2 King 1 - Nobonob Baibel

Elaiya nug King Ahasia geha mauhkkunu aum

¹ Amu King Ahap mauhe dimppa amu, Moap ag tappenak henana, Israel waalagppa daaglagnu uuppig.

² Amu deɗ laappa Samaria appa King Ahasia nug laug oo attan amuppa ta dayom. Dayaya, nug gililppa ulah ibuppa daya, ad naunau, keeke laa oɗe amuppanu na qemanu lo akkak bia oɗe amuppa daappig amu, keeke amu qiie, nug attannu na qa ukka wanppa noa o, beɗu guittak awom. Anam amunu, nug eɗua ena daakkutai, o iittatai, amu dabmaama dookkunu, nug danab laala maatte, Pilistia wanppa Ekron aabppa gokkulagnu onilagppa eppig. Nug e uɗin daaegeg, nug amelagppa aum. “Ag gona, Ekron dilag kayak Balsebup, da eɗuen ena daakkulte amu oɗ metteg!” awa aum. Nug anam ana, nug he goppig.

³ Ahasia anam heum, amge Yawenu engel nug propet Elaiya, Tisbe ted, nug nug amegppa aum. “Na ahan gona, Samarianu king nug danab maatte, Ekron gotteb, na ag uɗalag tena, amelagppa inam akkut. ‘Aɗinu ag Balsebup, Ekron dilag kayak, ag nug oɗ mettaglagnu gotteb? Israel ippa am Kayak laa iite daatte amunu, ag appa gotteb?’ ⌊Ag eɗun gona, king amegppa inam aig!⌋

⁴ ‘Na amu heme amunu, na geha niittemppa, anam niikkut. Na geha bau eɗun, ena ii daamna. Iitta. Genab, geha na mauhkkut,’ ” awa aum. Aakku Elaiya nug nai amu doya, nug aha ukka, ⌊danab amu uɗalag ta, amelagppa a, ag eɗun goppig⌋.

⁵ Danab ag propet Elaiya amu a doon, haen ag eɗun king toppa ukkaeg, king nug ag oɗ maatom. “Ag aɗinu eɗun uɗippig?” awa oɗ mattom.

⁶ King anam oɗ matte amu, danab amu ag king amegppa appig. “Danab laa uɗia, ibppa uɗanig ta, nug inam amenigppa aum. ‘Ag eɗun gona, king maatte uɗippig ele amu, ag nug amegppa inam appeg doyaɗ! “Yawe Nug inam atte. Na aɗinu danab otiatte, ag Ekron dilag kayak Balsebup oɗ mettaglagnu gotteb? Israel dilagppa Kayak laa iite daatte? Na amu heme amunu, na geha niittemppa, anam niikkut. Na geha bau eɗun, ena ii daamna. Iitta. Genab, geha na mauhkkut,” awa aum.’ ” Ag king amegppa anam appig.

⁷ King nug nai amu aeg doya, nug inam oɗ mattom. “Danab nug ag uɗalag ta, nai amu ag amelagppa aum ele amu, nug am aɗi danab bia?” Nug ag anam oɗ mattom.

⁸ King oɗ matte, ag eɗun nob mena appig. “Danab amu nug lamen nuhig beɗuppa meum ele, amuam doɗ uɗigppa heppig, imuagppa matagiɗ takkom, amuam doɗ gaɗappa heppig takkom ele,” aon appig. Ag aeg, king nug doya, nug amelagppa aum. “Nug am propet Elaiya, nug am Tisbe ted,” awa aum.

⁹ Aakku king nug ban daup ikki, ban danab 50 ele maatte, Elaiya omalna uɗiglagnu goppig. Ag gona, aab Elaiya daatte, amuppa tena, ban daup ikki nug neekka, Elaiya nug qauko nakok igippa ta dayeye antta, ikki danab nug Elaiya amegppa inam aum. “Kayaknu danab, king nug atte. ‘Na nee!’ ” awa aum.

¹⁰ Nug anam a amu, Elaiya nug oɗeppa awa, amegppa aum. “Amu genab da am Kayaknu danab laa daattem dayeb, habppanu aab aɗu na, am na, nahip ban danab 50 ele ag ewatteb, iitta meig!” awa aum. Aakku habppanu aab aɗu na, ban daup ikki, amu ban danab nuhikkud ele ewatte, iitta meppig.

¹¹ Anam beum, dimppa king nug eɗua ban daup ikki laa, ban danab 50 laa ele Elaiya omalna uɗiglagnu maatte goppig. Ag gona tena, ikki danab nug Elaiya amegppa aum. “Kayaknu danab, king nug atte. Na paha ne!” awa aum.

¹² Nug anam a amu, Elaiya nug oɗeppa awa, amegppa aum. “Amu genab da am Kayaknu danab laa daattem dayeb, habppanu aab aɗu na, am na, nahip ban danab 50 ele ag ewatteb, iitta meig!” awa aum. Aakku habppanu aab aɗu na, ban daup ikki, amu ban danab nuhikkud ele ewatte, iitta meppig.

¹³ Anam beum amu, king nug ban daup ikki laa, ban danab 50 laa ele, ag Elaiya omalna uɗiglagnu maatte goppig. Amge ban daup ikki ebqak ewam amu nug qauko amuppa ta, Elaiya guguitta ukka, laippun gateg qaun o, amegppa inam aum. “Kayaknu danab, na da dabmeɗan heppe, da ii mauhpan, danab imu ele anamib oo doyak ele oɗ medattem. Ig am nahip maɗi nid.

¹⁴ Da doottem, aab aɗu habppanu na, ban daup ikki danab aɗit, ahilti huu ele ewatte, iitta meppig. Amge na gemu da dabmeɗan heppe, da ii mauhpan oɗ medattem,” awa aum.

¹⁵ Ban daup ikki nug nai ana male amu, aakku Yawenu engel nug Elaiya amegppa aum. “Na danab amu ele gokkulahnu aib baɗame. Na ahappe, Nug ele ukkeɗ!” awa aum. Aakku Elaiya ahe, aa king gumidya gopiɗ.

¹⁶ Elaiya nug ukka ta, king amegppa nai imu mattia aum. “Yawe Nug inam atte. ‘Na aɗinu danab otiatte, ag Ekron dilag kayak Balsebup oɗ mettaglagnu goppig? Israel dilagppa amu, Kayak laa, na Nug oɗ medakkutnu iite daatte? Na amu heme amunu, na geha niittemppa, anam niikkut. Na geha bau eɗun, ena ii daamna. Iitta. Genab, geha na mauhkkut,’ ” awa aum.

¹⁷ Aakku, Ahasia nug mauhe amu, Yawe Nug Elaiya oɗeppa nai mattiom amu, nai amu aakku elele mettom. Ahasia nug nid danab iitta amunu, nug amag Joram nug abenabppa king ba dayom. Jehosapat bekka Jehoram nug Juda dilag king dayaya, nuhig king dayaknu maɗ aɗitppa amu, Joram nug Israel dilag king ba dayom.

¹⁸ Amu keeke kuɗum laa oh ele King Ahasia heum amu, kaya amuam ag buk laappa, buk amu onig am, Israel Dilag Kingnu Kaya, ag buk amuppa yaappig daatte.