1 Stori 9 - Nobonob Baibel

Danab ag Babilonnu eɗun uɗin, Jerusalem daappig

¹ Amu Israel dilag king ag heeg, danab ag Israel oh onilag bukppa yaappig, onilag buk amuppa aakku daatteb. Amge Juda danab ah ag Yawe ippunattom bia Nug dim lamidkkulagnu oo metta ii uuak kobol ii dim lamidppig amunu, Babilon dilag daup ag uɗin eɗadna, ag aɗualadna diin gona, Babilon wanppa maatteg, Juda danab ah ag appa diia ukka laih me dayak danab ah daappig.

² Ag gona, Babilon wanppa diia ukka laih me dayak danab ah daaeg ukke, king laa nug ag eɗun uɗiglagnu elele a, laa tatam uɗippig am mana mettak danab laala, Lewi buɗubppan mana mettak danab iitta, amunu laala, amu Yawenu mettid lagnu maɗi nid laala, amu Israel danab ah laala ele.

³ Laa Israel dilag huu okkai Juda, Benyamin, Epraim, Manasenu ele, ag uɗin Jerusalem daappig.

⁴ ⌊Laa Juda buɗubppanu amu, amunu laa onilkad am inam.⌋ Amihut bekka Utai. Amihut am Omri bekka. Omri am Imri bekka. Imri am Bani bekka. Bani memetab anukkanu am Juda bekka Peres.

⁵ ⌊Juda bekka laa,⌋ Sela, nug buɗubppanu am Asaia, nug bekkod ele. Asaia nug Selanu nid naanaeg.

⁶ ⌊Amu Juda bekka laa,⌋ Sera, nug buɗubppanu am Juel. Juda danab ah ag eɗun uɗin Jerusalem daappig ele amu, ahilag ebqak am 690.

⁷ Benyamin buɗubppanu uɗippig amu, amunu laa onilkad am inam. Mesulam bekka Salu. Mesulam am Hodawia bekka. Hodawia am Hasenua bekka.

⁸ Laa am Jeroham bekka Ibnaiya, Usi bekka Ela, amu Sepatia bekka Mesulam ele. Usi am Mikri bekka. Sepatia am Reuel bekka. Reuel am Ipnea bekka.

⁹ Benyamin buɗub onilag bukppa yaappig daatteb amu, bukppa Benyamin buɗubppanu ag eɗun uɗin daappig dilag ebqak am 956. Danab ag eɗun uɗin daappig ele amu, ag oh ag baelkadppa dilag ikki daappig.

¹⁰ Mana mettak danab ag eɗun uɗin daappig ele, amunu laa ag onilag am inam. Jedaia, Jehoiarip, Jakin,

¹¹ Hilkaia bekka Asaria ele. Hilkaia am Mesulam bekka. Mesulam am Sadok bekka. Sadok am Meraiot bekka. Meraiot am Ahitup bekka. Ahitup nug anukka Kayak laug gumaknu danab okkai dayom.

¹² Mana mettak danab laa am Jeroham bekka Adaia. Jehoram am Pasur bekka. Pasur am Malkiya bekka. Mana mettak danab laa uɗiom am Adiel bekka Masai. Adiel am Jasera bekka. Jasera am Mesulam bekka. Mesulam am Mesilemit bekka. Mesilemit am Imer bekka.

¹³ Mana mettak danab eɗun uɗin daappig ele dilag ebqak am 1,760. Danab amu oh ag baelkadppa dilag ikki daanna, ag kalu mettak danab daappig. Kayak ag Nug laugppa daanna, ehanittak nuhikkud danab ah madakkunu maattom.

¹⁴ Aria, Lewi buɗubppan mana mettak danab iitta, ag uɗin, Jerusalem daappig amu, amunu laa ag onilkad am inam. Hasup bekka Semaia. Hasup am Asrikam bekka. Asrikam am Hasabia bekka. Hasabia memetab anukkanu am Merari.

