppig.

²⁹ Jehu anam heum, amge nug Nebat bekka Jeroboam hipunin hatta he, Israel danab ah ag hipunin amu ele hadappig amu, nug hipunin amu hekkunu ii uua, di-ii-mettom. Hipunin amuam makau gaiɗ aɗit golppa hak noolahppa dup noa binag mak. Makau dottog amu laa Betel daye, laa Dan dayom.

³⁰ Anam amu, Yawe Nug Jehu amegppa inam aum. “Na dahil neekkakppa, aɗi am hak tutukku, na amu heme. Da Ahap buɗub dilagppa aɗi bekkunu dabmak da oolppa dayom amu, na keeke amu oh heme. Na amu heme amu, na ena heme. Na amu heme amunu, da heppi, na buɗun buɗun doobob ukkeb, ahilag ebqak waɗele batak na buɗunppanu laa ag anen anen ahilag haenppa Israel dilag king bena, sia kingppa daaglag,” awa aum.

³¹ Amge Jehu nug Yawe, Israel dilag Kayak, nug nuhig ɗo oh, nug meu ohppa ii dim lamittom. Iitta. Nug Jeroboam hipunin hatta he, Israel danab ah ele ag hipunin amu hadappig amu, nug hipunin amu hekkunu ii uua di-ii-mettom.

³² Haen Jehu nug king dayom, haen amuppa amu, Yawe Nug digma he, wan laala ag banelag uɗin, Israel eɗadna, wan ahilag laih laala ele aɗadna aoppig. Aram dilag king Hasael nug ban ha, Israel aqaaqa, Israel dilag wan laih

³³ Jodan leppanu kaɗag uɗitteppanu, appanu daatte amu, nug wan amu oh nug awom. Amuam Gileat wan. Israel dilag huu okkai Gad, Ruben amu Manase huu maha ele, ag wan atu amuppa daatteb. Wan amuam aab onig Aroer, oolnu noak onig Arnon daugppa daatte, appa digma ukka, Gileat wan oh, amu Basan wan oh ele batakppa daatte.

³⁴ Amu keeke kuɗum laa ele King Jehu heum, nuhig uɗat ɠagattag ele amu, kaya amuam ag buk laappa, buk amu onig am, Israel Dilag Kingnu Kaya, ag buk amuppa yaappig daatte.

³⁵ Dimppa Jehu nug mauhe, ag nug Samaria appa boumppig. Nug mauhe, nug bekka Jehoahas nug abenabppa king ba dayom.

³⁶ Jehu nug Israel dilag king ba, nug maɗ 28 Samaria appa Israel dilag king dayom.