1 Timoti 6 - Nobonob Baibel

Begbeg maɗi nid dilag nai

¹ Danab ah ag Kayak onignu, Kristen kobolnu ele nai nau amananu, begbeg maɗi nid ag ahilkad okkainu ena elele okkai dooglagnu daatteb.

² Begbeg maɗi nid ag Kristen daatteb, ahilkad okkai ag ele Kristen daatteb dayeb amu, ag oh eamakkud daatteb bia, diig amunu ag begbeg maɗi nid ag ahilkad okkainu ena elele doyak uun, ii hemananu aib heppig. Iitta. Ag anen anen ahilag uɗatppa ag laa Jesusnu ooppa genab dootte, Jesus nuhignu oo mauhtte ele, ag nug ehanidtteb amunu, ag uɗat elelenab hekkulagnu daatteb. Na ag anam ippunadna, dabmak maɗettaknu nai a!

Keeke kuɗum awaknu kobol

³ Laa nug ihinig Naɗi Jesus Kristusnu nai genab ippunikkom, Kayaknu kobol tutukkunu nai ele, nug nai amu uua, ippunittak hamu meu iitta madikku dayeb amu, ig doognig,

⁴ danab amu nug hamu, ikki okkai kobol aakkuib hette. Nug diignu doyak tutukku laa ele iitta. Nug oɗmak hamu ge iitta hekkunu, nai onig diignu, naippa nug mehqak kobol amu ele hekkunu oo okkai daatte. Kobol amuppa kobol nau digdig ele betteb. Am inam: laanu ameg qe oo elele ii dayak kobol, naippa nug qak kobol, baeg qak nai anak kobol, layagnu dabmak eheɗ awak kobol amu

⁵ danab ag ahilag dabmak augigiak ele, ag haen oh oolag laippu iitta ele oitteb. Doyak diig genabib amu, ag ii aɗatteb, oolagppa ele ii daatte. Ag oolagppa Kayak nainu, “Keeke uɗat iittappa, hamu awaknu ib aakku,” aon atteb.

⁶ Amge danab nug Kayaknu kobol tutukku dim lamittatta, nuhig keekeppa, “Aakku elele,” dabmette amu, nug enaib daatte, keeke oh awom bia.

⁷ Aɗinu? Ihinkad menuak haenppa ig keeke laa ele ii domut; mauhak haenppa ele ig keeke laa aot gokkunignu elele iitta

⁸ amunu amu, takkaknu keeke elele, ee ele elele dayeb amu ig, “Imuam dahilnu elele,” aot akkunig.

⁹ Amge laa ag enulag kuɗum ele daaglagnu dabmak huanak aotteb amu, eheɗ hekkulagnu oo eeɗak, pelemppa tak, oo hak dabmak iitta ele, aria oo hak danab guittak medatte ele, oo hak amu oh ag heeg, danab padal mette ele amu, keeke amu oh danab ag enub danab daaglagnu oolag hette amu aqadtteb.

¹⁰ Keeke eheɗ ohnu diig laa am enubnu oo mauhak kobol. Danab laala ag enub ele daaglagnu wagai metteb ele amu, ag aakku ooppa genab doyak kobol uuna, uug kuɗum aakku aoppig daatteb.

Bau dayak haen ohnu ɠagattag aɗa dayaknu nai

¹¹ Amge na Kayaknu danab, na keeke amu oh dimettan, awaidna daye! Na genab tutukku hak kobol, kobol Kayak Nug amunu oo hette, ooppa genab doyak kobol, nug oo mauhak kobol, ɠagattag dayaya uug oh mawaknu kobol, oo bodoettak kobol ele aɗan oiye!

¹² Ban ameg laa amu ban ameg laa ele aa nug eɗidkkulahnu nug mehqettep, amubia na ooppa genab doyaknu wagai men he! Na bauklel hanhannu, Kayak Nug anukka na amu aokkutnu oninppa eum ele amu, na amu ɠagattag aɗe! Kayak Nug na oninppa e, na nahip ooppa genab doyak, danab ah kuɗum amelagppa miag mattime.

¹³ Kayak, Nug keeke oh bau madatte ele, Nug noobppa amu Kristus Jesus, Nug Pontius Pailat amegppa nuhig diig tutukku mattiom amu, Nug noobppa ele da nai imu na hekkutnunab medattem.

¹⁴ Nai am inam. Na Kristusnu nai tutukkunab elelenab dim lamidppe ukkeb, ihinig Naɗi Jesus Kristus eɗua uɗikku batakkut.

¹⁵ Kayak Nug Jesusnu eɗua uɗiaknu haen epeɗiom daatte, amu haen amuppa amu Kayak Nug heeb, Kristus miag atikku. Kayak Nug am anuqaknab, Nug nukka am okkai daatte. Nug am king dilag King am naɗi dilag Naɗi.

¹⁶ Nug nukka aakkuib ii mauhtte; hanhan daatte. Amahlak ig gukkuidta gokkunignu elele iitta ele amu Nug amuppa daatte. Danab laippu laa ele Nug ii anttom, laa anidkkunu ele elele iitta. Nug binag amu nuhig ɠagattag haen oh ele nuhigppa dayeɗ! Amu genab.

¹⁷ Danab ah wannu haen imuppanu keeke kuɗum ele amu, Na tutukku imu ag amelagppa appe doyeg! Ag beɗuppa tak kobol aib heppig. Ag keeke oh paha nauhtteb ele, ag amunu oolagppa genab aib dooppig. Ag Kayak, Nug nukka aakkuib keeke ena ena kuɗum, ig oonig gamag ahakkunu megatte ele amu, ag nuhignu aakkuib oolagppa genab doyeg!

¹⁸ Laa amu, na danab ah enulag ele ag ena, ao ag kobol ena okkai hena, ag danab ah oo qak iitta ele ehanadna, ag enulag laih oppatna, danab laa ɗo mattaglagnu babaittak daaglagnu haknunab nai ag matteg!

¹⁹ Ag anam hekkulag amu ag keeke kuɗum dimppa ehanadkkunu, ag bau dayak genab aoglagnu qagmekkulag.

²⁰ O Timoti, Kayak Nug uɗat na mettom amu na atognona, dabmettanna he! Na nai Kayaknu doyakppanu ii bette, amu doyak hambuppuak, doyak amunu amu wanppan danab ag, “Doyak genab,” atteb amge anam iitta, nai amu ele amu, na keeke aɗit amu aib dim lamidme.

²¹ Danab laala ag, “Ig doyak genab amu aomut,” atteb ele amu, ag aakku ahilag ooppa genab doyak uuppig. Kayaknu ehanittak okkai hamu mettak amu, nahip-ppa dayaɗ!