¹⁵ Lewi buɗub laa am Bakbakar, Heres, Galal, Matania ele. Matania am Mika bekka. Mika am Sikri bekka. Sikri am Asap bekka.

¹⁶ Amu Lewi buɗub laa am Semaia bekka Obadaia. Semaia am Galal bekka. Galal am Jedutun bekka. Lewi buɗub laa am Asa bekka Berekia. Asa am Elkana bekka. Elkana nug Netopa danab ele daappig.

¹⁷ Lewi buɗub laa ag Yawenu mettid lag odnu gumak danab daappig amu, amunu laa onilkad am Salum, Akup, Talmon, Ahiman, amu ag lailkad, tiig laippu ele. Salum nug ahilag okkai dayom,

¹⁸ Danab amu, ag Lewi buɗubppan mana mettak danab iitta, ag ahilag uɗat am od gumaknu uɗat, amu ag gemu ele uɗat amu henana, ag od laa onig, “Kingnu Od,” od amuam Yawenu mettid lagnu kaɗag uɗitteppanu daatte amu, ag appa od guman daatteb.

¹⁹ Salum, nug baegppa ele, ag am Kora buɗub, ahilag uɗat am Yawenu mettid lagnu od gumak uɗat. Anukka ag mamelkad aɗi dilag uɗat am Yawenu peh laugnu od gumak uɗat dayom, amubia danab imu dilag uɗat am, amuib aakku daatte. Salum am Kore bekka. Kore am Ebiasap bekka. Ebaisap am Kora bekka.

²⁰ Anukkanab, Eleasar bekka Pinias nug od gumak danab okkai dayom. Nug daye, Yawe Nug ele daapiɗ.

²¹ Meselemia bekka Sekaraia nug ele anukka od gumak danab, Yawe laug odppa dayom. Nug mettid haknu peh lag danab ah appa qagmetteb ele amu, nug amunu od gumak danab dayom.

²² Juda ag Babilonnu eɗun uɗippig haenppa amu, ag danab 212 od gumak uɗat hekkulagnu tituanadppig. Ag onilag ag bukppa yaappig daatteb amu, ag aab anen anen onilag waappa, danab amu onilag yaappig. Anukkanab Dawit, propet Samuel ele aa danab amu memetalkad, ag am danab laa ag ahilagnu genab elele doyaknu elele dooya, a ag od gumak danab daaglagnu tituanadppig.

²³ Danab Dawit, Samuel ele tituanadpiɗ amu, ag buɗulkad ele ag Yawe laugnu od gumaglagnu uɗat aakku aoppig daatteb. Tatam, haen ag uɗat amu aoppig amu, haen amuppa Yawe laug am mettid haknu peh lag dayom.

²⁴ Od gumak danab amu ag Yawenu mettid lagnu kaɗag uɗitteppanu, qaban uɗitteppanu, yawalti uɗitteppanu, yau uɗitteppanu ele daan, od gumatteb.

²⁵ Lewi buɗub ag od amu anam guman daappig, amge deɗ laala ag awalkad, amalkad ele ag aabppanu uɗin, ehanadnana daaegeg ukke ukke, deɗ eblaih aɗit ele uue, ag eɗun aabppa goppig.

²⁶ Od gumak danab waɗele amu, laa ag ahilagnu genab elele doyaknu elele, diig amunu danab waɗele amu, ag Lewi buɗubppan mana mettak danab iitta, ag am od gumak danab laa oh dilag ikki daaglagnu daan, amu ag Kayak laugppan en maknu oo anen anen, amu oo laala ele guman daaglagnu tituanak daappig.

²⁷ Ag Kayak laugppa uug laa bema, diig amunu ag tuqan Yawenu mettid lag dimittim, lag amu talilidna, aben aben daanna, gumanna, ag Kayak laug buttua od matuladkkulagnu ki aɗan, uɗat amu ele hekkulagnu daappig.

