1 Timoti 5 - Nobonob Baibel

Tamaniaknu danab ah tolittaknu kobol ena

¹ Na danab kaino aib aidme. Iitta. Na mamen dabmak maɗettaknu nai bodoettak mattiak biappa appe doyaɗ! Nid bau amu na amapad dilag doottem amubia ehanatte!

² Ah kaino amu na aninnu doottem, amubia doonna ehanatte! Nid ahin bau amu, na appinmad bia doonna, kobol oppiakppaib ehanatte!

³ Ah laa nug gamu mauhak, nid laa ele iitta, qabnab dayeb amu, na atognona ehanitte!

⁴ Amge ah qab nug bekkodtai o iitta alakkudtai laa daanna amu, ahilag uɗat anuqak am ag anilkad mamelkad alalkad ele ag nob ena eɗun mattaglagnu atognoadkkulagnu daatte. Ao, Kayak Nug kobol amunu ena dootte.

⁵ Ah qab nug genab nukka baeg laippu daatte, nug Kayak ehanidkkunu dabmak aɗa dayaya, tuqanppa amunppa ele unuqidtte.

⁶ Amge ah qab nug nukka beɗunu oo hakib dim lamidtte amu, nug aakku mauhak bia daatte.

⁷ Na nai amu ⌊tamaniaknu⌋ danab ah amelagppa, ahilagppa nai laa ii daamanu, tutukku appe doyeg!

⁸ Am danab laa, nug tiilag laippu daatteb ele amu, ag oolagppa nug nuhikkudnab anuqak dabmadatta, dimppa laa oh ele dabmadatta atognoadtte am ena, amge laa nug nuhikkudnab anam ii dabmadatta, ii atognoadtte amu, nuhig ooppa genab doyak am hambuppuak, nuhig eheɗ hak amu ooppa genab doyak iitta dilag eɗadtte.

⁹ Ah qab nug maɗ 60 eɗittom dayeb, nug gamu ele eleleib daapiɗ dayeb,

¹⁰ amu danab ah laa ag nug kobol ena heum, nug nuhikkud nid ena atognoatta omalattom, nug ehanittak kobol dim lamittom, nug Kayaknu danab ah oppiaawak ele atognoattom, nug laa qagaiettakppa daaegeg ehanattom, amu nug kobol ena laala kuɗum heum ele anidtteb dayeb amu, ah qab amu na nug onig ah qab laa, ehanittak aoglagnu onilag ele laippu ye!

¹¹ Amge na ah qab, ag ah bau amu, ag onilag aib yaame. Aɗinu? Ag beɗulagnu eeɗak okkai dooppeg heeb, ag Kristusib dim lamittaknu dabmeppig ele daulag atieb, ag danab baula diiglagnu hekkulag.

¹² Amuppa ag anen anen ag anukka, “Da Kayaknu uɗatib dabmekkul,” genab haknu madippig amu, ag heeg, iitta mette amunu ag epeɗiak aoglagnu daatteb.

¹³ Laa ele, ag uɗat ii hak kobol aona, lag lag tena nenana oitteb. Amu uɗat ii hak kobolib iitta, ag laa dilagnu dimug nai mattinna, ag laa dilag dabmak, maittak keeke baolikkulagnu henana, ag nai eheɗ ig akkunignu elele iitta ele maditteb.

¹⁴ Amunu ah bau qak mak dilag ulum mettak nai dahil am ah bau anam amu, ag danab bau aona, nid menunna, ag laulag atognokkulagnu ɗo mettem. Ag anam heppeg amu kekeɗ laa ag ihinignu nai nau mattiglagnu ib laa ii anidmana.

¹⁵ Na doottem, ah laala Kayak dimettanna, ag aakku ib ena apiɗidna, Satan dim lamidtteb.

¹⁶ Ah laa, nug ooppa genab dootte ele, nug baekkudppa ah qab laa daatteb dayeb, nug ehanattaɗ! Kristen tamaniak uug aib mettom. Ib amuppa amu tamaniak am ah qab, ag anen anen akka baeg laippu daatteb, tamaniak ag ehanadkkunu elele daakku.

¹⁷ Ag Kristen danab, ag Kristen tamaniak ikki danab ag tamaniaknu uɗat ena hetteb ele amu, ag danab amunu ena elelenab doyeg! Amu Kristen tamaniak ikki danab, amu oolagppanu laala ag Kayak nai mehuqtteb, danab ah ele nai ippunadtteb ele amu, ag amu dilagnu amu ag anuqaknab doyeg!

¹⁸ Amuam Kayak nai atte amubia. “Na makau okkai ebehi ele ee aeg, dappunkkeg ele piɗe piɗe daaglagnu uɗat haaha, ee laabob, na aib lanak uukkunu oɗe hautna qakkame.” Laa ele, “Uɗat nid nug nuhig uɗatnu nob aokkun daatte.”

¹⁹ Am danab laippu laa nug, “Ikki danab imu nug eheɗ heum,” ab amu, na amu aib doome. Aɗi heehe anttomnu mattiak danab aɗit o ewam ag anam appeg amu, na doye!

²⁰ Am danab laa hipunin haaha daakku amu, na danab ah noolagppa daug batan, tutukku mette! Amuppa amu danab laala oh ele baɗan, hipunin ii hemana.

²¹ Kayak, Kristus Jesus, amu Kayaknu engel oh ele noolagppa da tutukku na amenppa iikku attem. Na uɗat amu tutukku atogno! Na atognonana, na ameg laa dilagppa nai bodoettak anana, ameg laa dilagppa nai ɠagattag aib mattime; na laanu ena doon, laanu ena iitta doon, aɗi keeke laa aib heme!

²² Na danab laa paha aon, tamaniak ikki daakkunu eppen qaɗeppa aib meme. Na laa ag hipunin hetteb ele amu, na ag ele hipunin aib heppig! Na nakka beɗun atognonana, oppiak daye!

²³ Na ootppa oɗe daatte, haen kuɗum oɗe laala ele nidatte amunu, na tuɗidna le hamuib aib lame. Iitta. Na wain nakok ele la!

²⁴ Am danab ah laala dilag hipunin amu miag atiak bena, epeɗiakppa tatam ukkaeg, danab ah dim gotteb, amge laa am ahilag hipunin lokkumak daaegeg, dimppa danab ah ag epeɗiakppa teeg, hipunin ag miag atitteb.

²⁵ Amubiaib kobol ena laala danab ah laa hetteb amu, geha iikku miag atiak betteb. Laa dilag amu paha miag atiak ii betteb, amge amu ele am haen oh lokkumak daaglagnu elele iitta.