2 Jon 1 - Nobonob Baibel

Oo mauhak kobol dim lamittaknu nai

^1-2 Da Jon, da Kayaknu tamaniaknu ikki danab laa, da nai imu yaattem. Da na ah Kayak tituanittom, nahipad nid naunau ele, da ag oh ahilagnu yaattem. Doyak diig genabib ihinigppa daatte, haen oh ele daakku amunu, da genab ahilagnu ool mauhtte. Am daib iitta. Laa ag doyak diig genabib dootteb amu, ag ele amubia ahilagnu oolag mauhtte.

³ Anam amu, ig Mamenig Kayak, Nug Bekka Jesus Kristus ele, aa doyak diig genabib, oo mauhak kobol ele dim lamidya, aa ehanittak okkai hamu mettak, oo gai-iitta doya oo metta ehanittak, amu maɗoɗ ele ig mekkaglah.

⁴ Ao, da nahipad nid naunau laala ag doyak diig genabib Mame Nug ig anam dim lamidkkunignunab aum ele amu, ag amu dim lamidna daatteb doyena, da maɗoɗppan gamag ahak okkainab doottem.

⁵ O ah Kayak tituanittom ele, da haknunab anak bau nahipnu ii yaattem. Iitta. Imuam haknunab anak, ig digmakppa aomut, amuib. Haknunab anak amuam ig lainkad ele nug oo mauhak doognignu daatte, amu da ig oh amu dim lamidkkunignu iikku unuqadttem.

⁶ Oo mauhak kobol dim lamittak am inam; ig nuhig haknunab anak dim lamidkkunig. Amu ag digmakppa dooppig amubia, nuhig haknunab anak am, ag oo mauhak doon oiyeg!

⁷ Am hambuppuak danab kuɗum, ag Jesus Kristus Nug danab beɗu ii awa uɗiom maditteb ele amu, ag ihinigppanu qatin gona wan imuppa oitteb. Danab amu ag am hambuppuak danab, ag Kristusnu kekeɗ.

⁸ Amu ag tamaniak ooppa daatteb ele, ag Kayaknu keeke aoglagnu uɗat heppig, amu laa amu ag heppeg, keeke amu iitta memanu dabmeig! Ag geha nob ena oh aoglagnu heig!

⁹ Am aun laa nug Kristusnu ippunittakppaib ii daatte, nug nukka nuhig dabmakppa, dabmak hambuppuak laala ele tuɗidtte amu, nug Kayak ele laippu ii daattep. Am aun laa nug Kristusnu ippunittakppa daatte amu, nug Mame amu Nug Bekka ele oh laippu daatteb.

¹⁰ Am aun nug ag gumatta gokku, amge nug Kristusnu nai tutukku ii maditte amu, ag nug ⌊ippunittak danab daakkunu⌋ ag laulag ooppa nokkunu aib appig. Ele amu ag nug ele laippu dayaknu oolagppa eleleib aib dooppig.

¹¹ Aɗinu? Danab aun laa nug nug ele laippu dayaknu ooppa eleleib dootte amu, nug aakku ippunittak danab nau amu ehanitte, hak nau amu aa oh hettep.

Bagqak nai laala

¹² Da keeke kuɗum yen madakkul daatte, amge da uɗugppa yaakkulnu ool ii daatte. Iitta. Da ig oh maɗoɗppan gamag ahak ena aognignu ag gumatte ukke anatten, da ag ele oh nug iɗu anidtata, nai mattignignu dabmettem.

¹³ Da daattem imuppa, ah laa na nug ele am eappinag amu, Kayak Nug ah amu nuhig tituanom ele, nid nuhikkud ag na humidtteb.