²⁸ Aria, Lewi buɗubppan mana mettak danab iitta, ag mana mettak danab aɗi ag keeke Yawenu mettid lakka appa uɗat medappig amu, ag keeke amu oh atognoppig. Laa nug uɗat medakkunu ha, aokkunu uɗiom amu, Lewi buɗub amu ag waa keeke, gane daatteb ebqeeg awom. Aria, eɗua awa uɗiom amu, haen amuppa ag baula ebqeppig.

²⁹ Amu Lewi buɗubppan mana mettak danab iitta, ag oolagppan laa ag Yawenu mettid lagnu sia keeke atognoadkkulagnu daanna, aɗi keeke laa appa daappig amu, ag amu ele atognona, plaua, wain, goɗen, kalu danab ile muttuɗig enanag bette, amu spais digdig ele dabmadappig.

³⁰ Lewi buɗub laa ag keeke amu dabmadappig, amge mana mettak danab agib spais digdig, ⌊Kayak ag amu hekkulagnu attem attem hekkulagnu aum amu⌋, agib amu kabolippig. Laa nug amu hekkunu elele iitta.

³¹ ⌊Amu Lewi buɗub ag eɗun uɗippig, haen amuppa⌋ Lewi buɗubppan mana mettak danab iitta oolagppan laa, Matitia, laa ag nuhignu genab elele doyaknu elele, ag nug bret ag manan, Kayak mettaglag, nug bret amu manakkun tituanppig. Matitia am Salum bekka; Salum nug Kora buɗub. Matitia nug Salumnu nid danab tatamnu.

³² Lewi buɗub laa ag aab ikki Kohatnu amu, ag ahilag uɗat am Sabat bekkunu heehe, ag hanhan bret balal laa Yawenu mettid lag, amuppa daatte, ag bret amuppa mekkulagnu manappig.

³³ Aria, Lewi buɗubppan mana mettak danab iitta, ag baelkadppa dilag ikki danab daappig amu, ag musik digdig hekkulagnu doyak ele. Danab amu ag Yawenu mettid lag oo laalappa daan, amun, tuqan ele ahiettak gumaglagnu babaittak daappig. Ag anam hekkulagnu babaittak daappig amunu, ag uɗat laa iitta.

³⁴ Lewi buɗub amu onilag yaak amu oh, ag baelkadppa danab dilag okkai daappig. Ag Israel danab ah onilag bukppa yaappig ele, ag buk amuppa anam danab okkai onilkad yaappig daatteb. Ag Jerusalem appa daappig.

Saul ele tiig laippu uɗiak

³⁵ Anukka Jeiel nug aab Gibeon kala, appa dayom. Nug wau am Makah.

³⁶ Nuhig nid danab tatamnu am Abdon. Abdon dimugppan am Sur, Kis, Bal, Ner, Nadap,

³⁷ Gedor, Ahio, Sekaraia, Miklot ele.

³⁸ Miklot nug Simeam mameg. Miklot baekkudppa ele, ag ele Jerusalem appa, ag tiilag laippu ele ouqak daappig.

³⁹ Ner bekka am Kis. Kis bekka am Saul. Saul bekkod am Jonatan, Malkisua, Abinadab, Esbal ele.

⁴⁰ Jonatan bekka am Meribal ⌊onig laa am Mepiboset⌋. Meribal am Maika mameg.

⁴¹ Maika bekkod am Piton, Melek, Tarea, Ahas ele.

⁴² Ahas am Jara mameg. Jara nug Alemet, Asmawet, am Simri ele mamelag. Simri am Mosa mameg.

⁴³ Mosa am Binea mameg. Binea bekka am Repaia. Repaia bekka am Eleasa. Eleasa bekka am Asel.

⁴⁴ Asel nug bekkod eblaih laippu ele. Ag onilag am Asrikam, Bokeru, Ismael, Searia, Obadaia, Hanan ele. Amuam Asel bekkod aakku.