1 Timoti 2 - Nobonob Baibel

Unuqittak attem haknu

¹ Amunu da tatam ag tamaniakppa daatteb amu, da ag unuqittak uɗatnu inam hekkulagnu oolag maɗedattem. Ag unuqittakppa, danab oh dilagnu, unuqittak digdigppa Kayak unuqidna, Kayak Nug danab oh dilagnu aɗi aɗi hettenu Nug amegppa, “Ena heme,” aon aeg!

² Ig maɗoɗ aot toettat daatta, ig genab tutukku hak danab, oppiaawak ele oignignu amu ag king amu gabman dilagnu ele Kayak unuqitteg!

^3-4 Unuqittak amunu amu Kayak, Nug ihinig eɗua awikkaknu diig daatte, Nug danab ah oh eɗua diikkunu, ag doyak diig genabib ele dooglagnu oo daatte ele amu, Nug unuqittak amunu ena dootte.

⁵ Yo, Kayak laippu daatte, gamag danab ele laippu, Nug Kayak amu danab ele gamagppa daatte, danab amuam Kristus Jesus.

⁶ Nug danab ah oh dilagnu Nug nukka Nug bau dayak nuhig uua, amuppa Nug haenppanab Kayak Nug danab oh eɗua diikkun hette ippunikkom.

⁷ Diig amunu amu, Kayak Nug da nai mehuqak danab, totol danab ele meiɗom. Da nai yaattem imuam genabib yaattem, da ham-ii-bubuttem. Nug da iitta aɗi dilag, ag ele Jesusnu oolagppa genab dooglagnu, ippunittak danab meiɗom.

⁸ Amunu da danab oh ag unuqidkkulagnu amu ag oppiaawak daanna, ag oo nauhak, a ona a doak ele iitta daanna, unuqidkkulagnu ool daatte.

Ah dilag nai

⁹ Amubia ah ag tutukku dabmena, lamen eleleppaib takkana, ag ikkilag uɗug kobolnab eleppa ii takkamnanu, ag bala digdig golppa hak o men perlppa hak o iitta lamen laa daden nob naɗinab ele amu, ag ii memananu ool daatte.

¹⁰ Ah ag keeke digdig amubia ii memana. Iitta. Ag ah Kayak dim lamidnana, aɗi aɗi kobol hekkulagnu elele doon henan oitteb ele amu, ag hak ena amu lamen bia takkaglagnu ool daatte.

¹¹ Ippunittak awak haenppa amu ah ag dagom daanna, ippunittak nai aoglag.

¹² Da ah laippu laa nug danab dilag ippunittak ah daakkunu o danab dilag ikki daakkunu aib attem. Nug anam ii daama, nug dagomib daakku.

¹³ Amunu diig am inam. Kayak nug Adam tatam hewowa, dimppa Ewa heum.

¹⁴ Laa ele, Adam nug nai hambuppuaknu ooppa genab ii doyom. Ah nug nai hambuppuak ooppa genab doya he, hipunin beum.

¹⁵ Amge nug ⌊ah laa oh ele⌋ ag oolagppa genab doon, oo mauhak kobol dim lamidna, oppiaawak daanna, ag akka ag oiyak pehettak atognoak kobol ele hetteb dayeb, ag nid laa menuakppa padal memanu ehanittak aoglag.