1 Timoti 3 - Nobonob Baibel

Kristen tamaniak gumaknu danab dilag nai

¹ Nai imuam genab, danab nug Kristen tamaniaknu gumak ikki danab bekkunu oo niitte dayeb amu, nug aakku uɗat enanu oo hette.

² Amunu laa nug Kristen tamaniak gumak ikki danab daakkunu, nuhigppa nai laa ii daakkuoitte. Nug ah laippu gamu aakkuib daya, nug atognoak oiya, nug nukka nuhig oiyak pehettak atognoak kobol haaha, laa nuhignu ena elele dooglagnu elele daya, nug ɗo danab dotteb ele atognoatta, nug danab ah ele nai ippunadkkunu elele daakkuoitte.

³ Nug le ɠagattag lanak danab, o laa guittak nau mauhnoak mettaknu tiigppa dayak danab ele ii daama. Iitta. Nug am oo bodoettak danab dayaya, nug mehqak ii hema. Nug ele oo men doɗonu aib mauhom.

⁴ Nug baekkudppa ena atognoatta omaladkkuoitte. Nug bekkod ag nuhignu ena elele doon, ag keeke oh maɗoɗ kobolppa nug oɗe dim lamidkkulagnu, nug baekkudppa gumattak uɗat amu elele haɗ!

⁵ Am danab laa nug nug baekkudppa atognoatta omalattak ii dootte dayeb amu, nug attemun Kayaknu Kristen tamaniak dabmadatta daakku.

⁶ Kristen bau nug enaen mak, ikki okkai kobol ele haaha, nug Satan na qa nob nau awom bia na qemanu, nug Kristen tamaniaknu gumaknu ikki aib dayom.

⁷ Laa ele amu danab nug Kristen tamaniaknu gumak ikki danab daakkunu oo daatte amu, nug eheɗ heeb, uɗa nak guittak ele doya, nug Satannu uhuippa nomanu nug dimittim danab, ag noolagppa danab ena daakkuoitte. Anam iitta dayeb, nug ag noolagppa ele danab ena dayaɗ!

Tamaniaknu toliak danab dilag nai

⁸ Aria, Kayaknu tamaniaknu toliak danab ag danab laa ag ahilagnu ena elele dooglagnu elele daan, ag danab oɗelag aɗit ele ii daamna. Ag wain huana ele ii lamana, amu ag danab enulag hamu yabhok ele ii aomna.

⁹ Ag beɗulagppa aab iitta daanna, ag ooppa genab doyaknu nai unuqag ɠagattag aɗeg!

¹⁰ Amge tatam ahilag uɗat enatai o nautai amu atognona anidna, elele anidppeg amu ag tamaniaknu toliak danab dayeg!

¹¹ Amu ag waalkad ele ag ah danab laa ag ahilagnu ena elele dooglagnu elele daanna, ag baeg qak nai ele aib madippig. Ag tutukku oinna, amu ag hambuppuak kobol laa ele ii hemana.

¹² Kayaknu tamaniaknu toliak danab nug ah laippu aakkuib gamu daakku, nug nuhig ah, nid naunau ele ena atognoatta omaladkkuoitte.

¹³ Danab ag Kayaknu tamaniaknu toliak uɗat elele hetteb, ag tamaniak dilag neekkakppa anuqak daanna, ag ooppa genab doyak Kristus Jesusnu ɠagattag mehuqkkulagnu elele daatteb.

¹⁴ Nakok laa ele amu, da na gumitte gokkulnu dabmettem, amge gemu da nahip-ppa keeke imunu iikku yaattem.

¹⁵ Amunu diig am, da paha na gumitte ii goppi amu, na nai imu ebqena, na Kayaknu tamaniak attem tolidppe ena oiglagnu dookkut. Tamaniak am Kayak bauklelnu keeke, tamaniak am doyak diig genabib ukku, biidod ele daatte.

¹⁶ Genab, ig Kristen tamaniakppa daattem, ig doyak laa aɗattem, amu doyak amuam lokkumak dayeye, gehaib miag atiom. Doyak amuam unuqagnab ele daatte. Doyak amuam inam. Jesus Nug danab beɗu awa, miag atia beum. Kayak Ouɗi Nug ig Nug tutukkunab ippunikke, engel ag Nug ele anidppig. Nuhig nainu mehuqak am wanppan ɗo maɗoɗppa ukke, wanppanu danab ah ag oolagppa genab dooppig. Kayak he, Nug hab aabppa teum.